#ولاد_تسعة "الفصل الاول/سميه تسعة"
#جمان_فريد
الجزء_العاشر"شبح الماضي"
⛔احداث هذه الروايه وشخصياتها من وحي الخيال بعض الاحداث غير واقعيه"فنتازيه" وبعضها بعيد عن واقعنا المعاش والبعض الاخر يلامس شيء من الواقع⛔
⚠️ملاحظه..
لما يبدا الكلام بهذه الرموز (♤ ♧) هذا يعني ان البطل/ة يسردوا في الأحداث..
اما لما يبدا بهذا (🌿) يعني الكاتبه هي اللي تسرد..
#الباقيات_الصالحات
قال ﷺ : (خُذُوا جُنَّتكُمْ منَ النارِ ؛ قولوا : سبحانَ اللهِ ، و الحمدُ للهِ ، ولَا إلهَ إلَّا اللهِ ، واللهُ أكبر ، فإِنَّهنَّ يأتينَ يومَ القيامةِ مُقَدِّمَاتٍ ومُعَقِّبَاتٍ وَمُجَنِّبَاتٍ ، وهُنَّ الباقِيَاتُ الصَّالِحاتُ) 📚 صحيح الجامع
■■■■■■■■■■■■■■■■■■■■■■■■■■■■■■■■■■■■■■■■■
🌿 إذا تنازلت عن حقك مرة واحدة فأستعد لرحله طويله نحو المذلة🌿
••••••••••••••••••••••••••••••••••••••••••••••••••••••••••••
وداروا حفلة ولادة "فداء" اللي مازاد فيها شي ولانقص عن حفلات خوتها قبلها..
لكن للأسف ربيعه من لما جابتها مش قادرة تفرح بيها طول حفله السبوع عمتها هانيه ماسيبتهاش ولأن زكيه كانت معاها طول الوقت ربيعه ماقدرتش دير شي قعدت متفرجه وهي مقهورة قهر حاولت اخفائه بستار ابتسامه مزيفه واكثر من حاس بيها وملاحظ حالها عصمت وحسناء..
🌿🌿🌿🌿
"لو تشوفها عموري تهبل عليها طعمة طعامه ماصارتش"
قرصها معمر من خدها وقال وهو مبتسم بحب..
/كان تشبهك انتي اكيد حتكون طعمه طعامه وحلوة حلاوة لاقبلها ولابعدها..
ضحكت هانيه بخجل بعدين قالت..
/عموري..
قاللها بهويام..
/روحه..
وهي مبتسمه بالغصب قالت..
/نبي نبدا بالعلاج من توا..
معمر قال..
/اني نقول خل برنامجك يبدا قبل وتقطعي فيه مشوار بعدين الهي بالموضوع هدا..
بإبتسامة اسف قالت..
/اني توا سكرت 33عام معاش عندي وقت عموري..
خداها لقلبه وقال..
/اللي يريحك حبيبتي ديريه..
دمعوا عيون هانيه مع احتفاظها بإبتسامه الأسف وبدت من توا تستعد لكل الاحتمالات واولهم فراق معمر...
🌿🌿🌿🌿🌿
تاني يوم..
الساعه الرابعه قبل العصر..
في النادي..
تحديدا ملعب التنس..
كانوا عزة وصديقتها وداد مقعمزات ع مقعد طويل وهما لابسات الملابس الخاصه بلاعبين التنس..
تيشرت ابيض كم طويل وبطلون ابيض فيه خط اسود من الجناب وع راس كل فيهم طاقيه من غير غطا راس فيها بس الواقي اللي يتقي ع العيون..
وهما منسجمات في الهدرزة سمعوا حد ينادي بصوت عالي..
"سلامة كريم"
ع طول وجهوا انظارهم القدام شافوا سلامه واقف وهو لابس اللبس الخاص بلاعبين التنس الذكور..تيشيرت ابيض نص كم وشورط للركبه ابيض وهي خطوط سود من الجناب كان يشوف للي ناداهم هو وولد عمه وهو يلبس في سريتشه ع راسه تحديدا جبهته وبعدين نزل عليها الجمة متاعه..
غروره كان باين عليه في كل تفاصيله وهدا اكثر شي يستفز في عزة وينرفز فيها...
"واخيرا جو،اشبح علاش قعدوا غايبين فوق الشهر عن النادي "
عزة وهي تشوف لسلامه قالت..
/بنمشيلهم..
وداد وهي متفاجئة..
/وين بتمشي؟
عزة وهي رافعه حاجبها قالت..
/بنتعرف عليهم..
وداد بضحكه..
/معانا كل يوم في المدرسه هدا وين تفكرتي تتعرفي عليهم!؟
ضحكت عزة وقالت..
/مانبيش نتعرف بس..ناضت وهي تقول..تمشي معاي؟
ناضت وداد وقالت بضحكه..
/نمشي ليش لا؟
..ومشوا مع بعض بإتجاه سلامه وكريم والولاد اللي معاهم..
وصلوا فيهم وبدت عزة بالتحيه..
/هاي..
وجهوا انظارهم ليها وسلامه قال..
/وعليكم الهاي ورحمة الله وبركاته..
ضحكوا الولاد وحتى وداد ضحكت معاهم اما عزة قالت..
/امم..ماعلينا..المهم حني نقروا معاكم في الفصل اكيد تعرفونا؟
سلامه وهو مستغرب حرك راسه بالنفي وشاف لكريم وكريم قاله..
/هادي اللي جت جديده اسمها..تقريبا يزة ولا؟
واحد من الاولاد..
/يزة!!؟زي اسم حناي..
ضحكوا الولاد ووداد شاده ضحكتها بالسيف..
عزة كانت تحاول تبرد نفسها ع قد ماتقدر وردت بهدوء..
/اسمي عزة عزة..عندك حق ماتحفظاش لإنك مش واخد عليه..
فنصوا الاولاد وهما يشوفوا لكريم اللي رفع حاجبه وهني سلامة قال بضحكه..
/باهي ماقلتيش شن تبي جايه يايزة..أاا قصدي وزة..سوري سوري..عزة عزة..
كريم والولاد قعدوا يضحكوا وبالغوا في الضحك بش يحرقوا دمها وسلامه يشوفلها بإبتسامه مستفزه..
ووداد مازال شاده ضحكتها وحتى عزة مازال قاعده متمالكه اعصابها ردت ع سلامه تقول..
/ماعلينا..المهم نبي نلعب معاك..
سلامه:شن تبي تلعبي؟
كريم قال..
/طاي طاي طايري ..
ضحكوا الولاد وسلامه يضحك معاهم..
هي استمرت في تجاهل مسخرتهم وقالت..
/تنس..
قاللها سلامه..
/امم..والله شن بنقولك!
قالت:يقولوا انت احسن لاعب هني قلت خل نتأكد بروحي..
كريم:ولد العم تتحدا فيك هادي..
سلامه:غير دقيقه خل نفهمها..اني احسن لاعب ضمن الفئة العمريه متاعي يعني في لاعبين اكبر واصغر مني مازال خير مني فيها شوفي واحد فيهم والعبي معاه..شاف للولد اللي قدامه وقال..هيا لؤي..
وكيف جي بيمشي اعترضت طريقه وقالت..
/خايف يقولوا غلباتك بنت!
الولاد صاحوا...
"اوو"
ووداد كانت مندهشه في جرأة عزة..
سلامه تنهد بملل بعدين قال..
/ok...خليك متفكرة انتي اللي طلبتي..
ابتسمت بتحدي بعدين مشت ووداد لحقتها..
كريم:خاشه متحمسه هادي..
سلامه:تصدق والله مازبطتها ولانتفكرها متأكد تقرا معانا؟
كريم قال بضحكه..
/ايه مقعمزه في اخر مقعد في صفة البنات..
مط سلامه شفايفها للاسفل وقال..
/مانتفكرش اني شفتها بكل..تنهد وقال..يللا هي في خاطرها شي تبي ديره واني بنسايرها وخلاص..
ضحك كريم وباقي الولاد جنبهم كان يشوفوا لعزة وهما يسمعوا في كلامهم..
🍀وبدت المباراة بين عزة وسلامة..
في البدايه ماكانش سلامه واخد عزة ع محمل الجد لعند ماشاف كيف هي لاعبه متمكنه وخصم حقيقي لهذا بدي يلعب بجديه وفي عقله قعدت تتردد جملة قالتها وهي تتحدى فيه..
" خايف يقولوا غلباتك بنت!"
وهالشي مستحيل يسمح انه يصير وهو المعروف عنه ان سجله في اللعبه هادي خالي من الخساير..
ولأن الطرفين بانوا للحضور اقوى من بعض المباراة بينهم ولت حماسيه ووداد وكريم ع اعصابهم كل حد فيهم يبي صديقه يفوز..
ويقعد سلامه ولد تسعه بيت المال لايمكن يرضى بالخسارة والفوز لابد يكون من نصيبه..
بعد ماانتهت المباراة قدموا لبعض هو وعزة مدت يدها وقالت..
/ماكذبوش..
صافحها وقال..
/حتى انتي ماكنتيش ساهله..
سحبت يدها وقالت..
/لكن كان خليتك فزت في هادي مش حنخليك تفوز في غيرها..
ضحك وقال..
/تو نشوفوا ياوزة..
قلبت عيونها ومشت وخلاته بضحك عليها..
🌸وصلت عزة في صاحبتها وهي تقول بنرفزة..
/مغرور ومستفز..
ووداد قالت بضحكه..
/لكن تعبتيه..
رفعت حاجبها وقالت..
/ومازال بنزيد نتعبه تو يشوف..
🌿وياريت كل التحديات تكون زي اللي بين عزة وسلامه تحديات بريئة لاضرر فيها ولاضرار...
🍃"مازال نسمعكم تقولوا دوة زي هادي مرة تانيه تشوفوا مصيركم الأسود"
فريحه بربكه وخوف..
/ماجبنا شي من عندنا ياعمتي..
زكيه بغضب..
/سكري فمك..اشرت بسبابتها عليهم وهي تقول..توا طلعتوا ماتعرفوش الراجل اللي حاويكم!؟ مايحطش تحت جناحه مراه ماتنفعش مستحيل ياخدها قبل ليعرف كل شي عن جدها السابع مش غيرها بس..حركت سبابتها بتهديد وهي تقول..اسمعوني جاي جو الضراير هدا بدي يطيرلي فيها واني كان طارتلي ندير حاجات عقولكم ماتستوعبهاش..اخر مرة تقطفوا القطاف هدا وياويلكم..ياويلكم نسمعه واصل لربيعه..نوضوا اطلعوا من قدام وجهي..واشرت بسبابتها ع باب جناحها..
ناضوا الزوز ومشوا طلعوا من قدام وخلوها تفور وتغلي من الغضب..
🍃برا الجناح..
فريحه قالت بصدمه..
/من امتى تحبها هكي!
نزيهه:لاتحبها ولاطيقها وردة فعلها كنت متوقعتها..
فريحه:كان توقعتيها علاش خلتينا نكلموها من اصله..
ابتسمت نزيهه وقالت..
/تحسابي الكلام اللي قلناه خش من الوذن وطلع من التانيه؟ لاحبيبتي خش من وذنها ووصل لعقلها وحيقعد فيه..
فريحه قعدت تشوفلها بإستغراب..
ضحكت نزيهه وقالت..
/بري بري وماتسأليني عن شي خلي اللي بيصير القدام يجاوبك..
ومشت فريحه مع نزيهه وهي مش فاهمه شي لكن يقعد كل اللي يهمها واللي تبيه ان ربيعه تطلع من حياتهم وترتاح منها للأبد..
🌿🌿🌿🌿🌿
وتعدي الايام..
ويبدا برنامج هانيه الاجتماعي اللي كانت هي صاحبة الفكرة متاعه والمعده والمقدمه ليه..
وكل من يحبها قعمز قدام شاشة التلفزيون يتفرج عليها..
كانت مقدمه متمكنه اللغه متاعها ممتازة واسلوبها مميز وواثقه منها نفسها جدا..امها وهي تتفرج عليها كانت دمع من الفرح وخوتها كانوا فخورين بيها..
ونساوين خوتها المقربات ليها كانوا يمدحوا ويشكروا فيها طول الحلقه زي ماداروا فاطمه وغزلان لكن كريم ماباش يطلع من داره بكل غضبه منها خلاه كاره شوفتها..
▪▪▪▪▪▪▪
"شن رايك حبيبي؟"
معمر وهو شاد يدها وطالع بيها من مبنى الاذاعه والتلفزيون قال..
/شن بيكون رايي زدتي غرقتيني فيك اكثر واكثر..
ضحكت هانيه بخجل وهي تقول..
/تسلملي..
وصلوا للسياره فتحلها الباب الخلفي وقال..
/بنمشوا لحوش العيله تيسير دايرتلك حفله غادي..
هانيه قالت بضحكه..
/تهبلي صاحبتي..وكيف جت بتركب شد يدها وقال..وخوها؟
قالتله بضحكه..
/يهبل اكثر منها..
ابتسم بحب بعدين ساعدها تركب كان يعامل فيها بإهتمام مبالغ فيه كان يلقى مايخليهاش تمشي ع الارض..
بعد ركبت سكر الباب ومشي ركب جنبها وطلب من السواق يتحرك بإتجاه فيلا عائلة الهاشمي..
🍃واول مايوصلوا غادي وتخش هانيه عليهم تتفاجئ بالجو اللي كانت دايراته صاحبتها وتزيد تتفاجئ اكثر بأفراد عيله راجلها وهما يصفقولها ويهنوا فيها حتى من شيبانها..
هدا كله تشوف فيه سلفتها "عاطفه" ونار الغيرة تاكل فيها ماكله..
▪▪▪▪▪▪▪
"والله من بكري والهاتف يرن حمواتي وخواتي وقريباتي كلهم اتصلوا يهنوا فينا عليك ومابطلوش شكر فيك"
هانيه وهي مبتسمه قالت..
/مشكورين كلهم ذوق..
تيسير:الشلة قالوا نبوا هانيه ديرلنا زردة راهوهانيه قالت بضحكه..
/قوليلهم يخلوها لبعد غدوة غدوة بنمشي للقصر..
تيسير:توقعت..
عاطفه وهي مبتسمه ابتسامه مصطنعه قالت..
/مبروك ياهانيه والفال لما نفرحوا بجية صغاركم انتي ومعمر..
ام معمر قالت..
/ايه والله هدا اليوم اللي نراجي فيه..
هانيه حاولت تحافظ ع ابتسامتها وهي تقول..
/ان شاء الله ان شاء الله..
"خالتي هنو"
شافت لخالد وهو جايها يجري فتحت ايديها وقالت..
/خلوده حبيبي..
وصل فيها وخش لحضنها وهي ضماته وقالت..
/سلمه ياربي..
🌿🌿🌿🌿
"مش عارفه خيرها ياحسناء ماتبيش تسكت بكل"
حسناء وهي تشوف بضيق لربيعه وهي تبكي مع بكاء بنتها قالت..
/ترا هاتيها نحاول معاها..
قدمت ربيعه وعطتها فداء سمت حسناء بالله وخدتها وبدت تمشي بيها وتجي وهي تغنيلها وربيعه تشوف لبنتها بألم والدموع ينزلوا من عيونها..
والبنت شي ع قد مادارت معاها حسناء مابتش تسكت..
فجأه دق باب الجناح..
ربيعه قالت بضيق..
/خش..
انفتح الباب وخشت الخادمه زهره قدمتلهم وهي مترددة لين وصلت فيهم وقالت بربكه..
/واني طالعه من جناح اللا نزيهه سمعتها تبكي..اني عندي الصغار يحبوني هلبه..
حسناء:بعتتاك نزيهه؟
زهرة قالت بشي من الفزع..
/لالاوالله لا..اني وجعتني كيف تبكي ماتحملتش نمشي ونخليها..بالله يااللا ياعطيهالي..
حسناء شافت لربيعه وربيعه قالت بنبرة باكيه..
/عطيهالها..
مدت حسناء فداء لزهره وزهره خدتها بهدوء وهي تذكر في اسم الله..ومشت قعمزت بيها ع كرسي وبدت تغنيلها وهي تهز بيها هزات خفيفه..
وسبحان من خلا فداء تهدا في حضنها وتسكت عن البكاء وياخدها النوم..
فرحت ربيعه هلبه المهم بنتها ارتاحت ورقدت مشت قعمزت ع السرير مقابله زهره وقالت..
/شكلك واخده ع الصغار؟
زهره ابتسمت وهي تقول..
/كنت نعاني في خوتي مع امي..
هزت ربيعه راسها بصمت وهي مبتسمه وعيونها ع بنتها..
اما حسناء اللي كانت واقفه عليهم عيونها كانوا ع زهرة..
🌿وتاني يوم...
تحل هانيه ضيفه ع قصر ذهيبه من الساعه الحاديه عشر صباحا..
واستقبلوها امها واختها ونساوين خوها احلى استقبال وهما يمدحوا ويشكروا ويهنوا وهي كانت فرحانه ع الآخر..
وبعد وصولها بربع ساعه جو فاطمة وغزلان وحتى هما ماخلوا كيف شكروها ومدحوا فيها..
🌱"تسلمولي يارب..والله حتى حوش شيابيني امس دارولي حفله عمي وعمتي ماخلوا ما قالوا من كلام حلو وشكرانيه وقبل لنروح عمي وعمتي سقدوني بالهدايا..
زكيه قالت..
/ماشاء الله..كبر قدارهم من يومهم ناس موجبه وتعرف الاصول..
هانيه:هلبه ياماما..تعرفي عمتي قالت نساوين العيله كلهم اتصلوا بيها يهنوا فيها عليا وع برنامجي..
زكيه قالت بضحكه..
/يابختهم ببنيتي يابختهم..
نزيهه وهي مبتسمه قالت..
/ايه والله يابختهم بهنو بنت العز والاصل هدا غير جمالها ونجاحها..
هانيه قالت بإبتسامه..
/بعض ماعندك نوزي..
فريحه قالت بإبتسامه..
/ان شاء الله منها للأحسن وينشهر برنامجك ع مستوى الوطن العربي كله..
هانيه قالت بضحكه..
/يارب يافيري يارب..
زكيه:يارب..
ويخشوا حسناء وخالتها ومعاهم ربيعه وهما يلقوا في السلام بعدين مشوا لهانيه بيسلموا عليها..
ناضت هانيه سلمت ع نبيهه اللي كانت تهني فيها بعدين سلمت ع حسناء وحتى هي هنتها وبعد سلامها ع حسناء قعمزت طول وهي تقول..
/ابله نبيهه عندي معاك هدرزة طويله بعدين..
نبيهه بضحكه استغراب..
/اني!؟
هزت هانيه راسها بإبتسامه وقالت..
/امم..
زكيه قعدت تشوف لنبيهه وهي مبتسمه وحسناء تشوف لخالتها بإستغراب..
اما ربيعه اللي كالعاده هانيه تجاهلت وجودها انجبرت للمرة الالف تعصر عن نفسها ليمون وتمدلها يدها..
هانيه:ايه حقه فيري بندير لمة للشله وشدوا فيك تجي راهو..
فريحه وهي تشوف لربيعه كيف مادة يدها قالت..
/ان شاء الله..
"هانيه ربيعه ماده يدها"
رفعت هانيه حاجبها بعد ماسمعت نزيهه شن قالت بعدين شافت لربيعه ومدت رووس اصابعها..
سلمت عليها ربيعه وقالت وهي مبتسمه بكبرياء مع ان الدمعه في عينها..
/مبروك عليك..
هانيه سحبت اصابعها وقالت.
/بنت خوي وين؟
ربيعه قالت..
/راقده..
شافت هانيه لأمها وقالت ..
/عادي ماما يجيبوها هني وهي راقده؟ مستاحشتها هلبه..
زكيه:اي عادي عادي..بري ربيعه جيبيها بري..
ربيعه وهي تشوف لزكيه قالت..
/حاضر عمتي..
ومشت طلعت والعيون تلحق فيها ونظراتهم كانت بين المتشفي واللي واجعه الحال..
♧ماهو هي الحياة مرات تجبرنا ع التنازل وغض الطرف عن هلبه حاجات بش نحافظوا ع مكاسبنا فيها..وعمتي وقتها ماكانتش تبي تخسر عمي ولاتخسر الاستقرار اللي كانت عايشه فيه ولاتخسر بنتها لهدا اضطرت تتنازل وتساير وتفوت المهم المركب تمشي...
🌿🌿🌿🌿🌿
في مدرسه "نور المعارف"
تحديدا احد فصول الصف الثامن كانت عندهم حصه لماده الاحياء..
الابله مجمعه كراسات الواجب وتصحح فيهم والطلبه يهدرزوا بصوت منخفض..
شويه قالت الابله..
/عشت وشفت كراسه منظمه متكمه اكثر من كراسة سلامه..
الطلبه كلهم ركزوا معاها وهي رفعت الكراسه وقالت..
/ ممتازة ياعزة تعالي خودي كراستك..
ناضت عزة والعيون عليها ماعدا سلامه تظاهر بعدمالاهتمام..
وصلت في الابله اللي قالتلها..
/حتى درجة الاختبار صكرتيها،انتي وسلامه بس اللي سكرتوا الدرجه..
هي خدت كراستها وابتسامه الفخر ع وجهها بعدين لفت بتمشي لمقعدها شافت لسلامه لقاته يشوف للأبله بس ابتسمت تهكما وكملت طريقها لمقعدها وكريم يشوفلها وهورافع حواجبه..
قرب لسلامه وقاله..
/حي عليك ناوياتك هادي راهو..
قاله سلامه بإبتسامه غرور..
/حي عليك انت بتخليك الترتيب الثالث..
كريم قال بضحكه..
/ياخوفي تخليني الثالث وانت التاني..
سلامه قاله..
/فكرني نعطيك عنفقه بعد ماتطلع الأبله..
🍀وتنتهي حصة الاحياء وتطلع الابله ويخش بعدها ع طول استاذ الفيزياء بعد ماعطاهم الحصه اللي كان فيها سلامه اكثر من يشارك كالعاده طلع اوراق الامتحان وبدي يوزع عليهم وهو ينادي حسب الابجديه..
وكذلك كالعاده سلامه كان جايب الدرجه الكامله لكن هالمرة مش بروحه عزة حتى هي سكرت الدرجه..
🌱"بجديات فاجئتيني عزة لإنك ماتشاركيش هلبه"
عزة:تعطيني مسألة توا نطلع نحلها؟
ضحك الاستاذ وقال..
/الحصه الجايه ان شاء الله..
وكمل الاستاذ توزيع الاوراق لعند ماوصل في كريم اللي كانت ناقصاته نص درجه..
كريم بأسف:ديما هكي الزفت مش عارف كيف نسيتها هادي..
سلامه قاله..
/انت تستعجل هلبه تحل بسرعه من غير ماتركز..
سكت كريم وهو مضايق...
🌸"صحه ليك ياعزة"
عزة قالت..
/مازال ماريتوا شي تو تشوفوا شن ندير فيه سلامه هدا..
ضحكوا البنات والتفتوا شافوا لسلامه لقوه مقعمز فوق المقعد يهدرز مع زملائه ولاع باله..
ولحظات وتخش ابله اللغه العربيه وع طول خشت ع تسميع نص شعري..
🌱"هي اليوم بنبدوا بالمجموعه التانيه..سلامه سمع هي"
وقعدت تسمع عليهم اغلبهم كانوا حافظين ومن ضمنهم كريم وعزة..
الابله قالت..
/طبعا درجات الاختبار ياحلوين فيكم هلبه مكعكين..
وحده من الطالبات قالت..
/في شني ياابله؟.
قالت:النحو هلبه ملبزين في الاعراب..وحي ع كريم قداش رافس فيه رفس..
ضحكوا وكريم قال..
/النحو دمه ثقيل هلبه..
قالتله:قول لولد عمك يخففهولك ماشاء الله اجاباته نموذجيه هو وعزة..
كلهم صاحوا..
"اووو"
ضحكت الابله وقالت..
/ خيركم؟
كريم قال بضحكه..
/في الاحياء والفيزياء نفس الشي هما بس اللي سكروا الدرجات..
الابله قالت..
/جاك اللي يقدك ياسلامه..اسمعي عزة نبوا الاول للبنات السنه هادي..
عزة:هدا اللي نبيه..
الابله قالت..
/منافسه شرسه ياسلامه..
قاللها:تنافس كريم ع الثاني اني ماليش منافس..
صاحوا الولاد تشجيعا لزميلهم والابله قالت لعزة..
/سمعتيه شن قال ردي عليه..
قالت وهي مبتسمه بثقه..
/خلي الدرجات ترد عليه ياابله..
البنات ضحكوا والابله قالت بضحكه..
/صحه ليك..
كريم قال..
/عنصريه هادي ياابله..
قالتله بضحكه..
/سادكم سنين وانتم واخدين الاول خل تاخده بنت المرة هادي..
سلامه قال بإبتسامه غرور..
/تو نشوفوا..
وعزة قالت بعده..
/تو نشوفوا..
والابله وزملائهم يضحكوا عليهم..
🌾🌾🌾🌾🌾
"ع قد مادرناله ياشيخ مافيش فايده شادها عياط من الفجر لتوا"
صفي الدين وهو يشوف للطفل الرضيع قال..
/عاينتوه؟
قاله اب الطفل..
/عايناه عايناه يقولوا غازات لكن ع قد مادرناله مافيش فايده..بالله عليك اقرا عليه..
تنهد صفي الدين بعدين خدي الطفل من بوه..
حط يده ع بطنه..غمض عيونه وبدي يتمتم..
والراجل يمرر في نظراته القلقه عليهم وماهي الا لحظات والعيل هدي تماما..
الاب قال بفرح..
/شوف كيف يشبحلك ياشيخ يضحك..
صفي الدين قال بإبتسامه..
/ارقوه ديما وبعدوه عن عيون الاقارب العين الحاسده ماتجي كان منهم..
الراجل قال..
/صدقت ياشيخ..
مد صفي الدين الولد لبوه وقال..
/اقروا عليه ديما..
خداه بوه وقال..
/حاضر حاضر..وكيف جي بياخد يد صفي بيكب عليها سحب صفي يده وهو يقول..حاشالله حاشا لله..
الراجل قال..
/ربي يطول في عمرك ربي يحفظك..
وهو يسمع فيه وع وجهه ابتسامه وعيونه في الأرض..
🌾"تي عييت وهي تحلف قالت قري ع الحزم بعدين عطاهولي نلبسه وقالي خليه ع وسطك شهر كامل وقالت درت اللي قال عليه وبعد شهر بالزبط حملت"
فطيمه قالت..
/لاحق الراجل هدا مبروك وربي عاطيه كرامات وكان تقولي لولدك ومرته عليه يازاهيه..
زاهيه:تو نقوللهم..
بدت ع وجهه فطيمه ملامح الوجع قالتلها مسعوده..
/خيرك يااللا من بكري نحس فيك تتوجعي..
فطيمه قالت..
/مفروض غدوة موعدي لكن من الصبح الوجع يمشي ويجي..
زاهيه قالت..
/تساهيل هادي
فطيمه وهي حاطه يدها ع بطنها قالت بشي من الوجع..
/حتى اني قلت هكي...نوضي يامسعوده شوفي الغدي..
ناضت مسعوده وهي تقول..
/حاضر ياللا..ومشت طول بإتجاه الكوجينه..
🌿🌿🌿🌿🌿
الساعه الخامسه عصرا..
في حديقة قصر ذهيبه...
كانوا بلقيس وغزلان يتمشوا ويهدرزوا وقدامهم متين يلعب مع ثريا ووسام..
ثريا خطفت لعبه من متين ومشت تجري لحقها متين وخدي منها اللعبه وتبدا بوصلة البكي..
وسام وهو يشوفلها كيف تبكي في لمح البصر خبط متين ع وجهه ثريا لما شافت خوها شن دار وقفت بكي وعطت متين الخبطه التانيه..
وبدي متين يبكي وسام خدي منه اللعبه وعطاها لاخته ومشوا وخلوه وهو قعد واقف يشوفلهم ودموعه ينزلوا..
غزلان قالت بضحكه..
/ياروحي..
بلقيس قدمتله وقالت..
/تعلم ادافع ع روحك ياماما معاش تبكي ومعاش تخلي حد ياخد حاجتك..
وولدها يسمع فيها وهو يشوفلها بحزن وشفايفه مقوسات..
وجع قلبها خداته ورفعاته في حضنها وهي تقول..
/خلاص حبيبي خلاص..
وغزلان بعد ماشافتلهم بإبتسامه تعاطف مشت بسرعه لحقت ع وسام وثريا..
🍀وع الطاوله الرئيسيه في الحديقه..
كانت زكيه مقعمزة مع فريحه وحسناء وفاطمه ومحور حديثهم عن..
🌱فاطمه:الزوز خوت واحد عزري والتاني مطلق..المطلق خدي عاتكه والتاني رقيه..
فريحه:باهي طيب فيهم..
زكيه:ايه والله..اني الحق قداش ليا عليهم..
فريحه:حتى هما معاش يواصلوا في حد زي قبل..
فاطمه:ناس معينه بس اللي قاعده علاقتهم بيهم قويه..
فريحه:ايه صح..باهي زعمه بنتهم وديعه مازال يجيها حد بعد اللي صار معاها؟
فاطمه:ياودي مظني طالعه عليها اشاعات انها ملبوسه ومسحورة اللي يسأل عليها وين يحكوله عن وضعها يوخر..
فريحه قالت بأسف..
/مسكينه..
وهما يهدرزوا وحسناء شبه مش معاهم عقلها عند خالتها اللي كانت مقعمزه مع هانيه ع مقعد طويل مقابلهم..
🌱هانيه:هو خال راجلي ارمل من غير صغار هو عقيم لكن راجل كويس هلبه وليه مركزه واسمه..
نبيهه وهي مبتسمه بإحراج قالت..
/فاجئتيني يابنتي..
هانيه ابتسمت وهي تقول..
/عزوزتي وخواتها معجبات بيك هلبه هلبه ومصرين عليك..
سكتت نبيهه وهي متحشمه..
هانيه قالت..
/انتي تبي تتزوجي ولالا؟
نبيهه:لا مش رافضه الفكرة لكن خل نزيد نشاور ونرد عليك..
هانيه قالت بإبتسامه..
/على راحتك...
🌿ومن حديقة القصر لمكتب تسعه وين ماكان مجتمع بنزيهه..
🌱"جاملته راجل اختك هدا فوق الحد لهني وياسر"
نزيهه بضيق:انت غير قعمز معاه واسمع منه..
حرك راسه بالنفي وقال..
/الفلوس مانلقوش فيهم فالشارع بش نحطهم في مشاريع فاشله..
سكتت نزيهه وهي مضايقه..
عقد حواجبه وقال..
/اطلبي من اي شي تاني تاخدي عيوني لكن الموضوع هدا انسيه..معليشي..
ناضت نزيهه وهي تقول..
/باهي سامحني اللي خديت من وقتك..ومشت طلعت من المكتب بعد سكرت الباب تأفف تسعه وقال..
/استغفر الله واتوب اليه..
🍀ومن مكتبه لجهة تانيه في القصر..
فيها حجرة يحبوا يقروا فيها الصغار ومش هما بس..
حتى ربيعه اللي كانت موجوده فيها مع سلامه وهشام وحداهم بمسافه كانت زهرة مقعمزه وحداها كروسه اطفال راقده فيها فداء وكلها انتباه مع ربيعه وربايبها..
🌱ربيعه:بتوسع بالك معاي سلامه..
سلامه قال بضحكه..
/ديما بالي واسع امي في حد قالك غير هكي؟!
هشام:ايه انت بالك واسع لكن مزاجك اليوم مش مليح..
رفع سلامه حواجبه وقال..
/شن قصدك؟
شافله هشام بنظرة خبيثه وهو يقول..
/حكالي كريم ع يزة..
ربيعه بضحكه..
/من يزة هادي؟!
سلامه:فوتيه وانتبهي معاي..
هشام قال بضحكه..
/وحده تقرا معاه فالفصل بتاخد منه الترتيب الاول..
سلامه قال..
/ في الاحلام..
ربيعه ضحكت بعدين قالت..
/حلوة الثقه بالنفس لكن رد بالك تنغر بروحك،كان طلعلك منافس اعترف بيه بش تقدر تغلبه..
سلامه قال..
/تو لما يطلع ندير هكي..
ربيعه شافتله بطرف عينها وقالت..
/مقنزع زيك زي امك نزيهه..فنصت وحركت عيونها هني وهني وهي تقول بخوف مصطنع..معاذ وين؟!
قعدوا يضحكوا وسلامه قال بضحكه..
/ام هشام حتى هو..
قالت لهشام..
/لاهشومه وليدي عارفني نبصر..
ابتسم هشام..
سلامه قال..
/لكن اني عارفك ماتبصريش..وضحك ضحكه شر..
ضحكت ربيعه وضرباته ع قفاه..
هو حط يده ع فقاه وقال..
/احح يدك رزينه..بعدين كيف تضربي استاذك هكي! خلاص الدرس مشروح..
ضحكوا عليه وربيعه قالت بضحكه..
/تي هيا ابدا راح علينا الوقت..
هو خدي الكتاب رفع حواجبه ونزلهم بعدين ناض ومشي للسبورة وهو يقول..
/انتبهوا معاي..
🌿🌿🌿🌿🌿🌿
الساعه الثامنه مساءا..
في مكتب تسعه وهالمرة كان مجتمع بحسناء اللي تكلم عن الموضوع اللي جي لخالتها..
🌱تسعه:نعرفه الراجل لكن معرفه سطحيه وبالمجمل العيله كلهم مافيهم من يذم لكن تو نزيد نسأل كويس..
حسناء قالت بضحكه.
/قول لجمال يدور وراه
ابتسم وقال..
/وهو في غيره!؟
ضحكت بعدين تنهدت..
هو شافلها بإبتسامه وقال..
/انتي تبيها تتزوج ولالا؟
حسناء:اكيد نبيها تستقر في حياتها ودير ونيس لكن بنقعد خايفه عليها..خالتي هادي طيبه هلبه القط ياكل عشاها زي مايقولوا
قاللها:اني وراها بإذن الله مايقدر حد يضرها ولايعفسلها ع طرف..
ابتسمت بحب وقالت..
/تسلم..
ويدق باب المكتب اضايقت حسناء وهو شافله وقال..
/تفضل..
انفتح الباب بشي من الصعوبه وخشوا كريمه ووراها اروى..
تسعه قال ببهجه..
/اهلا هلا اهلا..
كريمه قربتله بعدين مدتله ورقه وقالت..
/شوف قداش حصلت في الرياضيات..
خدي منها الورقه لقاها جايبه درجه كويسه ناقصه عن الدرجة الكامله درجتين بس قاللها..
/صحة لبنتي صحة للا بوها..
كريمه قعدت تشوفله وهي فرحانه..
وتمدله اروى الكراسه وهي تقول..
/شوف بابا كتبت للخمسه..
خداها منها وشافها وقال..
/ماشاء الله ع الدكتورة اروى ماشاء الله..
فرحت أروى وكريمه قالت./حتى ابلتها كاتبه دكتورة اروى..
حسناء قالت بإبتسامه..
/وانتي كريمه شن تبي تولي؟
كريمه قالت..
/ابله بش نطلع الدكتور والمهندس والمحامي والشرطي ورجل اعمال زي بابا..هكي قالت ماما ربيعه.
ابتسم تسعه وعيونه يلمعوا..
وحسناء قالت بإبتسامه..
/كلامها مزبوط..
تسعه قال..
/شن دير امك ربيعه؟
كريمه:قاعده تقرا..
هز تسعه راسه وهو مبتسم وحسناء تشوفله بإبتسامه..
🌿🌿🌿🌿
"واخيرا جبتي يانعلي يانعلي"
هادي هنادي تكلم في تعويضه هاتفيا وتعويضه ردت عليها بضحكه..
"تي اسكتي عطك حبة"
هنادي قالت بضحكه..
/مبروك المزيود ويتربى في عزكم..
"الله يبارك فيك والعقبه لك"
هنادي قالت..
/غير خل نتزوج قبل..
"ربي يبعتلك نصيب سمح كيفك"
هنادي قالت..
/قولي اسمح مني اسمح مني..
"تي هيا عاد حتى اني نبي نكلمها'
هنادي قالت بضحكه..
/اهي معاك ابله برنيه..مدت هنادي السماعه لبرنيه خدتها وقالت..بري كملي شغلك..
هنادي قالت..
/حاضر..ومشت بإتجاه الكوجينه..
لما وصلت فيها وخشت لقت مجيده توتي في سفرة قهوة مابتش تسألها عنها اكتفت بالنظر بس..
ومجيده بعد ماجهزت السفره خدتها ومشت بإتجاه الباب الخلفي للكوجينه وخلت هنادي في حالة استغراب..
🍃وتطلع مجيده بالسفرة وهي دور ع جمال لقاته مقعمز بعيد وشاد كتاب يقرا فيه..
وخرت الشاربه اللي كانت لابستها وطلعت جمتها ساوتها ومشت بإتجاهه..
بلعيد خو هنادي كان جاي من جهة تانيه شافها وهي ماشيه لجمال عصب ع الآخر وقعد واقف في مكانه يراقب فيها..
🍃هي بعد ماوصلت في جمال قالت بصوت فيه مياعه..
/جمال..
رفع عيونه للسفره من غير مايتكلم..
هي مدتها وقالت..
/القهوة زي ماتحبها..
قاللها:ماطلبتش قهوة..ورجع نزل عيونه للكتاب..
هي قالت:عارفه لكن اني هكي من كيفي درتهالك..
رفع يده واشر بيها وهو يحرك فيها من الخلف للأمام..
اضايقت منه هلبه بعدين لفت ومشت وهي تقول..
/تو تشوف ياجمال كان ماجبتكش للطريق مانبداش مجيده..
وهي ماشيه جو عيونها في عيون بلعيد شافتله بإزدراء وغيرت عيونها عنه وهو تبعه بنظره وكان مضايق ع الآخر..
🌾🌾🌾🌾🌾
وفي البنداريه..
تحديدا حوش كبيرهم كمال البندار وضعت مرته مولودها الثالث بعد ماجاها المخاض قبل المغرب المولود كان ذكر وطبعا زيه زي خوته جاباته في الحوش..
🌾ويوصل الخبر لكمال وهو في الجامع بعد كمل صلاة العشاء..
..."ماشاء الله ماشاء الله"....
كمال وهو مبتسم بفرح قال..
/نبيك انت تسميه ياشيخ صفي الدين..
كل من فالجامع كان يراجو في رد صفي وهو بعد ماابتسم شاف لسطان وقال..
/عندك السلطان وعندك العمران..وربك عطاك الريان..
كمال:شن معناه ياشيخ؟
صفي قال..
/هدا اسم باب من ابواب الجنه اللي يخشوا منه الصائمين..
هز كمال راسه وقال بإبتسامه..
/خلاص..ريان..
وسلطان يشوف لبوه وهو مبتسم بفرح..
🍀وريان كان من دون خوته ولادته جت ساهله..وحتي ان وجهه كان مريح وحلو بالمرة كل من يشوفه يطيح في قلبه زي حبة السكر وامه ماتت عليه..
🌾"الله يبارك الله يبارك"
الساعدي قالت..
/ماشاء الله وجهه ضاوي..
كمال قال بضحكه..
/وين ريته استريحت..
زقطي قال..
/يتربى في عزك وتشوفه هو وعمران زي خوهم سلطان..
ابتسم سلطان وكمال اللي شافله بإبتسامه قال..
/لا سلطان بروحه مايجيه زي حد القسورة.
ضحك سلطان وقال..
/كلنا ولاد كمال البندار مايجي زينا حد..
ضحك كمال والساعدي مسح ع ظهر سلطان والزقطي قال بإبتسامه..
/الله يبارك فيكم كلكم..
🌾🌾🌾🌾
ويعدي اسبوع ع ولادة ريان وبوه يديرله سبوع كبير زي مادار لخوته وكانت العقيقه اللي ذبحها جمل..
🌾في المضافه اللي كانت معبيه ناس مهمه من الالف وخمسين وبرا منها..
خش عليهم كمال البندار وفي حضنه ولده ريان..
مشي بيه طول للشيخ صفي الدين وقال..
/هاك اقرا عليه ياشيخ بش ربي يزيد يبارك فيه..
ابتسم صفي وهو يشوف لوجه ريان بعدين ناض وقال..
/خليه عندك تو نقرا عليه وهو عندك..
هز كمال راسه وهو مبتسم..
رفع صفي الدين يده ومدها لريان مجرد مايده لمست راسه الولد بدي في عيطه وحده..
الحضور استغربوا زي كمال اللي خالط استغرابه الخوف..
صفي وهو مبتسم ابتسامه تخفي ارتباكه قال..
/شورها يدي مصقعه..وخرها وحطها مع اختها ورا ظهره وقال..رده لأمه رده..
كمال بخوف:مافيه شي ياشيخ ؟
حرك صفي راسه بالنفي وهو يقول بإبتسامه..
/ماتخافش مافيه شي..غير توا دخله داخل ومعاش طلعه للناس..
كمال هز راسه وقال..
/فهمت فهمت..ولف ومشي طلع بولده وصفي يلحق في ريان بنظره لين درق عنه بعدين تنهد وقال وهو يقعمز..
/العين حق..العين حق..اذكروا الله ع كل شي يعجبكم..
وبدوا الموجودين يبركوا ويقولوا ماشاء الله ويصلوا ع النبي وهو يمرر في نظره عليهم ويهز في راسه...
🌿🌿🌿🌿
وتمضي الايام..
وهانيه اللي كانت تقدم في برنامجها يوم الاربعاء حققت نجاح كبير وبرنامجها ولى متابع في البلاد كلها وياما جتها من رسائل شكرا واعجاب من المشاهدين زي ماكان راجلها طاير بيها وكان يلقى ينزلها نجمه من السمي المهم يفرحها ويدخل السرور ع قلبها..
لكن هانيه ديما تحس ان حياتهامعاه مؤقتة ومش حتستمر لهدا كانت سعادتها معاه ناقصه والسبب معروف..الانجاب..
🍃"متأسفه جدا استاذة هانيه احتمالية الحمل عندك تكاد تكون معدومه"
ابتسمت هانيه بألم وقالت..
/الدكاترة اللي قبلك قالوا الاحتماليه ضعيفه جدا واني تمسكت بيها وقعدت نعالج ع امل تصير معجزة..لكن..
سكتت وهي شاده دموعها بالغصب..
الطبيبه قالت بأسف..
/اسفه جدا جدا..
ناضت وقالت..
/انتي درتي اللي عليك وزياده دكتورة..مشكورة جدا..
🍃وطلعت من العياده وتوجهت طول للفيلا اللي تسكن فيها..
لما وصلت غادي خشت لدار النوم نزلت شنطتين وحطت فيها كل شي يخصها من بتاتها فقط بعدين طلعتهم بصعوبه وهي تبكي بقهر..
وبصعوبه وصلتهم للسيارة وحطتهم فيها بعدين ركبت..
قبل لتطلع من الفيلا القت نظرة عليها وهي مبتسمه بألم وحركت السيارة وطلعت منها...
🌿🌿🌿🌿
في حديقة قصر ذهيبه..
كان تسعه واقف مع مرعي يحكي معاه في امور تخص الاشغال المشتركه بينهم..
فجأة سمعوا بوابه القصر انفتحت التفتوا شافولها لقوا سيارة هانيه خاشه...
تسعه قال بإبتسامه..
/غريبه قالت بتجي الخميس..
مرعي قال..
/شكلها جايه بش تمشي معاهم لحوش البدري..
وتوقف سيارة هانيه لكن تأخرت في النزول منها خوها لما ركز فيها لاحظ انها تبكي قلبه انقبض قدملها ومرعي قعد واقف يراقب في الوضع بقلق..
وقبل ليوصل تسعه في السيارة تفتح هانيه الباب وتنزل لكن ماقدرتش توقف ع حيلها ع طول طاحت فاقده الوعي...
...يتبع...
(رجاء خاص اللي يقرا ياريت يدير لايك..
وتاني شي ياريت ياريت معاش نشوف اي تعليق يحكي عن الروايه اللي قبلها عارفه انكم تأثرتوا بيها هلبه زي مااثرث فيا قبلكم لكن خلاص عاد ليها قريب اربعين يوم تامه تي اغلبكم سحنوا كبدي وهما يقولوا كمليها بسرعه ملينا منها معاش عندنا ليها جو وتوا بعد تمت ولت روايه لاقبلها ولابعدها!!
اني متفهمه حبكم ليها لأن قصتها قويه ومؤثرة لكنها زيها زي اي روايه خدت وقتها وتمت وعدا ع نهايتها فوق الشهر لازم نبدوا في غيرها..اللي مش قادر يتخطاها مايجبرش نفسه اجبار يقرا هادي ولايعلقلي عن الروايه اللي قبلها فوتوا الصفحه بالمرة وخلاص..وياريت هادي اخر مرة نتكلم فيها عن النقطه هادي)
