■■■■■■■■■■■■■■■■■■
🌿كل شيء يحدث في وقت محدد، لا الورود تزهر قبل موعدها، ولا الشمس تشرق قبل موعدها.
انتظر... نصيبك سيأتيك حتماً
جلال الدين الرومي.🌿
••••••••••••••••••••••••••••••••••••••••••••••••🌿🌿🌿🌿🌿
مدتله امه فنجان القهوة خداه منها وهي قعمزت جنبه..
رشف محمد من فنجان القهوة بعدين حمحم وقال..
/يمي نبيك تخطبيلي..
امه بفرحه:قول والله..
بضحكه قال:والله ومن عيلة بيت المال..
ضحكت امه بفرح وقالت..
/واني اللي نحسابك خطيت في الموضوع بعد عدت الشهور هدي كلها!
قاللها بإبتسامه..
/كانت عندي مواضيع قلت نتمها بعدين نلهى بروحي..
امه بفرح قالت..
/خل نوض نتصل بيهم..
قاللها:راجي يمي..اللي نبيها مش نفسها البنت اللي في بالك..
امه شافتله بإستغراب وقالت..
/مالا منو؟
هو قال بإبتسامه..
/اختها..
امه تفاجئت وقالت..
/بلقيس! صغيره عليك ..
عقد حواجبه وقال..
/مش صغيره هلبه يمي بيني وبينها 14سنة بس..
امه سكتت شويه بعدين قالت..
/الحق البنيه سمحه ماشاء الله عليها ومازال احلى من اختها بس ان شاء الله يرضوا يعطوهلك..
قاللها:انتي توا بري كلميهم وخودي منهم موعد والباقي خليه عليا..
🌿وفي نفس الوقت حتى هانيه جاها موضوع زواج من شخصيه مرموقه امها عجبها الموضوع هلبه وحتى تسعة رحب بيه وكلم بوه عنه بش يقنعه..
🌱سلامه بضيق..
/اختك صعبه ياولدي طباعها مايتحملهاش الراجل..
تسعة:لايابوي في رجاله يتحملوا وبعدين حني بنوضحوله ان بنتنا عايشه في دلال وراحة كان مصر ياخدها لازم يخليها تعيش زي ماعاشت عند بوها..
تنهد سلامه وقعد ساكت..
تسعه قال:خلاص العام هدا تتخرج وراهو كبرت يابوي غلط قعادها لهالوقت من غير زواج..
هز سلامه راسه وقال..
/خلاص خليت الموضوع عندك..
🌱وعند زكيه وبنتها وكناينها...
زكيه:شكلها تبي تخطبك لولدها محمد..
هانيه:لالا ماما اني عاجبني موضوع السفير نبي نطلع من البلاد..
ضحكوا نساوين خوها وامها قالت بإبتسامه..
/ياودي باهي خل نستقبلها ونسمع منها شن تبي وبعدين نقوللها مافيش نصيب..
🌿وتاني يوم جي محمد بأمه لقصر ذهيبه..
استقبلوه تسعة وبوه...وامه استقبلتها زكيه مع كناينها استقبال حلو ودخلوها لصالون الضيوف..
بعد ماتجاذبوا اطراف الحديث وضيفوها هي فتحت الموضوع اللي جايه ع خاطره..
🌱زكيه وهي متفاجئه قالت..
/بلقيس!
ام محمد قالت:ايه بنت الانجليزيه..
نزيهه شدت ضحكتها وهي تتخيل في ردة فعل بلقيس لما تعرف..
زكيه:والله ياوخيتي مش عارفه شن نقولك..البنت صغيره ماظنيش بوها يعطيها..
قالت ام محمد..
/انتم افتحوا معاهم الموضوع وشوفوا شن يقولوا..
♤ومحمد الامين كان عسكري والعسكري ماعنداش صبر فتح الموضوع مع جدي وبوي وفاجئهم هلبه وهو عاد ماغيبش جهد حاول يقنعهم بيه ونجح يخلي بوي يتقبل الموضوع وبوي بدوره حاول يقنع جدي وكالعاده نجح في اقناعه وقعد الموضوع واقف ع عمتي بلقيس..
🌱"عسكري!"
اسيا قالت بضحكه..
/عسكري وسيم كتير..
بلقيس وهي تسمع في امها شن تقول ذاكرتها جابتلها الموقف اللي شافت فيه محمد الامين يوم حفله نجاح خوها..
آسيا:مش انت تبي تتزوج اهو جاك موضوع حلو...
بلقيس قالت بتخوف..
/لكن عسكري ماما والعسكريين واعرين..
قالتلها:انتي شوفيه هدرز معاه ماعجبك قولي لااريد وتمت..
خدت بلقيس نفس وهي متوتره بعدين قالت..
/باهي..
♤ويجوا مالي السفير يخطبوا عمتي هانيه رسمي وتموا فيها وقعد موضوع محمد الامين وعمتي بلقيس..
🌿وصل موضوعهم لخطوة المقابله الشرعية اللي حتم في القصر لكن قبلها كان عند تسعة كلام يبي يقوله لمحمد..
🌱"زي ماتعرف هي حاليا تقرا في المعهد والقرايه في المعهد هدا مدتها سنتين نبوها تكملهم عندنا"
بعد ماسمع محمد كلام تسعه مرر نظره ع المكان وهو يفكر بعدين رده لتسعة وقال بإبتسامه..
/مافيش مشكله..
هز تسعة راسه وهو مبتسم بعدين قاله..
/تفضل..
🌹🌹🌹
"اسمعوا خلاص ماصارليش معاش نبي"
نزيهة قالت بضحكه..
/بلا هبال زايد تحركي قدامي..
فريحة؛والله يهبل ياجبينه كان تشوفيه تقوليله روح بيا..
ضحكوا نزيهة وبلقيس اللي قالت بضحكه..
/يعطيهالك..تنهدت وقالت..خايفه..
نزيهه:طبيعي حبيبتي توا لما تخشي عليه وتهدرزي معاه يمشي الخوف هدا..
وصلوا للباب اللي كان من فردتين..
دقت عليه نزيهه دقتين...شويه فتح تسعه الباب شاف لأخته بإبتسامه وقال..
/تعالي ياجبنه..
مشي وهي لحقاته وكانت في قمة الارتباك..
قعد يمشي هو وياها في الممر اللي يرفع للمربوعه وكان يقول..
/اسأليه كل سؤال يخطر ع بالك اشرطي الشرط اللي يعجبك خليك عاديه ماتتوتريش..
بلقيس وهي خجلانه قالت..
/باهي..
وصلوا لباب المربوعه وخر عنه وقال..
/دقي الباب وخشي..
قدمت بلقيس للباب دقاته بعدين خشت وهي تقول..
/السلام عليكم..
محمد ماباش يقيم عيونه فيها رد السلام واستنى شويه بعدين قام عيونه لقاها مقعمزة مقابلاته وهي مشبكه اصابعها في بعض من الخجل والتوتر ابتسم وقال..
/بلقيس..
صوته كان خشن هلبه وفيه بحة والنبرة اللي قال بيها اسمها كانت مميزة..
رفعت عيونها طول وهالمرة شافاته عن قرب بدت ع وجهها ملامح المفاجأه مع الاعجاب..برغم انه اشقر لكن ملامحه رجوليه وشكله وسيم للغايه..
هو ابتسم من قلبه لما شاف عيونها وقال..
/شنو حالك..
هني استاقظت ونزلت عيونها وقالت..
/الحمد لله..كيف حالك انت..
قال بإبتسامه..
/الحمد لله..
سكتوا للحظات بعدين هو حمحم وقال..
/قولي شن عندك من شروط يابلقيس..
بلقيس وع وجهها ملامح القلق قالت..
/هما تلاته..
قاللها:اللي هما..
قالت وهي تعد ع صوابعها..
/ماتكشخش عليا ماتضربنيش ماتعاملنيش بوعارة..
ضحك وهو يمسح ع لحيته..
قامت عيونها وقالت..
/نتكلم جد..انتم العسكريين واعرين تتكلموا بنتان ويدكم والكف..
بضحكه قال..
/غير من قالك هكي بس!؟
قالتله:هلبه يقولوا فيها العسكري باله مش واسع ومايعرفش يضحك واني نحب نضحك ونبصر هلبه..
ضحك بعدين قال..
/اني شن خلاني نقول لخوك ماعنديش مشكلة بس..
عقدت حواجبها بآستغراب وقالت..
/شن قصدك؟
ابتسم وقال..
/قالي اصبر عامين تكمل قرايتها بعدين دير العرس واني توا مش عارف كيف بنروح ونخليك..
نزلت عيونها وهي مبتسمه بخجل..
تأملها للحظات بعدين قال بإبتسامه..
/حتلقي مني معامله خير من معاملة هلك حنحطك في عيوني يابلقيس..
هي بإيتسامه خجل قالت..
/كان هكي ان شاء الله خير وخلاص..نستأذن..وناضت بسرعه ومشت طلعت ونظراته مع قلبه لحقوها..
🌹🌹🌹🌹🌹
"ياحليلي ياحليلي يهبل يجنن ولاكيف يتكلم..نوضوا ديرولي مية وسكر"
نزيهة وفريحه يسمعوا فيها ويشوفوا لحركاتها وهما يضحكوا لكن هانيه قالت..
/زيدي فكري كبير عليك هلبه راهو..
بلقيس:وشن الفرق بين ماما ومامتك وبين بابي؟
هانيه:بابا مافيش منه حبيبتي..
بلقيس:لافي منه ..رمشت عيونها وقالت..عسكريا اني..
ضحكت فريحه ونزيهة قالت بضحكه..
/عطيك الهني..
هانيه قالت..
/والله انتي حرة ذنبك ع جنبك..
بلقيس قالت..
/اليمين ولااليسار!..وقعدت تضحك في ضحكتها اللي خلت فريحه ونزيهه يضحكوا بدموعهم وهانيه تضحك غصب عنها...
🌿وطبعا لازم بلقيس تاخد رايي اقرب الناس ليها اللي حتى وهو بعيد قلبه معاها..
"مش عارف كيف بتعيشي انتي وياه بضحكتك هادي"
بلقيس بضحكه:المهم انت شن رايك..
"تسعة شكرلي فيه هلبه ومدام تسعة شكره خلاص ربي يهنيك ويسعدك"
بلقيس بإبتسامه..
/سلمك حبيبي..ايه حقه وتي روحك بتلحقني راهو..
"لالالالا..اني مازال عليا مازال نوصل لنص الثلاثينات ونبدا نفكر في الموضوع"
ضحكت بصوت عالي وهو يقوللها..
"وذني يامهبوله اسكتي"
🌹🌹🌹🌹
وداروا حفلة خطوبه مشتركه للخوات..
وكل وحده فيهم طلعت احلى من التانيه واهالي خاطبيهم كانوا فرحانين بيهم وبنسبة عيلة بيت المال اللي يتمنوا فيها الناس تمنايه..
اللحظه اللي لبسوا فيها امهات العرسان الدبل للعرايس ذرفوا زكيه وآسيا دموعهم وفريحة ونزيهه معاهم يهدوا فيهم..
وفي اخر هالحفل خدوا صورة جماعيه قعدت للذكرى..
♤تزوجت عمتي هانيه بعد ماكملت اخر امتحان ليها في الجامعه تحكي جداي ع عرسها قالت ماخلوا ماداروا فيه وقعدوا اهل الالف والخمسين يحكوا بيه سنين عرس هانيه بنت سلامة بيت المال وقالت بعد سافرت هانيه مع راجلها للبلاد اللي تعين سفير فيها ياما صار فيا لكن وجود جدي وبوي ونساوينه معاها خفف عنها...
🌿🌿🌿🌿🌿
في حديقه القصر كانوا يتمشوا الثلاثه..
فاطمه مرت مرعي وفريحه وفي نصهم نزيهه وهي تقول..
/كولوا التمر كولوا بش تتسهل عليكم
فريحه بضيق وتعب..
/هاتي هاتي نبي نجيب تعبت خلاص
نزيهة عطتها تمرة وقالت..
/خودي..ومدت التانيه لفاطمه اللي خدتها وقالت..
/ربي يسهلها علينا ونجيبوا ع خير..
🌱وفي الجهة الاماميه من حديقة القصر كانوا مرعي وتسعة مقعمزين مع بعض يهدرزوا وكلامهم كان عن الخدمه..
تسعه:بتصاميمي اني وخبرتك انت حنديروا اسم في عالم المجوهرات ينافس اسماء عالميه..
مرعي:والله ياولد عمي من ناحيتي ماعنديش مشكله ويخي متحمس..
ابتسم تسعة وقال..
/ع بركة الله..
مرعي ابتسم وقاله..
/تبي تغير الاسم؟
تسعة قال..
/لالا نبيه يقعد زي ماهو نبي ننجحوا في المجال هدا بإسمنا حني زي مانجحنا في صناعة السيراميك والرخام بإسمنا..بيت المال..
مرعي هز راسه وقال بإبتسامه..
/كله من فضل الله..
تسعة قال بإبتسامه..
/الحمد لله..
وتجيهم وحده من الشغالات تجري وهي تقول بتوتر وخوف..
/سيدي تسعة سيدي مرعي اللات بيجيبوا خلاص..
ناضوا الزوز وتسعة يقول..
/قولولهم يطلعوهم فيسع..
مرعي مشي يجري لسيارته اما تسعه قال لواحد من رجاله يشغل سيارته وهو مشي بسرعه لباب القصر يراجي مرته تطلع..وماهي الا لحظات وطلعوا فريحه ومعاها نزيهه شادتها وهي تقوللها في كلام تقويها بيه..
قدملهم تسعة وشد فريحه من الجهة التانيه وهو يقول..
/ساهله ساهله ياغاليتي ساهله..
فريحه وهي تتوجع وتبكي قالت..
/نحس في روحي بنموت..
نزيهه وهي تحاول تخفي توترها قالت..
/بعيد السو عليك فيري وجع ساعه ويعدي ويجي سلامه الصغير لكن من توا بنقولك هدا حصتي اني راهو وانتم دبروا في واحد تاني..
ضحك تسعه وفريحه في عز وجعها ضحكت..
وصلوا السيارة فتحلهم تسعه الباب وساعدهم يركبوا بعدين ركب القدام وتحرك..
وقبله كان مرعي طالع بمرته وامه بالسيارة وخلوا غزلان مع زكيه اللي كانت رافعتها في حضنها وهي تقول بقلق..
/ياربي نوضهم هما وصغارهم سالمين..
🌱في هالوقت..
كان سلامه في حوشه التاني مقعمز في مكتبه يقرا في القرآن..
بعد فاتت عليه ثلث ساعة وهو يقرا خشت عليه آسيا وهي تقول بفرح..
/سلامه..سلامه جونيور جي..
سكر المصحف وهو يضحك بفرح ويقول..
/ماشاء الله ماشاء الله..
♤وجي خوي الكبير سلامه تسعه سلامه بيت المال في نفس الوقت اللي جي فيه كريم مرعي منصور بيت المال..ع فكرة الحاجه هادي صارت حتى مع خوتي زوز منهم جو في نفس اليوم..وحتي اني جيت مع اخت ليا في نفس السنه لكن بينا شهرين..المهم بعد ماجي سلامة الصغير جدي طلب من بوي مايديرش مظاهر احتفال خصوصا انهم مالهمش وقت دايرين عرس عمتي هانيه اللي كان كبير هلبه،وبوي سمع كلام جدي ودار لمة عائلية مشتركه لخوي وكريم ولد مرعي ماحضروش فيها غير عايلات نساوين بوي ومرت مرعي حتى عمتي هانيه روح بيها راجلها بش تحضرها وتشوف اول ولد لخوها..
🌿"ربي يشبح فيك وتحملي ياوخيتي"
نزيهة قالت بإبتسامه..
/يارب..
بدريه:والله كان عطلتي اكثر من هكي يخلوك ع الهامش..
اختهم التانيه قالت..
/من هي اللي ع الهامش ماريتيش عزوزتها كيف تعامل فيها نزوهة هني الكل في الكل..
نزيهه قالت بإبتسامه..
/ايه والله ديما مكبرين قدري ربي يكبر قدرهم..
بدريه:يدووم عليها لكن اني نتكلم هكي من خوفي عليها ديما نخمم في حالها..
حطت يدها ع كتف اختها وقالت..
/معاش تخممي فيا وخيتي والله عايشه في خيار خيري..
اختهم التانيه قالت..
/يدوم عليك ويهنيك ونفرحولك في نهار زي هالنهار..
🌱وسقدت نزيهه اهلها اللي كانوا اخر من روح من اللمه..
وهي ماشيه بطريقها لجناحها كانت تدعي الله في نفسها..
"ياكريم ياعالم بحالي اجبر بخاطري وعطيني الذريه اللي تفرحني وتفرح راجلي وماليه يارب"
خشت للممر اللي يرفع لجناحها وقعدت تمشي لعند ماوصلت في باب الخارجي للجناح فتحاته لكن فجأه شافت يد شدت يدها وسكرت بيها الباب..
هي انفجعت والتفتت لقاته يشوفلها بإبتسامه وقال..
/تعطيني من وقتك شويه..
ضحكت وقالت..
/خوده كله..
خدي يدها ومشي بيها وهي تقوله بضحكه..
/وين رافعني!؟
قاللها:امشي وانتي ساكته..
ضحكت وقعدت تمشي معاه وهما ساكتين لين وصلوا لباب يفتح ع الحديقه من الخلف..
منظرها كان حلو بسرب الضي اللي مزين السور متاعها..
مشي بيها لمكان فيه حوض طويل طول معبي ورد رفعها وقعمزها ع حافة الحوض وقعد واقف قدامها وهو يقول..
/هاتي يدك..
مدت يدها وهي تضحك..
هو طلع من جيبه انسيال الماس ولبسهولها..ابتسمت بحب لما شافاته نسخة عن الانسيال اللي هداه لفريحه بعد ماجابت..
رفع يدها وطبع عليها قبلة بعدين قال..
/مازال في حاجه تانيه..
بعد عنها ومشي لطاوله كان فوقها صندوق خشبي طويل طول خداه ورجعلها بيه فتحه قدامها وطلع منه ورقه ملفوفه ومربوطه بشريط اخضر وقال..
/شوفي..
خدتها وهي مبتسمه بإستغراب فكت الشريط وفردتها وبدت تقرا في محتواها وهي تقرا بدت ع وجهها ملامح الدهشه لما عرفت ان هالورقه تثبت ملكيتها للمصنع..
قاللها بإبتسامه..
/شريت من ولد عمي حصته في المصنع وكتبته بإسمك..
حطت يدها ع فمها وهي تضحك بدهشه ودموعها في عيونها..
قاللها بإبتسامه..
/مازال حاجه تالثه..طلع ورقة تانيه مربوطه بشريط من نفس اللون ومدهالها..
خدتها وهي تضحك..حطت الورقه الاولى جنبها وفكت شريط التانيه وفتحتها وبدت تقرا اللي فيها شافتله بصدمه ودموعها نزلوا..
مسحهم وقال..
/شريتها من بوك وكتبتها بإسمك حتى هي..
نزلت ايديها وقالت بنبرة باكيه..
/مش عارفه شن نقول..
شد وجهها بإيديه وقال..
/ماتقولي شي..هدا اقل من حقك ومايجي شي جنب اللي انتي درتيه وقاعده ديريلي فيه مراة ما دور كان في راحتي ومادير كان اللي تفرحني من لما خديتك ماريت منك كان كل خير وحب واحترام..والله مهما نديرلك ونجيبلك شويه عليك..مانقول كان ربي يرحم والديك اللي عرفوا يربوا والحمد لله اللي خلاك من نصيبي..
ضمتها وقعدت تبكي وهي تقول..
/انت غالي عليا هلبه فوق ماتتصور..
قعد يمسح ع شعرها وهو يقول بإبتسامه..
/حتى انتي ياشيهانه غاليه عليا هلبه وقدرك عندي كبير وعالي ربي مايحرمني منك..
قالتله:ولامنك يااغلى ماعندي..
♤يقولوا الراجل اللي يعامل مرته كأميره رباته ملكة..وبوي اللي ربوه ملك وملكة عرفوه اللي ليه ولاعليه وهو تعلم من حياتهم من بعض كيف لازم الراجل الحقاني يتعامل مع زوجته..بس بنقوللكم راهو حياتهم ماكانتش ورديه وماشيه حلوة ع طول..علاقه بوي بزوجاته مرت بهلبه منعطفات وامتحانات طلعت منه ومنهم احسن واسوأ ماعندهم...
المهم..قعدت فترة الحياة ماشيه حلوة الحفيد الاول زاد حلا حياتهم بالذات جدي اللي معاش قدر يفارق القصر ع خاطره ولهذا قرر يخلي اسيا وبلقيس يعيشوا في القصر وجداي زكيه ماكانش عندها أي اعتراض..
وحتى حياة مرعي ومرته تغيرت للأحسن بعد جي كريم ام مرعي ولت حمامة سلام ومسايرة فاطمه ليها خلتها فعلا بدت تحبها..
من جهة تانيه بنات عمام بوي الصغار جتهم مواضيع مناسبه للزواج وبعد وافق عليها جدي قرر يدير فرحهم الزوز مع بعض في القصر..
🌿روحوا محفوظ وقيس بش يحضروا العرس وتسعه من اول ماشاف محفوظ بدي يزن عليه بش يتزوج..
🌱محفوظ:من الاخير يابوزنان حاط في بالي وحده نراجي فيها تتخرج بش نخطبها..
تسعة:انجليزيه؟
قاله:لاعربيه..اردنيه بوها رجل اعمال معروف اسمه مروان الشوابكه..
تسعه:نعرفه كويس تلاقيت اني وياه مرة في مصر..
تنهد محفوظ وقال..
/واني شفتها مرة جاياته للشركه متاعه غادي عجبتني مشيت كلمتها..
تسعة بضحكه قال..
/حوزتها يعني..
ضحك وقال..
/ايوه هكي..
طبطب تسعه ع رجل محفوظ وقال..
/باهي باهي المهم في الاخير بتتزوج..
محفوظ غمزله وقال..
/باهي وانت مازال مافكرتش في الثالثه..
ضحك وقاله..
/الصراحه اكتفيت والحمد لله..
محفوظ قال بضحكه..
/باهي الحمد لله..
ع جية قيس وفي يده كاميرا تصوير قال..
/ترا ابتسموا..
تسعة قال:غير راجي مازال مش ناوي تتزوج؟
محفوظ قعد يضحك..
قيس رفع الكاميرا لعينه وقال..
/مازال..ومد الالف لين قريب نفسه انقطع..
تسعه قال..
/والله مافي احلى من الزواج اسمع مني..
خدالهم قيس لقطه وقال..
/لا الكيمياء احلى منه..
محفوظ قال بضحكه..
/كان تشوف العبيتر اللي دايرينه ع خاطره الانجليزيات غادي وهو شي الخشم فوق مايشوف في حد..
رفع قيس حاجبه ومشي وخلاهم يضحكوا عليه..
🌿ومن خيمة الرجاله لمكان في باحة القصر يبعد عليها بمسافة..
المطبخ الخارجي للقصر..
كانوا في المناسبات يجيبوا في طباخين يديروا ماكلة العرس لكن غسل الماعين كان وظيفه النساوين اللي من الطبقه الفقيره في الالف والخمسين..
مقابل خدمتهم فهالليله كانوا ياخدوا في اجر ومعاه حصتهم من عشي الفرح..
"منوبيه" و"مبروكه" كانوا من ضمنهم..
هادم الزوز كانوا صاحبات واهلهم كانوا جيران وعشرة عمر حتى بعد جاهم نصيبهم قعدت علاقه الصحبه مستمرة وفي كل شي يتشاركوا ماعدا شي واحد
كانت دير فيه "منوبيه" "مبروكه" ماتندريش عليها..
🌱"هيا يامنوبيه عطلنا"
منوبيه وهي دس في كواشيك ومواس الفضه في جيب رداها قالت..
/هاني جيت..
ومشت خدت حصتها من العشي وطلعت لصاحبتها..
○طلعوا من القصر وهما يمشوا ع رجليهم ويهدرزوا..
مبروكه:نبيها الخدمه يامنوبيه الحال معاش يلايم بكل ياوخيتي..
منوبيه؛باهي كان خدمتي راجلك منو بيه..
مبروكه قالت بضيق..
/بنبطل البنت من المدرسه ماعندها مادير بيها تقعد تعاني بوها وخلاص..المهم شوفيلي ناس يبوا شغاله بالله عليك..
منوبيه قالت..
/حاضر حاضر تو نشوفلك..
وبعد ماقطعوا مسافه لاباس بيها تلاقوا هما ولد منوبيه اسمه"صالح" عمره 15سنه..
كمل بيهم للطريق لعند ماوصل مبروكه لحوشها..
مبروكه:تصبحوا ع خير..
منوبيه:قدامك كل خير..وكملت طريقها مع ولدها لحوشهم اللي يجي في مكان زي الغابه في الف وخمسين..
🥀خشت مبروكه لحوشها اللي كان اشبه بالبراكه اهو مكان آويهم وساترهم..
مشت لراجلها اللي كان طريح الفراش لقاته فايق يراجي فيها..
قعمزت جنبه بالعشي وقالت..
/اليوم بتاكل لحم وعصبان..
لمعوا عيونه بالدموع وهو يقول..
/لينا فوق العام ماريناهم حنى الري..
مبروكه:رقدت؟
قاللها؛مش عارف خشت داخل ومعاش طلعت..
تنهدت مبروكه وقعدت تنادي..
"ربيعة ياربيعة"
شويه وجتها ربيعة بنت 12ربيع من عمرها كان رافعه كمامها وفستانها من جهة الصدر مبلول..
امها قالت..
/شن كنتي ديري؟
هي شافت لبوها اللي نزل عيونه بإحراج بعدين ردت نظرها لأمها وقالت..
/نغسل في الدبش
امها قالت:ان شاء الله غير عرفتي تكديه زين..
قالت:ايه يما ايه دعكته كويس بصابون الغار..
هزت امها راسها وقالت..
/باهي تعالي كولي..
عقدت ربيعه حواجبها وقالت..
/ماناكلش الفضله..
قالت امها:فضلة شني اني كنت في عرس لعيلة بيت المال هدوكا مايعطوش الفضله..
ربيعه قالت..
/ماعنديش نيه يما تعشوا انتم..ومشت وخلتهم..
بوها قال بإبتسامه ألم..
/بنتك هادي عندها عزة نفس عجيبه..
امها قالت بإبتسامه متهمكه..
/وشن دير بيها عزة النفس بتوكلها ولاتشربها!؟..مدتله طرف عصبان وقالت..كول كول..
خدي راجلها طرف العصبان وكلي منه وهو يشد في دمعته بقوة.
🥀الدمعه اللي نزلتها ربيعه وهي واقفه في الكوجينه تاكل في كسرة خبزة يابسه تسكت بيها صوت جوعها اللي طلع لما شمت روايح ماكلة عرس عيلة بيت المال...
♤ربيعه..للاة اللات..المراة الشامخة العزيزة..الذيبة المكارة...
امي...
..يتبع
