الريتانين " متراس الدرزياء "

_ الغُـرزة 24 || هل انت الجحيم ؟

﷽

روايـه  :  الريتانيـن  " مِتـْـراسِ الدَّرْزِيُّــاء  "
الڪاتبه  :  تاليـن     

•  لا تنسوون التصويت بنجمة والتعليق بين      
   الفقرات  " ڪونتيساتي "   ...   🤎🪶
• متابعة حساب الواتباد باليوزࢪ   tallen9n
• حساب الأنستا   tallen.n_
• مُعࢪف قناة التلي   9_taffi

▪▫▪▫▪▫▪▫▪▫▪▫▪▫▪▫▪▫▪▫▪▫▪▫▪▫▪▫▪  
" غيدة  "

حطيته بصدري ورفعت حلك التيشرت ليفوك عيوني تزرزى للخارج خليت جفي على خشمي واخذت نفس اهدئ من روعي وارتباڪي

اخذت الجنطة ونزلت قَفلت السيارة ومشيت بالڪراج رجليه يهتزن برجفة خوف  ، العرك يجري على طول جسمي ناڪعني امشي واتلفت بڪل الجهات بايڪة بوڪة من صدك وخايفة لا تلڪفني عين گلبي يدگ حيل يشهرني بصوته المتعالي

طلعت للطابق الاداري حالي مڪشوف امشي سريع
عيني تنرفع تباوعلهم بنظرة ارتياب وتنخفض بتوتر
حتى الما منتبه اچذب انتباهه وشڪلي يڪله اني ناهبة

مسحت العرك من وجهي اخذت نفس اهدئ ذاتي
فتت لغرفته الرجفة بية انطيته الجنطة تشڪرني وطلعت عالسريع من اضل ثانية ڪباله ابوح بالسويته
وافضح روحي

رحت لغرفتي ڪعدت عالڪرسي وانطيت ظهري للباب
مدنڪة وحاضنة چف بچف اعصرهن اثبت ارتعاشي
الناتج من تأنيب ضميري الصحى من بعد ما فات الأوان
الشيطان حڪم عقلي وخلاه يغلب ضميري

وهسه بدا ضميري يعذبني اني ورقة طايحة من شجرة مستغنية عنها ما اشيلها من الڪا؏ يا جرأة انخلقت بداخلي عدمت صحوتي ومديت ايدي للحرام
تتوافد براسي الڪلمات التجر عقلي لقا؏ الرعب
بايڪة مال غيري 
حرامية نهبت
ارتڪبت حرام
غضبت ربها
مدت ايدها وبترت ضميرها
مشت ورا الشيطان وعافت تربيتها الصالحة
اتبعت الغلط وترڪت طريق الصح

خلاية ذهني تصيح بعلو صحوتها  بواگة محد يأمن بيج بعد  ، نهابة ما خفتي ربج والنهى عنة  ؟
عصرت راسي بأثنين ايدية قوي اسڪت هالاصوات الخبلتني غمضت عيوني ارخي اشتداد جسمي المنذعر من فعلتي وارتڪاب ايدي لهالجرم وانعدام الضمير

ردت اطلع من الشغل بعد ما اتحمل على دقيقة انهض اطفي عقلي بصيحة افضح روحي بنص هالعالم واڪول اني ناهبة وندمت   ،  وبقيت مصبرة نفسي
اذا اطلع هسه اجيب الشبهة لروحي

لنهاية الدوام يلا طلعت جن تحررت من سجن امشي بالشار؏ ويتهيئلي عيون المارين تباوعلي وصدري عبالك ثقل اجبال محطوط فوڪه وسالبة حق البشرية  وضامته جوة صدري

وڪفت بنص الطريق راسي يفتر على مداري
الگلادة ما اطب البيت اني اخذتها دسدد الأيجار
لازم ابيعها واتصرف بفلوسها
طلعتها من صدري بالختلة وضميتها بچفي
دورت على بايع مجوهرات وفتتله حطيته ڪباله وڪتله اريد ابيعها باو؏ علي ورد باوعلي