■■■■■■■■■■■■■■■■■■■■■
🌿"عندما تتذوق الصعوبات في حياتك سيُصبح عقلك أكبر من عمرك بكثير فكل أذى هو مستوى جديد من النُضج ومن لا يتألم لايتعلم"🌿
•••••••••••••••••••••••••••••••••••••••••••••••••••••••••••
في المكتب..
ع الكنبة مقعمز شاد كتاب في يده يقرا فيه بصوت مسموع ليها هي اللي كانت متوسدة صدره تتأمله بنظراتها الهايمه وقلبها يرفرف بالمشاعر الحلوة حواليه..
" لا يتصل بروحها شيء إلا نبت واخضرَّ ثم نوَّر وأزهر، كأن طبيعة الجمال خبأت في قلبها سرّ الربيع. وهي الصافيةُ كرقة النسيم والناعمةُ كملمس الماءِ والضاحيةُ كطلعة الشمس؛ فإن غضبت بدَّلت النسيمَ قيظاً والماءَ ظمأً والشمس الطالعة غيماً يلفُّ نهارَ الحب في مُلاءَة ليل أسود..! "
بعد ماقري المقطع هدا من كتاب رسائل الأحزان للرافعي نزل الكتاب وقاللها..الكلام يوصفك بالزبط..
ابتسمت بحب وقالت..
/أني هكي؟
شافلها وقال..
/امم..عندك حالتين وكل وحده فيهم مناقضة للتانيه..مرات نشوف فيك ارق من النسمه ومرات نشوفك اقوى من عاصفه لو هبت تمسح كل شي قدامها..والحالة التانيه هادي ماتكونيش عليها الا في الوقت والظرف المناسب..ابتسم وهو يشوف لعيونها لحظات..زي توا..عيونك الحلوات اللي يغزلوا في الحب غزل باينه فيهم النظرة اللي حبيتها فيك..نظرة القوة..
نزلت وهي مبتسمه بخجل..
باس راسها بعدين قال..
/خليك ديما متفكرة انك زوجة تسعه بيت المال..زوجتي يعني نصي التاني يعني اني،ماتخلي حد يتمادى عليك من كان يكون،وفي حال ماقدرتيش ديري حد بروحك تعاليلي اني طول نديره..
هي تباعدت عنه شويه وقالت..
/ماحد تمادى عليا الا السفيهة اللي قتلك عليها وماخليتهاش تبرد فيا عطيتها ع راسها ووريتها حجمها..
🍀ضحك بعدين ضمها وهويفكر كيف مازال درق اللي داروه اهله معاها..المواقف هادي تبين معدن المراة كويس..المراة اللي تحاول تتحمل في نفسها في سبيل الحفاظ ع علاقة راجلها بأهله..وطبعا لما يكون الزوج صالح ودايرلها قيمة وقدر ومايرضاش فيها شي الراجل اللي زي هدا المراة مستعدة تتحمل لخاطره كل شي..🍀
تنهد بعدين قال..
/وتي روحك غدوة بإذن الله بنتسقدوا للقاره بولي..
تباعدت عنه وهي تشوفله قالت بمفاجأة..
/غدوة؟
هز راسه بإبتسامه بعدين قال..
/ايه..بنديروا للصغار حفلة نجاحهم وتاني يوم يروحوا وحني نكملوا باقي الاسبوع غادي وبعدين نروحوا طول لحوش مرعي فضانية بنته نهاية الأسبوع ..
ربيعه وهي متفاجئه قالت..
/بالله!
هز راسه وهو مبتسم بأسف..
لاحظت ابتسامته وقالت..
/خيرك؟
تنهد بضيق بعدين قال..
/كلمني عليها خوي قيس قالي اخطبهالي..
بدت ع وجه ربيعه ملامح الأسف..
وهو متابع يقول..
/واضح من عيونه يبيها من جده مش عارف كيف بنقوله مالكش قسم فيها وبتولي من نصيب غيرك..
ربيعه قالت بحزن..
/وجعوني..
قعد يشوفلها بصمت..
وهي كملت تقول..
/هو واخته حظهم بالهون..
قال بشي من الألم..
/اني هدا اللي قاهرني..
حطت ربيعه يدها ع خده وقعدت تمسح ع لحيته وهي تقول..
/بعيد السو عليك من القهرة..معليشي هادي الدنيا دار ابتلاء..وربك بعد ياخد يعطي خير من اللي خداه وحتى هما تو يدير معاهم زي مادار معاي اني وعوضني احلى عوض..
ابتسم بعدين قربها ليه وباس راسها وهي مغمضه عيونها وهايمه بمشاعر حبها اللي قاعد يكبر كل لحظه..
دق الباب تباعدت عنه وهو ساوا جلسته بعدين رسم ع وجهه ملامح الجديه وقال..
/تفضل..
انفتح الباب وخشت تعويضه وهي تقول..
/العشا واتي يابيي..
قاللها:جيبيلي اني واللا ربيعه هني..
شافتله ربيعه وهي متفاجئة وتعويضة قالت..
/حاضر يابيي..ومشت طلعت وسكرت الباب وراها..
ربيعه وهي تشوفله قالت..
/تسعه..
قاطعها لما رفع يده بعدين قال بإبتسامه..
/من اليوم وبرا غادي مدامني فاضي مافي حد يهتم بيك غيري..
ابتسمت بحب وهي تشوفله كيف رفع الكتاب وقال..
/بنرفع معاي هدا بش نكملوه مع بعض ونشرحلك الكلمات الصعبه..
ضحكت وقالت..
/تفاهمت اني وحسنا اي حاجه مش فاهمتها ولانبي نعرفها هي تعلمهالي..
رفع حاجبه وقال..
/انسجمتوا مع بعض..
قالتله:هي طيبه ومتواضعه مراة متعلمه حق العلم اللي متعلماته باين فيها..
ضحك بعدين هز راسه وقال..
/كويس كويس..
قالتله بإبتسامه..
/بجديات يازين مااخترت..
رفع حواجبه وهو مبتسم تعجبا..
قالت بضحكه..
/والله نحكي من جدي..زيها هي زي فريحه..عقدت حواجبها وقالت..وحتى نزيهه مش خاطيه..هزت راسها وقالت..كويسه كويسه..
ضحك من قلبه وخداها لقلبه وهي تضحك معاه..
🌿ونزيهه الكويسه قاعده تغز عليكم في الملح ياربيعه مش غير هي بس هانيه أشر منها بالذات بعد عرفت ان خوها زعل أمه ولأول مرة يديرها في حياته ع خاطر وحده زي ربيعه حسب وجهة نظرها،ومابتش تتعشى لين تعشت امها معاها في جناح زكيه وقررت تبات حداها..
🌿🌿
"تصبح ع خير"
تسعه بإبتسامه..
/قدامك كل خير..
خشت ربيعه للمصعد وبعد تسكر بابه عليها وركب بيها رجع تسعه من جديد للمكتب..
🍃وتوصل ربيعه للدور التاني ولما جت طالعه من المصعد جت قدامها فريحه..
فريحه غيرت نظرها عنها وهي رافعه حاجبها.. طلعت ربيعة وهي تشوفلها كيف خشت للمصعد..تنهدت بضيق بعدين مشت بطريقها لجناح البنات..
🌿في مكتب تسعه..
كان تسعه مقعمز ورا الطاوله يشوف في اوراق تخص اشغاله..
دق باب المكتب وهو يعرف كويس من صاحب الدقة برغم اللي صار لقلبه تجاهل شعوره وقال بنبرة جافه..
/تفضل..
انفتح الباب بهدوء وخشت فريحه وهي تشوفله كيف مركز بنظره ع الورق وع وجهه باديه ملامح التجهم..
سكرت الباب وقدمت وقعمزت ع كرسي مقابله وهي تقول..
/حبيبي..
قام عيونه وشافلها بإمتعاض..
فريحة بحزن..
/مابيتش نقولك بش مانشغلكش بس..
نزل عيونه للورقه اللي شادها بدون مايتكلم..
قعدت تشوفله بضيق للحظات بعدين قالت بإنفعال..
/عارفه روحي غلطت لكن مش بيدي مش قادرة نتحملها مش قادرة نقبل المراة اللي خداتك مني..
نزل الورقه وشافلها وهو يسأل بإستغراب..
/خدتني منك!؟..علاش هي بشني زايده عليكم سوا انتي ولانزيهه؟
فريحه قالت بدموع..
/اللي نعرفه اني بروحي عندك..في قلبك مافي حد يقدر ياخد مكاني لكن من بعد ماخديت هادي كل شي تغير..
حط ايديه ع بعض فوق الطاوله بعدين قال..
/اول شي هادي عندها اسم..ربيعه..تاني شي مافي حد ياخد مكان حد عندي وانتي تعرفي الحاجه هادي كويس..مانبيش نرجع نعاود نفس الدوة يافريحه اعرفي كيف تحافظي ع اللي انتي الوحيده قدرتي تكسبيه مافيش وحده يفزلها قلبي زيك انتي فريحه لعند اليوم قاعده فيه زي ماانتي واني لو شفتيني عطيت لشريكاتك اكثر ماعطيتك لأني قاعده نعوض فيهم عن الحب اللي في كل وقت يكون ليك منه النصيب الأكبر وانتي زابطه الحاجه هادي كويس..
نزلوا دموعه وهي تقول..
/نظرة عيونك وين تشوف لنزيهه ولحسنا ماتشبهش النظرة اللي تشوف بيها لربيعه حتى ماتشبهش نظرتك ليا اني انت تحبها ياتسعه ماتكذبش ع روحك وعليا..
سكت وهو يشوفلها بصمت..
اشرت عليها وقالت..
/هاه سكتت وسكاتك هدا اكبر دليل..
قاللها:سكتت لأني ماعنديش رد يقنع مراة الغيره واكله قلبها وعاميه بصيرتها..
ببكي قالت..
/تو طلعت عندك عمية البصيرة!
ضحك غصب عنه بعدين ناض من مكانه وجاها..
قعمز قدامها ع رووس اصابعه بعدين شد ايديها وقال..
/والله والله نحبك حب مالاش زيي..وكلمة نحبك مافي مراة سمعتها مني غيرك وربي يشهد..
هدت بكي بعدين قالت..
/باهي قولي شعر زي زمان.
ضحك وقال..
/زي زمان!؟ امتى بطلت نقولك في الشعر اني؟
حركت راسها بالنفي وقالت..
/نبي نسمع منك زي ما كنت نسمع فيه زمان..
ابتسم وقعد ساكت شويه بعدين قال..
"سكنتَ فؤادي منذ أولِ نظرةٍ
وما زلت في لُبِّ الفؤادِ تجُوبُ!"
بدت ع وجهها ابتسامه من وسط دموعها هو مسحهم وقال بضحكه..
/مهبوله..
عقدت حواجبها وضرباته ع يده ضربه خفيفه ضحك وقال..
/ونحبها..
رجعت ابتسمت مرة تانيه وهي منزله عيونها خجلا وهو يضحك عليها..
🌿🌿🌿🌿🌿
"غدوة!؟"
التساؤل هدا طلع في وقت واحد من كريمه واروى لربيعه بعد ماخبرتهم عن موعد حفله النجاح وهي ضحكت وهزت راسها بإيجاب..
نزلت كريمه من سريرها وجتها تجري ضمتها وقالت..
/نحبك ماما ربيعه...
حضنتها ربيعه وهي تقول بإبتسامه والدموع في عيونها..
/حتى اني نحبك هلبه..
وتنزل اروى من سريرها وتجيها حتى هي ضمها مع كريمه وهي تقول..
/حتى اني نحبك..
ربيعه قالت بضحكه..
/ياحليلي ع اللي يحبوني محلاهم ياناس..
🌸وقعدت معاهم تحكيلهم في قصة جديده عاشوا معاهم بخيالهم الواسع لعند ماجاهم النوم ورقدوا..
طلعت من حداهم وهي حاطه يدها ع بطنها تقول..
/مش عارفه ليش حاسه انك بنيه قلبي يقولي هكي..ان شاء الله تطلعي بنيه بش نديرك امي ووخيتي..
خشت للممر اللي يرفع لجناحها سمعت اصوات هدرزة تسعة وفريحه..ابتسمت بحزن..
وهالابتسامه تبدلت للبرود لما قابلتها ضرتها الكبيرة وهي جايه من الممر المقابل اللي يرفع لجناح الولاد...
الزوز تلاقوا في ممر واحد وقعدوا يمشوا ورا فريحه وتسعه بمسافه..
نزيهه وهي مبتسمه بمكر قالت..
/مهما ديري ماتقدريش تغيري لون الشمس..
رفعت ربيعه حواجبها وقالت..
/لون الشمس!؟
قالت نزيهه..
/حب تسعه لفريحة زي لون الشمس عمره مايتغير..
ابتسمت ربيعه بنفس البرود ولما وصلت في جناحها فتحت الباب وهي تقول..
/حاجه ماقدرتيش تغييرها انتي..التفتت وكملت تقول..صعب نقدر عليها ياشيهانه نقعد ثعاله..وابتسمت بإستفزاز وهي تقول..تصبحي ع خير..وسكرت في وجهها الباب..
غمضت نزيهه عيونها بغضب بعدين فتحت ولفت ومشت كملت طريقها لجناحها...
🌿🌿🌿🌿🌿
في صباح اليوم التالي..
في كوجينة القصر..
كانت تعويضه تجهز في الفطور ومجيده تساعد فيها وحداهم هنادي مقعمزة تغني مع الراديو..
"حبيت لون الورد لاتلوموني"
صوتها كان نشاز مجيده معكرشة وجهها وهي تسمع فيه اما تعويضه اللي كانت مبتسمه قالت..
/زاهيتلك الحمامه هنادي هانم..
هنادي قالت..
/وليس ماتزهالي واني بنمشي نقعد اسبوع في مزرعة سيدي سلامة الله يرحمه اللي يقولوا عليها زي الجنة!
قالت تعويضه..
/بتعدي تخدمي مش دهواري ره..
هنادي:عارفه ياحسديه عارفه المهم نمشي غادي..
"هنادي"
قالت:خش يابلعيد..
مجيده زادت عكرشت وجهها بتقزز مش طايقه بلعيد اكثر من اخته لأنها ملاحظه عينه عليها..
ويخش بلعيد ومعاه جمال اللي لما شافاته هنادي وقفت استعداد..
هو بملامح وجه جامده قال..
/صباح الخير..
التفتت مجيده وقعدت تشوفله بلهفه ونظرتها هادي لاحظها بلعيد وضايقاته..
تعويضه وهي مبتسمه بإرتباك قالت..
/صباح الخير..
بلعيد قال..
/بالله زوز قهوة ليا اني والافندي..
مجيده وهي مبتسمه قالت..
/شن هي قهوتك جمال؟
شافلها بنظرة متجهمه وهو يقول..
/وسط..نبي هنادي ديرها..
ضحكت هنادي وقالت..
/حاضر..ومشت بسرعه بش تجهز القهوة..
بلعيد قال لجمال..
/قعمز قعمز والله الجو هني مليح خير من قعادك بروحك برا..
قدم قعمز وهو ساكت وبلعيد قعمز معاه..
🍀اول مرة يخش جمال للكوجينه وكان مجبور لأنه شاف بلقيس تدهور بولدها في الحديقه ماقدرش يقعد واقف برا🍀
🍃وبلقيس وهي تتمشى وولدها يلعب حواليها كانت تغنيله في اغاني اطفال باللغة الانجليزيه ودموعها ينزلوا الأغاني هادم كانت تغنيلها فيها امها في صغرها..
وهي تمشي وهايمه مع ذكرياتها شافت خوتها واقفين ع بعض يبان تسعه يتكلم وقيس يسمع فيه..
🍃"مافيش نصيب"
قيس بلع ريقه وقال..
/علاش!؟ ع خاطر فرق العمر!؟ ولا لإنها مازال صغيرة!؟
حط تسعه يده ع كتف خوه وقال..
/كل شي نصيب ياخوي ونصيب حد ماياخده حد..
"البنت انخطبت لولد عمتها"
عمره في حياته ماحس بألم يشبه الألم يحس بيه حاليا الجملة اللي قالها خوه كانت وكأنها سكينه طعنت قلبه وقاعده تحفر فيه بلارحمه ولاشفقه..
قعد يشوف لخوه بصمت حتى وجهه كان بلاتعابير..
شد تسعه ع كتفه وقال..
/معليشي ياخوي قسمة ونصيب ربك يعطيك خير منها..
غير قيس نظره عن خوه ووجهه يمينه للجهه ترفع لحوش الحبيبه اللي حبها حب شديد حتى لنفسه مش قادر يوصفه..بنبرة مخنوفه قال..نصيب..إن شاء الله يطلع يستاهلها..رد نظره لخوه بعدين ابتسم بألم وقال..
/صحيت ياخوي..ومشي هارب بدموعه اللي يكره يوريهم لعيون البشر وخوه يتبع فيه بنظره وهو موجوع ع حاله..
"تسعه"
التفت وقال بإبتسامة حزن..
/جبنه..
هي قالتله:خيره قيس؟
قاللها:قايلك انه حاط عينه ع بنت مرعي؟
هزت بلقيس راسها بحزن..
هو قال:البنت مخطوبه..
قالت بنبرة باكيه..
/عرفت وماقدرتش نقوله..
قاللها وهو مستغرب:زوجة مرعي خبرتكم؟
قالت وهي تمسح في دموعها..
/غزلان خبرتنا وهي فرحانه..
بدت ع وجه تسعه ملامح الاسف ضم اخته لحضنه ونزل نظره لولدها اللي كان شاد في يده وردة صغيرة ويشوفلهم..ابتسم بحزن..
🌿🌿🌿
ويجي وقت الفطور اللي قيس ما حضراش لأنه طلع من القصر لحوش محفوظ ولد عمه..
وترأس تسعه الجلسة ع طاوله الطعام اللي ماغاب عنها حد..
كان ياكل بدون مايشوف لحد فيهم وامه كذلك كانت تاكل بصمت وعيونها في الماكله..
بنتها كانت مرة تشوفلها هي وتسعه بضيق ومرة تشوف لربيعه بحقد..
وربيعه لاهيه بالهدرزة مع حسناء وخالتها ونزيهة وفريحة يسرقولهم في االنظر..
كمل تسعه وقال..
/الحمد لله...وبعد مسح فمه بالفوطه ناض وهو يقول..ماشي للقاره بولي بنقعد اسبوع غادي بيمشوا معاي ربيعة والصغار..
انصدمت فريحه ونزيهه تشوفلها..
هو شاف لربيعه وقال..
/كان كملتي فطورك نوضي جهزي نفسك..ومشي طلع من حجرة الطعام وربيعه بعد مااستأذنت مشت طلعت وراه..
حسناء وخالتها حسوا ان في شي مش طبيعي صار توا.
حسناء ركزت بالنظر ع هانيه وفريحه بعدين شافت لنزيهه..
وخالتها بعد مررت نظرها عليهم ثبتاته ع زكيه اللي قالت بإبتسامه..
/في عندنا زوز مزارع في القارة وحده كانت لسلامه الله يرحمه والتانيه لولدي تسعه..ع ايام سلامه الله يرحمه كان يرفع فينا اني وضرتي رحمة الله عليها غادي..بالدور اخر سبوع من كل شهر وتسعه خدي منه هالعاده وهادي اول مرة تمشيلها ربيعه..
نبيهه قالت بإبتسامه..
/ماشاء الله ماشاء الله..
زكيه قالت..
/ان شاء الله اخر الاسبوع بنزردوا فيها كلنا..
نبيهة قالت بضحكه..
/الله مغلا عليا جو الزرادي..
..وهما يهدرزوا واللي حواليهم يفطروا في حالة صمت من غير نيه ماعدا حسناء اللي كانت تاكل عادي وعيونها مرة مرة يشوفوا لنزيهه..
🌿وبعد ماجهزت ربيعه نفسها مشت لجناح البنات لقت برنيه تجهز فيهم قعدت تساعد لعند ماكملوا بعدين طلعوا مع بعض..
قابلوهم الولاد جايين من الجهة التانيه تلاقوا وقعدت ربيعه تهدرز معاهم وهما يهدرزوا عليها معاذ اللي ماقدرش يتقبلها هلبه زيهم..
وقبل ليطلع تسعه من القصر خدي ربيعه من يدها ومشي لأمه اللي كانت مقعمزة في مقعدها المفضل في الحديقه..
هي كانت تشوفلهم ولما قربوا يوصلوا فيها ابتسمت وقالت..
/احسن حاجه درتها ولدي ترفعها تغير جوها وتخليها تشم هوا نظيف..
ابتسمت ربيعه وتسعه يدوب ابتسم وقال..
/بري سلمي..
قدمت ربيعه لزكيه طبست باست ع راسها بعدين قالت...
/بالسلامه عمتي..
زكيه قالت بإبتسامه..
/بالسلامه بنتي بالسلامه..ردي بالك ع روحك..
ربيعه وهي مبتسمة قالت..
/حاضر..
تسعه قدم لأمه طبس باس ع راسها وقال..
/ربي يحفظك ويطول في عمرك ماتنسيناش من الدعاء..
قالت وهي مبتسمه ولمعة الدمعه في عينها..
/ربي يحفظكم بحفظه..
قاللها: بالسلامه يام..استودعناكم..قرب لربيعه خدي يدها ومشي بيها وهي كانت في قمة الفرح ونظرات زكيه الممتعضة تلحق فيهم..
🍀وطلعوا اربعة سيارات من القصر..
سيارة جمال في مقدمتهم وراكب جنبه واحد من افراد الأمن المسؤولين عن حماية تسعه وعيلته..
ووراهم سيارة تسعه جنبه ربيعه ومعاهم كريمه واروى ..
وبلعيد وراه في سيارة كبيره رافع فيها هنادي والولاد
واخر سيارة كان فيها باقي افراد القوة الامنية..
🍀في سيارة تسعه..
🌱تسعه:بيجي هو والصغار مع اني مانحبلاش شبح وجه لكن ع خاطر بنتي بنتحمل ثقل دمه..
ربيعه قعدت تضحك..
تسعه وهو مبتسم شاف لبناته من المرايه وقال بصوت مضحك..
/كركر ورور..
ضحكوا البنات وربيعه تضحك معاهم بدموعها..
🍀اما في سيارة بلعيد كانت شغاله فرقة غنائيه بقيادة هنادي..
"يا سواق اجري ع المية
ماتخافش ع البتارية
سواقنا مااقنينته
يبي حلوى مينتا
يا سواق اجري ميتين
ما اتخافش على العجلتين
سواقنا ماقنينته
ربي يخليله اميمته
ي سواق اجري ع الألف
ماتخافش ع الباب الخلف
سواقنا محلاه
لابس شبشب حناه
سواقنا يابي
نبو رحلة لوادي الحي
ياسواق عطيك حويتة
لاعوص بينا ف السليطة "
والولاد يردوا وراها وهما يصفقوا ويضحكوا وخوها يضحك وهو يحرك في راسه يمين ويسار...
🌾🌾🌾🌾🌾
ومن التسعاويه للبنداريه..
تجديدا قدام حوش كمال البندار..
درست سيارة مرسيدس نزلت منها مراة لابسه فراشيه ونزل بعدها ولدها..
انفتح الباب وطلع كمال استقبلهم بحرارة بعدين خدي الراجل دخله للمربوعه والمراة طلعتلها فطيمه..
🌱"ميمتي مرحبتين مرحبتين"
الحاجه دلالة "ام فطيمه" وهي تحضن في بنتها قالت..
/رحب بيك بنيتي..
اخت فطيمه طلعت وراها وهي تقول..
/يما..
شافتها امها وهي تحضن في فطيمه قالت..
/انتي هني يامنسرفه؟
ضحكوا بناتها...
🌾وبعد السلام الحار دخلوها للصاله..
فطيمه طبقت فراشية امها وهي تقول..
/استاحشتك هلبه يام..
قالت:حتى اني استاحشتكم هلبه ،درت ع خاطركم عركه اني وبوكم لقلب السمي قتله بنمشي لبناويتي نشوفهم نفرهد ع رويحتي شويه..قالي راهو نحلف بالطلاق قتله احلف..هبط في مكانه وقال...ماتقعديش اكثر من اسبوع..
بناتها ضحكوا وهما يسمعوا فيها بعدين فطيمه..
/اه وكان يعرفوا الناس اللي يخافوا من بوي كيف يولي قدامك يام..
امها قالت بإبتسامه وحاجبها مرفوع..
/بري دسي الفراشيه بري..وانتي ديريلي قهيوة..وضبحولي ع الولاد نشوفهم..خيرك ماجبتي معاك الصغار انتي!؟
قالت بنتها:غير وحده وحده عليك يام..جبتهم جبتهم..وبدت تنادي في صغارها وصغار اختها وفطيمه مشت بفراشية امها وهي تضحك..
🍀دلالة ام فطيمه..مراة شخصيتها قويه وواعرة ع قولتنا لكن قلبها كبير وطيبه ويدها سخيه..عيبها الوحيد عقليتها اللي كانت مؤيدة لعقلية راجلها في هلبه حاجات ومنهم عدم تقبلها لتعليم البنات،عندها مآل البنت لحوشها وراجلها ولازم تكون ام لصغارها ومراة لراجلها وبس لاتتعلم ولاتحقق ذاتها بأي شكل كان..وهادي كانت عقليه اغلب الناس في البنداريه وماجاورها من ضواحي الألف وخمسين زي ضاحية السوق العالي وضاحية تانيه اسمها باب الورد اللي يسكنوا فيها عيلة فطيمة🍀
🌿🌿🌿🌿
"قصدك كنتي تعرفي؟"
نزيهه:ايه لكن مش منه ولامن عمتي عرفت من بنتي وحتى هي ماقالتهاليش اني قالتها لغاده بنت اختي..تعرفي امس اتصلت بيا بدريه اختي قالت راجلك كلم راجلي وعزمه للمزرعه مع الصغار..قالتلي كيف الحفله للصغار بس قلتلها ايه لكن رفع معاه ربيعه بش ترد بالها من الصغار..
ابتسمت فريحه تهكما والدموع ينزلوا من عيونها وهي تقول..
/وهي صدقاتك؟
ابتسمت نزيهه تهكما..
فريحه قالت..
/علاش ماقلتيش؟
نزيهه:عارفه ردة فعلك حديري تصرف يجي ع راسك..ارجوك فريحه حكمي عقلك شايفه الوضع لوين وصل ولا؟خلاته يعارك عمتي ع خاطرها!كيف اني وانتي!؟..ماتعطيش لهديكا فرصة يافريحه خليك ديما برا المشاكل خليه يشوف راحته عندك انتي بس فاهمه عليا؟
فريحة فكرت في كلامها شويه بعدين هزت راسها بإيجاب..
🌿🌿
ويعدي هاليوم بأجواء غايه في الروعه في المزرعه الحفله كانت بسيطه لكن مبهجه هلبه لعبوا فيها العاب حركيه وعقليه وهدرزوا وضحكوا..
كريمه كانت في قمة الفرح وغاده بنت خالتها عجبها الجو هلبه وحبت ربيعه عكس معاذ اللي كان حاس بالغيره من كريمه اللي شايف انها ماتستاهلش يديروا ع خاطرها هالحفله..
اما بوه فكان عبد الرزاق راجل بدريه ع قلبه زي الجبل مش طايقه بالمرة لكن اضطر يجامله ع خاطر نزيهه وبنتهم كريمه..
🌿وقبل المغرب بشوية روح عبد الرزاق بصغاره وقعدوا تسعه مع مرته وصغاره برواحهم..
🌱سلامه:كان تعاودها مرات ومرات ياكينج
ضحكت ربيعه..
هشام:دير زي توا اللي تجيبها هني جيبنا معاها نقعدوا يوم ونروحوا..
تسعه وهو مبتسم قال..
/نفكر..
فاضل قال..
/امي هادي بس جوها مليح جيبنا معاها هي بس..
شافله معاذ بربع عين والباقي كان بين المبتسم وبين اللي يضحك..
شويه سلامه قال..
/بوي عندي سؤال وان شاء الله مايكونش بايخ..
هشام قال:ماتقولاش..
سلامه ضربه ع قفاه وقال..
/اسكت انت ضحكوا باقي خوتهم ع هشام اللي كان يتحسس في قفاه وهو يشوف لخوه بإمتعاض..
تسعة وهو مبتسم قال..
/ياودي اسأل..
سلامه حمحم وقال..
/تو مش انت مسمي امي نزيهه وامي فريحه اسماء تانيه وزي ماسمعت منهم سميتهم الاسماء هادي من اول ماتزوجتهم علاش ماسميتش امي ربيعه لتوا..
وينط فاضل ويقول..
/اسمها ثعاله..امي نزيهه تقول عليها الثعاله..
سلامه وهشام قعدوا يفنصوا في فاضل اما معاذ شاف لربيعه بمكر عكس باقي الصغار اللي كانت نظراتهم عاديه..
ضيق تسعه عيونه وقال..
/ثعاله؟
معاذ هني تكلم وقال..
/امي تقول عليها ثعاله مكارة..
شاف تسعه لربيعه لقاها تشوف لمعاذ وهي مبتسمه بأسف..
حاول يغلب ملامح الغضب بإبتسامه مصطنعه وهو يقول..
/توا وقت العشي قولوا لهنادي تعشيكم بعدين صلوا العشي وارقدوا..
ناضوا كلهم والكبار منهم قالوا..
/حاضر..
ومشوا كلهم للكوجينه وين مافي هنادي..
وهما ماشيين هشام ريش معاذ من شعره وسلامه ضرب فاضل ع فقاه وكل واحد منهم تحسس الضربه من غير مايتكلم تعلموا يحترموا خوتهم الكبار...
🍀"مازال لتوا مالقيتش لقب يليق بيك"
قالتله بإبتسامه..
/لإنك مازال ماتعرفنيش كويس..
قال بإبتسامه..
/لامش هكي..نزيهه عطيتها لقب بعد قريب عام من زواجي منها وفريحه من اول شهر لقبتها..
ضحكت وغيرت نظرها القدام..
عقد حواجبه وقال بإبتسامه..
/علاش ضحكتي؟
ردت نظرها ليه وقالت..
/الحق مش هامتني حكايه الالقاب ولامرة فكرت فيها نهائي..
بنفس الابتسامه قال..
/مش مهمه قصدك؟
قالت:مافي حد ولافي شي مهم عندي غيرك..سادني اللي وليت مرتك وحصلت منك الاحترام والقدر وخديت مكين صغير في قلبك..الباقي كله عندي زايد..
ابتسم من قلبه بعدين قال..
/مع هذا اني حنديرلك لقب..
قالتله بضحكه..
/اللي تبيه ديره يابيي قلبي انت..
ضحك بعدين قال..
/تي تعالي تعالي..خشت لحضنه وهي تضحك وهو ضمها وقال بإبتسامه...ربي يباركلي فيك..
هي قالت:ومايحرمني منك عمري كله..
🌾🌾🌾🌾🌾🌾
"يام اني مش زيك مانقدرش نولي زيك"
دلالة قالت بعصبيه..
/وعلاش ماتقدريش شن ناقصك؟
نزلوا دموع فطيمه وهي تقول..
/يام اني عمري ماحسيت روحي مرته يعامل فيا زي الجاريه نلبيله طلباته ونعطيه حاجته ونربيله صغاره بس،عمره ماشاركني في حاجه ولاخدي رايي في شي حتى الدبش اللي نلبس فيه عمري مااخترته..خنقتها العبره وقعدت تبكي واختها تشوفلها بحزن..
اما امها قالت..
/كلام فاضي..العيشه اللي عايشتيها انتي ياما منهم تمنوها واحد سيد بين ناسه معيشك في عز احمدي ربك لتوا مادارش ديرة جماعتهم ولاهداكا ولدعيت بيت المال وخدي عليك بدال الوحده تلاته...
ببكي قالت فطيمه..
/ياريتني طحت في راجل زي تسعه بيت المال وكان نحصل راجل يقدرني ويديرلي شان زيه راضيه بيه ياخدهم عليا في ليلة وحده..
امها قالت..
/لاانتي هبلتي مرة وحده..
قالت ببكي وضيق..
/يام اني نشكيلك وخلاص مانبي شي تاني...
ضيقت امها عيونها وقالت..
/حامل؟
وهي تبكي قالت..
/ايه..قتله يراجي شويه لين يكبر عمران ماباش يعدل عليا ودار مافي راسه..
اختها قالت..
/جبتي عمران وسلطان بيخش 13عام راهو..
امها قالت..
/قوليلها دماغ الحيط هادي انتي ناسيه ان البنداريه عندهم لعنة في جياب الصغار راجلك هدا امه ماقدرتش تجيب غيره ولاد في جرة اللعنه هادي عنده حق يدير الصغار امتى مايبي ويكثرهم..
فطيمه قعدت ساكته ودموعها ينزلوا..
تنهدت امها وقالت..
/ارضي بنصيبك بنتي ارضي بنصيبك وقولي الحمد لله..
مسحت دموعها وقالت بنبرة استسلام..
/الحمد لله...
🌿وكل واحد في الدنيا ماياخد غير نصيبه لكن قيس ماقدرش يتحمل ضياع غزلان منه ماقدرش يقعد في البلاد اكثر من هكي كان يبي يهرب بخيبته وعن سببها ومعاش يولي نهائي جرحه العميق خلاه مايفكر في شي غير في
الهروب لهدا حجز تاني يوم في رحلة للندن وسافر من غير مايودع اخته..واخته عاذراته هي نفسها تبيه يبعد بش ينسى..
🌿وفي نفس اليوم روح بلعيد بالصغار للقصر وطول استلموهم حناهم وامهاتهم وعمتهم وقعدوا يحققوا معاهم وعاد شن يسكت معاذ وفاضل كله عاودوه بالتفصيل..
زي ماعاودت غادة لأمها حتى هي تفاصيل يوم الحفله ومابطلتش مدح وشكر في ربيعه وبدريه تسمع بإستمتاع..
🌿وربيعه كملت باقي ايام الاسبوع مع تسعه وكل مالها تزيد تغرق في حبه،وهي تكبر مكانتها في نفس تسعه وقلبه اكثر واكثر..
..في أخر يوم ليهم في القاره بولي..
كانت مرافقاته لرحلة صيد في وحده من الغابات تشوفله كيف يقنص بمهارة ومافيش طير طاير فلت منه..
"خاطري نتعلم"
شافلها وهو مبتسم بدهشه..
قالت بضحكه..
/نحكي جد..بالله عليك علمني ماتخليهاش في خاطري راك تنسى اني حامل..
ضحك بعدين قدملها خداها من يدها وقال..
/تعالي..
..ويروح بيها للمزرعه وغادي بدي يعلم فيها الاساسيات
بعدين حط اهداف وبدي يضرب فيهم قدامها وهي تراقب بدقه..
بعد كمل بحماس قالت..
/تصدق لو تحطلي هدف توا نصيبه..
قال بضحكه:غير اهدي اهدي ماتستعجليش..
قالت:انت جربني وشوف..
قاللها:مش زي ماتشوفي زي ماتجربي..
قالت بإلحاح..
/انت غير جربني شن بتخسر.. حرك راسه بالرفض وهو مبتسم بعدين مشي حط اهداف تانيه بش يضربها...
بعد ماحطهم رجع لمكانه وهي واقفه ومربعه ايديها وتشوفله بإبتسامه جانبيه كيف يصوب بسلاحه ع الاهداف ويصيبها بدقه..
لما قعد منهم الهدف الاخير علت صوتها تقول..
/خليهالي..
نزل سلاحه وشافلها بإبتسامه بعدين مدلها البندقيه..
قدمتله وهي تمشي بثقة واعتزاز زي عادتها..
خدت منه السلاح وهو عطاها مكانه وقال..
/وريني شن تعلمتي..
بإبتسامه تحدي قالت..
/افتح عيونك زين وتفرج..
غيرت نظرها للهدف شافتله شويه بعدين رفعت السلاح وحطاته في وضعيه مناسبه للتصويب..
ركزت الهدف كويس..وسحبت..بعدين اطلقت بإتجاه الهدف وصاباته بدقه..
هو ابتسم وعيونها توسعوا من الدهشه..
وهي نزلت سلاحها والتفتت عليه تقول بإبتسامه نصر..
/شن رايك!؟
بضحكه قال..
/سرحانة..
ضحكت بإستغراب وقالت..
/سرحانه؟
قاللها بإبتسامه..
/انثى الذيب اسمها سرحانه..
بدت ع وجهها ابتسامه اعتزاز ورجعت شافت للهدف اللي صاباته وهو يتأمل فيها بنظره ويتفكر في اول لقاء بيناتهم برغم الحاله اللي كانت فيها لمعت في عيونها زي النجمة وهاللمعان قاعد لهاللحظه زيد في القوة والسطوع..
قربلها خداها من يدها ومشي بيها لمقعد قعمزها عليه بعدين قعمز في جنبها وقال..
/ربيعه..شن عندك من احلام غير القرايه تبي تحققيه؟
بإبتسامه قالت..
/عندي هلبه قداش تمنيت من ربي يديرلي معجزة بش نحققهم..
قاللها:شن هما؟
تنهدت بعدين قالت..
/نبي نفتح مدرسه نعلم فيها البنات بس كل بنت ظروف عيلتها صعبه ندخلها للمدرسه هادي ونصرف ع قرايتها من جميع النواحي..عارفه حاجه زي هدا صعبه وتبي تخطيط كويس بش يصير منها وتنجح لكن هادي اكثر حاجه نتمناها..
وهو مبتسم بإعجاب قال..
/وشن تاني؟
ضحكت وقالت..
/قبل كنت نتخيل لو ربي هكي يديرلي معجزة يخليني نولي غنيه زيكم..والفلوس اللي عندي ندير بيهم المدرسه اللي قتلك عليها..وندير بيها مشروع يخدموا في النساوين اللي يعولوا في عايلاتهم..
سرحت بعقلها في ذكريات ماضي قريب مؤلم وهي متابعه تقول.. يكفيهم حاجتهم ويخدموا فيه بكرامتهم..لايراجوا في صدقه من حد ولاشفقة من حد..شافتله وقالت..مرات الكلام اللي بنقوله توا يزعلك شويه..زمان كنت نشوفلكم بنظرة مش حلوة..نشوف فيكم ناس ساكنين في ابراج عاليه يشوفوا فينا من فوق وكان جو بيساعدونا يحدفولنا الفضله متاعهم ولايعطونا من طرف جيبهم وعند ارواحهم هكي داروا حاجه كبيره..
ايه اني نعذر بعض الناس اللي مستواهم المادي مايسمحلهمش بأكثر من هكي..لكن اللي زيكم شن عذرهم قدام ربي لما يسألهم عن بحر الفلوس الغارقين فيه شن داروا بيهم؟
كان مشدود جدا لكلامها كلام اول مرة يسمعه في حياته خلاه يحس بمجموعه من المشاعر ع راسهم الصدمه ومن ثم الاحراج...
هي غيرت نظرها عنه وقعدت تمرر فيه القدام وكملت تقول..
/ربي ماعطاكمش في الدنيا بش تتمتعوا بس هو يختبر فيكم اكثر شي..في القران تكلم عن الزكاة هلبه وديما يجيب فيها مع الصلاة لأنها زيها بالزبط تنظف النفس وتزكيها وطلع منها الكبر والانانيه والغرور..يبيكم تحسوا بغيركم من الناس المعدمه في الدنيا هادي وتساعدوهم زي ماهما يساعدوكم بالاجر اللي يجيكم من وراهم..
اللي زيكم مفروض يديروا مايخلي هالدنيا متوازنه فيها الغني والفقير لكن مايكونش فيها المسكين والمعدم..
مفروض تفتحوا مشاريع تساعدوا بيها الناس المحتاجه مفروض في وجودكم مايكونش في ناس تبات بالليالي جعانه..وفي الشتي مرات تموت صقعانه..مافي حد ياكل فضلة غيره ويخسر كرامته ع خاطر لقمة العيش..
شافتله وقالت والدموع في عيونها..
"راهو هدا كله بتتحاسبوا عليه زيكم زي اللي ياكل في رزق الحرام بالزبط"
غير نظره عنها وهو مضايق ومحرج..
قربت منه وخدت يده شدتها بإيديها الزوز وهي تقول بإبتسامه..
/سامحني..مش قصدي نوجعك لكن كلام قعد سنين في قلبي وماصدقت طلعته..
رد نظره ليها وابتسم بعدين خدي يدها وباسها وطول وهي تشوفله ودموعها ينزلوا..
رفع راسه مسح دموعها وقال..
/كلامك حق..صح وجاع لكن كان لازم نسمعه..بس في كلمه معاش نبيك تقوليها..زيكم..معاش نبيك تفصلي نفسك عني وعن أي شي يخصني..
بإبتسامه حب وقالت..
/نقول فيها بس نسمعها اني ونقعد مذكره شن كنت ومن وين جيت مانبيش ننسى، لإني كان نسيت ننسى الاحلام اللي قتلك عليها كلها ومعاش تبدا تعنيلي في شي...
تنهد وقال..
/ياريت نقدر نزيد سبوع تاني..
ومع بعض قالوا..
"لكن تحقيقا للعدل لازم نروحوا غدوة"
بعد سكتوا ضحكوا وهي من كثر ماضحكت حطت راسها ع كتفه بعدين حضنت ذراعه وقالت بحب..
/نحبك هلبه..
ابتسم بود بعدين باس راسها...
♤زيكم وزينا..عيب امي الوحيد الماضي متاعها..الماضي اللي خلاها في نظري حتى اني مش مناسبه لبوي ع خاطرها هي بالدرجة الاولى لأن هالفرق ماخلاهاش تعيش معاه متهنيه برغم الدلال اللي غرقها فيه..ماضي امي قعد ملاحقها مهما صارت ولوين وصلت بعدين،هلبه ناس ماكانتش تشوف لهدا نهائي كانوا بس يفكروا فيها بماضيها..الله يرحم ايام ماكانت وكانت...هادي اكثر جمله انقالت في حق امي..وللأسف هالماضي خلاها تعيش محرومه سنين طويله من اكثر حاجات تمنت تكسبها في حياتها برغم العز اللي كانت عايشه فيه مافي شي قدر يغنيها ع اللي خسراته غصب عنها...
🌿فعلا ماضي البنادم يقعد لاحقه لأخر يوم في عمره ماضي اثقل من حذاء الطنبوري اللي بعد ماظن نفسه انه تخلص منه قعد ملاحقه لعند ماخسره خساير فادحه..
🌾🌾
وسط الحوش مقعمزات يبرموا في الكسكسي وهما يغنوا في اغاني افراح..
دلالة وبناتها وحليمه مرت الزقطي وخديجه مرت الساعدي ومعاهم مسعودة اللي كانت هادي اول جيه ليها بعد ماتزوجت..
حداهم بمسافه في المربوعه..
كانوا سلطان ومحرز يتفرجوا ع فيلم من افلام الآكشن والاثارة وهما منسجمين معاه تماما..
خشت عليهم جليله تمشي دبه دبه لين وصلت في سلطان وقعمزت جنبه حطت يدها ع ذراعها وقعدت تقوله بلغة طفوليه..
"العب"
هو شافلها بمفاجأه وقال..
/زربوطه!شن ديري هني؟!..
محرز وهو يشوف للتلفزيون بحماس قال..
/غير شوف هيا ياراجل شوف..
رجع ركز مع الفيلم وجليله جنبه مدت شفايفها القدام بزعل وغضب وربعت ايديها..
🌾في وسط الحوش..
دلالة:اني باهيه والناس قالوا عوجه..
هما يردوا وراها..
"هييه ياهييه"
دلالة:هما البحر وانا عليهم موجه..
"هييه ياهييه"
وكيف جو بيكلموا باقي غناهم جمدوا من الفجعه لما سمعوا صوت ضرب رصاص متواصل قدام حوشهم..
🌾في المربوعه ناضوا سلطان ومحرز اللي قال..
/شني هدا!؟
وحداهم جليله تبكي من الخوف..
شافلها سلطان طبس ضمها ورفعها وطلع بيها يجري لوسط الحوش..
"اطلع ياكمال البندار اطلع واجه كانك راجل كانك سيد البندرايه اطلع"
سمع سلطان الكلام وولعت في قلبه نار الغضب حط جليله حدا النساوين وقاللهم..
/نوضوا خشوا داخل..خشوا لدارك يام وسكروا عليكم..
ناضوا وهما يرعشوا ويسمعوا صوت ضرب رصاص تاني عيطوا ع طول حسهم..
سلطان قاللهم بصوت زي الرعد من الغضب..
/تي خشوا داخل تحركوا..
دلاله طول خدتهم وخشت بيهم وفطيمه وهي ماشيه كانت تلتفت تشوف لولدها بخوف لقاته ولى يجري للمربوعه..
🌾خش سلطان للمربوعه وتوجه طول لحيط كانت معلقه عليه قماشة كبيرة حولها ونزل من تحتها "كلاشن" ومشي طول ومحرز لحقه...
🌾في هالوقت كمال كان مع رجاله في السوق الكبير جاهم واحد يجري وهو يقول يهلع..
/الحق يابيي حوشك هجموا عليه..
جبد كمال الراجل من قميصه وقال..
/شن تقول!؟
قاله بخوف..
/والله شفتهم مسلحين يابي قدام حوشك بالزبط..
طلقه ودفه وطلع يجري ورجاله وراه...
🌾واللي جاي هاجم علي حوشه بدي ينفد في اقتحامه للحوش وهو يدف في بابه الخارجي مع جماعته..
...ومن فوق السطوح...
كان سلطان مدرق يشوفلهم ويعد فيهم..
خدي نفس وهو يفكر في كلام بوه اللي مرة قاله..
"اللي يتعدى ع حرمتك اقتله طول ماتراجيش دمه حلال هدا"
ويوجه الكلاشن عليهم ويبدا يقنص فيهم واحد واحد..
هما حاولوا يردوا لكن سلطان كان ذكي جدا وبوه مدربه كويس وعنده الجرأة والشجاعه اللي تخليه يقدم ع شي زي هدا رغم صغر سنه..
محرز:انزل انزل هادم يصلوا وخلاص..
سلطان قعد يفكر شويه بعدين نزل..وصل لروشن في الدروج فتحه شويه بانوا عليه كانوا زوز بس اللي مانصابوش ركز عليهم كويس وقنصهم ورا بعض..
محرز شافه وقال بضحكه..
/صحة ليك..
وسلطان قاعد يراقب وقلبه من داخل يرجف..
🌾ع جية بوه مع جزء من القوة اللي عنده شافوا سيارتين قدام الحوش قال كمال بغضب...
/كيف سولتلهم انفسهم كيف!
وصلوا قدام الباب ونزلوا بسلاحاتهم ويتفاجئوا لما يلقوا خمسه مطروحين ع الأرض فيهم اللي فاقد وعيه مش معروف حي ولاميت وفيهم اللي يأن من وجع الاصابه..
غير كمال نظره للباب ونادى بصوت عالي..
"سلطان"
لحظات وطلع سلطان وفي يده الكلاشن ومحرز وراه ..
نزل سلطان عيونه لضحاياه شافلهم بإزدراء ودفل "بصق" عليهم..
بوه قال بإبتسامه فخر..
/تعالى ياقسورة تعالى..
شاف لبوه وهو مبتسم بعدين قدمله وضمه وبوه حضنه بقوة وهو يبوس في راسه..
...يتبع....
