ကားထဲတွင် သာမန်ထက်ပိုကာတိတ်ဆိတ်မှုကကြီးစိုးနေသည် ၊ ဆူဘင်းသည် ဘေးမှတိတ်တဆိတ်သာလိုက်ပါလာသလို ယောန်ဂျွန်းသည်လည်း ကားမောင်းရင်းပင် တိတ်ဆိတ်နေလျက် ၊ သို့သော် သူ၏အတွေးများမှာ သိပ်မကြာသေးတဲ့အချိန်တစ်ခုဆီသို့ရောက်ရှိသွားကာ နားလည်နိုင်ဖို့အား အတော်ကြိုးစားနေရ၏ ၊
မွေးနေ့ပွဲကို အတူတူလိုက်ပေးရန် ခေါ်ခဲ့သည်မှစကာ ထိုလူတွေရှေ့မှာသူနဲ့ပတ်သက်မှုကိုဖွင့်ပြောခဲ့သည်အဆုံး ယောန်ဂျွန်းနားမလည်နိုင် ၊ ထို့အတူ တစ်ခါလေးတောင် မမျှော်လင့်ထားသည့်အခြေအနေလည်းဖြစ်သည် ၊ စီယာတိုင်အား လက်ချောင်းများဖြင့် တစ်တောက်တောက်ခေါက်ကာ စိတ်လှုပ်ရှားမှာကို ဖြေဖျောက်နေရသည် ၊
မွေးနေ့ရှင်အတွက်ပါ လက်ဆောင်ရွေးပေးခဲ့ရသည်ကိုပြန်တွေးမိတော့ ရင်ထဲတွင်သိမ့်ကနဲ ၊ အရေးမကြီးသည့်ကိစ္စဖြစ်နေသည့်တိုင်အောင် သူကအရေးတယူလုပ်ခဲ့ပြီး ထိုအရာကိုဆူဘင်းကမငြင်းသည်မလို့ အသိအမှတ်ပြုခံလိုက်ရသည်ဟုလည်း ယူဆမိ၏ ၊ တစ်စုံတစ်ယောက်ဆီက အသိအမှတ်ပြုခံရခြင်းက အဲ့လောက်ထိသဘောကျစရာကောင်းလိမ့်မည်ဟုတစ်ခါမှမထင်ထားခဲ့ဖူးပါ ၊ သို့မဟုတ် တစ်ခါလေးတောင်အသိအမှတ်အပြုမခံခဲ့ရဖူးသူမလို့ ဒီခံစားချက်ကိုမသိတာများလား ၊ ယောန်ဂျွန်းမသိတဲ့ ခံစားချက်ကောင်းကောင်းလေးတွေဟာ ဘယ်လောက်များများရှိနေဦးမည်လဲ ၊ အဲ့လိုဆိုလျှင် Lea noona ပြောသလို သူကဆူဘင်းကိုသဘောကျတာမဟုတ်ပဲ ချစ်နေတာရောမဖြစ်နိုင်ဘူးလား..အနားမှာရှိနေလျှင်ပျော်တာမဟုတ်ပဲ ချစ်နေလို့သာ အနားမှာထားချင်ပြီး မြင်နေရရုံနဲ့ပျော်နေတာမျိုးလား ၊ အချစ်မခံခဲ့ရသူမလို့ ချစ်နေတာကိုပါမသိတာဖြစ်မည်ဟု ပေါက်ပေါက်ရှာရှာတွေးမိကုန်သည် ၊ သို့သော်လည်း ဆူဘင်းမချစ်တာကိုတော့ အတိအကျသိသည်...သူ့ကိုမလိုလားတဲ့အရပ်မှာသာ ရှင်သန်ခဲ့ရသည်မလို့ မလိုလားတဲ့အရိပ်အယောင်တွေကိုသေချာမပြသည့်တိုင် သူကတော့နားလည်နေသည် ၊
" ဘာလို့ အဲ့လိုလုပ်ခဲ့တာလဲ "
အပြင်ဘက်ကိုသာငေးကြည့်နေသော မျက်ဝန်းများသည် ယောန်ဂျွန်း အမေးစကားအားနားမလည်သလို လှည့်ကြည့်လာသည် ၊
