نظرات محرمة (الفصل الثاني )

الجزء5

الحلقة 30
بقلم Lina sabrina
جاء ليه ديراكت دخل فيه نحالو يدو مني وتخنزر فيا ويتحلف بعينيه ونضال باقي يأثر عليا بكلامو باه نرجع لداري وواجد يدير أي حاجة عليا. لتم وبداو يتعاركو لزوج بالهدرة ورجال دارو بيهم وليت هزيت روحي وخرجت من لاكلينيك .الخوف سيطر عليا و خلاني غير نمشي وماش عارفة وين نروح مستحيل نرجع لداري نضال مافيهش ثقة قادر يكون يقري فيا فلامان ويستدرج فيا بلعقل غير باه نصدقو ويعاود يحكمني ليه وينتقم اشد انتقام يعني مانقدرش نروح ليه برجليا ونحط روحي فالخطر ومعايا وليدي .وحتا أصيل خايفة نروح عندو من طريقتو وملامحو باين عليه متغشش والنار راح يشعلها عليا ويحرقني بيها سيرتو ليوم حاط كل الاغلاط عليا وانا سبابهم يعني ماش راح يسكت عليها وراح يعاقبني . من جيهة تشوي ومن جيهة تكوي في الحالتين راح ننضر من الأفضل نروح نشكي لابوليس وخلي يصرا واش يصرا ندخل للحبس بإتهاماتهم ونتعايش مع مكتوبي خير منهم لزوج وهكدا نتهنى من هادو الظغوط ونظمن مستقبل ليا ولو نكون فيه خاسرة بصح اكيد نربح حريتي في الأخير وانا هكداك ماشيا ثلفوني صونا لقيتو أصيل ماقدرتش نهز عليه خايفة ميتة .بقا غير يعاود ماحبسش وانا مترددة من قراري وليت هزيت عليه _وييينك وين ررحتي  _رايحة للكوميسارية ونحكيلهم كلشي _تبالي ماش في عقلك نتي هكدا نضال يلقاها واجدة ويشكي بيك راه كلشي ضدك راح تهلكي روحك _ايه كلشي ضدي بصح على الاقل نتهنى من هادي لحياة ليعايشتها معاك بكل نجاسة _كوبيت عليه وطفيت ثلفون .وسقسيت مرا وين نلقى كاش كوميسارية وجهتني ليها كانت ماش بعيدة بزاف كيقريب نوصل ليها لقيت أصيل مقابلني وجاي جيهتي وليت حبست وهو قدم عندي بكل هماجية حكم يدي وجرني لطونوبيل _خليتي نرتاح ونتهى اطللقني ماش من خقك تمنعني _ركبني بسيف وزاد ركب وديمارا بسكات بصح نفس تاعو العالي كان يخوف كيثور ليراح يهيج في أي وقت وانا بقيت غير تهدر ونغلي باه يحبس ويخليني في حالي لقيتو حبس في بلاصة خالية ودور ليا ويتخنزر بعينييه _ناوية تحطي حد لحياتك باه نبعد عليك ناوية تبعدي روحك عليا كنتي راح تخليني ندير جريمة فيك وفي روحي واش في راسك قتلك كون ماتكونيش ليا ومعايا راني نقتلك بكل برود علاه ماش راح تفهمي معنى كلامي وزيد ناوية تدخلي الحبس وتولدي فيه وتربي ولدك ولد سامي فالحبس على تهمة باطلة حبيتييهم يتشفااو فيك ويفرحو بخسارتك افهمي بلي راهم حابينك ديري هاد الشيئ باه يسلبو كلش منك لتم نتي ماتربحي والو من غير هويتك واسمك يتوسخو والمستقبل تاعك يعود مشبوه راح تكملي تعيشي حياتك ونتي في نظر الناس وحدة زانية ومجرمة باسكو راح يحطو عليك زوج قضايا الاولى انك راكي ديري في علاقات غير شرعية وشهود كاينين كلهم راهم ضدك ولو ماسمعوش وماشافوش راح يقولو شفنا وسمعنا ولتم مايحوسوش نهائيا لا على ليفيديو لا ليفوطو يكفيهم شهود والقضية الثانية راح يتهموك بمحاولة قتل وماش من الموحال يكون نضال حاط كاميرا داخل صالون وبلا سارتيفيكا ليفيهم كلش ونضال بمعرفتو قادر يثبث عليك ماكتر وتتفر غير غيك حسابتلك تدخلي للحبس وكيتخرحي تكوني حرة وتفرحي وتكملي حياتك منين خليتيها راكي غالطة بهادو الاتهامات تدخلي وتخرجي تلقاي روحك بهوية فاسدة وموسخة لا مجتمع يتقبلك لا والدين يستعرفو بيك بعني عندك سوابق عدلية _طبطب على راسي بيدو .دخلي كلامي مليح في راسك الخاوي الحبس ماهوش بهادي السهولة ليمتوقعتيها راه صعييب ويقتل الانسان بالشوي _بصح تعبت وعييت _مازال نزيد نعييك وأمر ونفدي تستحنليني _واش قصدك _الهدرة في هاداك الموضوع فدار _أصيل يعيشك ادا راح تضرني خليني هنا ليفيا يكفيني ارحموني شوي مانغيضكمش شوف حالتي كيفاه رجعت وجدان تاع بكري ماتت _اسندمعيي لا يكون صدقتي كلامو وحابة ترجعي لعندهم  جاوبيني_هززت براسي لالا _مالا حسك ونفسك مانسمعوش ندمتيني كيجبتك .ديمار وخبط الفولون وبدا غير يخبط و هيهدر بالصوت العالي ويلوم فياا .كنت ماش مرتاح من الاول بصح انا الطحان ليتبعت كلامك وجبتك _شفتو شاف ليدو ليمربوط بشاش وكمش وجهو باين توجع .هبط عند فارماسي شراء  ورج شرب دواء وديمارا بصح تحتمت نروح معاه من جيهة قنعت بكلامو على جال الحبس ومن جيهة قبلت نتحمل نارو ولا جهنم نهضال .
الحلقة 31
بقلم Lina sabrina
نحالي ثلفون وكسر لابيس طيشها وطول طريق حاكمة روحي بسيف الرعب راه ركبني سيرتو هو راح ينفجر طونوبيل ليتقلقو فطريق يبقى يسب في مولاها لمزية لابس نواظر ماشفتش عينيه ليقتلو الانسان غير بخزرة _منين وصلنا كان طاح ليل هبطنا جيت نجبد الكابة ماخلانيش _ادخلي ماش وقتها _دخلنا وطبعني لداخل وغلق الباب رحت نجري للبيت نغلقها بصح شكون يقدرلو لحق بيا ونحا المفتاح حطو في جيبو وبقا يقدم ليا وانا نوخر درت كل الطرق باه يشفق عليا ويتسامح بصح كيعادتو طبعني للحيط وحكم شعري من فوق الخمار ويد حكملي بيهم خدودي بكل جهدو وانا عييت نحيلو يديه بصح هو متحجر دموعي رجعو يهبطو بلا حساب _مالا تسبي فيا وتبزقي عليا وتكوبي فثلفون وتطفيه في وجهي علاه انطقي .نحا يدو من خدودي .هيا اهدري كيفاه تجرأتي ديريها _نتا ليتماديت فالهدرة تاعك _انا نتمادى ولا نتجاوز مايهمكش تسمعي وتسكتي _شعري وجعتي ارخف يدك _مانرخفش راح نزيد ماكتر باسكو كسرتي كلااامي كلو كون خليتي الاتصال بيناتنا كون قتلك ماتخرجيش جواد راه قدام دار اصبري حتا يدخل بصح نتي فحلة طفيتيه ليخلاص وحبيتيي ديريني بلا معنى وتمشي في كلمتك عليا حسباتلك كينحبك ديري رايك _ماكنتش عارفة راح يصرا هكدا وانا نزعف فيساع غير سمعتك قلت هكدا ماستحملتش وغلبتني روحي _وعلاه كينتقرب منك تضعفي وماتديريش ردة فعل وتبقاي ضعييفة بين يديا اااه جاوبي علاه ولا تحبي تتقواي عليا برك كيتكوني بعيدة ولا حسباتلك كينحبك ماش رراح نضرك وزيد خليتي الكلب تاع نضال يحكم يدك وخليتي عينك في عينيه ومستمتعة بكلامو علاه انا ماتشوفيش ليا وماتمتعيش بكلامي _راك غالط ماش هكدا راك تظلم فيا يعييشك اطلق يدك شعري راح ينصل من بلاصتو _زاد جبد شعري كتر وكتر وليت غير نعيط وعينييا راح يخرجو الوجع_لوكان ماجيتش انا بالاك كون راه لعبلك بمخك ورحتي معاه ماش موحال وانا ساعتها كون كتبت هويتك بيدي و نديرك صح وحدة رخيسة وساقطة وتبعتيه باه يلبيلك طلباتك وممكن حتا شهواتك ماندري  _وسعت عينيا فيه .راني اشرف منك ياحيوااان _ادا انا حيوان نخليك نتي الحيوانة تاعي ادا ماكيش عارفة قادر حتا درك نحطك تحت رجلي وتنبحي كما هاديك الصباح بصح زهرك كيحبيتك وفي ولدك _نتا راح تموت من داخل باسكو عارفني موحال نحبك ولا نتقبلك وخايف اي واحد بكلمة يخطفني منك عارف روحك ماتسواش وماتعاشرش وانا ادا هادي دقيقة معاك هنا الا باه نحمي روحي وولدي في هادي الدار حبيت نستر روحي من الناس ليبرا الجيعانة المتوحشة .نضال على الاقل كان واجد يبرهن نيتو وعلى الاقل حاول يكون مليح معايا بصح نتا بدون ضمير وذرة طيبة مافيكش تحب غير روحك وانا قاعدة معاك وثقتي صفر من جيهة نظرتك ليا المحرمة ومن جيهة تخليني نولد طفل بلا هوية و لحد ساعة مادرت والو ووعودك تبان فاشلة وانا معاك هنا غير سجينة برك بصح نستحمل غير على جال الملايكة لي في كرشي _هزز براسو ونحا يدو عليا وشاف شاف ليا ولا خرج من البيت .تحركت من بلاصتي وهزيت قرعة ماء كنت راح نشرب على غفلة لقيتو خبطها من يدي وطاحت فالأرض وفي يدو دوسي رماهم فوق الطابلة تحتي بقيت نشوف معاهم عرفتهم سارتيفا تاعي وتصاور ليمعاهم تاع طبيبة _قلتي ماش مداير والو ونضال خير مني وبلا وبلا وبلا مالا شوفي ليهم مليح هادو هوما ليمخليين نضال يسكت يالحمارة .
الحلقة 32
بقلم لينا صبرينة
كيفاه يعني _يعني نضال على قد ماراهو يخوف هو راه خايف وهاد الشيئ ليخلاه مايشكيش بيك وكان حاب يتعاطف معاك باه يرجع هو المتحكم والمسيطر من جديد _نتا ماحكيتش وانا من وين نعرف ماتحبش تجاوبني_مي ليوم حطيها في بالك راهي زادت كبرت ناس شافوك معايا ودرك الهدرة تدور وتكبر هنا ريسكيتي بروحك وبيا هادا كلو من تخشان راس تاعك وكبريائك _هبط لم الدوسي وكان خارح _خليه هنا علاه تديه _دور ليا وضحك بإستهزاء .حابة نخليهولك باه تروحي تخوفيه بيه نتي صح بهلولة . اولا راني قاريك وثانيا نضال يخاف من دوسي هادا كيكون عندي انا ماش عندك ماتلعبيهاش شاطرة وفحلة ونتي والو _خرح وغلق عليا الباب بالمفتاح .أصيل افتح علاه غلقت الباب .انا هكداك وزيد ضوء طفا عليا حتا لاثيلي والاشارة تاعو طافية _اصيل واش دير افتح الباب راه ثريسيتي راح _انا ليطفيتو وراح تبقاي هكدا فالظلمة يديك ماتشوفيهمش تستاهلي _حرام عليك مانقدرش نقعد فالظلام ادا ماخفتش عليا خاف على ولد خوك _لقيتو خبط الباب بالقوة_ردي بالك تزيدي تحاولي تأثري عليا بسامي والله ماتتوقعي ردة فعلي راني نبهتك _مالا خرجني ولا شعل عليا ثريسيتي_هادا عقاب ليك محتمة عليك تسلكي اغلاطك _بقيت نهدر ونبكي بصح ولا رد منو وحسو ماكانش رحت فتحت التاقة دخلي شوي ضوء من برا وبقيت هكداك مانعرف شحال من وقت فات وانا على نفس الحالة حتا فجأة شعل ضوء زربت غلقت التاقة وهو فتح الباب لقاني واقفة _فتحتيها باه يدخلك الضوء _ماجاوبتوش_مالا ماتخافيس درك يشعل الضوء مليح وتعودي تحوسي غير وقتاه يطفى وتبقاي فالظلام _واش تقصد _تبعيني _لحقتو لقيتو دخل للكوزينة وخرج للبالكون كيخرجت معاه لقيتو جاب قصديرة عالية شوي واصلة لكرشي وعريضة وفارغة من داخل وقدامها فالارض الكابة ليجبتها من الدار وفوقها البيسي وفلاش ديسك وليفوطو واوراقي تاعي تاع الرسم _علاه جبتهم هنا درك ندخلهم _احبسي وريحي كما راكي _علاه .قرب مني وجبدني ليه من خصري حاولت نطبعو بلا مانشوف ليه _راح نهدر هدرة وماكلاه تقاطعيني ولا تبعدي روحك عليا وطلعي وجهك ليا وركزي معايا مليح _طلعلي وجهي وخلاني بسيف نشوف ليه _ليوم وفي هادي ليلة حابك بين يديا بكل ارادة منك وعارف حرام وعيب بصح انا جهنم في مل الأحوال قابلها على جالك _هززت براسي لالا مستحيل ..._هوب هوب ماكملش الهدرة باه ترفضي كملي سمعي واش عندي .المهم ياتقبلي تكوني ليا ليلة وراكي فاهمة قصدي ناوي معاك علاقة كاملة ولو انا ماش حاب علاقة معاك بهادي الطريقة بصح ليوم دودة راهي تلعبلي براسي ولا هادو لحوايج ليداخل الكابة وليفوقها يتحرقو قدام عينيك _وسعت عينييا فيه وقلبي رجع يضرب فالالف والعرق يصب مني تصدمت من كلامو حطني بين زوج خيارات وكل واحد اقسى من خوه_واش قلتي وجدان تكوني ليا ولا يتحرقو _هبطو دموعي وبقيت نشوف ليه بدون جواب _ماتدبليش عينيك هكدا ماش راح نغفرلك عملتك ولا نشفق عليك لازم نحاسبك خيري واش تقبلي _أصيل باه نكون معاك مستحيل حرام في حرام وباه نقبل يتحرقو ذكياراتي مع سامي مانقدرش هادا واش بقالي منو جبت كلشي يخصو _ازربي قرري ماتخلينيش نديرهم لزوج خيري خيار واحد _(ضعفت وحطيت راسي على صدرو وخممت بكل عقلانية اكيد ماش راح نعصي ربي وندير حاجة حرام كتر من واش راني ندير فيه بوجودي معاه تحت سقف واحد بصح في هاديك الدقيقة طلبت ربي يغفرلي وطلبت من سامي يسامحني) _ماش راح نكون ليك بصح الاختيار ثاني قابلة بيه _طلعي راسك وشوفي ليا وقوليهالي كلمة كلمة واش ندير هيا وجدان _طلعت راسي بكل استسلام وضعف _أحرق  كلشي يخص سامي _تبسم بكل انتصار وفخر وبعد روحو مني وراح هز البيسي كسرو فالحيط وبرجلو دقدقو بقيت نشوف وروحي من داخل تتكسر كيكمل منو هز هاديك الكابة حطها داخل هاديك القصديرة وزاد حط فوقها ليفوطو وكسر لفلاش وحطو تم معاهم وهز قرعة عرفتها ليصونص فرغها لداخل وفالأخير شعل بريكة ورماهم عليهم ولهبت النار .
الحلقة 33
بقلم لينا صبرينة
كيشفت نار كيفاه تحرق فيهم قلبي بكى دم وتحرقت من داخل غير دموعي ليكانو يهدرو انا جسدي فكان غير دمية في هاديك دقيقة تمنيت الموت تمنيت تخلاص حياتي ويتقطعو انفاسي كرهت ومليت وتعبت كنت مهزومة من أمري ماش بساهل نشوف واش بقالي من سامي يتحرقو قدام عينيا كان ليهم ذكريات حلوة بصح درك تحرقو ومانقدرش نزيد نشوفو ولا نخلي وليدو يتفكرو بيهم بكيت حتا نفدو دموعي وهاداك واقف ومتكي على الحيط ويتكيف ويتفرج هو والشيطان واحد لافرق _وجدان قدمي ليا هنا _واش حاب كتر راك قتلتني وانا حية كمل دفني وهنيني ماتصورتكش بهادي القساوة والندالة . قدم ليا ويديه فلجيوب _هكدا باه من ليوم ديريلي حساب وديري حساب لكل كلمة نقولها وماتزيديش تتكابري ولا تنفخي روحك عليا وديري رايك من ليوم الكلمة كلمتي والقرار قراري ونتي تحطي الخطوة على حساب واش نقول من ليوم كل غلطة منك تتحاسبي عليها وحتا يماك وخواتاتك ممنوع تزيدي تهدري معاهم _جبد ثلفون وبلوكا الفيسبوك وخباه فالجيب وانا بقيت نشوف برك بصح من داخل جمرة مكوية غير ربي ليعالم بيا شحال مضرورة ووكلت ربي على كل واحد كان سبب باه وصلني لهادي الحالة .من وراها بيومين لقيتو دخل عندي للبيت وكما موالف يتقرب مني بهاداك الهوس ليعندو لبزني بين يديه تحملت تحملت وليت انفحرت في وجهو بكل كره وحقد المهم مانبقاش ضعيقة ويزيد يتلذذ بضعفي .صح ردة فعلي ماعجبتوش بصح بعد مني وتراجعت خطواتو وهو يقولي جامي نندم على حاجة درتها _باه نوصفلكم أصيل خانتني الكلمات هو انسان نرجسي خبيث وقاسي ويفتخر بالتملك ليسلطو عليا ___هكدا فاتو شهور وانا حالتي النفسية مدمرة اصيل قدر يعاقبني تفسيا بلا مايمسني كل هاد شهور بقى مرة على مرة يجي يقابلني فالبيت ومرات يتمادى ويقرب ليا وانا كنت نحاربو ونبعدو عليا سيرتو كيكبرت كرشي ديرونجاتني وانا وليت نلهث ونعرق بزاف ومرات حتا من كثرة مايتلفو اعصابي ونعود غير نعيط نفشل وطيحلي لاطنسيو والسكر وهو كان يأنبو ضميرو فيا ويداويني ومرات كينمرض يسهر معايا يعسني بصح موحال يبين ضعفو كان دايما شامخ ومتسلط ودايما هو على حق وماكانش منو زوج هو الاحق وهو لمخير وهو الافضل كنت غير ماكلة ورقاد ومنعزلة على كلشي نخرح غير عند طبيبة وقاتلي عندك طفل حمدت ربي وشكرتو كان من غير هادا لخبر ليفرحني وبقيت نستى فيه بفارغ الصبر وهو كل مرة يشري حاجة ياللبيبي يا ليا أنا وكانت مرا في عمر ربعينات اسنها رقية تسكن قريبة مني موصيها ومسلكها كل يوم تجيب غداء وعشاء هيا تطيبو وكل مرتين فسمانة تجي لدار ولازم بحضورو تدخل تنظف الدار وتطيبلو وتروح ومايخليهاش تجمع معايا بزاف بصح انسانة طيبية ونية تدخل للقلب كانت ماتعرفش معاناتي بصح دايما تقولي خلي ربي في قلبك كبير وماتدري منين يفرجها عليك .كانت كيتخرج من الدار نحس بلفراغ سيرتو كيحارم عليا نتواصل مع دارنا وماعندي حتى معلومة عليهم مخليلي فدار ثلفون حطبة وفيها بيس باه يعيطلي كيكون فالخدمة ومرات مانهزش عليه يتقلق حتا نلقاه عندي باسكو الكازارنا قريبة لدار كيلقاني والو مابيا يقولي تخلعت عليك _خلي تحس بواش راهي تحس يما درك من تقطعو خباري عليها اكون مسكيينة حطت ألف سيناريو في راسها _شاف ليا وخرج شوي وعاود دخل _عيطيلها وحطي في بالك بلي حسباتلها ريزو برك عندك فالدار ماكانش عليها مازدتيش هدرتي معاها _كل مرة يسمحلي نهدر مع يما نموت فرحة .خرج شفتو راح لشمبرتو باين باه يعسني واش نهدر .هزيت ثلفون طابيت نييمييرو وعيطتلها (من قبل كنت نخاف نعيطلها باسكو محدرني ولو نعيط بسرقة عليه بصح خفت ركبلي الرعب من هاديك ليلة كون نخالف كلامو راح غير نتعدب ) هزت عليا ومن سمعت صوتها طرطقت ببلبكا هادا شهووور ماسمعتش صوتها ولينا نسقو على بعضنا وعلى حساب مافهمت أصيل كان يهدر معاها وكان داير سبة بالريزو فالدار ماكانش وهيا لامتني قاتلي علاه كيتخرجي ماتعيطيليش هادو شهور كلهم وليت راوغتها فالهدرة وبدلتهالها نسقسي على بابا وخواتاتي _باباك راه كما راه برك الهدرة عاد ينطق شوي .
الحلقة 34
حمدلله يما راني قريب ندخل شهري ونولد راح نجيب طفل بإذن الله _مبروك بنتي يتربى في عزك ودلالك وان شاءالله ترجعلك فرحتك وتقدري تجي لبلادك _ان شاءالله بصح ولو نجي بابا راهو ..._ايه مازال في كلمتو بصح كيتولدي ارواحي اكري دار المهم تكوني قريبة لينا وفي بلادك ومبعد كلشي يتحل بشوي___بعد ماكوبات دخل ليا .علاه راكي تطمعي فيها على باطل _واش حبيتني نقولها _عندك حق كلشي في وقتو مليح هاكي ثلفونك تاعك لول وحطي لابيس فيها _يكتر خيرك مانحتاجش _ماش كما تحبي قتلك حطيه انا علابلي علاه يالله راني نستناك حتا تكملي _درت واش قالي  حتا كملت باه راح رجع لخدمتو _هاديك ليلة كيرجع مادخلش عندي راح لشمبرتو ديراكت وكينضت نصلي الفجر سمعتو شغل ينازع فالاول ماحبيتش نقرب بصح كيطول وليت دخلت عندو كان راقد على سرير ويهترف ماقدرتش نفهمو ولمخدة كلها ماء كان يقطر بالعرق عيطتلو باه نفطنو مافاقش بيا تجرأت بيد ترجف مسيتو لقيتو يلهب بسخانة وليت نهزز فيه بسيف فطن .نوض اشرب دواء راك بسخانة .نضت رحت جبتهولو شربو وعاود حط راسو على لمخدة رقد ورجعت لبلاصتيي بقيت مرة على مرة نطل عليه وآخر مرة شفتو لقيتها هبطتلو وبركا من تنازيع للحظة بقيت مركزة في ملامح وجهو هو بشرتو بيضاء مايل للخمري موالفة نلمح صدرو وكتافو ووجهو خمري من الشمس وشعرو ماش كحل وماش مارو جاي شاتان كيكان راقد يبان ملايكة ماش هو نفسو كينوض يعود شيطان وجوه الناس غير اقنعة مصطنعة حكمت في قلبي حقد وغل عليه وليوم داويتو لانو تربيتي واصلي مايسمحوليش نخليه هكداك وانا مركزة معاه فتح عينيه ديراكت جات صورة عينين سامي بين عينييا وليت زربت خرجت لازم نقاوم روحي مانبقاش نشوف لعينيه شوي ولقيتو دخل عندي مفرفش مع روحو وداخل بعضو _شكون قالك تدخلي للشمبرة _في عوض تتشكرني جاي تحاسب باخي حالة _ ماتزيديش تدخلي وثاني واش كنتي ديري فوق راسي حتا فتحت عينيا هربتي _اووف شفتلك سخانة كيلقيتك مليح نضت خرجت واش تحوس عندي _ايه أمنتك __فاتت سمانة برك وبداني سطر عظيم وساحتلي سقية كنت وحدي فدار فهمت بلي راح نزيد زربت عيطت لأصيل شوي وكان عندي كنت ديجا وجدت كلشي هو كمل برك لبسلي العباية وعدلي الخمار باسكو من سطر فسدتو وطول طريق هو يقولي ديري شهيق زفير هيا اتنفسي مليح بلعقل ماتعيطيش في وذني صممتيهالي بشوي  _مالا اسكت علياااا السطر راهو ماش فيك وزيد تنصح فيا شغل موالفين يكرشوك وتولد _كون ماجيتيش راح تولدي كون عطيتك سوط تربي بيه لسانك _ربي روحك يا..._اسكتي راح تخليني ندخل في كاش واحد اسكتي وخلي طاقتك لفوق طابلة باه تجيك ساهلة زبادة _وراسك غير موالف تولد راك تعرف بالحمل وزيادة خير مني لايكون تعرف ثاني واش يصرا مور زيادة وكيفاه نرضع _علاه تشوفي فيا مخنث سكري فمك راه بدا يطلق فلخماج _ماكانش اخمج واحد قدك _نتي تباني بولون تنحالك ولا ماش رااكب مليح ماش راح نلومك اولدي ومبعد ساهل _كيفاه راح نجيب هادا طفل وورقة ماعندي راح يولد وهو بلا هوية ويقولو عليه غير شرعي وولد حرام _ماتهميش في هاداك الشيئ واسكتيي شوي وشبيكيي تغلي ونحي يدك من يدي راكي غرسي ضفارك فيا جامي مستيتني غير ليوم جاتك تنتقمي _نحيت يدي وبقيت عقابو فوق راسو غير نهدر ونعيط مضغتو بالترخاس شغل جاتني فرصة واستغليتها افضل استغلال _وصلت لسبيطار ودخلوني ديراكت فوق طابلة وربي سهلها عليا وجبت طفل كيسمعت صوتو يبكي حطيت راسي وريحت وسميتو صمد وسمعتهم كيقالو كيولدت بهادي سهولة عندها زهر .خيطوني وقلتلهم وينو طفل نشوفو _قاتلي طبيبة درك داوه يغسلولو وتشوفو طبيبة ومبعد يجيبوهلك _علاه تشوفو قبلي وين صرات هادي جيبوهولي هنا _ياختي نتوما دزيريين دمكم حار اصبري برك ومبعد يجبوه لخضنك  _داوني لشمبرة ومن تعبي غفات بيا عيني شوي ونضت لقيتو فوق راسي كان بدل حوايجو نحا الكومبا تاع العسكر _مبروك عليك وجدان _كان اول واحد يباركلي بحملي وأول واحد يباركلي بزيادتي وهاد الشيئ كان من حق سامي بصح المكتوب كان عندو رأي ثاني سبحان االله  _ماجابوليش صمد حابة نشوفو_ درك بجيبوه ارتاحي برك _وشبيك وجهك ماش عاجبني ولا كنت حابة يموت _ماكان والو نحي هادو الافكار من راسك ومن ايوم وليدك هو وليدي  _ قعد بجنبي وساكت حتا جابتو فرملية حطتو في حضني .ياعمري على حبيبي واخيرا جيتني وفرحتلي قلبي وراح تزهيلي ايامي .بقيت مدة نحفظ ونركز في ملامحو كانت بشرتو مخلطة وعينيه ملونين ماش باينين مليح بصح متمنية يشبه لسامي .كيخرجت الفرملية. أصيل قدم ليه وبقى يتلمس فيه من يدو وساكت  _أصيل راه بلا هوية ياك وعدتني من قبل _صايي قتلك فريتها وولدك راه بإسمك وبإسم سامي كونك مهنية _هبطو دموعي على ولدي وحمدت ربي وشكرتو واخيرا راح تزهالي أيامي _علاه غطاوه هكدا قريب يخنقوه د _جيت نحيلو شوي زاورة حكملي يدي اصبري ساع عندي هدرة معاك _سمعتو وياريت كان للقدر رأي ثاني.
الحلقة35
بقلم Lina sabrina
وجدان الهدرة لينقولهالك اتحمليها واصبري وتقبليها _خوفتني واش كاين _وليدك راهو خلق مريض بصح راح يبرا ماتسرعيش وتقلقي _ديراكت هبطت عينييا ليه نشوف معاه تخلعت .وشبيه راه يبان لاباس عليه انطق علاه راك تقطر عليا فالكلام  _قتلك بعقلك ماتقلقيش عندو تشوه دماغي من كان في كرشك خرجت فيه حبة في راسو بصح ليه حل لانو التشوه خارحي يدير عملية ويرجع عادي _للأسف فرحتي ماكملتش ومن الصدمة في هاديك الدقيقة دمعة ماهبطت من عينيي بقيت غير نشوف ليه وأصيل غير يهدر ويفهم فيا _وجدان صمد من كان في كرشك والتشوه تاعو واضح بصح ماحبيتش نخبرك وحتى وصيت الطبة كامل واحد مايخبرك باسكو عارف من سابع المستحيلات انو تطيحيه من كرشك وتفرطي فيه وتسمحي في ولد سامي ربي يرحمو عليها فضلت نخليها فالستر باه مانزيدش عليك باسكو ماكان حتا فايدة كينخبرك راني عارف وحتا متوقع ردة فعلك فالاول طبيبة شكت وقالت من الاحسن تطيحيه بصح انا هاديك ليلة كلها وانا نخمم وفالاخير قلتلها خليها على ربي وببناتنا برك ومن وراها كيديتك لطبيبة خلاف اكدتلي التشوه بصح كان صغير وكانت متوقعة يكبر وبزايد كان عندك سكر الحمل وهاداك ليزاد أثر عليه انا كيكنت نوكل فيك بالريجيم ماش باخلك وانما كنت حريص و خايف عليك وعليه وقلت مانخبرك مانقلقك وادا كمل حملك وولدتي على خير لتم تعرفي وتكشفي ولدك واش عندو ودرك ابكي وخافي وتحسري من حقك راه ولدك والكبدة واعرة وصعيبة ومايعرفها غير ليعندو قلب حنون ونتي هكدا وتعرفي واش معنى العشرة لبيبك وبين المرحوم ومادام كان فيه روح كنت متأكد ماش راح تطيحيه حافظ تخمامك هو ولد وريحة الغالي لي في قلبك وحاليا ماش راح ننكر هاد الحقيقة درك أنا نحيلو لغطا لي في راسو بصح كالمي روحك _قدم نحالو وشفت راسو من شفتو قلبي وروحي وكلشي فيا عاد يرجف وهبطو دموعي منظر الله لا يشوفكم فيه ولا يحط أم في بلاصتي كان عندو تشوه في راسو من لور حبة قد كف اليد بكيت وتحسرت وغاضني وغاضتني عمري وقلبي حسيتو راه يتعصر عليه من داخل ماتحملتش وهو غير يكالمي فيا _أصيل راك تقولي تشوه خارجي بصح راني نشوف فالحبة لاصقة في راسو راك تكدب عليا _وجدان كاين ولاد كتر منو بصح هو مخو راه في بلاصتو والحبة راهي فارغة يعني كيديرولو العملية ماش راح تكون معقدة بزاف وشوفي راسو راه طبيعيي من غير الحبة برك كينحوها يرجع لاباس بيه _وكيدير العملية راح يبقى راسو مشوه طول عمرو ؟؟_لالا العملية راح تكون تجميلية راني هدرت مع الطبة من قبل وزدت تأكدت ليوم وطبيبة من قبل تاعك قاتلي غير تدخل في شهرها تجي باه تدخلك سيزاريان ديراكت بصح صمد كان مزروب وجاء قبل الوقت وهادا الشيئ ساعدك وساعدو باه التشوه مايكبرش كتر ودرك مادام ولدتيه لازم نزربولو بالعملية على قد مانزربو على قد ماتنجح و نتي لازمك تصبري وتتقبلي اي حاجة تجي من عند ربي وخلي ايمانك قوي وليكتبها ربي قولي الحمدلله _بقى يفهم فيا و اول مرة يهدر كلام تاع الدين ويكالمي فيا بيه حتا دخلو طبيب وفرملية عندي باه يدوه وزاد طبيب فهمني كتر وكتر وكانت نفس هدرة أصيل برك هو زاد غمق في تفاصيل الطب .قدمت الفرملية تهزو من حجري _بعدتو عليها _مادام سامحيني لازم ندوه مايقدرش يبقى معاك كتر هادا خطر عليه _ماتدوهش عليا خلوه عندي يعيشكم حابة نحضنو ونرضعو ونرقدو قدامي أصيل قولهم مايدوهش ويداووه قدام عينيا _محتمة يدوه لازم يبقى فالحاضنة ويراقبوه عندهم باسكو ماش راح يطول ويديرولو العملية وادا بقى عندك هكدا تعودي تلعبي بحياتو والتشوه ليعندو راح غير يكبر ونخسروه اتحملي وجدان واصبري على هادا الإبتلاء _وكون يموت فالعملية مسكين راه صغير خلاص والله بلا بيه نموت ماتبقالي حتا حياة _علاه تفولي عليه بعيد الشر هو صح الرأس حساس بصح لمزية التشوه تاعو خارجي ماش داخلي بالعكس أحمدي ربي وأشكريه هكدا ولا كتر_شفت معاه دمعة في عيني وابتسامة في وجهي .الحمدلله والشكر لله على ماإبتلاني .صمد وليدي ربي يشفيك ويحفظك من كل سوء ويارب ترجعلي لحضني سالم ومعافى وتكمل فرحتي وربي مايحرمني منك  _مديتو للفرملية وقلبي محروق عليه ماقدرتش نتقبل مرضو وبلي كاين احتمال نخسرو ونخسر واش بقالي من سامي ياربي نتا الستار استرلي وليدي وماتخليش كبدتي تتحرق .
حلقة 36
بقلم لينا صبرينة
من وراها زدت سمعت خبر زاد هدملي كياني وحسيت بتأنيب الضمير ولومت روحي على واش صرا لصمد عرفت بلي هادا التشوه ممكن من دواء تاع رقاد ليكنت نشرب فيه وليت نندب في وجهي _وجدان ألعني الشيطان وبركاين ماديري هكدا الله غالب عليك كنتي تشربي فيه بلا علمك للحمل وطبيبة كيقلتلها اسم الدواء قاتلي ممكن منو او من دواء خلاف ويكون مفعولو قاوي بزاف ويأثر بفترة قصيرة _ونتا وين تعرف اسم دواء _كنت كينجي عندك نشوفو قدامك حفظت اسمو _يعني منو الله ياخدني ونتهنى من حياتي ياربي ماتمتحنيش بولدي كون تصراولو حاجة ويموت ساعتها دفنوني معاه مانقدرش نعيش وانا هيا سباب مرضو وموتو _بعيد الشر ماش متأكدين بلي من دواء .ممكن حتا من الضرب ليخديتيه من عند نضال راه ماش ساهل واش دار فيك ومن فوقها بقيتي لاهبة بسخانة كل هادو الإحتمالات ممكن يكونو سبب وفالاخير كاتبة من عند ربي ابتلاء اصبري عليه يعني ماكلاه تلومي روحك واتهدني_كيماحبيتش نتهدن جات فرملية دارتلي برا منها تكالميت ورقدت__ لغدوا نضت على حريق من تحت وحسيت حاجة تجبد وتوجع في لحمي شافتني طبيبة لقات خياطة تفتحتلي شوي قاتلي لازم نعاودولك عندك إلتهاب درك نرجعلك _هيا خرجت وشوي دخل اصيل سترت روحي مليح _صباح الخير _على الاقل طبطب الباب قبل ماتدخل ماش تدخل على هواك _مايهمش كيفاه صبحتي لاباس عليك _مادام وليدي مريض راح نبقى مكوية عليه وماش راح نرتاح لا نفسيا لا جسديا _يامات برك ويروح عليك هادا الكابوس ويرجع وليدك لحضنك اتفائلي خيرا تجديه _ان شاءالله .(جاوبتو وشفت ليه وفي قلبي هادا منين طاحت عليه قوة الإيمان بصح باين هادا التغير مؤقتا)_ قولي كيفاه حتا حطيت صمد بإسم سامي وانا ورقة ماعنديش_شكون قالك ماعندكش صايي فريت كلشي وجددتلك كواغطك _وسعت عينيا وتقعدت مليح .كيفاه قدرت تديرها وانا ماش حاضرة فيهم ؟_خدمتهم بمعرفتي _وكييفاه درك نضال اكيد يفيقلي بلي جددتهم وهو موالف يهددنيي _ماعندو مايعملك مادام راني واقف على كتافك راح يخاف على روحو المهم خلي كلشي في وقتو مليح  _دخلت طبيبة مع فرملية وهو خرج عاودو خيطوني ولو بلانستيزي بصح حسيت بالوخز تاع لبرا وتوجعت .كيخلصو نصحتني بدواء لينغسل بيه وخرجت .هزيت ثلفون كان قدامي وعيطت ليما خبرتها بكلشي صرا مالقات تباركلي ولاتهدن روحها ولا تصبرني بعد ماكوبات بقيت على أعصابي حابة نروح نشوف صمد بصح ماخلاونيش حتا باه يرضع لازمو حليب سبيسبال مايقدروش يخلوه خارج الحاضنة لفترة طويلة وانا على قد ماعصرت ماخرج مني والو من صدري ناشفة .حتا لغدوا من داك باه طلعت شفتو كان داخل الحاضنة وليزاباراي عليه بقيت نتأمل فيه وطلبت ربي يشفيه ورجعت لبلاصتي حتا جاء أصيل هزلي قشي وخرجت من سبيطار ورحنا لدار وانا فارغة اليدين ووحيدة بصح خليت قلبي وعقلي عندو .بقيت كل يوم نروح نشوفو نطل عليه نتفقدو ونرجع لدار كنت حاسة بفراغ كبييير في حياتي ولو أصيل راه متهلي في كلشي يخصني وماهوش يقلق فيا ولا يقرب مني وحتا عاد يخلي رقية تجي عندي تونسني وتعاوني بصح حاجة ماخففت عليا واش نحس من داخل. صمد كان هو أملي فالمستقبل انو يغيرلي حياتي للأحسن ويفرحني بعد الحزن ليجاز عليا ويعوضني على واش ليفات ونكون انا وهو واحد بصح قدر الله ماشاء فعل __بعد هادوك ليام وصلت عمليتو وأصيل تكلف بالمصاريف والإجرآت كلها وكان لازم يديبلاصيو صمد لاكلينييك في ولاية خلاف وهنا أصيل دار المستحيل باه يقدر يتغيب على خدمتو ونروحو .كيكنت نوجد فالكابة باسكو غدوا نروحو لقيتو دخل عندي لابس الكومبا وحاط يديه وراء ظهررو هادي الوقفة تاع الشموخ وملامح وجهو المشبوح ونظرتو الحادة نعرفها كاش ماراح يعطيلي محاضرة ولا يطلب كاش حاجة _أصيل مادام دخلت راح نقولك حاجة اعطيلي كواغطي باه تديني نجبد دراهم العملية من لابونك ماش محتمة نتا تسلك _حسباتلك ساهلة قتلك انا جددتلك كواغطك نتي ماش تاع سامي وماش كلشي خرجتو لازملهم وقت وباه تجبدي دراهم تاع سامي من لابونك يلزملك اجراءات كبيرة وكيف كيف تدي وقت واصلا ماش محتاج لا دراهمك لا دراهمو عندي دراهمي انا نتكفل _مالا اعتبرها دين _قلتهالو ودورت نكمل نجبد في قشي _وجدان عندي هدرة معاك _من دخلتك باينة اهدر _حاب نتزوجك يعنيي نفتح عليك قبل مانروحو _عقدت حواجبي وتفاجأت من واش طلب.راك في عقلك ماهوش وقت زواج درك وولدي بين لحياة ولموت وزيد راني نافسة _عارفك نافسة وانا ماقلتش ندخل عليك قلت مادام ولدتي خلصت عدتك نقدر نفتح عليك _لا وألف لا انا محروقة على ولدي وهو تخمامو فزواج .وليت نهز فالقش ونرمي للكابة من زعاف _مالا نتي ليحابة تبقاي مع راجل غريب عليك تحت سقف واحد فلحرام انا خاطيني وراني صابر عليك برك على جال طفل .
الحلقة 37
بقلم لينا صبرينة
ماحبيتش نجاوبو وهو خرج وخممت في  كلامو على لحرام كان عندو حق بصح مانقدرش نحصل روحي معاه ادا ربي مد لصمد عمر جديد نهز كواغطي ونسهل لبلادي _لغدوا من داك رحنا لامبيلونص الأولى وحنا وراهم أصيل كان حاب حنا نسبقو بصح انا اصريت اني نمشي مع ولدي خير كيوصلنا طلعوه دييراكت لعندهم حتا لغدوا ويدير العملية وحنا ماعندنا مانديرو تم ممنوع حتا نقرب بسيف كيدرت مندبة ولا اصيل هدر معاهم وقنعهم باه خلاوني نشوفو شوي كل مرة نشوفو نلقاه راقد وهادا الشيى ليقلقني وخوفني وكتر بصح هوما بقاو يطمنو فيا انو عادي اي بيبي ايامو الأولى يرقد بزاف ولا علاقة بمرضو .خليتو وخرحنا من لاكلينيك داني لوحد ريسطو نتغدوا ماحبيتش نهبط عيا فيا بقيت مخشنة راسي ماعنديش شهية ولا كره خرج كيرجع جاب معاه ساشي ركب ورحنا لدار ليكراها راح نبقاو فيها. دخلنا ليها كانت مجهزة من كلشي ونظيفة _هاكي غداك كيتجوعي كولي وانا داخل ندوش ونرقد ميت بالتعب _كيكمل وراح لشمبرة غلق على روحو مايحشمش ماقالش راهي نافسة خلي هيا ترقد فشمبرة وانا فصالون على فوتاي مرات نحسو يحبنيي مهووس بيا ومرات نحسو يحب غير نفسو ومايهمو غير نغسو كل مرة بخرجة جديدة .نضت انا ثاني غسلت عليا ورجعت كليت شوي من الماكلة ليجابها على جال نشرب دواء كيكملت حطيت مخدة على الفوتاي لمزية عريض وتكسلت .من غير حطيت راسي من تعب دييراكت غفيت مافطنت غير كيحسيت روحي فالهواء ويد تحت دراعي ويد على ركايبي ونفس تاعو في وجهي من الفجعة ماحبيتش نفتح عينيا .بقا يمشي بيا حتا حطني على مطرح فتحت عينييا على ضوء خفيف فشمبرة قابلوني عينيه مخدرين بيا وغايبين عن الواقع بلعت ريقي من نظراتو الجريئة ليا وفي نفس الوقت خفت مايتهور وكاش مايدير _قدم وجهو لوذني وتلمسلني وهمسلي .كلمة وحدة منك نروح نجيب إيمام وشهود ونجي نفتح عليك ولتم ماتعودي ماتحسيش بتأنييب الضمير على لحرام ولا تحسي بعدم الثقة فيا .صح نفتح عليك وترجعي حلالي وانا حلالك راح يروحلك هادا الخوف والضعف وسلاحك معايا انو تعاملينيي بجرأة وعدم خوف بصح نتي درك راح تجيبيها غير في روحك وانا كينشوف ضعفك راح نزيد نقسى عليك كتر وكتر ودرك راني قابلت عينييا في عينيك وماكلاه تهربي منهم حابك تجاوبينيي بالموافقة وانا نجري نفد طلبك _مادام جبتني لشمبرة كمل خيرك وشعلي فيوزة خير من ضوء تاع برا وخلينيي نرقد بالاك تخفاف روحي وننسى همومي وتبرد ناري على ولدي  _غمض عينيه وعاود فتحهم بكل حقد وناض كيثور الهايج خرج وغلق الباب وراه بالقوة وخلاني فالظلمة ولو راه نهار برا بصح الكاش ريدو مضلمنين الشمبرة وليت نضت شعلت فيوزة وغلقت الباب بالمفتاح باسكو كيضعف ويقسى في نفس الوقت راح يخرجلي شخصيتو النرجسية الخبيثة وماش راح نتفك منو ولا نقدرلو __لغدوا على صباح كنا فلاكلينيك وصمد دخلوه لبلوك بقيت نستنى على اعصابي وروحي من داخل تحرق كيلفلفل الحار وماش قادرة نهز روحي فشلت لدرجة ماتصوروهات ويما وخواتاتي مرة على مرة يعيطو يسقسو ويكيبو.. وغير طولو معاه فلبلوك حطيت جميع الاحتمالات في راسي وبدا خوفي يتضاعف واصيل يقولي عادي عملية شوي حساسة عليها يطولو __بعد ساعات واخيرا خرج طبيب كيشفتو خرج ماقدرتش حتا نوقف وأصيل راح ليه سمعتو كيقال الحمدلله العملية ناجحة رايح يبقى تحت المراقبة حتا تزيد تتحسن حالتو _من سمعت لخبر رجعت نبكي ونرجف قدم ليا اصيل قعد بجنبي وحكم يدييا _خلاص اتكالمي حمدلله صمد بعد يامات راح يكون في حضنك شفتي قتلك مايكون غيير الخير _بقيت نحمد ونشكر في ربي كيخرج منها سالم ومابيه والو ورجعلي الأمل من جديد في حياتي .حتا خرجوه ورحت شفتو غير من بعيد وراء زجاج كان راسو كلو مغطي وليزاباراي مازالو راكبين فيه وانا هكداك حسيت بيد على خصري تخطفت لقيتو أصيل _هادا انا وشبيكي مفجوعة _قالها وغمزلي .ماتزيدش تدير هادو ليجاست ولا تمسني ماعندي حتا طاقة نزيد نتلى بيك خليني مع ولدي وحالتو بزايد عليا _تبسم وماجاوبنيش وبقى يشوف لصمد .
الحلقة 38
بقلم لينا صبرينة
وفاتو ليام وشهر كلو وصمد حبيبي وأخيرا راه معايا فدار خرجناه من لاكلينيك ورجع لحضني بصح مازال مابراش مية بلمية لازمتلو رعاية خاصة وكل مرة يسويفي عند طبيب باه يتأكدو انو ماكانش مضاعفات وبلا دواوات وزيد صرالو مشكل فالمسالك البولية ولازمو ختانة بصح الوقت الحالي ممنوع حتا يبرى شوي من راسو باه نقدرو نختولو قبل مايزيد عليه الحال .ودرك فرحتي ماش واسعتني نرضعو ونلبسلو وتغسلو وكون نصيب من قدامو مانتحركش ونبقى نتأمل فيه عينيه زورق كما سامي ان شاءالله برك مايتبدلوش وبشرتو خمرية ومع يكبر يزيد يبان مليح _وجدان بعدي من طفل شوي ياك راقد خليه يتنفس وارتاحي نتي قبل لاينوض _مانقدرش هادا روحي ونفسي دنيتي وحياتي كلها ادا قلقتك وانا نشوف لولدي هكدا ساهلة ماتشوفش ليا _هزز براسو وخرج من شمبرة وسمعتو قال راه بدا العد العكسي وجدي روحك _استغفرت ولتيت بروحي وبالملايكة ليقدام عينيا  __لغدوا على صباح لفيت مليح صمد وخرجنا من دار ركبت من لور وهو رجع لدار جاب الكابات وغلق الباب واستنا شوي حتا جاء راجل مدلو لمفاتح تاع الدار باه ركب وديمارينا طوول لدار وصلنا مع الظهر .دخلنا وهو كان مزروب زرب بدل قشو وخرج ماطولش ودخل بالقضيان _راه كلشي تحتاجيه هنا وكاش مايصرا عيطيلي _هززت براسي وراح __فاتو يامات مع صمد علكيف كل يوم يتحسن خير من نهار ليقبلو بصح نسايسو قد مانقدر ولازم مانخليهش يبكي بزاف ولا نهزو بزاف غير من ببلاصتو ونسايس ورقية مرات تجي نخليه معاها ونرقد شوي باسكو مرات مايرقدليش فليل ونبقى عساسة نخاف كاش مايصرالو .وأصيل كلما يدخل لدار مانكدبش يجي لعندو يبقى يتلمس فيه ويلعب معاه وماكانش نهار مادخلش لدار وماجاش شافو وطمن عليك كل مرة يسبق ليه ومتهلي فيه من كل حاجة _شفتو خرج من الكوزينة وراح لشمبرة وليت تبعتو من غير حطيت رجلي فيها شعل فيا _هووب هووب وين داخلة واش تحتاجي _بعقلك طفل راقد علاه تعيط برك عندي هدرة معاك _تبعيني للكوزينة وهدري _تبعتو كيف الجندية الفاشلة وعينييا مقلبين من تصرفاتو ليتقلق _اقعدي لاه واقفة فوق راسي _قعدت .حابتك تكملي دوسي تاعي باه نقدر نجبد دراهم _رجعنا لنغس الموضوع واش دييري بدرراهم كاش ماممنقص عليكم كاش حاجة _لالا ماش هكدا بصح حاسة روحي ثقيلة _بيانسور تحسي هكدا كون راكي درك معايا فلحلال ماتحسي روحك ثقيلة اصلا ياولوكان تجبديهم ماش راح نخليك تصرفي فرنك مادامكم معايا تمشو على حسابي وعلى كلمتي _ماش محتمة نمشي على كلمتك _تحبي نفكرك واش يصرا كون تعكسينيي_شفت معاه بكل حقد. نفترضوها بالاك انا نستاهل واش درت بصح وليدو اكيد مايستاهلش انو يكبر ومايلقى حتا صورة من باباه يتفكرو بيها بصح ماعليش كاين ربي وندامتك تجي روطار.  نضت وانا نفور من داخل_وجدااان دوري ليا _خيير واااش تحوس _ماتعيطييش في وجهي وفيريفي روحك وبدلي قشك راكي تنزفي _كيقال هكدا تصمرت في بلاصتي كي لحجرة _حط يدييه وراء رقبتو وطلع راسو للسقف ورجل على رحل ويتبسم _يالله وجدان قبل مانشوفو يهبط مع رجليك  ماتخلينيش نغمق في هدرتي كتر راكي تعرفيني ماعنديش حدود _زرب رحت للدوش ووجهي راح يكلاطي من الغش والحشمة وكيغلقت الباب بالقوة فطن صمد بدا ييبكي _خودي راحتك راني معاه .
الحلقة 39
بقلم لينا صبرينة
شفت مع رووحي صح قشي مطلي من لور وعلى البخصة جاتني قاوية مافقتش بروحي غسلت وسمعت صوت فالباب _وجدان قشك حطيتو قدام الباب ورراني مع صمد ماتخافيش _كيتأكدت بلي راح فتحت الباب غير شوي وجبدت قشي كان فالأرض من دخلتهم وشفتهم جهلت والله صح ماعندو ذرة حشمة ولا حياء جابلي جبة ومعاها ليبوند وملابس داخلية هادا وين يعرف وين حاطتهم رخيس مايحشمش .لبستهم وغسلت قشي لتم بعد و تكوراجيت وخرجت لقيتو معاه يلعب كيشافني باسو وخرج من الدار __هاديك ليلة سمعت ينازع رحت ليه نفس الشيئ يلهب بالحمى نوضتو شرب دواء وانا غير ندمي مافهمتش روحي غير نبدل ونعاود .لصباح سقسيتو علاه مرة على تجيك الحمى هادي _الكازارنا باردة وكينعرق يقيسني لهواء برك عادي والفت ونتي لاباس _حمدلله _نوضي شوفي صمد راه تقيا مسحيلو _درك نشوفو _هيا نوضي وشبيكيي تشوفي معايا _اخرج برك من لبيت درك نوض _كاش ماكاين ولا حاحة مخبيتها عليا _حاجة خاصة بيا اخرح برك _لقيتو قدم ليه لسرير تاعو مسحلو وقعد بجنبي ماش متحرك حتا تقولي واش ليبيك _بقا يحقق معاها حتا نطقني .مريضة وراني ننزف بزاف وحاشمة نوض قدامك فهمت درك والله هكدا راك تعدب فيا ماعندي ولا خصوصية لا راحة معاك _مممم راني خارج خودي راحتك _خرج وغلق الباب وراه وانا هاد المرة تحتمت عليا لبست ليكوش تاع صمد . مور ظهر دخل لدار _انا فالخدمة وبالي معاك هيا نديك لطبيبة خير _علاه مابيا والو _سي بيك هيا نديك ماش مليحة تبقاي تنزفي بزاف ممكن يكون عندك مشكل هيا ألبسي ولبسي صمد وانا برا نستناكم _هززت براسي ولبسنا وداني لطبيبة قاتلي تبان حاجة طبيعية ومنا على 6ايام رجعيلي نزيد نتأكد من رحمك بلي مابيه والو _خرجت لعندو ركبت وهزيت عليه صمد وبقى يشوف ليا _انطقي واش قاتلك _حاجة تاع نساء مانقدرش نحكيهملك _هز دوسي ليعطاتهولي طبيبة وبقى يقرا شغل راح يفهم _عندك رونديمو منا على 6ايام _ايه _ان شاءالله __فاتو ليام وأصيل يوميا يجبدلي سيرة الزواج وانو هو وفى بالوعد وانا ماوفبتش بصح نطنش فيه قد مانقدر ونحوس نقريلو لامان باه يمدلي كواغطي ونروح ماش حاباتو يفيقلي بلي ناوية عليها بصح عارفة راه يحسبلي فليام وايامي رجعت معدودة صبرو بدا ينفد __ حتا لوحد نهار دخل لدار وانا كنت مع رقية قاعدة _هيا ليوم رونديفو تاع طبيبة ولا نسيتي البسي وصمد خليه مع رقية _لا نديه معايا _وجدااان كلمتي سمعتيها يالله وتروحي بسيف عليك _شفت مع رقية قاتلي راه أمانة عندي ماتقلقيش .وليت نضت لبست ولحقتو كان يستنى عند الباب .خرجنا وقلبي ماش مطمن ركببت معاه _أصيل ولو رقية انسانة مليحة بصح نتا جامي خليتها وحدها فدار كيفاه درك خليتلها الدار ووليدي ماش خايف_تبسم بإستهزاء انا صمد ورقية  نخاف منهم عليك _واش تقصد _تكبري وتفهمي وصمد ماعندو مابيصرالو معاها حسباتلك دنيا سايبة ولا نسيتي انا شكون__ داني لطبيبة شافتتي لقات كلشي مليح ورحمي لاباس عليه من غير انفكسيو حاجة قليلة كيكملت رحت ركبت وديمارا بسكات لقيتو قارا في بلاصة ماعرفتهاش وهبطني _علاه جبتني هنا _باه تشوفي دارك لجديدة _كيفاه ؟_تعودي تسكني هنا هيا ادخلي وشوفيها _قريت لامان وكنت حاسبة راح يعطيلي الحرية .دخلنا كانت غير استوديو _نتا علاه تحب ديار صغار وضيقين _خطواتو قربت ليا وهو يهدر .باسكو انا وسامي ماش كي بعضنا _انا هدرت على الدار _ايه سامي كان مسكنك في دار واسعة ومشروحة بصح انا نحب نسكنك في دار ضيقة وصغييرة باه منيين تروحي عيني تبعك ماتغيبيش عليا دقيقة _علاه حشرت فيا بعد واش ناوي واش تقصد كيجبتني لهادي دار _قتلك دارك لجديدة ومن ليوم تعودي تسكني هنا وحدك برك _(قلبي حسيتو فسخ) ماتخلعنيش بهادي النظرة القاسحة وكلامك انا نكون وين يكون وليدي .
الحلقة 40
بقلم لينا صبرينة
وليدك راه في أمان وفي دارو نهار يماه تحط عقلها في راسها ترجع لعندو _حاب تحرمني من ولدي ماش راح تقدر وماااش من حقك _بصح نتي من حقي ونعمل فيك ليبغيه راسي _على واش تحوس من تالي _نحوس عليك تقبلي نتزوجو وبلا ماتزيدي تضيعي الوقت جبتك هنا باه نحطك تحت الأمر الواقع عييت وانا نصبر ونديرلك فالأعذار كنتي بالحمل فلازم نستنا ولدتي وصمد مريض وقتلك نفتح عليك رفضتيي قلت ماعليش مانزيدش نضغط عليها كتر درت العملية لصمد ورتاح ورجع لحضنك والحمدلله وبقيت نستى فالموافقة منك وكل يوم نحبدلك سيرة وقلت ليوم غدوا تقبل بصح نتيي مطشنة ومستهزأة بيا بصح درك خلاص من نهار اليوم يبدا العد العكسي لتنو كرهت ومليت وانا نصبر في روحي والقرار تاخديك بنفسك نهار تكرهي وتتواحشي كبدتك اكيد راح تقبلي بزواجنا _بصح هكدا راح تحتم عليا _ايه نحتم عليك ونجبرك المهم راكي معايا خيري يالحلال يالحرام _بعد مني .وقبل ماتجاوبي خليني نحطلك شوي نقاط على الحروف _حط يدو فالجييب تاع لافاست وجبد منو . شوفي هادي لاكارت تاعك هويتك وهادا باسبور وهادا الكارني تاع العقد  تاع تونس نتي وسامي حاليا هادو يدخلوك بيك بولدك لدزاير بصح نخليك تحلمي بيها ياوجدان ادا حاطة في راسك من البداية تلعبيها عليا مور ماتولدي تكوني غالطة فايقلك وفايق بتخمامك الفاشل موحال نخليك تروحي وتبعدي وادا اضطربت وخشنتي راسك راح تبقاي محبوسة هنا طول حياتك وولدك يربوه الناس _قربت ليه زرب هزهم وخباهم .ماتقدرش تحبسني هنا وحدي وبلا ولدي حرام عليك _مالا اقبلي لحلال نرجعلك ولدك لحضنك _من تالي مانقدرش نتزوجك والله نعاف روحي كيفاه نرجع مرت صاحب سامي ليتعدى على شرفي وانا في فترة العدة وحزني جديد غير هادي ليمانقدرش نتقبلها ماش فاهمة كييفاه عطاك قلبك تشوف مرت صاحبك الروح فالروح كان حاط فيك ثقة كبيرة _فالاول تجيك صعيبة ومبعد توالفي كما انا جاتني فالاول صعييبة من اول يوم شفتك فيه فالمطار من هاداك نهار مارحتيش من بالي فالاول قلت اعجاب برك بصح كل مرة الحالة كانت تطور كتر وكتر ونهار شفتك مع نضال في هاديك الوضعية طحتي من عيني وماطولتش ورجعت نشوف ليك بنظرة مليحة سيرتو كيكان سامي طول الوقت يحكي عليك وعلى حبك ووفائك ليه زدت هبلت في قلبي وعقلي لدرجة وصلت نرقد مع نسرين ونغمض عينيا باه نسخايلك نتي تحملت وصبرت وبقيت نغض النظر عليك ونحرم في روحي باه نتقرب لأي حاجة نتي فيها غيير باه مانخونش صاحبي وتمنيت سامي يهزك وتروحو بعيد من عيني مانعرف كنت حاس بلي راح ندير حاحة ماش مليحة كنت ناوي على مصيبة وصلت لحد أقسى من حبي ليك تهلوست ضيعت وصورتك بين عينييا قلت كون مانديكش اكيد نهبل كنت حاس بعقلي مخطوف وغير قلبي ليتحكم  بصح شاءت الأقدار انو سامي يموت وانا ناخد بلاصتو بكل بساطة ونكشف على حرمتو في نص الليل كنت كينشوفك راقدة نخمم نخطفك ونديك بصح استعقلت وكنت كلما نجيك نتمناك تفطني بيا باه نحطك تحت الامر الواقع وصح ووصل نهار ليماتوقعتوش انو نجي ونلقاكي فالانظار ماكان عندي حتا حل من غير نفورصيك ونخوفك ونكشف عليك ونهددك ونضربك كان لازم نستعمل القوة معاك واصلا مانكدبش عليك كيتقربت منك وشفت ضعفك وخوفك مني حبي ليك زاااد أضعاف حسيت بلي صايي ملكتك من خوفك سيطرت على عقلك ومامانش حاجة تفرقني عليك وهادا واش صرا بكل اختصار ونتي هادو شهور في داري الشيطان كل يوم يوسوسلي بصح متحكم في روحي بصح درك خلاص نفد صبري ومحتمة عليك تخيري تتزوجيني بإرادتك ولا تبقاي محبوسة هنا وحدك  _بعد كلامو كلو فشلت رجليا مابقاوش يهزوني رحت قعدت ودموعي متحجرين وهو هز دخان وبدا يتكيف قارو مور خوه وانا غير نخمم ويديا على راسي راح ينفحر مالقيتش روحي .طلعت راسي ليه .بصح زواج بالفاتحة بلا ولي أمر لا يجوز وغير مقبول مايصحش _ضخك بإستهزاء.ياك باباك وعمك متبريين منك يعني راكي بلا والديك ديري روحك يتيمة وهوما ميتين .
حلقة 41
بقلم لينا صبرينة
كيقال هكدا حسيتو قتلني ومشى في جنازني بدون إحساس ضميرو ميت ودرك كمل كسر جناحي المكسور خلاني نتقعن قدامو _وجدان بركاي ماتصعبي فيها وتفتي من عندك وادا حابة ولي امرك تحبي نجببلك أمي لعندك _علاه نتا عندك ام _ايه ام وأب وخاوة وخواتات وفاميليا طوييلة عريضة انا ماش مقطوع من شجرة برك مقاطع الكل تقريا من غير أمي المهم ماش هوما موضوعنا وجدان وليدك راه فاللعب قسما بالله كون ترفضيني نعود نخليك هنا محبوسة الضوء تاع برا ممنوع عليك ونرجع كل ليلة نجيك نشبع رغباتي وشهواتي ونخليك هنا وحدك كيف الكلبة ونروح وماكانش ليسمع بيك ليجي يسقسيني نقوللهم تخلات على ولدها وهربت وتتفر غير فيك مالا ماتخليش روحك تكون رخيسة وغير جسد تاع عاهرة كونك نظيفة وخيري لحلال وانا بروحي نوعدك نكون ليك سند واب واخ وزوج ونحبك ونحترمك وريح مايقيسك بصح بشرط بلادك تنسايها _حرام عليك قسما ببالله جاني شفت احقر منك نتا انسان ظالم وماتعرفش ربي حاب تشبع غرورك فيا وتفرض عليا شروط انا ماش قابلتهم_ايه فيا العيوب كامل وقابلهم المهم نتي ليا انا ماضربتك ماسلختك ماديتلك رزقك ماطمع فيه حمدلله عيني شبعانة من دراهم ومانديش ليخاطيني بالعكس عاونتك وسترتك وخبيتك وداويتكم وتهليت فيكم ودرك طالب لحلال مع الإنساتة ليحبها قلبي شوف مانعاودوش الهدرة وراني رايح وبربي مين نرجع غدوا نسمع جوابك _(كان راح يخرج فيساع قلبي رجع يرجف وعقلي خمم في صمد مانقدرش بلا بيه حكمني وخلاني نستسلم بسهولة ) _أصيل صايي قابلة اديني معاك _دور ليا.  متأكدة ؟؟_ايه نتزوحو صايي معاك لحلال ومع وليدي خير من لحرام وانا بعيدة عليه _مالا تفضلي يامدام لدارك ووجدي روحك لعرسك _خرجت معاه وركبنا وشعل اغنية وكان يدندن معاها مع ابتسامتو العريضة وحاكم يدي بااقوة ليه بصح فيساع غلقتو الاغنية .ماتزيدش تحطها _علاه مايعجبكش صابر الرباعي واغنيتو اتحدى العالم انا في رايي تحديت كلشي باه تكوني لياا _هادي تبقى ذكرى تاع سامي ليا حاجة تخصنا انا وياه برك مانشاركها مع حتى واحد (نحا يدو مني وسكت)___رحت لدار وهو رجع لخدمتو من دخلت ديراكت عند صمد نحضن ونعاود ونبكي وغيير نهدر معاه ورقية مافاهمة والو في لحضة ضعف لقيت روحي حكيتلها كلشي على حياتي تفاجأت كانت حاسبة بلي راني مرتو لتم وين فهمت علاه نرقد فالبيت ومانحيش الخمار من راسي _وجدان حالتك غاضتنيي واش رايك نحكيلك مع خالي هو يخدم فالمحمة ممكن يعاونك _في واش يقدر يعاوني مثلا _مانعرف نسقسيه ونرجعلك لخبر _اسمعي ردي بالك تغلطي وأصيل يسمع بلي حكيتلك _ماتخافيش سرك غي بير __هاديك ليلة ماجاش اصيل كان يخدم بصح رقية على صباح لقيتها عندي قاتلي لقيتلك الحل _واش هو _خالي قالك ادا تحبي ارواحي عندي وانا نحميك ونرجعلك حقك وماتخافيش راه انسان كبير شوي فلعمر وخبرة كبيرة وليه معارفو وبمرتو وولادو ويحب يدير الخير كون ماش هو راني برا متشردة مع ولادي المهم خمي غدوا كينرجع نسمع جوابك _هيا راحت وانا تخمام بدا ياكل فيا ويدي ويجييب حتا كيجاء أصيل فليل وفاقلي بلي عقلي بعيد ونخمم _بركاي ماتخمي بربي مايكون غير لخيير ونعوضك على كلشي ارقدي وأرتاحي باسكو غدوا عرسك _اااه غدوا _ايه كيماجبتوش ليوم راني نغلي من داخل بصح ماعليش تحتمت باسكو غدوا عندي ليك مفاجأة _واشمن هييا _قتلك مفاجأة يعني ماتهدرش المهم وجدي روحك وصباح نوضي بكري هيا تصبحو بخيير _خرج وخلاني في حيرة من أمري حتا يما مانقدرش نحكيلها حاجة كما هادي ولو نحكي ماعندها ماديرلي يديها مربوطين وليت نضت ثلبت ودعيت ربي وأستخيرتو يوجهني لطريق الصحيح حاليا ماعندي غير هو نشكيلو همي__لصباح نضت على الباب يطبطب راح فتح سمعت صوت رقية خرجت عندها لحقت عليه يقوللها ريقلي اول حاجة شمبرة ومبعد ديري غداء خفيف وروحي _ صبحت عليا وراحت لشمبرة وكان معاها حتا كملت وراحت للكوزينة وسمعتو كييغلق الباب وجاء عندي لابس الكومبا _نخدم غير نص نهار ونجي عند مرتي ماتبقايش عابسة _خرج ورقية دخلت عندي تجري لقاتني نبكي .وجدان نوضي ..... وأهربي والله قالي خالي بيه بمرتو نستقبلوها ونديروها بنتنا حتا يفرج عليك ربي ياختي روحي مادام راه يضغط عليك هكدا ونتي ماش قابلة ماش بسيف راح تموتي معاه بشوي هادا الانسان على حساب واش حكيتيلي راه مريض ومرضو جاه عليك نتي ويحطو فيك مالا راهي جات فرصة لبين ييديك روحي وممكن تلقاي باب الخير يتفتح من تم والله حالتك تشق القلب هيا بركاي من تخمام ونوضي ازربي قبل لا يرجع _شفتها راحت لقشي وبدات تهز فيه وتحط فالكابة وانا ولا كلمة غير تخمام يلعب بيا وهيا تحاول تقنع فيا بأي طريقة باه نخرج من دار .
الحلقة 42
بقلم Lina sabrina
درك القرار ليا يانهرب مع ولدي وننسى وننكر خيرو الأخير معايا ووعدو ليوفاه ليا ولا نقبل بشروطو والحالتين فيهم ريسك و مستقبل مجهول حنا هكداك والباب طبطبو فيه دييراكت وقفت من الخلعة وهيا تصمرت في بلاصتها _شكون ليجاء ؟؟_مانعرف جامي واحد طبطب عليا من غيرك__ رحت الباب وقلت شكون سمعت صوت مرا قاتلي افتحي بنتي _شكون نتي _ولية أمرك _بقيت نشوف مع رقية وحايرة _بالاك يماك جات _موحال لا_ماعرفتكش ومانفتحش .من غير قلتها لقيت الباب تتفتح بالمفتاح حطيت احتمال كببير في رراسي والرعب مشا في جسمي ورقية وجها صفر من غير تفتح لقيتو أصيل يضحك ومرا قدامو هيا ليهدرت معايا كانت لابسة حجاب قرونا وخمار أبيض_رحبي بأمي ولا ماعجبتكش ولية امرك ليجاتك هادي هيا المفاجأة _تبسمت في وجها وتفاجأت ورحبت بيها وهيا تسلم عليا وتعاود  واصيل طلب من رقية تروح للكوزينة تكمل خدمتها .دخلنا للبيت وهو قعد بجنبها ويحضن فيها وهياا تشوف ليا _بربي ياولدي غير تعرف تختار على قد ماحكيتلي عليها وماقدرتش نتصورها كيفاه تكون هادي ليخداتلك عقلك زينها يشبه لزين الغجريات _ايه بشرتها وملامحها تشبه ليهم _نتا وصاحبك المرحوم عندكم زهر فيها _كيقالت هكدا وسعت عينييا وشفت ليه _اكيد علابالها بكلش ماتشوفيش ليا هكدا_بنتي نتي راكي بعيدة على والديك وفالغربة ديريني انا هيا مكانة أمك ووعد مني بلي ماتشوفي مني شر ولينحبو في بناتي نحبو في بنات الناس _ان شاءالله ربي يعيشك_ هاتيلي ولدك نشوفو _ناض  مدهولها لحضنها بقيت نشوف ليهم .يماه تبشبه فيه بيضاء وعينيها زروقة وعندهم ملامح مشتركة .خليتهم ورحت للكوزينة عند رقية _وجدان كيفاه ديري درك _خلاص نتقبل مكتوبي ماعندي كيفاه نهرب كيجات يماه حسيت انو ربي بعتلي اشارة من عندو فالوقت ليكنتي نتي توجدي فالكابة باه نروح هيا جات يعني لامفر .وانا هكداك معاها دخل أصيل وجهو مقلب ماش هو تاع قبيل وعاقد حواجبو _هاديك الكابة ليفيها القش علاه ؟؟_بلعت ريقي وزربت نطقت _انا قلت لرقية توجدلي قشي ليمنحتاجوش في كابة وتجمع باقي القش مع بعض باه نحطو فشمبرة خير باسكو مع قش صمد ضياقت هاديك لخزانة_ديراكت تبدل وتبسم وهزز براسو .ماعليش خلو القش ومبعد. راني رايح وتهلاي في امي حتا نرجع _خرج لتم وين رتحت وشفت معاها هيا اصلا مقطرة شواربها بويض من الخوف منو _شفتي قتلك المكتوب _خرجت وكل ندامتي درك أني حكيتلها وخاييفة تتعكس في وجهي وتتعقد كتر لحقت عليه كيقال يماه علاه ماحبش يجي عندي كيشافني .هيا جاوبتو راه حاشم منك برك نتا ماتكبرهاش _ ويعني محتمة تروحي بعد ليوم كنت متمني تبقاي كتر _باباك وتعرف طبايعو اصلا خليتو فراش راه مريض بيض قلبك وروح عندو طل عليه _من هاداك العام هو تبرأ مني وانا يتمت روحي من الأب مانروح مانطل عليه _كيقعدت سكتو وهو خرج __بقينا طول اليوم مجمولين ورقية راحت و وسقسيتها شكون جابك قاتلي أخ أصيل حشمت نسقسيها على التفاصيل واش هو المشكل .بصح انسانة حنينة من كلامها باينة قلبها بيض كانت تحكي معايا وابتسامتها مافرقتهاش حتا خلاتني ننسى واش كاين ليوم _بنتي روحي وجدي روحك قبل مايجي أصيل _واش نوجد _باينة وجدي روحك لراجلك_كيقالت هكدا لحمي شوك _ بنتي ماتقوليش راني مرا متزوحة من قبل وأرملة وبولدي ولو هكدا يلزملك تحفي وتفحفي روحك على لخر راكي عروسة ولازم ديريه على جال راجلك وتبداي معاه حياة جديدة هيا ليلة ليلتكم _هززت براسي برك _وجدان حاساتك شوي مترددة هادا شيئ عادي وأصيل كيتعاشريه راح تحبيه والدليل طليقتو أخت سامي صح ماتلاقيتهاش بزاف وكانت جابدة روحها عليا بصح كنت عارفة بلي كانت تموت على الأرض ليمشي عليها باسكو ولدي كعبة نادرة استغلي فرصتك فالحياة وفرحتك ليغابت عليك نتيي أخلقيها مع أصيل__لعشية رجع أصيل في يدو ساشيا حطهملي فالبيت وباط كبير مدو ليماه قالها حطيه فالكوزينة .هيا خرجت وهو غلق الباب _هاكي ساشي هادي فيه قشك كلو ليتلبسيه وجدي روحك منا على ساعتين يكون الامام وشهود هنا .
الحلقة 43
بقلم Lina sabrina
أصيل كيفاه راح تفتح عليا برك والعقد كيفاه ؟(وانا في قلبي نحوس غير على سبة باه نعطل )_قتلك من قبل العقد مازال نتي اجنبية وانا نخدم عسكري ماش بسهولة يعطوني الموافقة هنا في بلادي كاين شوي سهولة بصح في بلادك مصعبينها بزاااف وباه يكون في علمك راني حطيت طلب ونستنى فالرد من الجيهتين وهادا يبرهن على نيتي معاك انو حاب نكمل حياتي معاك بصح مؤقتا ماتقولي لحتا واحد انو متزوحة بعسكري ونتي أجنبية وبالفاتحة هاد الشيى راح يضرني بزاف وادا انا راحت عليا فحياتك راحت معايا فحداري من غير أمي تعرف انو نتي دزيرية وباقي فاميلتي سمعو اني تزوجت من تونسية فحاذري روحك __خرج ويماه دخلت شافت واش جابلي وجبدتلي قشي مامبا شفت ليه ورحت لدوش دوشت ونوجد في روحي لراجل كان غريب عليا وليوم يولي قريب دمعتي كانت سخونة وتحرق القلب صدري ضيق عليا وصورة سامي بين عينييا حاسة روحي خاينة وماكنتش قد كلمتي بصح كلشي كان غالبني من الدنيا الغدارة .كملت ولبست روبة ليجابها لونها بيضاء وطويلة وليها شق فالجنب وليها روسور تحت صدر داير بلاغوب كون نفتحو يتنحا وتعود روبة قصيرة وحدها ومن فوق كانت كروازي .زدت لبست صباط بيض جابو معاه كيكملت فتحت الباب بشوي لقيت يماه تستنا فيا عند الباب _ماشاء االه تبارك الرحمان ارواحي للبيت وكملي اصيل راه في شمبرة_رحت قعدت وجابت مرايا تاع الكولوار وحطتها قدامي درك ديري نتي المكياج انا خاطينيي وشعرك كون تاخدي برايي تخليه هكدا جاك شباب مايحتاج لا سشوار لا ليسور بالعكس تباني عروسة من نوع آخر ومختلفة ماعندي مانقول في عروسة ولدي  _درت الماكياح من فوق القلب من غير غيسيل وغوجالاف وشعري كما غسلتو كما خليتو نشفتو برك بالمنشفة وحطتلي باغيطا بيضاء على جنب شعري لقاتها مع القش ليجابو _بقيت نستى كما الجثة جسد موجود وروحي تعدمت وانا نشوف لولدي وتفكيري بعيد نطقت يماه _وجدان درك نهزلك صمد ونروحو للكوزية باه رجال يدخلو مع الايمام راه وصلو _أصيل وينو؟ _تبسمت .قال حتا نفتح عليها باه نشوفها وتشوفني _رحنا للكوزينة وبديت نسمع في صوت رجال قاوي مانعرف شحال فات من وقت حتا حسهم قرب لينا ونسمع غير في كلمة مبروك مبروك ويماه لتم باركتلي وزغرتت وارواحو نتونا وشوفو حالتي ديراكت هبطو دموعي على صمد ليكان في حجري قدمت ليا تمسحلي فيهم وتكوراجي فيا صح حسيت بحنانتها كان كلامها كلو حنين ويهدي القلب .خرجت عندو ونسمع فيها تهدر معاه وصوت راجل معاهم كيشغل يتهاوشو خممت قلت ممكن خوه ليجاء .شوي ودخلت عندي كانت لابسة الخمار هزت صمد من عندي وحطتو في سريرو صغير المتنقل وقدمت حضنتني وسلمت عليا مبروك عليكم بنتي لعقوبة لدرية الصالحة راني رايحا اتهلاي في روحك وفيه وفي ولدك وعيشي حياتك راكي تعيشيها غير مرة _حضنتها بقوة كانو ساعات برك من عرفتها بصح دخلت لقلبي وحبيتها وحسيتها امي الثانية. خرجت راحت وانا حالتي ماتعجبش .تفتح الباب وتفتح معاه قلبي من التوتر والخوف _وجدااان _دورت ليه وتقابلو عينينا مع بعضنا وياريت ماتقابلو وياريت رضخت لنضرتو بسهولة خير مانخلي كرامتي يكركرها ونعود رهينة ليه وتحت ترحمتو .