•••••••••••••••••••••••••••••••••••••••••••••••••••••••••••
واجتمعوا نساء قصر ذهيبه ع طاولة الغدي اللي استطعماته ربيعه وهي تتبادل في الأحاديث مرة مع حسناء ومرة مع عبير اللي كانت متوسطه الجلسه بيناتهم تحت أنظار اغلب الموجودات..
زي فاطمه اللي بدت تركز بزياده ع ربيعه،في الحقيقه فاطمه ماكانتش متقبله ربيعه هلبه حتى هي كانت متوجسة منها بسبب تعلق تسعة السريع بيها في بالها انها ممكن تكون مخططه تسيطر عليه وبالتالي تسيطر ع كل شي وتولي هي الكل في الكل..
لكن نظرتها هادي بدت تتغير شويه بعد الاحداث الأخيره ولهذا حبت تزيد تعرفها اكثر بش ماتطلقش عليها احكام ظالمه..
وهالاحكام الظالمه زادت نزيهة تمسكت بيها اكثر من قبل والكره في قلبها لربيعه قاعد يزيد ماينقصش كره مخليها تتمنى لو تقدر تسمح لنفسها بالقضاء عليها..
وفريحه اللي كانت مقعمزة جنبها رجعت حست بنفور شديد من ربيعه بسبب الغيرة طريقه سلام تسعه عليها قاعده بين عيونها مش قادرة تحولها من بالها للحظه لدرجة ان نيتها انسدت كانت يدوب تاكل مجامله لاأكثر..
زي ماقاعده دير بلقيس اللي عقلها وقلبها كانوا عند خوها وشعورها بالضيق كانت تحس بيه اضعاف استجابة للمشاعر اللي يحس بيها توأمها حاليا..
مافي حد رايق في الجمعه هادي اكثر من هانيه اللي تلقت اتصال من صاحبتها تيسير تخبرها فيه عن مرواح خوها من السفر وانها ناويه تجيها زيارة بش تعطيها الهدايا اللي جابهولها معاه..
🌿🌿🌿🌿
"جبتلها هديه من غادي نبي نعطيهالها بروحي..فاضل"
شاف فاضل لبوه وقاله..
/نعم بوي..
تسعه قاله..
/برا ناديلي غزلان..
فاضل قال..
/حاضر..وانطلق يجري بإتجاه باب القصر الرئيسي..
مرر تسعة نظره ع الاولاد اللي كانوا يلعبوا حداهم في حديقة القصر بعدين قال..
/وين كريم؟
مرعي قال:ياسيدي قاعد في حوازة عمته نعيمه مع حناه ليه اربعه ايام غادي..
هز تسعه راسه وهو مبتسم..
محفوظ:بما إن الجو قنين شن رايكم نديروا زردة ؟
تسعه قال بضحكه..
/قاعد في عقلي..حتى اني فكرت فيها لكن هاه في مزرعة عمكم في القاره بولي..
محفوظ قال..
/مافيش غيرها،اصلا هي حوازة زرادي..
مرعي قال بضحكه..
/طلعتوا زردةفي بريطانيا؟
محفوظ حرك يده حركة دائريه وهو يقول..
/قول زرادي مش زردة..شاف لقيس وقال..هدا مشي معاي مرة وحده..غير نظرة لتسعه وهو يقول..خوك هدا عطيه معامل الكيمياء بس مستعد يكمل عمره فيهم..
تسعه وهو يشوف لقيس قال بإبتسامه..
/عاشق للكيمياء من صغره وشكله مش ناوي يتزوج غيرها..
قيس وهو يسمع في كلامهم كان مبتسم مجامله قلبه اللي كان يرفرف وسط ضلوعه من قوة الدق يراجي في جية غزلان بس...
"السلام عليكم"
ويلتفت قلبه المغروم فيها قبل عيونه اللي يموتوا عليها..
قدمت ووقفت مقابلتهم وهي تقول بإبتسامه..
/حمد لله ع سلامتك عمي تسعه..
تسعه بإبتسامه قال..
/الله يسلمك بنتي..رفعتي رووسنا الله يبارك عليك خليتي الناس تضرب بيك المثل في تفوقك واخلاقك نهني مرعي بيك ونهنيه هو وامك ع ربايتهم الحسنه..
وهي مبتسمه بخجل قالت..
/بارك الله فيك عمي تسعه..
وبوها قال..
/ماتتخيرش عن صغارك الله يبارك فيك كل واحد فيهم خير من التاني..
هز تسعه راسه وهو يقول بإبتسامه..
/تسلم..بعدين طلع من الجيب الدخلاني لجاكيته علبة مجوهرات صغيره ومدها لغزلان وهو يقول..
/حاجة بسيطه مش من قدرك..
خدتها منه وهي تقول..
/غير باركتلي ساد عمي..
محفوظ قال..
/ترا افتيحها وشوفي اما خير هديتي ولاهديته..
ضحكوا وقيس مازال هايم بنظراته..
هي بضحكه خجل قالت.
/كل واحد هديته بروحه وكل هديه احلى من التانيه..
مرعي:ماتقدرش عليها يامحفوظ تغلبك بلسانها..
ابتسم محفوظ وقال..
/ربي يحفظها وان شاء الله ديما ناجحه..
قالت:تسلم عمي محفوظ..
تسعه قال..
/ربي يفتح عليك ياغزلان ويحفظك..
قالت بإبتسامه..
/ويحفظك عمي تسعه...مشكور..نستأذن..
ومشت وعيون قيس معاها ومحفوظ يشوفله بإبتسامه..
🌿وقعد قيس طول ماهما قاعدين يفكر في غزلان وحاله معاها وبعد طول تفكير قرر يفتح الموضوع مع خوه ويخليه هو يكلم مرعي لأنه يعرف مكانة تسعة عنده عارفه مايردلاش طلب..
▪▪▪▪▪▪▪▪
"طيب فينا والله"
قيس ضحك بإحراج بعدين قال..
/المهم..نبيك تكلم مرعي ع بنته غزلان..
بدت ع وجه تسعه ملامح المفاجأة..
قيس تابع يقول..
/كان قالك مازال بكري عليها قوله بنعطوا فيها كلمه بس..
تسعه وهو متفاجئ قال..
/باهي تو نكلمه..
ابتسم قيس بفرح وهو يقول..
/بالله افتح معاه الموضوع في اقرب وقت اني مش قاعد هني اكثر من اسبوع نبي نولي واني تام الموضوع..
ابتسم تسعه وهز راسه بالموافقه..
🍃ومرعي بعد ماروح بعيلته من قصر ذهيبه تواصل مع راجل اخته وبلغه بالموافقه وختم بالمكالمه بعد ماحددوا يوم الفضانيه اللي حيكون اخر الأسبوع القادم...
نصيب..كله نصيب🍃
🌿ونصيب بلقيس وقيس من المواجع في هالدنيا كبير واعظم الابتلاء ديما يكون من نصيب القلوب البيضاء..
🌱"مانقدرش نطلع لمكان في وضعي هدا"
تسعه وهو شاد يد اخته بلقيس بإيديه الزوز قال..
/اول شي انتي بتطلعي مع العيلهلمكان يخص العيله تاني شي انتي حتكوني ملتزمه بالضوابط الشرعيه سوا كان في لبسك او تصرفاتك وبعدين بتقعدي طول الوقت مع النساوين يعني مش حتنكشفي ع راجل اجنبي عنك..
التزمت بلقيس الصمت وهي منزله عيونها والحزن مسيطر ع ملامح وجهها..
طبطب تسعه ع يدها وقال..
/بتمشي حبيبتي بتمشي وتغيري جوك وتبدي بالشويه بالشويه ترجعي تعيشي حياتك..الدنيا ماوقفتش حتى بعد موت رسول الله عليه الصلاة والسلام..مدام ربي مازال ماد في عمرك عيشي حياتك وربي ولدك،بإذن الله مازال في عمرك ايام حلوة تعيشيها..غير نظره لمتين اللي كان راقد وقال..تكبري هالعبرود ودخليه للمدرسه وتفرحي بنجاحه وتفرحي بتخرجه وتفرحي بشوفته عريس...رفع حاجبه اليسار وقال..يقولوا ثلتين الولد لخاله..مرات تشوفيه عريس اكثر من مرة..
ضحكت بلقيس من بين دموعها وتسعه يضحك معاها..
🌿وطلع من دار اخته بعد مارسم ع وجهها ابتسامه وهون عليها شويه من مواجعها..
ومن دارها توجه لجناح امه حتى هي قعمز هدرز عليها وضحك معاها وماخلاهاش الابعد مالنوم بدي يغلبها..
ويطلع من عندها ويتوجه للمصعد اللي رفعه للدور التاني..
بعد ماوصل للدور التاني توجه لجناح ولاده دار عليهم طلة لقاهم كلهم غارقين في النوم..قعد واقف يتأمل فيهم وعقله يفكر في تفسير الحلم..وهو يفكر كان يقول لنفسه..
"رد بالك ياتسعه تفرق بينه وبين خوته خليهم كلهم عندك سوا وخلي كل واحد فيهم يثبت نفسه بروحه وكان جيت بتساعد ساعدهم كلهم..وزي ماوصى بوي الله يرحمه خليهم يحبوا بعض اكثر مايحبوك انت"
تنهد وقال بصوت منخفض..
/يارب..
🌿ويطلع من عندهم ويتوجه لجناح خواتهم دار عليهم طلة غطى اروى اللي كانت محوله غطاها وطبع قبلة ع جبينها وجبين كريمه خدي نفس القبله قبل ليطلع من جناحهم ويتوجه للجهة اللي فيها اجنحة زوجاته..
الليله هادي كان دور نزيهه لكن هو قبل ليمشيلها حب يدير طلة ع ربيعه..
🌸ربيعه كانت مقعمزة ع السرير وهي مربعه رجليها وحاطه شعرها اللي كانت فارداته ع جنب شادة كتاب تقرا فيه ومن انسجامها معاه ماسمعتش صوت باب الجناح لما انفتح ولاسمعت خطوات تسعه ولاحست بيه لما وصل للدار ووقف في بابها..
بدت ع وجهه ابتسامه اعجاب حلوة وقعد واقف في مكانه يتأمل فيها..
عقد حواجبه وهو مبتسم لما سمعها تقول..
"مش قادرة نفهم قصده من الكلمات الصعبه اللي كاتبهم.."
نزلت الكتاب وقالت..
/تو نقول لحسناء تشرحلي معناهم..خل نوض ندسه هدا ونقرا الروايه خير مازال اسهل..ناضت ومشت للطاوله اللي عليها الكتب وهي تقول..
/وحده وحده ياربيعه وحده وحده ماتستعجلي ع شي..
خدت الروايه وشافت لعنوانها وهي مبتسمه بعدين قالت..
/قداش استاحشته...يللا نصبر لبعد غدوة وامري لله..
وتلف بترجع للسرير تجمد في مكانها من الفجعه لما تلقاه واقف وراها بالزبط..
ضحك وضمها وقعد يمسح ع ظهرها ويقول..
/اسف سامحيني..
ابتسمت ربيعه بحب وقلبها بيفر منها..
بعدها وهو شاد ذراعاتها بعدين قال بإبتسامه..
/شن حالك توا؟.
قالتله بحب..
/بشوفتك في احسن حال..
قرص خدها قرصه خفيفه وقال بإبتسامه..
/عجبك اللي جبتهولك؟
قالتله وهي مبتسمه..
/مدامه انت جايبه اكيد حيعجبني..
هز راسه وهو مبتسم بعدين قال..
/ماتعبتيش الايام اللي فاتوا؟
قالت وهي عاقدة حواجبها بإبتسامه..
/زي قبل تعب وحم ومشي ع حاله..
قاللها..
/باهي امتى الموعد متاعك؟
قالت:بعد اسبوعين..
هز راسه وهو يقول..
/امم كويس..باهي تعالي قعمزي هدرزيلي شن درتي واني مهناش..
شدت يده وقالت وهي مبتسمه برفعة حاجب..
/الليله مش دوري..
رفع حواجبه وهو مبتسم تعجبا..
وهي قعدت تشوفله بنفس النظره بدون ماتتكلم...
قاللها وهو متعجب..
/لو وحده من شريكاتك في مكانك مستحيل ضيع الفرصة هادي..
قالتله وهي مبتسمه بكبرياء..
/هما مش اني..اني ربيعه نفرق ع الكل..
ضحك وهي تشوفله بنفس الابتسامه.
هدا ضحك وقاللها..
/باهي شن مفروض نصدق توا كلامك هدا واللي سمعته بكري!؟
قالتله:صدق الزوز..وكانك عليا اني مانخليك تفارقني دقيقه لكن العدل لازم يتحقق واني نبي نعينك عليه بش ماتتحاسبش في جرتي..
تنهد بإبتسامه وهو يوزع في نظره ع المكان بعدين رد ليها وقال..
/فعلا تفرقي ع الكل..
ابتسمت بحب وهو قربلها وطبع قبله ع جبينها بعدين قال..
/تصبحي ع خير..
ردت عليه بنفس الابتسامه..
/قدامك كل خير..
لف ومشي وهي لحقاته لعند ماشافاته طلع من الجناح وسكر الباب..تنهدت وهي مبتسمه ابتسامه حزن بعدين قالت..
/كان نلقى ندسك في قلبي ونخليك دابي بس..الحمد لله ع كل حال..
🌿وهو بعد ماطلع من عندها قعد يفكر في كلامها وابتسامته ع وجهه لعند ماوصل لجناح نزيهه خدي نفس وفتح الباب وخش وسكره وراه...
🌿🌿🌿🌿🌿
تاني يوم..
ولأن قيس موجود فطر هو وياه في حديقه القصر..
بعد الفطور نادى ع واحد ولاده اللي كانوا يفطروا قراب عليهم..
"فاضل..فاضل"
ويجيه فاضل يجري..وصل فيه وقال..
/نعم بوي..
تسعه قال..
/برا ناديلي امك حسنا..
فاضل قال..
/امي الجديده اللي عيونها خضر؟
ضحك قيس وتسعه قال بضحكه..
/ايه..
فاضل قال..
/باهي..وانطلق يجري لباب القصر الرئيسي..
🌿🌿🌿
وتطلع حسناء مع فاضل للحديقه يلقوا تسعه بروحه واقف يراجي فيهم..
ابتسمت من قلبها لماشافاته كان موجه نظره لجهه معينه وين وصلوا فيه هي وفاضل لقاته يشوف لصغاره..
"بوي اهيا امي الجديده"
شافتله حسناء وهي متفاجئه وتسعه ابتسم وقال..
/هي اسبقنا لخوتك..
فاضل:باهي..ومشي بسرعه للمكان اللي قاعدين فيه خوته..
تسعه شاف لحسناء وقال..
/ارتحتوا في مكانكم الجديد؟
قالت بإبتسامه..
/ايه الحمد لله..
قاللها:ماناقصكم شي؟فيه شي مش عاجبكم؟
قالت:لالا ابدا..
هز راسه بعدين مشي وهو يقول..
/تعالي نعرفك ع الصغار ونعرفهم عليك هما شايفينك قبل ويعرفوا انك زوجتي لكن ماصارش بيناتكم هدرزة تعارف..
ابتسمت وهي ماشيه معاه لعند ماوصلوا فيهم..
بعد ماالقت التحيه وهما ردوا عليها خلاهم بوهم يعرفوا بأنفسهم وحسناء كانت مستمتعه جدا وهي تسمعلهم وتشوف في شكل العلاقه الحلوة بينهم وبين بوهم..
بعد ماتم التعارف من طرفهم هي قالت..
/اني اسمي حسناء تاشفين عمري 34سنه محاميه..
فاضل قال..
/وامنا الجديده..
ضحكت وتسعه قعد مبتسم..
وجه فاضل سؤال لبوه يقول..
/مازال بتجيب ام جديده؟
ضحك تسعه وقال..
/لاخلاص سكرنا العداد..4بس..
فاضل قال بأسف..
/خسارة..قبل نبي يولي عندي 10امات وكلهم حلوات..
ويضحك تسعه بصوت عالي وصغاره يضحكوا معاه ماعدا فاضل اللي كان مضايق من جده..
وحسناء تشوف لتسعه كيف يضحك وهي مندهشه وقلبها يرفرف...
وبعد ماخدي غايته في الضحك هدا ورجعلهم وهو يقول بضحكه..
/اضحك الله سنك ياولدي..
ابتسمت حسناء وهي تشوف لفاضل بعدين غيرت نظرها لمعاذ لما قال..
"حقه بوي امنا الثالثه قريب ماتت.."
اختفت ملامح الضحكه عن وجه تسعه وحلت محلها ملامح استغراب ممزوجه بالخوف وهو يقول..
/ربيعه!؟..
معاذ:ايه..
وجه نظره لسلامه وسلامه قاله..
/مش بالزبط اغمى ليها ورفعوها في المستشفى في اليوم اللي سافرت فيه وامس طلعت..
طول تسعه مشي بسرعه بإتجاه الباب الرئيسي للقصر وحسناء لحقاته وهي تقول..
/شفتها امس حالها باهي..
هو بغضب قال..
/ماقالي حد..حتى هي درقتها..
حسناء:ماتبيش تشغلك ع الفاضي..
خشوا للقصر وقف وقاللها..
/ناديهالي..
حسناء هزت راسها ومشت بإتجاه الجهه اللي فيها صالون العيله..
وقعد تسعه يستنى وهو معصب وقلق في نفس الوقت..
"تسعه"
وجه نظره ليها وقال..
/علاش ماقلتيش انك كنتي راقده في المستشفى؟
ربيعه وهي تحاول تحافظ ع هدوئها قالت..
/قتلك تعبت الايام اللي فاتوا..
قاللها بحده:لكن ماقلتيش رقدت في المستشفى..
تنهدت وقالت..
/باهي اني والعيل حالنا باهي مافينا شي هدا وحم تسعه في اللي يرقدوا منه في المستشفى بالاسابيع..
اشر بسبابته لنفسه وهو يقول..
/اني لازم نعرف مايدرق عليا شي..اشرلها وقال..حطيها في بالك هادي ياربيعه شن مايصير معاك مهما كان تافه لازم يكون عندي بيه علم اخر مرة درقي عليا حاجه..
خافت منه وخافت من زعله تعبوا عيونها بالدموع وهي تقول..
/حاضر..
هو لما شاف لون وجهها كيف تغير والدموع عبوا عيونها هدي غضبه شويه وقدملها حط يده ورا راسها وطبع قبله ع جبينها بعدين تباعد عنها وقال بهدوء مع ان ملامح الغضب قاعده ع وجهه..
/سامحيني..
قالتله بضيق..
/انت اللي سامحني..
مسح بيده ع راسها بعدين مشي بيطلع من القصر وهي قعدت معاها بعيونها لعند مادرق عنهم وقلبها مليان خوف..
🌿🌿🌿🌿🌿
وتمر الساعات وكان الوضع هادي تماما كل حد لاهي بالعالم متاعه لعند ماجي وقت صلاة العصر..
بعد العصر تسعه وقيس طلعوا من القصر بعد طلعتهم ببضع دقائق وصلت سيارة تيسير صديقة هانيه وحماتها وطلعت هانيه لحديقه القصر لإستقبالها..
بعدها بلحظات تطلع ربيعه شافتها وهي تسلم ع صاحبتها غيرت نظرها عنهم وهي مكمله طريقها ابتسمت من قلبها لما شافت عصمت وصديقاتها نوال وأمال خاشين قدمتلهم بسرعه وهي تقول..
/مرحبتين مرحبتين..
تيسير التفتت تشوفلهم وهانيه شافتلها بعدين غير نظرها ليهم وهي تغلي من الغضب..
تيسير ردت نظرها ليها وقالت..
/هادي عصمت شكلها جايه لمرت خوك الرابعه...
هانيه:تعالي نخشوا..
مررت تيسير نظرها ع صديقات ربيعه بشي من الترفع بعدين مشت مع هانيه اللي كانت تمشي وتتلفت تشوفلهم وهي في قمة الغيظ..
🌸"والله حتى اني استاحشتكم هلبه واستحشت لماتنا وهدرزتنا"
عصمت:الجو قنين اليوم كان تخلينا نقعمزوا برا..
نوال قالت..
/تي لاخاطري نشوف القصر من داخل..
عصمت:كز!! "بنت"
ضحكت ربيعه وقالت..
/نقعمزوا شويه برا بعدين نخشوا داخل..هي تعالوا...
ومشت وهما رافقوها لوحده من الطاولات والكراسي الموجودات في الحديقه..
..قعمزوا وهدرزوا وكلوا الحلو وشربوا العصير والشاهي والقهوة بعدين خدتهم ربيعة وخشت بيهم للقصر وهما خاشين تلاقوا مع هانيه وتيسير اللي جايين بيطلعوا..
تيسير:عصمت.
وقفت عصمت وهي تقول بإبتسامه..
/اهلا اللا تيسير..
وقفت معاها ربيعه هي وصاحباتها ومافي حد عبرهم وتيسير تابعت تقول لعصمت وهي مبتسمه تهكما..
/تعرفي لمني تجيبي الخدم ياعصمت..
امال ونوال شافوا لبعض بنظراتصدمة وربيعه تشوفلهم وهي مصدومة اكثر منهم بعدين ردت نظرها لتيسير وغضب الدنيا كلها فيها قدمتلها وقالت..
/من قصدك انتي!؟
هانيه فنصت فيها وتيسير رفعت حاجبها وشافتلها من فوق لتحت وهي تأشر ع صاحباتها..
ربيعه بغضب قالت..
/هادوا بنات ناس مايفرقوا عنك في شي كان في الديكور متاعك ومرات كان تحوليه ماتجي شي حداهم..
وبعد مارمقتها بنظرة احتقار مشت وهي تقول لصاحباتها..
/تفضلوا يابنات...
لحقوها وهما في قمة التوتر والضيق عصمت بعد ماشافتلهم ردت نظرها لتيسير وقالت..
/التصرف اللي درتيه توا مايليقش بيك يااللا تيسير انتي اكبر من هكي..وبعد ماعطتها نظرة ليها معنى لحقت ربيعه والبنات..
هدا كله وهانيه مصدومه من اللي صار معاش عرفت شن تقول ولاكيف تتصرف خوفها من خوها كان داير حاجز بينها وبين اي تصرف ديره يخلي الموقف اللي واخده منها يكبر..
شافت تيسير طالعه وهي تمشي بعصبيه لحقتها ووقفتها وهي تقول..
/تيسير تيسير..شدتها من مرفقها وقالت..
/تيسير نكلم فيك..
ردت عليها بإنفعال..
/بجديات مش عارفه كيف وحده زي هادي ولت وحده منكم كيف خوك خداها مش عارفه!
هانيه قالت بضيق..
/لو عندنا حكم عليه ماخليناه يديرها هالعمله السودا..
زفرت تيسير وقالت..
/ع العموم خلوا عيونكم عليها وع الشكالات اللي دخل فيهم للقصر..
هزت هانيه راسها وهي في قمة الضيق بعدين قالت..
/اسفه تيسير..
تيسير وهي تحاول تهدي نفسها قالت..
/ولايهمك حبيبتي خلاص صار خير صار خير..
🍃وبعد ماتسقد هانيه حماتها تولي تخش للقصر وتتوجه طول لأمها...
▪▪▪▪▪▪▪▪▪
"ماخلت ماقالتلها الجربوعه هادي ياماما غير ياريتها قالت غلط هي عندها الحق الجربوعات اللي جوها مناظرهم مناظر خدم واقل يخي"
قعدت زكيه ملتزمه و ع وجهها باديه ملامح الغضب..
"تفضلي ياعمتي..جاك كلامي..هدا اللي عييت واني نحكي فيه من قبل ماتجي المخلوقه هادي"
نزيهه قالت هالكلام وهي تشوف لزكيه وتابعت تقول..
/تيسير هادي مش بس صديقة هانيه توا ولت حماتها يعني هانيه انحطت في موقف زفت مع العيله كلها..
هانيه شدت ع قبضتي ايديها بقوة وصرخت صرخة غيظ مكتومه..
امها شدت يدها وقالت بقلق...
/ماما خيرك!
بلقيس قالت بضيق..
/هنو هدي روحك..
نزلوا دموع هانيه وهي تقول بإنفعال..
/كيف تبيني نهدا بعد هالموقف الحقير..الجربوعه هادي محسوبه عليا مرت خوي بسببها هي حنقعد متحشمه قدام متاعيني...
نزيهه تنهدت تنهيده ضيق مصطنعه وقالت..
/عندها حق..في وجوهنا كلنا المخلوقه هادي..
زكيه ضمت بنتها وقالت...
/انتي بنت سلامه بيت المال مافي شي يحشمك بنتي واللي صار هدا خليه عليا تو نعرف كيف نأدبها..
بانت مسحة ابتسامه مكر ع وجه نزيهه وبلقيس زادت اضايقت ع خاطر اختها..
وهدا كله صار وفريحه واخده وضعية المتفرج ومطلعه روحها من كل شي قاعد يصير..
🌿🌿🌿🌿🌿
"مرعي ياولد عمي اني جايك نطلب بنتك غزلان لخوي قيس ولد عمك وتعرفه كويس ويخي انت مربيه معانا مش حتلقى خير منه لبنتك"
مرعي وهو متفاجئ قال..
/والله ماعارف شن نقولك ياولد عمي..بنتي عطيتها..
تسعه قال بدهشه..
/عطيتها؟ امتى؟! وخيرك ماقلتش؟
مرعي قال..
/والله كله صار وانت مسافر والموضوع شبه تم امس عطيناهم الموافقه وحددنا موعد الفضانيه وتوا كنت ناوي نخبرك وكان انت ماجتنيش راني مشيتلك للقصر بش نخبركم ونعزمكم..
تبدلت ملامح وجه تسعه للأسف وهو ويقول..
/لمن عطيتها؟
قاله:لعامر ولد اختي كميله تعرفه..
هز تسعه راسه وهو يقول..
/ايه نعرفه شاب كويس لكن كيف بتعطيها توا البنت مازال صغيره..
مرعي قاله:توا بيعطوا فيها كلمه لعند ماتطلع من الثانويه نديروا الفرح ان شاء الله..
ابتسم تسعه وهو يحاول يخفي ضيقه بعدين قال..
/كل شي قسمه ونصيب..ربي يبارك ويتمم ع خير..
مرعي وهو مبتسم بأسف قال..
/ان شاء الله..ويعطي قيس خير منها..
🍃ويروح تسعه من معرض ولد عمه وهو مضايق للغايه بدون مايشرح قيس كان باين في عيونه حبه لغزلان الحب اللي شافه تسعه وخلاه يتخيل ردة فعله لما يعرف ان البنت اللي يحبها ولت لغيره..
وان اختلفت الظروف وجع خوته التوأم واحد..الفقد..وهدا اللي زاد ألم قلبه عليهم...🍃
🌿🌿🌿🌿
"بالله عليكم يابنات سامحوني."
نوال بضيق:خلاص ياربيعه معاش تبكي ماترعشيش روحك..
امال قالت بضيق..
/انتي حامل ربيعه مش باهي ليك الغشاش..
عصمت قالت بحزن..
/اسمعي كلام صاحباتك يابنتي..
ضمت ربيعه صاحباتها بالوحده وهي تبكي بصمت..
عصمت قالت..
/مرة تانيه تلاقوا عندي وخلاص..
امال:ايه احسن شي..
عصمت قربتله سلمت عليها بالخد بعدين قالت..
/خلاص خشي داخل مغاريب..
ربيعه بنبرة باكيه قالت..
/حاضر..بالسلامه..
كلهم بأصوات متقاطعه ردوا عليها..
/بالسلامه..
ولفت ومشت خشت بسرعه وهي تبكي مابتش تركب لجناحها مشت طول توجهت لمكتب تسعه وصلت في ممر المرايات وقفت وقعدت تبكي بحرقه وكتمان تراكمت عليها الاهانات اللي حاولت تتجاهلهم طول الفترة اللي فاتت بس اللي صار اليوم كان القشة التي قصمت ظهر البعير..
حاولت تهدا وتتماسك بش تكمل طريقها للمكتب خدت نفس بعدين مشت طلعتمن ممر المرايات وقدمت قعمزت ع الكرسي اللي كان موجود قريب ع باب المكتب..
🌿في نفس الوقت..
لما طلعوا عصمت ونوال وامال من الباب الرئيسي للقصر خشت سيارة تسعه شافوه وهما طالعات..قالت عصمت.
/اسبقوني للباب يابنات لاحقتكم..
هما شافوا لبعض بعدين مشوا لبوابة القصر وقعدت عصمت في مكانها تراجي في تسعه ينزل من سيارته..
نزل تسعه وهو يشوف فيها كيف واقفه سكر الباب ومشي ناحيتها وهي قدمتله..
وصل فيها وقال..
/عصمت..
قالتله:شن حالك يابيي..
قال وهو مستغرب في حالتها اللي تبان حالة غضب..
/الحمد لله..كنتي عند ربيعه؟.
هزت راسها بإيجاب بعدين تنهدت وقالت..
/انت خديت ربيعه من حوشي يابيي لما خطبتها بعتت من يطلبها مني اني..معناها اني في مكان امها وعيلتها كلها لايمكن نرضى حد يوصل فيها...
هو بدي يعصب قاللها..
/قولي اللي عندك طول ياعصمت..
قالتله:يابيي كل شي واضح المراة هني مش لاقيه قدر ولااحترام قاعدين يعاملوا فيها زي الشغاله ولاكأنها مرتك توصل بيهم وين تمرض وتتعب يبعتوها مع الخدم للمستشفى! وتقعد فيه تلاته ايام مافيهم حد زارها كان مرت البي مرعي ومرت البي محفوظ! وفوق هدا كله صاحبة اللا هانيه هانتها وهانت صحاباتها اللي جوها يزوروا فيها لأول مرة بعد تزوجت روحوا مكسورات الخاطر ومنهانات وهي انهانت اكثر منهم..هدا كله يصير فيها وهي مرتك انت يابيي!؟..ابتسمت بتهكم وقالت..ماهو كان وراها حد ماكانش هدا حالها لامعاك ولامعاهم..
ومشت وخلت تسعه بركان ع وشك الانفجار التفت وناداها.
"عصمت"
وقفت والتفتت شافاته ينادي بغضب..
/بلعيد..بلعيد..
جاه بلعيد يجري وهو يقول..
/نعم يابيي..
قاله:وصل عصمت هانم واللي معاها لحياشهم..
عصمت قالت..
/مش لازم..
قاطعها وهو يقول بحده..
/عصمت..
سكتت وهي مضايقه بعدين غيرت نظرها لبلعيد لقاته ركب وحده من السيارات بعدين حركها وجاها بيها هي التفتت اشرت للبنات جوها طول وركبوا مع بعض وطلع بيهم بلعيد من القصر..
بعد ماطلعوا خش تسعه للقصر وهو في قمة الغضب..
🌿"شادين جناحهم هي وخالتها "
زكيه:مازال يبوا وقت بش يتعودوا..
نزيهه:يتعودوا ع ناس دون ناس الصبح كله وهي مع هديكا وبعد ماهديكا ركبت لجناحها هي خدت خالتها وتسقدوا طول لجناحهم..
فريحه:ع راحتهم يانزيهه..
زكيه:زي ماقالت فريحه ع راحتهم..
نزيهه:باهي اني بنسكت ومعاش بنتكلم بكل ونخليكم تشوفوا بعيونكم..
زكيه قعدت ساكته وهي تفكر في بنتها وكلام نزيهه..
ولحظه الصمت هادي كسرها صوت تسعه الغاضب وهو يقول لزوجاته..
"مانبي حد يقعد هني غير امي"
بسرعة نزيهه وفريحة ناضوا وطلعوا من دار المعيشه..
وهو سكر الباب وراهم..
🍃فريحه بخوف..
/خيره اللطف!
نزيهه وهي رافعه حاجبها قالت..
/واضحه هديكا الثعاله عبت راسه دارت جو نتغدا بيهم قبل ليتعشوا بيا..ومشت بطريقها للصالون وفريحة لحقتها وهي تفكر في كلامها بخوف..
...................
تسعه وهو واقف قدام امه وحاط ايديه ورا ظهره قال..
/يام..اني مني وصيت قبل لنسافر مني اللي وصيته ع ربيعه بالذات قبل لنسافر!؟
قالتله بهدوء عكس اللي يدور في داخلها..
/وصتيني اني واني من غير ماتوصي مسؤولية كل من قاعد في القصر في رقبتي اني لما تغيب والشي هدا من ايام بوك الله يرحمه وعمري ماقصرت في حق مسؤولياتي..
قاللها:ايه هدا علاش بعتوها للمستشفى مع الخدم وخليتوها غادي تلاته ايام ولاعدلتوا عليها ولادورتوها نتصل ونسأل عنها مرة تقولوا راقده مرة تقولوا مع الصغار وهي ملوحه في المستشفى مافي حد منكم مدورها..
امه التزمت الصمت وهي تشوفله بتهجم خالطه شي من الخوف..
بأسف قال..
/ماوجعتي من حد غير منك انتي يام...انتي بس..
حرك راسه يمين ويسار اسفا بعدين مشي فتح باب الغرفة وطلع..
فات من قدام الصالون شافوه فريحه ونزيهه وقعدوا معاه بعيونهم لعند مادرق عنهم بعده تطلع زكيه وهي معصبه ودموعها في عيونها فاتت من قدامهم ماتشوف في شي غير في نظرات ولاده وماتسمع في شي كان في كلامه..
وعيون نزيهه وفريحه معاها لعند ماتوارت عن انظارهم..
نزيهه:ريتي بالله ريتي خلاته يولي حتى ع امه..
تأففت فريحه بخوف بعدين قالت..
/حتى حني مشينا في القص راهو..
شافتلها نزيهة شويه بعدين غيرت نظرها عنها وهي تفكر..
🌿وهو قعد بغضبه الشديد ماشي بإتجاه مكتبه ديما في حالة الغضب يفضل يقعد فيه بعيد عن الجميع..
واول ماوصل غادي يتفاجئ لما يشوف ربيعه مقعمزة وهي مربعه ايديها وعيونها يشوفوا للفراغ والدموع تنزل منهم..
قدملها بسرعه قعمز قدامها ع رووس اصابعه وقال..
/ربيعه..
ربيعه قالت بنبرة باكيه..
/نبي نقعد معاك ارجوك حتى شويه..
بدت ع وجهه ابتسامة عطف وود..وقف ع حيله وخداها من ايديها ونهضها بهدوء وقال..
/تعالي..
ابتسمت من دموعها وخشت في حضنه وهو ضحك وحط يده ع كتفها بعدين مشي بيها لباب المكتب طلع من المفتاح وفتحه خش هو وياها وسكر وراه الباب..
...يتبع....
(سامحوني تعبانه جدا ماقدرتش نكتب اكثر من هكي)
