#ولاد_تسعة "الفصل الاول/سميه تسعة"
#جمان_فريد
الجزء_التاسع"صراع على العرش"
⛔احداث هذه الروايه وشخصياتها من وحي الخيال بعض الاحداث غير واقعيه"فنتازيه" وبعضها بعيد عن واقعنا المعاش والبعض الاخر يلامس شيء من الواقع⛔
⚠️ملاحظه..
لما يبدا الكلام بهذه الرموز (♤ ♧) هذا يعني ان البطل/ة يسردوا في الأحداث..
اما لما يبدا بهذا (🌿) يعني الكاتبه هي اللي تسرد..
#الصلاة_على_النبي
وفي الصلاة على النبي ﷺ فضلٌ عظم ، لا يزهد فيه إلا محروم.
- ابن حزم.
■■■■■■■■■■■■■■■■■■■■
🌿" من الصحيح يا سيدي ان الفقر ليس رذيلة... ولكن ارتضاء الهوان رذيلة.. وقد تكون فقيرا ولكنك تظل محتفظا بكبريائك الطبيعية.. أما إذا فرطت في كرامتك، فلن تجني شيئا، بل أن الذي يرتضي الهوان هو أول من يحتقر نفسه " .
- الجريمة والعقاب / ديستويفسكي🌿
•••••••••••••••••••••••••••••••••••••••••••••••••••••••••
في النادي..
كانت هانيه مقعمزة مع صديقتها "تيسير" وهما يتبادلوا في الأحاديث وفي نفس الوقت يستنوا في جية "معمر" أخ تيسير..
وع الموعد درست سيارة معمر في موقف السيارات متاع النادي..
نزل منها وفي يده باقة ورد انيقه وجميله وبعد سكر سيارته توجه للمكان اللي فيه اخته مع هانيه..
🌱"قريب ان شاء الله يبدا تنفيذه"
تيسير قالت بإبتسامه..
/موفقه حبيبي..
هانيه رفعت حاجبها وهي تقول بإبتسامه..
/هادي اول حاجه بنشرطها ع خوك خدمتي مستحيل نسيبها..
تيسير ضحكت وقالت وهي تشوف لجهة معينه..
/ولد الحلال عند ذكره..
هانيه قالت:جي؟
تيسير اشرتله وقالت وهي مبتسمه..
/اهو جاي هني..
هانيه كانت جدا متحمسه وملهوفه لكنها اخفت هالمشاعر ورا قناع التكبر والغرور..
معمر وهو جاي مانزلش عيونه من عليها قلبه كان يبي يسبقه ليها وكانت لهفته عليها كبيرة وحتى هو زيها هي اخفى هالمشاعر بستار الكبر والثقل..
وصل فيهم وقال..
/مساء الخير..
ردوا عليه وهانيه كانت يدوب تشوفله..
ناضت تيسير وهي تشوفله بإبتسامه بعدين قالت..
/خل نمشي نشوف خالد..خدت شنطتها ومشت وخلتهم..
معمر ابتسم ومد لهانيه الباقه وقال..
/تحبي الورد؟
خدت الباقه وهي مبتسمه بتكبر وقالت..
/امم..
مشي قعمز مقابلها وحط رجل ع رجل وقعد يتمعن في تفاصيل ملامحها من ورا النظارات وهو يقول..
/كيف حالك..
حطت الباقه ع الطاوله وقالت..
/الحمد لله كيف حالك انت..
معمر قال:الحمد لله..عظم الله اجركم .
هانيه:اجرنا واجرك..
عقد حواجبه وقال..
/لولا هالظروف اللي صارت رانا متزوجين توا..
ضحكت وقالت..
/لا وين ماشي بيها الثقه هادي؟ من قالك نوافق عليك؟
ضحك ضحكه خفيفه بعدين قال..
/وشن اللي يخليك ترفضي؟
قالتله:مرات ماتخشليش خاطر ومرات ماتوافقش ع شروطي وغيرهم من الاسباب..
بإبتسامه قال..
/ع النصيب..
وهي مبتسمه قالت..
/صح..
سكتوا شويه هانيه قعدت تمرر في نظرها ع المكان وهو يتأمل فيها قلبه كان يفر فران من سرعة دقاته مايبيش هاللقاء ينتهي الا وهي موافقه عليه بس في نفس الوقت ماكانش يبي ينزل من نفسه ليها ومع هذا هو اللي بدي بالأسئله..
"علاش اطلقتي؟"
السؤال كان مؤلم بالنسبه لهانيه واجابته ممكن تخليها تبان ناقصة قدامه لكنها جاوباته عليه بكل صدق بعد ماوجهت نظرها ليه..
/كانت عندي مشكله في الانجاب تبي علاج مدته طويله وهو ماتقبلش وقالي يبي يتزوج واني طبعا رفضت وطلبت الطلاق..
قعد معمر يشوفلها بصمت ولما طال صمته قالت هانيه بإبتسامه ثقه مزيفه..
/معاش طلع صوتك!..
غير نظره عنها ووجهه لولد خوه اللي كان يلعب بكرة المضرب وهانيه تشوفله ومن داخلها كانت موجوعه هلبه لهدا قالت..
/بالك تحسابني كان تراجعت عن الموضوع بعد اللي عرفته بنزعل ولانضايق بالعكس..مالكش في الطيب النصيب..
وجهلها نظره لقاها تشوف لخالد وهي مبتسمه بغرور..
ضحك بعدين قال..
/شن شروطك هانيه؟
شافتله وقالت..
/شروط صعبه مش اي راجل يقدر عليها..
كل ماله قلبه يزيد سرعه وقوة في النبض ومشاعره اتجاهها تكاد تطلع عن سيطرته بلع ريقه وقال بإبتسامه..
/شن هي؟
هانيه قالت..
/زي ماتعرف اني خريجة اعلام وحاليا نخدم في وزارة الثقافه،من قبل عام تقريبا جهزت لبرنامج تلفزيوني اجتماعي حيكون تحت رعاية الوزارة وقعدت نخدم عليه الفترة هادي كلها وقريب جدا نبدا في تنفيذه وحنكون اني المقدمه متاعه..
بإبتسامه قال..
/ماعنديش مشكله وبإذن الله حندعمك بالرعاة التجاريين..
بدت ع وجه هانيه ابتسامه فرح حلوة زادت جننت قلب معمر فيها تلقائيا تنهد تنهيده ماتبانش الا من حركه صدره..
غيرت نظرها عنه وهي مبتسمه بغرور بعدين قالت..
/اني عشت عمري كله في الدلال ماندير شي في حياتي غير خدمتي بس..طبعا نحب السفر هلبه ونحب المخالطه وتكوين الصداقات مع ناس ننسجم معاها من كل النواحي..ردت نظرها ليه وقالت..طبعي مش اي راجل يقدر يتلايم معاه..
ضحك وهو يوزع في نظره ع المكان بعدين شافلها وقال..
/شروطك كلها موافق عليها واللي تبيه اني فيه..
رفعت حاجبها وهي تقول بإبتسامه..
/امم..باهي انت ماعندكش شروط؟
قال وهو مبتسم..
/لا..
تنهدت بعدين قالت.. /عطيني يومين نفكر ونرد عليكم..
ضحك وهو يمسح ع لحيته بعدين هز راسه وقال..
/ok..
🌿🌿🌿🌿🌿
وفي القصر..
تحديدا في الممر اللي يرفع لديار زوجات تسعه كانت تعويضه ماشيه بإتجاه جناح ربيعه ومعاها بنت عمرها 17عام اسمها"هنادي"..
هنادي جت مع خوها "بلعيد"لقصر تسعه بش يشتغلوا فيه.. هي حتكون من ضمن الخدم وخوها حيكون من ضمن موظفين القصر يعني حيخدم في أي شي يطلبوه منه..
"هذى جناح اللا ربيعه"
هنادي اللي كانت عايشه حالة ذهول من اللي شافاته من اول ماخشت القصر لما سمعت شن قالت تعويضه قالت بتلقائيه..
/الجناح هدا كبر شقة عيت عمي اللي كنا عايشين فيها عيلتين مع بعض..
"اني كنت عايشه في تريله مازال اصغر من الجناح هدا"
وجهوا انظارهم لربيعه اللي كانت طالعه من الدار وهي تشوف لهنادي بإبتسامه..
تعويضه قالت..
/هذي هنادي يااللا.
هزت ربيعه راسها وهي تمرر في نظرها عليها بعدين قالت..
/منين ياهنادي؟
هنادي وهي محرجه قالت..
/من طرابلس ياللا..
هزت ربيعه راسها وهي مبتسمه بعدين قالت..
/تقدري تمشي تشوفي شغلك ياتعويضه..
تعويضه هزت راسها وهي تقول..
/حاضر..بعدين مشت طلعت من الجناح..
ربيعه شافت لهنادي وقالت..
/حتقعدي ملازمتيني لبعد الولاده ياهنادي..
هزت راسها وقالت..
/تنوضي بالسلامه ياللا..
ربيعه وهي مبتسمه قالت..
/الله يسلمك..تعالي معاي..مشت بإتجاه الصالون اللي جنب الدار في الجناح وهنادي لحقتها..
🌿"كيف يعني جابهالها هي يبيها تولي نديمتها؟"
زكيه قالت..
/نديمتها شني انتي التانيه!؟..يبيها تخدمها في فترة حملها بس..
نزيهه:ولمن داره هدا قبل ياعمتي؟
زكيه قالت..
/نزيهه ماتبديش فيه..
نزيهه وهي تحاول تتحكم في اعصابها..
/ياعمتي هدا الحق..لما حملنا خلانا انا وفريحه نراعوا بعض ونخدموا بعض وبعدين فريحه كانت تعاني فيها واني نعرفها فريحه مستحيل تقصر معاها..
زكيه قالت..
/فريحه ماسكه مسؤولية الصغار مع القصر هلبه عليها تقعد تعاني هدا كله..
سكتت نزيهه وهي تغلي من الغضب..
زكيه وهي تشوف لحالتها قالت..
/نزيهه بنتي راك تنسي الكلام اللي قلتهولك قبل ردي بالك ديري تصرفات طيحك من عيون تسعه وتخليه ينفر منك يابنتي خليك زي ماعرفتك مراة عاقله حكيمه تعرف تتصرف وتخلي كل شي يجي لصالحها..
تنهدت نزيهه بضيق وقالت..
/مش قادرة نقبلها ياعمتي مش قادرة كيف وحده زي هادي تولي ضرتي اني وحده زي هادي تجي علينا اني وفريحه..
والله لما جاب الزواريه وقال بيكمل معاها لااضايقت ولاوجعتني لأنها زينا من توبنا بنت عيله وناس عينها شبعانه ومتعلمة تعليم عالي لكن هادي شني ياعمتي هادي وحده عاشت عمرها في الفقر خدامه في الحياش وامها كانت خنابه وياما طلعت عليها من دوة،اللي زي هادي ياعمتي لما تعيش في العز تتنمرد تولي زي الغوله تبي تاكل بس وبش تعوض النقص اللي عندها وتحافظ ع المكان اللي وصلتله تبدا تخطط بش تسيطر ع كل شي..
..الكلام اللي تقول فيه نزيهه دعم كلام هانيه اللي سمعاته زكيه الليله اللي قبلها وهكي زاد شعور القلق في نفسها لكن مع هذا قالت..
/حتى لو كان كلامك صح راك تنسي من واخده لو كانت هكي حق مستحيل تعدي ع ولدي تسعه ومايزبطهاش..
نزيهه قالت بإبتسامه تهكم..
/معقوله مش ملاحظه تسعه قداش تغير من لما خداها مش ملاحظه شن دار وشن قاعد يديرلها بش يرضيها!؟..ياعمتي تسعه يقعد راجل مش صعب ع وحده زي هادي تسيطر عليه..
سكتت زكيه وهي تفكر في كلامها اللي خلاها ترتاب هلبه وخلا القلق يبدا في السيطره عليها ونزيهه تشوفلها وهي تدعي في نفسها تقتنع بكلامها وتفهم عليها...
"هاي"
شافوا لباب الصالون لقوا هانيه خاشه وهي مبتسمه بفرح قعمزت جنب امها باستها من خدها بعدين قالت..
/شن جو زوزو؟.
نزيهه قالت بإبتسامه..
/شكلها الامور مشت تمام؟
ضحكت هانيه وقالت..
/ان شاء الله خير..
زكيه وهي مبتسمه قالت..
/يعني نقولوا ع بركة الله..
هانيه هزت راسها وهي مبتسمه..
ضمتها امها وقالت..
/ربي يهنيك ويسعدك بنيتي..
نزيهه قالت..
/ربي يتمم ع خير هنو..
هانيه قالت بإبتسامه..
/آمين..
زكيه بعدتها شويه وقالت..
/المهم فهمتيهم ان ماناش دايرين شي قبل لتطلع وخيتك من العده..
هانيه قالت..
/من البدايه وضحت لتيسير وقلتلها تطلع اختي من العده بعدين نديروا خطوة رسميه..
"لامش لازم هنو"
وجهوا انظارهم لبلقيس اللي خشت بولدها وهي تقول بإيتسامه..
/خليهم يديروا خطوة رسميه توا وبعد نرمي العده ديري عرسك..
زكيه قالت..
/لاعرس شنو بنتي! عيب حتى في حق حياة امك الله يرحمها..
قعمزت بلقيس بولدها وهي تقول..
/ماما الله يرحمها كانت تقول بعد نموت مانبي حد يحزن عليا..شدت دموعها وهي تقول..وبعدين هنو ياما قالت قبل كان جاني نصيب بندير عرس كبير واني مانبيش فرحتها تكون ناقصه..
ناضت هانيه وجت لأختها قعمزت جنبها وضمتها وهي تقول..
/ياروحي..
زكيه مسحت دموعها وهي تقول بإبتسامه..
/ربي يجبر بخاطرك بنيتي ويعوضك خير..
شافت لولدها وقالت بإبتسامه والدمعه معبيه العين..
/ربي يعوضني فيه هو يارب..
كلهم قالوا بأصوات متقطعه..
/آمين..
بعدت هانيه عنها وخدت عبد المتين وهي تقول..
/نجيهولي غزال خالته..وباساته من خده وكلهم يشوفولها بإبتسامه..
حطت هانيه ولد اختها ع حجرها بعدين قالت..
/مالا فيري وين؟
نزيهه قالت..
/في حوش مرعي هي والصغار..
هزت هانيه راسها وهي مبتسمه..
🌿وفي جنان حوش مرعي..
كانت فريحه مقعمزة مع فاطمه وزوز من خوات مرعي كانوا جايات يتغدوا في حوش خوهم بصغارهم والصغار حداهم يلعبوا بينما غزلان كانت مقعمزه مع بنات عماتها في جهة تانيه من الجنان وهما يهدرزوا...
🌱فاطمه:معاش تبي تقعد كان في حوش نعيمه..
كميله "حماتها":نعيمه عايشه في حوازة والجو غادي يرد الروح عاجب امي هلبه..
فريحه:ماتنلام جو المزارع كويس هلبه للصحة النفسيه والجسديه..
فاطمه بإبتسامه..
/وين ترتاح تقعد غير الصغار يستاحشوا فيها هلبه بالذات كريم..
حماتها التانيه قالت..
/يقول لبوه يرفعه مرة مرة..
فاطمه هزت راسها بصمت والتفتت للصغار..
شافت اروى مع بنت كميله واقفات ع دراجة وهما يتكلموا ابتسمت..
🌸اروى:هيا بيشو اركبي..
بشرى"بنت كميله"..
/لالانطيح بعدين..
اروى قالت..
/بري ياخوافه..
بشرى عقدت حواجبها وقالت..
/مش خوافه اني..
اروى قلبت عيونها والتفتت ع الولاد بعدين قالت..
/شروفي..
اشرف االي كان يلعب مع الولاد في البطش"الدحل" شافلها وقال..
/شني؟
اشرتله بيدها يجي..
تأفف اشرف ومشالهم وصل فيهم وقال..
/شن تبي هيا قولي بسرعه..
اروى قالت..
/باهي باهي..شافت لبشرى وقالت..ركب بيشو الدراجه..
بشرى قالت بعصبيه..
/قتلك لا نبيش اني..
ضحك اشرف وقال .
/نركبك ونشد بيك..
اروى:هيا يشد بيك شروفي ماطيحيش..
بشرى شافتله بعدين قالت..
/باهي..
مد اشرف لأخته البطش خداته بعدين جي لبشري رفعها وركبها الدارجه وبشرى خايفه..
قاللها:شدي هني كويس وماتخافيش..
شدت بشرى المقود كويس واشرف بدي يحرك في الدراجه..
وشويه شويه بدي شعور الخوف يتبدد عند بشرى وتحل محله مشاعر البهجة والاستمتاع وهي تسمع في تصفيق اروى وتشجيعها..
اشرف قال..
/نطلقك تكملي بروحك؟
شافتله وقالت..
/لا اقعد معاي..
ضحك وقعد يمشي جنبها وغزلان وبنات عماتها يشوفولهم..
🌸"ماشاء الله عليه الولد هدا احلا واحد في صغار ولد عم ماما"
غزلان:حسيت خوه وسام بيجي أحلى منه..
وحده من البنات قالت..
/صح وسام شكله بيجي احلى..
سكتوا شويه بعدين قالت نفس البنت..
/غزولي اهو قريب تطلع النتيجه..
احمر وجه غزلان وهي تقول..
/باهي..
ضحكوا ونفس البنت قالت..
/عامر يستنى ع نار راهو قال بيخطبك لما تخشي الثانوي..
غزلان بدهشة:يخطبني!؟
قالتلها:ايه ماهو انتي ماتبيش ديري معاه علاقه مشي هو قال لماما وبابا نعطي فيها كلمه توا ولما تطلع من التانوي يدير العرس..
غيرت غزلان عيونها لأمها وعماتها وهي شاده ابتسامتها..
شافولها بنات عماتها وقالوا بضحكه..
/شني!؟
ساوت حجابها وهي تقول بربكه وخجل .
/كان قالوا بابا وماما باهي نقول باهي..
ضحكوا البنات وهي ابتسمت بخجل..
🍃عامر يكون ولد عمتها كميله عمره عشرين عام حط عليها العين من عامين فاتوا ومن البدايه نيته صافيه معاها وغزلان كانت معجبه بيه ومايلتله لعده اسباب منهم ادبه وتفوقه في دراسته الى جانب وسامته غير انه ماكانش متدين زيها لهدا لما طلب يكلمها ويكون في بينهم علاقه هي رفضت رفض تام وهالشي خلاه يصبر عليها لين تطلع من الاعدادي بش يطلبها من اهلها..🍃
🌱"خطبتها لمني"
فاطمه قالت:لولدها الصغير عبد الحافظ..
كميله قالت بتوتر..
/وانتي شن قلتي!؟
فاطمه:لاطبعا مستحيل نعطيهم بنتي..
ابتسمت كميله براحه وقالت.
/مالا يافطومه بنقولك نبي غزيله لوليدي عامر..
تفاجئت فاطمه وحماتها التانيه وفريحه يشوفولها بإبتسامه..
كميله تابعت تقول..
/الولد بروحه يبيها يافطومه قال نبي نعطي فيها كلمه وبعد تطلع من الثانوي نديروا العرس..
التفتت فاطمه لبنتها وقعدت تشوفلها بصمت..
كميله قالت..
/عامر وليد خوك يافطومه وتعرفيه كويس وتعرفي من رباه..
ابتسمت فاطمه وشافتلها وهي تقول..
/نشوفوا مرعي شن يقول قبل..
كميله قالت بضحكه..
/ماعنده مايقول في وليد اخته يوافق طول..
ضحكوا وفريحه قالت بإبتسامه..
/مسرع الوقت مايجري هديكا الكريكيبه الصغيرة كبرت وبتنخطب خلاص..
ضحكوا وفاطمه تشوف لبنتها بإبتسامه وعيونها يلمعوا بالدموع..
🌿🌿🌿🌿🌿
"لاعاد تبي تولي لخدمه ولاتطلع من الحوش من اصله ماغير شاده دارها وخلاص"
هالكلام قالاته مرت الشيخ البدري لوحده من خواتها جايتها زياره..
واختها قالت..
/بنتك صايبتها عين قويه ياوخيتي..
تنهدت بألم وقالت..
/مش غير هي حتى خوتها وخواتها شوفي عاتكه قداش عمرها ماطق بابها حد ولا رقيه كان جتها مواضيع يايجيها الكبير ياالمطلق يالأرمل والولاد كل واحد فيهم حاله احرف من التاني بوعجيله مانافع في شي وعبد الباسط من بعد موال هديكا المغنيه سكر سيرة الزواج بكل وعبد الحافظ من الحوش للجامعه ومن الجامعه للحوش لايبي يطلع لايدير صحاب ماغير شاد هدوكا الكتب وخلاص..
اختها قالتلها بأسف..
/لاحول ولاقوة الا بالله..
🌱ومن الصاله لدار المعيشة.. كانوا عاتكه ورقيه مقعمزات يشربوا في الشاهي ويدور بينهم حديث عن..
عاتكه:جايه تقصقص وتتشمت..
رقيه:وشن عندهم خالاتك وعماتك غير الشماته..
تنهدت عاتكه ورجعت تشرب في الشاهي ورقيه كذلك وقعدوا ع هالحال للحظات لعند ماقالت عاتكه..
/تعرفي رقيه..
انتبهت معاها اختها وهي كملت تقول..
/حاسه اللي فيه اختك لاهو عين ولاهو مس..
رقيه قالت..
/مالا شنو؟
عاتكه رفعت حاجبها وقالت..
/شاكه فيها كانت دايره علاقه مع واحد وضاحك عليها..
حطت رقيه يدها ع فمها وهي مصدومه..
عاتكه:اكثر حاجه خلتني نشك حكايه خنبة تاكم امي بعدها بفترة قصيرة صار في وديعه اللي صار..
رقيه وهي تفكر قالت..
/قصدك عطت التاكم لصاحبها ولامش عارفه شني وهو هرب بيه ولا؟
عاتكه؛مافيش غير هكي..وبخوف كملت تقول..ان شاء الله هدا ماخدي ياوخيتي بس..
رقيه؛كيف قصدك مرات تطلع خانبه حاجه تانيه وعطيتهوله؟
عاتكه قالت بخوف..
/مش هدا قصدي قصدي حاجه تانيه..
رقيه فكرت شويه بعدين خبطت بيدها ع خدها بصدمه..
عاتكه قالت بقلق..
/نمشوا نفهموا منها؟
رقيه بدون تفكير قالت..
/نوضي نوضي..
وناضت قبل اختها ومشت طلعت بسرعه واختها وراها فاتوا الزوز من قدام عبد الحافظ اللي كان طالع من داره لما شاف حالتهم استغرب ولحقهم..
هما وصلوا لدارهم وتفتح رقيه الباب بإندفاع وتشوف منظر خلاها تصرخ ع طول حسها..
وديعه طايحة جنب سريرها فاقده للوعي وخداها علبة دواء اقراص..
دف عبد الحافظ رقيه وقدم لوديعه بسرعه رفعها بين ايديه وطلع بيها يجري وخواته وراه يعيطوا ويتلاقوا بأمهم وخالتهم جايين يجروا من الصاله ويشوفوا حالة وديعه ويكملوها عياط مع عاتكه ورقيه..
🌾🌾🌾🌾🌾🌾🌾
وفي مضافة عيلة البندار اللي كان مقعمز في صدرها كمال بحضور الأقارب والمعارف..
كان يدور حديث بينه وبين رجاله المقربين الزقطي والساعدي..
🌱"لاخلاص تفاهمت اني وياه ع موعد يجيك وتزيدوا تتفاهموا"
كمال قال:المصنع هدا بناخده لكن زي مانبي مش بشروطهم هما..
الساعدي:اخرتهم بايعنهولك ياحاج راهم خلاص فلسوا..
كمال هز راسه وهو يمرر في نظره ع ضيوفه..
🌿ومن المضافه لحوشه اللي كانت فيه زوجته مجتمعه بزوجات رجاله المقربين..
خديجة زوجة الساعدي..وحليمة زوجة الزقطي..
🌾"ماشاء الله على جليله ماشاء الله كل ماتكبر تزيد قنانة"
حليمه قالت بإبتسامه..
/سلمك ياللا..
خديجه قالت بضحكه..
/بنحوزها لمحرز ياحليمه..
ضحكت حليمه وقالت..
/حازها الحاج كمال لسلطان من اول ماجبتها ياخدوجه..
خديجه قالت بأسف..
/ياخسارها..
حطت فطيمه جليله في حجرها وقالت..
/تو تجيها وخيه ان شاء الله حوزيها من توا لمحرز..
حليمه قالت..
/لاياللا ادعي بالله عليك معاد نجيب كان الولاد من نهار جبت جليله وبوها فايتني ومايدلع كان فيها..
ضمت فطيمه لحضنها وقالت..
/خل يدلعها ويشرتعها كنينتي مريت سلطان السلاطين..
ضحكوا بعدين قالت حليمه..
/مازال مش ناويه تخاوي لسلطان وعمران؟
فطيمه قالت..
/لا مازال خل يكبر عمران شويه..
هزت حليمه راسها بصمت بعدين شافت لخديجه اللي قالت..
/بالله شن صار في ولد زاهيه ومرته؟
تنهدت فطيمه وقالت..
/مشوا للسوق العالي والله اعلم لامتى يقعدوا غادي..
حليمه قالت..
/وكيف بيصير في زاهيه؟
فطيمه قالت..
/قلت لكمال يخليها تقعد عندنا وخلاص ماعندها حد مسكينه وهو قال باهي..
خديجه قالت..
/ربي يعطي وليدها الذريه الصالحه..
فطيمه وحليمه قالوا مع بعض..
"يارب..آمين"
🌿🌿🌿🌿🌿
العاشرة ليلا...
في قصر ذهيبه تحديدا جناح زكيه..
كانت مقعمزة مع تسعه اللي كان يسمع فيها وهي تحكي عن موضوع اخته هانيه..
🌱تسعه:والله يام كان هي اقتنعت بيه ماعنديش مشكله الراجل نعرفه كويس وماعندي مانقول فيه لكن اهم حاجه تكون مصارحته بكل شي..
زكيه:اكيد مالا شنو حاجه زي هادي ماتدرقش..
هز راسه وقال..
/ان شاء الله خير..
زكيه:ان شاء الله..المهم قلنا توا نخلوهم يجوا يعطوا فيها كلمه وبعد ترمي بلقيس العدة نديروا العرس..
هو قال:باهي باهي ع خير ان شاء الله..ايه يام بنقولك الاسبوع الجاي بنرفع معاي ربيعه والصغار لمزرعة القاره بولي..
زكيه قالت:وعلاش رافع معاك الصغار؟
قاللها:بنديرلهم غادي حفله لنجاحهم..
عقدت امه حواجبها وقالت..
/لا كان هكي مفروض ترفع نساوينك كلهم..
ناض وهو يقول..
/الحفله لنجاح كريمه وربيعه هي صاحبة الفضل من بعد الله يعني تقدري تقولي ياللة اللات الحفله لربيعه وكريمه..
سكتت أمه وهي تحاول تخفي ضيقها..
هو طبس عليها باس راسها بعدين قال..
/هي خل ترقدي وترتاحي تصبحي ع خير..
امه قالت:قدامك كل خير..وقعدت معاه بعيونها لعند ماطلع من دارها وسكر الباب تنهدت بضيق وقالت..
/استغفر الله العظيم..
♤ويخش في قلب جداي الشك ناحية امي وكان الشك خش القلب معاش يطلع منه لين يخلي صاحبه يرتكب اخطاء ويظلم بدون مايحس ويخليه يصدق انه ع حق...
🌿تاني يوم الصبح طلعت ربيعه لحديقه القصر بصحبة هنادي وقعمزوا في اكثر مكان تحبه بين الشجر حطت كتب اللغة الانجليزيه مع كراسه وفي يدها مسجل صغير مع سماعات كبار حطتهم ع وذانها بعدين شغلت المسجل وهنادي تتفرج عليها هي وطبيعه المكان..
🍃وفي مكان تاني من الحديقه كانت زكيه مقعمزة تشرب في قهوتها ع جية بنتها وكناينها قعمزوا حداها وبدوا يهدرزوا لعند ماجتهم تعويضه بالقهوة..
🌱زكيه:اللا ربيعه مافاقتش؟
نزيهه وهانيه بدت ع وجوههم ملامح الإزدراء..
تعويضه قالت..
/وعت بدري ياللا وعدت مع هنادي جهة الشجر..
زكيه هزت راسها بعدين قالت..
/باهي بري..
مشت تعويضه وهانيه قالت..
/من هنادي هادي!؟
نزيهه جاوبت متهكمه..
/نديمه ربيعه هانم..
هانيه قالت بصدمه...
/شني!!؟
زكيه وهي تشوف لنزيهه بطرف عينها قالت..
/وحده جديده من الخدم جت هي وخوها امس بتقعد فترة تعاني ربيعه لين تجيب..
هانيه قعدت تضحك ونزيهه تشوفلها وهي مبتسمه بتهكم اما فريحه قعدت ملتزمه الصمت حتى بملامح وجهها ماعبرتش..
هانيه هدت ضحك وقالت..
/ماطيب قلبك ياماما والله..
زكيه قالت بحده..
/خلاص انهوا..
هانيه هزت راسها وهي تقول بإبتسامه أسف..
/تمام نهينا سكتنا لين نشوفوا شن اخرتها..
زكيه شافت لنزيهه ونزيهه ابتسمت بأسف وخدت فنجان القهوة ورشفت منه..
🌿وجي وقت الفطور اللي اجتمعوا فيه مع تسعة ع طاولة وحده..
كان الهدوء مسيطر عليهم..الكل ياكل في حالة صمت لكن دواخلهم كلها ضجة مجموعه من الهواجس والافكار والشكوك..
نزيهه شغلها الشاغل حاليا ربيعه ماتبي شي غير انها طلعها من العيله..
اما هانيه فكانت تفكر في معمر وكيف بتكون حياتها معاه وهل ممكن تتعالج وتزرق بالذريه ولا تنحرم منها نهائيا ويكون مصير زواجها منه زي مصير زواجها من محمود؟
وجنبها فريحه كان عقلها عند تسعه بس كانت تحاول ع قد ماتقدر تخلص قلبها من التعلق بيه هالتعلق اللي حيأذيها أذى شديد وممكن يخليها تخسر كل شي..
وهدا اللي مخوف عزوزتها زكيه اللي بدت تحس بعدم الارتياح لوضع ولدها مع ربيعه اللي مخوفها انها مرات تنجبر تتصرف معاها بطريقه ممكن دير مشاكل بينها وبين ولدها ومش بعيد تخليها تخسره بالمرة..
رفعت عيونها وشافت لربيعه لقتها يدوب تاكل وباين ع وجهها التعب لكن مابتش تكلمها نهائي..
ربيعه كانت حاسه بالغثيان حاولت تقاوم ماقدرتش ناضت وهي تقول..
/الحمد لله..نستأذن..
هو شاف لصحن فطورها بعدين قال..
/ماكليتي شي!
قالتله؛بعدين نولي عليه عطيني الاذن نمشي نرقد..
هز راسه وقال..
/اذنك معاك..التفت لهنادي اللي كانت مقعمزه تفطر بروحها قاللها..هنادي..طول ناضت ومشتلها..
ربيعه يدوب ابتسمت وقالت..
/صحتين..
ومشت طلعت من حداهم ووراها هنادي قعد معاهم تسعه بنظره لعند ماطلعوا غير نظره لأمه وقالت..
/ردي بالك منها يااللا حالها مش مريحني..
قالتله فريحه..
/بعد الفطور تو نركبلها..
تسعه شافلها بإبتسامه بعدين قال..
/توا اطمنت..
ابتسمت فريحه وضرتها وحماتها يشوفولها بنظرات عدم رضا..
ناض وقال:شوفوا حتى بلقيس خلوها تطلع من دارها ماتخلوهاش فيها بروحها..
نزيهه قالت..
/حاضر..
مرر نظره عليهم وقال..
/ماشي للزاويه بنروح بعد آذان العشاء ان شاء الله..
امه وزوجاته قالوا..
"تمشي وتجي سالم"
وهو مشي طلع من حداهم وقال..
/استودعناكم...
🌿وبعد ماطلع تسعه بساعتين ركبت زكيه للدور وتوجهت للجهة اللي فيها أجنحة زوجات ولدها..
وصلت في جناح ربيعه ودقت الباب..
لحظات وفتحت هنادي وهي تقول..
/تفضلي ياللا..
خشت زكيه وهي تقول..
/اللا ربيعه فايقه؟
هنادي:ايه فايقه وتقرا في القرآن..
زكيه قالت..
/باهي انتي انزلي للمطبخ توا..
هنادي وهي مستغربه قالت..
/حاضر..ومشت طلعت من الجناح وسكرت الباب..
خدت زكيه نفس ومشت بإتجاه الدار وصلت فيها ودقت بابها..
ربيعه رفعت عيونها في الباب بعدين سكرت المصحف وهي تقول..
/تفضلي عمتي..
قالتلها:خلينا برا..ومشت بإتجاه الصالون قعمزت في الصدر وحطت رجل ع رجل..
لحظات وطلعت ربيعه شافتها كيف مقعمزة حست بشعور غير مريح..مشت قعمزت مقابلتها وقالت..
/آنستيني عمتي..
زكيه قالت..
/كيف حالك توا؟.
ربيعه:الحمد لله خير من بكري..
هزت زكيه راسها بعدين قالت..
/قالي تسعه بديروا حفلة للصغار في المزرعه..
ابتسمت ربيعه وقالت..
/هي لكريمه يااللا..
زكيه قالت:انتي قلتيله عليها؟
ربيعه قالت..
/اني عطيت وعد لكريمه كان نجحت نديرولها حفله وقبل نبيها هني لكن صار اللي صار..
قاطعتها زكيه وقالت بإبتسامه..
/مدامك عارفه ان اللي صار يمنعنا نديروا حاجه فيها فرح علاش قعدتي مصرة ديريها؟
ربيعه بدت تتوتر لكن حاولت تحافظ ع هدوئها وهي تجاوب..
/ع خاطر كريمه ياعمتي نبيها تفرح بنجاحها..
زكيه بنفس الابتسامه..
/ايه باهي ماقلنا شي لكن مالهاش لزوم مشيتك معاهم..
ربيعه قالت..
/تسعه هو اللي طلب مني نمشي ياعمتي ولما قتله اعفيني اصر عليا..
زكيه دامت النظر ليها بصمت وهي مبتسمه بعدين قالت..
/في الجديد بنتي حاولي تتجنبي المواقف اللي تخلق حساسيات ودير مشاكل..خليك زيك زي ضرايرك همك كله تقعد العيله ملتمه ووضعها مستقر وكلنا فيها يد وحده..اني عارفاتك وعارفة نيتك الطيبه لكن يابنتي مرات ديري تصرف غلط بحسن نية ينقلب عليك فاهمه عليا؟
بلعت ربيعه ريقها وقالت..
/فاهمه عمتي..
رفعت زكيه حواجبها وقالت..
/حاجه تانيه حتى هي مهم هلبه تفهميها،لازم تفرقي بين تعاملك مع ضرايرك وتعاملك مع حمواتك..حمواتك بنات بيت المال يعني صاحبات المكان هدا ديري حدود في تعاملك معاهم والزميه..
ربيعه قالت..
/اني والله ماغلطت فيها..
رفعت يدها وسكتتها بعدين قالت..
/مانبيش نخش في نقاشات بنتي..نزلت يدها وقالت..اني جيت نوضحلك بعض الحاجات اللي لو التزمتي بيهم حتكملي عمرك في القصر هدا وتكمليه بإحترامك وقدرك..
تعبوا عيون ربيعه بالدموع ومع هدا ابتسمت وقالت..
/حاضر عمتي اللي تبيه اني فيه..
زكيه قالت..
/كويس..بعدين ناضت وهي تقول..الدوة اللي صارت تقعد بيني وبينك باهي؟
هزت ربيعه راسها وقالت..
/باهي..
مشت زكيه بتطلع وربيعه ناضت وراها،لحقتها لين وصلتها لباب الجناح فتحاته زكيه وطلعت بدون ماتقول كلمه وربيعه سكراته وراها وسمحت لدموعها بالنزول..
♤"جداك خلتني نحس وقتها انها بدت تشوفلي بنفس نظرة عمتك هانيه ونزيهه مرت بوك..جاريه مالهاش قدر ولاقيمه"..هدا اللي قالاته امي لما تفكرت هالموقف وقالت هني حسيت اني حنلقى روحي خاشه حرب فرض وجود عليهم وحرب زي هادي مش حتكون ساهله..طبيعي جدا مراة زي امي لاتقبل خضوع ولامذله ومش حتسمح لحد ينزل منها مني كان يكون...
🌿الانسان لما يهدر كرامته يخسر كل شي،خسارة الكرامه مايعوضه شي زي خسارة الشرف ووديعه خسرت كرامتها وشرفها ممكن ماتكونش غاصت في الذنب لدرجة خلتها تخسر عذريتها لكن البنت مجرد ماتسمح لراجل اجنبي عنها يدنس عفتها ولو بلمسه يد تخسر شي من شرفها ومع كل تمادي بالتدنيس كل ماتزيد تخسر شي من شرفها لعند ماضيعه تماما..
وهي فهمت هالشي بعد فوات الآوان وهالخسارة الكبيرة خلتها تحس ان الموت هو المخلص الوحيد من الحالة اللي قاعده تعيش فيها..
🌱"شن اللي وصلك لهني ياوديعه شن اللي يخليك تقتلي روحك.."
وديعه ببكاء:عيشتنا السودا العيشه الغبره اللي عايشينها قلة حظنا من دون بنات الناس..
عبد الحافظ قال بأسف..
/هدا كله ع خاطر قعدتوا لتوا من غير زواج!
ماعرفتش شن ترد عليه غطت وجهها بإيديها وانهارت بالبكاء..
هو تنهد بضيق وقال..
/تعرفي اللي صاير فيكم انتي وخواتك كله من البعد عن الله سبحانه وتعالى اربعه وعشرين وانتم تسمعوا في الاغاني وتتفرجوا ع المسلسلات اللي فيهم سفور وتبرج حتى لبسكم مش عاجبني بكل..
هدت بكي ونزلت ايديها وقعدت تشوفله..
عبد الحافظ قال..
/جربوا تعيشوا حياتكم بما يرضي الله وشوفوا كيف تتعدل معاكم..
رشفت وقالت..
/هدا علاش ديما وانت في دارك وماتطلعش بكل..
قاللها:لأن الدنيا هادي معبيه فتن بش تنجي منها لازم تقعدي في الحوش وكان اضطريتي تطلعي ابتعدي ع الفتن ع قد ماتقدري هدا ماداير اني ماعنديش الا زوز صحاب زي حالاتي وكان جيت نتبع التلفزيون نتفرج ع الرسوم بس..
ضحكت وديعه من بين دموعها..
هو ابتسم وقالت..
/عندي كتب تنفعك نجيبهالك تقريها..
دامت النظر ليه للحظات بعدين هزت راسها بالموافقه.
هو ناض ومشي طلع من الدار وبعد ثواني خشوا عليها خواتها ..
عاتكه:في شن كان يدوي معاك؟
وديعه وهي تمسح في دموعها قالت..
/شي..
عاتكه شافت لرقيه ورقيه شافتلها بعدين ردت النظر لوديعه وقالت..
/باهي تبي نديرولك حاجه تاكليها ولاتشربيها؟
قالت:امي وين؟
عاتكه:مع بوي في الصاله..
نزلت عيونها وقعدت ساكته ع خشة عبد الحافظ قدم لوديعه عطاها مجموعه كتب صغار في الحجم وقاللها..
/بعد تكمليهم رديهم..
خدتهم وديعه وهي تشوفلهم قالت..
/باهي..
مشي عبد الحافظ طلع وخواته يتبعوا فيه بنظرهم بعدين ردوه لوديعه لما قالت..
/اطلعوا وخلوني نرقد..
شافولها للحظات بعدين مشوا وهما متعجبات في امرها طلعوا من الدار وسكروا الباب..
وقعدت وديعه مع الكتب اللي كانت تقرا في اسمائهم وهي تشوف فيهم المهرب اللي تهربله من كل شي مؤلم وبشع عاشاته..
♧هلبه داروا زي وديعه هربوا من مواجهة اخطائهم بش يرتكبوا اخطاء اكبر..اني لما لجأت لله سبحانه وتعالي وقويت علاقتي بيه ماكانش عندي هدف غير اني نلقى الراحه ونلقي الحياة لقلبي لكن وديعه هربت من الذنب اللي ارتكباته لشي يستره ويدرقه قدام نفسها قبل الناس يعني نظرة الله ليها ماكانتش هي هدفها الوحيد وممكن ماكانتش في قائمة اهدافها من الأساس..
🌿🌿🌿🌿🌿
وتعدي الايام..
وتبلغ هانيه صديقتها تيسير بالموافقه ويوصل هالخبر لمعمر ويخليه طاير من الفرح المخفي عن عيون عيلته اللي كانوا فرحانين بنسب عيلة المال من غير مايهتموا لكون هانيه مطلقه وولدهم اعزب لم يسبقله الزواج..
ومشت كبيره عيله الهاشمي مع بناتها وكنتها "عاطفه ام خالد" لقصر ذهيبه بش يعطوا كلمة في هانيه..
عاطفه شخصيتها شبيهه جدا بشخصية هانيه او اسوأ انسانه متكبرة ومغرورة وتحب ديما تكون محط الاعجاب والاهتمام هي اخر كناين عيلة الهاشمي واكثرهم جمال ومال لهدا عيلة راجلها كانوا عاطيينها قيمة كبيره خلتها تشوف روحها بزياده ع سلفاتها وتوا حتجيها سلفة تتفوق عليها في المميزات وهالشي خلاها تحس بالحسد والكره تجاه هانيه...
🌿وخبر خطوبه هانيه يوصل لمسامع حد من الصدمه فقد السيطرة ع مشاعره وخلاه يبوح بيها..
🌱"ماما توا كنت نكلم في صاحبتي منال قالت غدوة النتيجه"
فاطمه ابتسمت وهي تقول..
/بإذن الله ناجحه من الاوائل..
قعمزت غزلان جنب امها وخشت في حضنها وهي تقول..
/يارب..
خش عليهم كريم وهو يقول..
/جعان.
غزلان قالت..
/ديما وانت جعان وتاكل وياريته غير طالع عليك..
قاللها:خليك في حالك انتي..هيا امي نوضي ديريلي حاجه..
فاطمه بضحكه..
/ياودي باهي..
ويرن الهاتف اللي كان جنبها رفعت السماعه وقالت..
/السلام عليكم..
"وعليكم السلام فطومي شن جو"
فاطمه بضحكه..
/مليح زي جوك هنو..
ابتسم كريم ولون وجهه تبدل للأحمر..
"فطومي موضوعي تم خلاص انخطبت"
فاطمه بإبتسامه..
/مبارك مبارك مبارك وربي يتمم ع خير..
تلاشت ابتسامه كريم ولون وجهه انخطف..
"الله يبارك فيك فطومي بالله فطومي جيبي غزوله وتعالوا غدوة"
قالت:ان شاء الله ان شاء الله وبالمرة نديروا زردة نجاح غزيله مع بعض غدوة نتجيتها ان شاء الله..
"ناجحه من غير كلام"
ضحكت فاطمه وقالت..
/يارب..
"يارب..تمام فطومي نتلاقوا غدوة سلام"
فاطمه قالت..
/وعليك السلام حبييتي..
سكرت السماعه بعدين شافت لغزلان لما سألتها..
/خيرها هنو؟
فاطمه قالت بإبتسامه..
/انخطبت لمعمر ولد الهاشمي..
"شني!؟'
وجهوا انظارهم لكريم لما سألهم وهو مصدوم وينصدموا اكثر منه لما يلقوا الدموع نازلات من عيونه..
فاطمه بإستغراب وخوف وقالت..
/خيرك تبكي!؟
كريم انفعل بكل مشاعره وهو يقول..
/حقه يام حقه هانيه انخطبت!؟
قعدوا يشوفوله امه واخته بعدم فهم بعدين غزلان قالت..
/كريم خيرك!؟
كريم وهو يبكي قال بإنفعال..
/اني نبيها هانيه اني نحبها كنت نراجي امتى نكبر بش ناخدها..
امه واخته من الصدمه قعدوا مسهمات فيه حتى السنتهم انعقدت عن الكلام..
وهو مكمل في التعبير عن مشاعره بكل ألم..
/علاش هكي علاش علاش!..ومشي بسرعه لداره خشلها وخبط الباب بقوة ومشي طول لبوكسينج كان معلقها في داره فش غله وهو يضرب فيها ويبكي..
وامه واخته قاعدات ع حالهم في الصاله خاشين في حالة صدمه وعدم استيعاب..
🌿🌿🌿
ويجي تاني يوم ويمشوا فاطمه وغزلان لقصر ذهيبه بش يتغدوا غادي ولأن كريم ماكانش معاهم سأل عنه صاحبه..
🌱سلامه:وين كريم خالتي؟
غزلان شدت ضحكتها لكن امها جاوبت بإرتباك..
/رفعه مرعي من الصبح لحوش عمته بش يشوف حناه بيقعد غادي يومين ولاتلاته..
سلامه بدت ع وجهه ملامح الأسف بعدين مش طلع من حداهم..
شافت فاطمه لهانيه وقالت بإبتسامه ربكه..
/ايه خبرينا..
هانيه شافت لربيعه بطرف عينها بعدين قالت..
/بعدين نحكيلك..
شافوا غزلان وفاطمه لربيعه اللي كانت ملهيه نفسها بالتلفزيون وعيون عزوزتها زكيه عليها زي ماكانت عيون نزيهه ع زكيه وهي حاسه براحه لأن كل شي ماشي زي ماهي مخططه..
فريحه اللي مطلعه روحها من هدا كله شافت لغزلان وقالت..
/اليوم النتيجه غزوله..
شافت بلقيس لغزلان بإبتسامه..
وغزلان قالت بضحكه..
/متوترة هلبه..
فريحه وبلقيس قالوا..
"ناجحه ان شاء الله..بإذن الله"
شافت فريحه لفاطمه وابتسمت ابتسامه ليها معنى وفاطمه بادلتها نفس الابتسامه...
🌿🌿
"ارفعي السفرة هادي لغرفة المعيشه"
رفعت هنادي سفرة العصير وقالت..
/حاضر ابله برنيه..
ومشت طلعت من الكوجينه بعدين ركبت الدروج وهي تقول..
/حق السفرة والطواسي يجيبوا لبلعيد مراة..اييه ياكبدي هادي الدنيا ناس تاكل في فضه وتشرب في كريستال وناس تاكل في ليموني وتشرب في النايلو..
وطلعت من المكان اللي فيه الكوجينه وهي تقول..
/وتو بتبدي ياهنادي رحله البحث عن الباب اللي يرفع للصالون..هالقصر تقول متاهه مش قصر..
وقعدت تمشي وتمشي لين وصلت في الباب اللي يدخل لصالون العيله ودار المعيشه..
خشت منه ومشت فاتت من قدام الصالون شافتله وقالت..
/هالصالون يسكن اربع عايلات..كان نعرف قاعه الاحتفالات شن كبرها..
وصلت لدار المعيشه وخشت عليهم فرقت عليهم عليهم العصير ولما وصلت في ربيعه رفعت ربيعه يدها وقالت..
/ماخاطريش..
هنادي قالت..
/نجيبلك حاجه تانيه يااللا؟
قالت ربيعه وهي متعبه بعض الشيء..
/لالا..
ركزت عليها فريحه وقالت..
/اتكي ربيعه اتكي..
هزت ربيعه راسها وكيف جت بترقد قالت زكيه..
/ كان تركبي لجناحك خير..
ربيعه نزلت عيونها وقالت..
/حاضر..بعدين ناضت..
طلعت هنادي قبلها وهي وراها اول ماوصلت في الباب طاحت من طولها وينوضولها فريحه وفاطمه يجروا..
شدتها فريحه وهي تفيق فيها وفاطمه تقول..
/ميه ميه..
طلعت هنادي تجري وهي تقول..
/هيا هي..
ناضوا زكيه وبلقيس ومعاهم غزلان اللي قالت..
/خل نحطوها ع الفراش ونرفعوا رجليها..
فاطمه قالت..
/عاونينا بنتي..
زكيه بقلق..
/حالها يبي مستشفى ..
حطوها فريحه وفاطمه بمساعدة غزلان ع الفراش..
فريحه شدت يدها بإيديها الزوز وقعدت تفرك فيها وفاطمه رفعت رجليها..
🌿وهنادي جت تجري من الكوجينه بالميه ووراها برنيه خشوا لغرفة المعيشه لقوا ربيعه باديه تفيق..
عطت هنادي الميه لبلقيس خدتها وبدت تمسح بيها ع وجهها..
زكيه قالت لبرنيه وهي متوتره..
/كلمي المرزوقي قوليله يوتي السيارة..
برنيه قالت..
/حاضر يااللا ومشت طلعت من حداهم وهي تقول..تعالي هنادي..وهنادي طلعت وراها طول..
هدا كله ونزيهه وهانيه ما حركوش ساكن الزوز كانوا يشوفوا للي قاعد يصير بنظرات امتعاض ممزوجه بالهزوة..
🌿بعد مالبسوا ربيعه حجابها رفعوها تعويضه وراجلها ومعاهم هنادي للمستشفى ومافي حد من نساوين العيله مشي معاهم..
الحركه هادي ضايقت بلقيس وفاطمه هلبه وتمنوا لو قدروا يمشوا معاها..
لكن زكيه مااهتمتش ابدا والحاجه هادي عجبت نزيهه ع الآخر..
🍃"علاش مامشتيش معاها يافريحه"
فريحة قالت بضيق..
/هكي وخلاص..
فاطمه قالت بأسف..
/غلط الحركه هادي اكبر غلط وكان يندري عليها تسعه تشوفوا شن يدير فيكم..
سكتت فريحه وهي مضايقه..
🍃فريحه كانت عايشه تخبط في مشاعرها تجاه ربيعه مرة تقبلها وتتعاطف معاها ومرة تسيطر عليها الغيرة وتخليها تنفر منها وفوق هكي تأثير نزيهه الكبير عليها خلاها وين شافتها قاعده في مكانها ومابتش تساعدهم تفهم ان ربيعه دير في حركات للفت النظر لااكثر زي مانزيهه كانت مفهمتها قبل🍃
🌿🌿🌿
"والله طارتلي منهم بالذات اللا الكبيره"
نعويضه قالت..
/لو يعلم سيدي تسعه يشوفن ايامهن السود..
هنادي:عاد توا مسافر بياخدوا غايتهم فيها وهي مسكينه لأنها راقده ريح ماتقدرش تفتح فمها بش مايحطوهاش في رووسهم ويخلوه يطلقها..
تعويضه:ان شاء الله لا والله ماتستاهل مسكينه اكثر وحده تعامل فينا بإحترام..
هنادي:صدقتي والله وين تشوفي اسلوبها ومعاملتها تقولي هادي بنت عز..
وجهوا نظراتهم اللي كلها شفقه ليها بعدين هنادي قالت..
/ربي يكفيها شرهم ويسخرلها سيدي تسعه..
تعويضه قالت..
/آمين...
....يتبع....
