نظرات محرمة (الفصل الثاني )

الجزء18

الحلقة 117
بقلم لينا صبرينة
بعد ماراحو هو كلمة ماهدرها معايا ومام انا كون نصيب مانشوفو مانهدر معاه وأصلا حسيتو رجع متجاهلني وحتا مازادش قرب مني. لغدوا من داك دانا لطبيب وبدا بيا المصران هلكني وتعبني وطبيب قالي الكولون العصبي عطاني دواء وزدنا دينا صمد فوت الكونترول تاعو الحمدلله صحتو مليحة وفي هادي ماندبش أصيل جامي ينساه دايما يتبع حالتو . وكملنا ببراء على الحساسية وحتا اصيل مدلو دواء بصح ماحب يشري ولا يشرب .هاديك ليلة بعد قالي وجدي روحك نروحو لدارنا دايرين عشا على براء غدوا .وكما كان الحال لغدوا رحنا فرحو بينا كامل ليقيناهم لتم من غير عاطف غايب كيسقسيت خالتي قاتلي اسكتي لا يسمعك لحيوط عندهم وذنيهم . عاطف ماكانش وقال حتا تروحو باه يرجع لدار ماش قادر على المشاكل وتوسويس تاع خوه __هاديك ليلة بعد تقرب مني وطالب بحقو وكيكمل فاجأني _هزي روحك عليا ورقدي بعيد مني _علااه ؟؟! _ ماش محتم عليا نشرحك هيا هبطي رقدي فالارض مايهمنيش فيك _طبعني بيدو حتا نضت وصح رقد على كرشو في نص السرير ودور وجهو ورقد وانا فرشت فالارض قدام لولاد حسيت روحي صح رخيسة بصح واش يعمل الميت في يد جلادو .راني قادرة ننفض روحي من هاد العيشة بصح العواقب راح تكون ضدي يلزمني نزيد نحمل  .لغدوا حاولتو باه نروحو ماحبش وقالي قاعدين هنا يامات مادامني كونجي.قعدنا بصح تقلقت وتعصبت مازالو متجاهلني ويعاملني كأني مانهموش كل مرة نكون قاعدة في نفس المجمع معاه هو وفاميلتو ياكلني بعينيه ماينحيهمش عليا حسيتو راه يروشارشي على غلطة مني ولا يشبع في رغباتو غير بالنظرات كيف موالف . كان كل ليلة يدي حقو ويرميني بعيد عليه .قلبي وجعني من تصرفاتو وهلكلي نفسيتي __وأخيرا رجعنا لدار حاولت نفهم منو .علاه تتعامل هكدا معايا مع انو نتا الغالط انا خاطيني واش هيا مشكلتك _نقولك زوج حوايج خلاوني نرجع معاك هكدا ومانزيدش نهدر من وراها .المشكل كلو بدا نهار جيت من الخدمة ولقيت هاداك المنظر قدامي لتم شعلتي فيا نار القسوة عليك ماتستنايش مني نسكتلك ونتجاهل واش شفت ولا واش درتي تبقاي نتي الغالطة ونتي المتهمة والحاجة ثانية في حضوري تدخلي لشمبرة المرحوم وتبكي عليه وحنيتي للماضي _أصيل ماتحاسبنيش على هاداك الشيئ ماقدرتش نتحكم في روحي _كنتي قادرة ماتدخليش لهاديك شمبرة مايصرا فيك هكداك بصح نتي برجلك دخلتيها غيير باه تتفكريه مع أنو علابالك نغير ونجهل كينشوفك تبكي على غيري وليدرتو فيك وفي روحي ماعندوش تبرير نهائيا ودرك خلي ليام هوما يصلحو كلش صيييبو ليفيا يكفيني _من تم خرج وخلاني ندور في كلامو في راسي حسيت أنو ممكن ضمييرو يأنب فيه بصح كينتفكر أنو ناض فرحان ويكسر في قلب ولية نهبل نحسو بلا قلب وحجرة انا ومافهمتشش روحي _من وراء هاداك نهار انا ثاني خديت قرار أني نرجع نتجاهلو ونتمتع ومايهمنيش فيه .رجع كيدخل لدار يلقاني نغني ونخيط ولا نرسم ولا مع لولاد زاهية حتا كيننطيب نبدا نتمهبل ونغني المهم دايرة جو هايل فدار مع روحي ومع ولادي متمتعة ولو القلب مجروح بصح نضمد فيه بشوي سيرتو يما ليرفضت تزيد تهدر معايا (ماتقدروش تعرفو واش فيه القلب من سلخات وطعنات تحرق) فاتو ليامات على نغس الحال يطلبني كل ليلة بصح من وراها يتجاهلني. وصل نهار شرع تاعي ووقفت فالمحكمة وخديت براءتي الحمدلله طبيبة ليشهدت ووقفت معايا وحتا المحامية ليها خير كبير أنو كانت واقفة على كل صغيرة وكبيرة .كيجينا راجعين لدار حبس فطريق وشاف ليا _علاه فرحانة ؟_بيانسور نفرح تحررت من كل الاتهامات ورجعت حرة _بصح ماتحررتييش من قساوتي وتجاهلي _هاديك مشكلتك نتا كما قتلك انا ماغلطتش باه يأنبني ضميري عادي نتا في مخك دايرني غالطة فدير ليعليك وبالنسبة ليا خليني نعيش أيامي ياك الحياة نعيشوها مرة وحدة مالا خليني نعيشها _مممم وتقبلي تعيشيها معايا؟_هههه أصلا راني معاك وشبيك _ياك قلتي الحياة نعيشوها مرة مالا واش رايك نروحو نديرو مغامرة فلبحر _واش نوع المغامرة هادي _نركبو على موتور (دراجة مائية) ونتمتعو وسط البحر _ااااه هبلت في هادا البرد _ايه حاب نعيشها فالبرد لبحر يكون هايج وواحد مافيه تكون مغامرة مميزة وهايلة وكينكملو عادي ندوشو بماء سخون وندفو رواحنا وادا مرضنا نعالجو بعضنا ساهلة خلاص واش قلتي ؟!!.
الحلقة 118
بقلم لينا صبرينة
ونتا تعرف تسوق ولا ناوي تريسكي بيا وتغرقني _وانا كون جيت حاب نغرقك كون درتها عندي زمااان فدار نحطك في بينوار برك تتخنقي وتموتي _ههههه مانعرف تخيلتها برك خفت _ماتخافيش راكي معايا برك قبل يلزم نروحو نشريو قش يساعدني ويسعادك باه تبقاي مستورة _ديمارا وبقيت نشوف ليه كيفاه تبدل صباح برك وهو بارد ومتجاهل وشابح وجهو ودرك تعكس سبحان الله مغير الاحوال _لقيتو دور ليا وغمزلي .ماتشوفيش فيا هكدا عادي كيشفتك فرحانة زهاتلي لحياة __بعد ماشرينا واش نحتاجو رحنا للبحر بلاصة معروفة بزاف وفي وسط لبحر كاين بلايص يقعدو فيهم يجو مبنيين وعاليين وفيهم كراسا ومغطيين من فوق بصح الحالة خالية خلاص الناس ماكانش باسكو رانا فالشتاء ماش صيف .راح ساع هدر مع المسؤولين وطول وهو معاهم ورجع لعندي فرحان قبلولو داني لبلاصة ساع لبسنا وخرجنا مسيت هاداك لبحر برجلي كان بارد لاقلاص بردت وسناني بداو يتخبطو في بعضهم _أصيل دييجا بردت هيا نرجعو ماكالاه ياودي مانيش قد مغامراتك _هيا حبي أركبي درك نديماري تسخني وتعجبك أصلا ماش راح نبعدو قالولي ممنوع برك نتي حكمي فيا مليح وعيشي اللحظات ماش راح تندمي عليها _درت كوراج ركبت وتمسكت فيه مليح والآجو ليلتم يوصي فيه ويعاود وحاشم منو وأصيل متجاهل فيه يقولو غير ايه ايه . ديمارا فالبداية خفت موت ومبعد عجبتني سيرتو كيزيد لافيتاس وهاداك لهواء يقيس وجهي مع شوي ماء يطارش ليه نحس روحي فالهواء نطير هاايلة وتهبل ومرات يميل شوي نخاف بصح الحق تمتعت بزاف  مغامرة مختلفة وجامي لاحلمت أصلا نديرها كانت تجربة كما قال هو مميزة ومجنونة في هادا البرد ضحكنا وعيطنا وزهينا .بعد ماكملنا وتقلاصينا رجعنا للشط ورحنا دوشنا ولبسنا وديراكت لطونوبيل ديمارا رحنا ريسطو كلينا حاجة سخونة كيشفت الماكلة تقول ماكليتش عام هجمت عليها_بعقلك لا تحصلك ليشوفك يقول مضيعك بالشر فالدار _نتا خاطيك انا مضيعة روحي _ماتهدريش وفمك معمر راكي ترجعي تشبهي لغسان المدرب تاع سلام دانك _شكون هادو _كوميك ومبعد شارشي عليه تلقايه نتي وفمك معمر ماكلة ترجعي هو فولا وتقسمت عليه _ومبعد نشارشي عليه. القصة كاملة غي صفحة قصص لينا صبرينة . كيكملنا رجعنا للولاية هزينا لولاد ورحنا للدار رقدتهم ورحت لبلاصتي وكان معايا هاديك ليلة مليح وحنين وعبر على حبو كيف موالف وعيشتو ليلة كما يبغيها .....(أكيد راكم تقولو كيفاه زدتي رجعتي معاه عادي بعد الشيئ ليدارو معاك فالفترة الأخيرة نقولكم بلي انا حاليا كون مانصايروش ومانديرلوش رايو وخاطرو راح يتحول وراكم شفتو من قبل واش قادر يدير وهادك التحول تاعو ماش لصالحي يلزمني نتعايش معاه كما كتبها ربي) هاديك ليلة بعد كيرضعت براء ورجعت لبلاصتي سمعتو يهترف مسيتو لقيتو الحمى طالعة ليه نوضتو بسيف شرب الدواء .شفت كيفاه المغامرة تاعك جات فيك ومرضت _عادي حبي راكي معايا تتهلاي فيا المهم البحر نحالنا هاديك الطاقة السلبية وتصافينا مع بعضنا فرحتك كملتهالك بنهار مايتنساش _تبسمت وهو بشوي عاود رقد أصلا ماش قادر يهز روحو ولا يفتح عينيه بصح كلامو الأخير عاود فكرني بسامي .تحكمت في مشاعري ورقدت ومرة على مرة نمسو كيلقيتو هبطتلو الحمة وليت انا غطست فالنوم تاعي .لغدوا من داك كانت حالتو مليحة من غير خشمو يسيل. خرجني داني لكوافيرة وأخييرا رجع شعري كيف ناس برك رجع قصير واصل لرقبتي وهاديك ليلة بقى يتغزل ودار معايا سهرة طويلة عريضة........فاتو ليام بلا مشاكل ولا دواس كلشي مريقل وانا عايشة كيف ماحب ربي دايرة واجباتي كلهم وساترة روحي فدار وعايشة لولادي .وحد نهار كنت نسيق لقيتو دخل لدار رجع من الخدمة ولابس الكومبا ووجهو مايشكرش وعابس_خير واش كاين ماش موالف تجي هاد الوقت؟؟ _عاودو رفضو طلب تاعي باه نعقد عليك ولو لقراد تاعي فالخدمة طلع ودرت معارف بصح عاودو بعتولي الرفض صعييبة ياوجدان رجعت من المستحيل  _كيقال هكدا تسندت بظهري على الحيط .والحل كيفاه درك نبقاو هكدا _الحل عندك تبدلي الجنسية تاعك _وانا وسبق وقتلك مانبدلش _وجدان راه ماكانش حل خلاف ولو تبدلي الجنسية تاعك ونبقاو نستناو شهور يعني راه كلشي صعييب بصح خير ماتبقاي هكدا عايشة معايا بتخبية ضحي على جال ولدك على الأقل _وعلاه ماش نتا تضحي وتحبس الخدمة _وجدااان نحيني من راسك نهدر عليك نتي يلزم عليك دييري واش قتلك وخلصت الهدرة _.قربت ليه وعليت صوتي في وجهو .مانبدلش ماش راح نبدل وماش راح نضحي ماش غيرتلي حياتي كامل وامتلكت كل حاجة فيا وحتمت عليا أمور وجبرتني عليهم ودرك جاي تغصب فيا نبدل جنسيتي ثاني موحال نديرها نخليك تحلم بيها _بركايي ماتعيطي في وجهي _نعيط ونزيد باسكو نتا تلفتلي أعصابي _تباني من كلامك حابة تزيدي تعيشي معايا فالسر وحابتني انا نبقى نريسكي بروحي ونستنا نضال وقتاه يخبر بيا يعني نبقى تحت تهديد _مااايهمنييش فيك نتا حبيتني وخيرتني نكون معاك مالا تتحمل المسؤولية كلها _يامات برك ونكركرك تبدليها .
الحلقة 119
بقلم لينا صبرينة
في لحظة غضب ضربت هاداك البيدون تاع تسياق برجلي ساح كلو فرجلو وفالكولوار وتلفو أعصابي كامل و من فوق وليت غير نهدر معاه بلعياط وهو ماعجبوهش تصرفاتي حكم رقبتي بيدو وحشرني فالحيط قريب ماعلقني ووسعلي عينيه بالغش _تباني نتي يلزم نرجع نتصرف معاك كيف بكري بالقسوة والغصب باه ترجعي لينقولو تنفديه وماترفضيش حابتني نرجع نعاملك كيف العبدة _خنقتني نحي يدك _أطلبي منيوسماح وقولي الشيئ ليتحبو نديرهولك نطلقك هيا _هززت براسي .لا _وجدااان راني معمي غيرك وافقي باه نحبس _رجعت نخبش فيه بيديا ونضرب برجلي باسكو صح حسيت روحي راح نتخنق وليت قتلو ايه لتم وين طلقني وانا وليت نرجع فالنفس تاعي ونسعل قريب ماجيفني _هزلي راسي من شعري .وااش قلتي جاوبيني _ خلاص خليني نرجع النفس_طلقني وبقيت دقيقة واققة وهو قدامي كيف لبوطو قدامي وييديه وراء ظهرو _هاد ليام ترووحي معايا وتبداي فالإجراءات وبساكت _يعني حابني ندير كلش حابو نتا وبالاجبار_ايه كما نحب انا نخليك تعيشي فهمتي  _هز روحو وخرج وانا فشلت روحي منو كرهت صايي  .فليل كيجاء روطار درت روحي راقدة ومام هو مانوضني لا والو رقد ديراكت حتا لصباح خرج بلا مايهدر معايا وفليل مام كيكان ساهر مع لولاد ماحبيتش نهدر وبقيت نستنا في ختي وئام تعيطلي  باسكو طلبت منها تحاول تهدر مع يما وتقنعها تهدر معايا بعد دقايق لقيتها بعتتلي ميساج قاتلي فيه ماحبتش وراهي متغشة منك فوق الحد _خبطت ثلفون فالسرير تاع براء كيشافني هكدا هزو وفيريفا ونزلو من يدو و نطق .قتلك خطيك منهم انا هو كلش في حياتك وزيد شوفي هادو لولاد مايستهلش على جالهم ضحي _سكت عليه _مخشنة راسك تباني ؟ مالا اسمعي كما قتلك هاد ليام تروحي معايا ودرك ماتجاوبيش على روحك مايهمنيش فيك _أصلا نتا وقتاه همك فيا اااه دايما تحب روحك ومصلحتك ولي في راسك ديرو ماكفاكش واش درت فيا فالاول وكملت عليا بوالديا ودرك حاب تسلب مني هويتي وأصلي .حابني نرجع برانية على بلادي ولتم والديا صح يدفنوني وأنا عايشة كانت عندي يما مساندتني بصح بسبابك زدت خسرتها .طاحو دموعي وليت نبكي بالشهقة .نتا ماش عارف واش راني نحس من داخل راني وحيدة يتيمة مقهورة ماعندي حتا واحد يسقسي عليا ولا يحب يعرف أخباري ولا يخاف عليا كامل تاهمين فيا أني رجعت وحدة زانية وبلا شرف وطيحتلهم راسهم وقدرهم في أمور خاطيني منهم وكملت عليا يما ليكانت الوحيدة ليمصدقتني وبسبابك نتا حتا هيا جبدت روحها مني _قرب مني وجبدني ليه لحضنو .بصح نتي مصلحتك معايا درك ماش معاهم راكي مرتي وأم ولادي _بعدنيي كون جيت حاب مصلحتي ماتجبرني على حوايج ماش حابتهم ولا تبعدني على فاميلتي وتزيد تشوهلي في صورتي معاهم الوحيد ليكان تهمو مصلحتي وراحتي راه تحت لقبر _كيقلت هكدا شاف شاف معايا ووجهو رجع حمر راح يكلاطي وحاكم قبضة يديه مزيرها وفي ثانية هز روحو وقف _ماتعياي نادمة على كلامك وتشوفي واش ندير فيك وتشوفي كييفاه تمشي كيف المسطرة على يدي ومصلحتك انا نقرر كيفاه تكون وراكي عارفتها  ادا كلشي درتو على جالك ومازلت مانسواش خلي نرجع كيف ### في حياتك _خرج من الدار بهاداك الغش وانا حسيت روحي صايي تخنقت منو ومن العيشة هادي ومن الذل و التسلط والتهديدات .رقدت لولاد وحكمت بلاصتي ومخي غرق في تفكير واحد لا بديل منو _كيدخل لدار كان كيف الوحش معايا .... وقززني من روحي كنت عارفة راح يرجع يعاقبني على كلامي وماش راح يفوتها بصح خليتو يدير ليحب خليتو يشبع رغباتو كامل ورجع بحكاية لولاد علاه ماهزيتش ورجع يطلب حقو صباح وعشية غير باه نهز وانا بدوري ماكنتش حابة أكيد وكل صلاة ندعي ربي باه مانهزش كاين ناس يقومو ليل باه ربي يستجاب لدعائهم وأنا كنت العكس ماش حابة غير باه مانزيدش نتعدب ونعدب ولد خلاف لأنو جنسيتي ماش راح نغيرها ويدير فيا ليبغي ماش راح نقبل نروح معاه أصلا أيامي معاه رجعت معدودة قراري مافيهش رجعة منو _القصة كاملة غي صفحة قصص لينا صبرينة_هاديك لعيشة كيرجع لقاني موجدتلو دار ومزينة روحي وشمبرة وانا كنت لابسة غوب قصيرة للركبة فالغوز مع صابو بالصالو وتاحفة روحي كيدخل وشاف الحالة استغرب _واش كاين ليوم _قربت منو .طولت ونتا زعفان وانا مانحبش على زعافك ترجع واحد متوحش عليها قلت نوجد ليوم سهرة لينا ونتصالحو ومنها نقولك أعطيني وقت برك باه نقتنع ونبدل جنسيتي _تبسم .يعني قابلة _قتلك اعطيني وقت باه نقتنع ماتدينيش فورصي عليا _كون قلتي هكدا من الاول ماتكبر بيناتنا ونرجعو نخلطو فالهدرة ولا نرجع معاك قاسي قتلك حنانتي راهي في طريقتك ونمدهالك كيتكوني معايا متسالمة_ايه عندك حق ودرك روح دوش وهيا تتعشى موجدتلك عشاء بنين تاكل يديك وراه _هههه نن واش  ندير بيديا ناكلك نتي خير _مالا أجري لايطير لحمام _راح دوش وجاء تعشى وتبنن وتشكرني عجبتو لماكلة اصلا هو كيكون مورالو مليح ياولوكان الماكلة سامطة يقول بنينة .كيكملنا من تم خطفني للعش تاعو وخرج هوسو من كلام وأفعال فيهم حنانة وحب وغزل ولمسات حتا عينيه كانو يهدرو ويعبرو على أحاسيسو وحدهم بهاديك النظرة البريئة ليتبرهن أنو غارق في عالم آخر من الفرحة والمتعة ...... فاتت ليلة كما يحب قوسطوه وجاتو على قلبو وانا غير بتصرف بسيط مني عرفت كيفاه نرجع نكسبو ونقلبو من القسوة اولى الحنانة.
الحلقة 120
بقلم لينا صبرينة
فاتو ليام وهو يحاول يقنع فيا بصح انا كل مرة نبدلو الهدرة ونحاول نسيه بأي طريقة المهم حاكمة عليه نقاط ضعفو ونحاول نكسبو ونضغط عليه بيهم .حتا لوحد نهار داني لدارهم ويماه جبدتني لجيه وحاولت تقنعني فهمت بلي هو موصيها _خالتي منين نقتنع راني نروح ماتضغطوش عليا _بصح علاه تصعبي فيها وهيا ساهلة بنتي بدليها وتهناو لزوج وهنيو وليدكم _خالتي بيناتنا نتي علابالك بلي أصيل حارمني باه نروح لبلادي ؟كون نبدل جنسيتي راح يزيد صح يطغى عليا _اصبري واش ديري هادا هو مكتوبك قتلك اصبري حتا يفرجها ربي ممكن كيتبدليها تزيدو تأكديلو بلي صح حابة تكملي حياتك معاه وهو حارمك تروحي خايف ماترجعيلوش برك ياك عاطيلك حريتك ماش حابسك ولا رابطك فدار وادا حابسك قوليلي ؟_لالا بكري صح كان حابسني ويعسني حتا بالكاميرات بصح درك كلشي رجع مفتوح ليا وماش كما بكري يخبيلي كواغطي رجع مخليهم في بلاصة باينة يعني رخف روحو عليا _مالا واش خاصك معاه كملي مشيلو فالخط ونشوفو كيفاه يرجع يخليك تروحي لتم انا نقدر حتى نوقف معاك وتحبي حتا نروح معاك وندير ليعليا مع والديك _صعيبة ياخالتي ماهيش ساهلة لا مع أصيل لا مع والديا _سهليها تسهال بربي ان شاءالله _القصة كاملة في صفحة قصص لينا صبرينة .من وراها دخل وكان معاه عاطف وخاوتو زوج .هيا وجدي روحك نروحو _علاه ولدي ابقاو تتعشاو وباتو _لا نخدم صباح نروح خير __كيرجعنا لدار لقيتو يسقسي فيا .نتي حبيتي تباتي _لالا علاه _سقسيت برك _وشبيك تبان ماراكش مليح _تعبان برك _نحا قشو وتكسل في بلاصتو وانا رحت رقدت لولاد ورجعت حكمت بلاصتي _وجدان ماش طولتي باه تزيدي تهزي الحمل _كلشي بيد ربي _سبحانو بصح حابك تزيدي _شفت معاه وتبسمت ان شاءالله نعمرلك الدار بيهم _هجم عليا ويدغدغ فيا .واش دير حبس _باه البويضات تاعك ينشطو راهم خاملين _أصيل وراسك غير تحبس مانحملش _بسيف حبس من تدغديغ والضحك قريب مانوضلي لولاد .مالا نتي تحبي تحملي غير لحنانة ارواحي نغرقك فيها ......مور مارقد بقيت فاطنة وتخمام معبي راسي حتا رقدت ولغدوا كيدخل لدار كان ماهوش نورمال سقسيتو قال والو مابيا تقربت منو طبعني قريب ماطحت _كيتشوفيني مانيش مليح ماتقربيش اخرجي من قدامي  _علاه واش صرا حتا تعامل فيا هكدا _برااا عليا وغلقي الباب _خرجت من عندو ومافهمتش حالتو ونسمع فيه طول فالسهرة وهو يهدر فثلفون وماتعشى لا والو حتا رقدت كينضت صباح لقيتو ماكانش والشمبرة لقيت فيها ورقة تاع حسابات مافهمتش مليح تاع واش بصح ليفهمتو شوي انو تاع سلعة زعما يكون كاش ماره يخدم مع واحد مانعرف .فليل كيدخل كان مليح معايا وفهمني كييكون ماش مليح مانقربلوش باه مايغلطش فيا بصح أصيل رجع يوميا يدخل لدار وكل مرة حالتو مبدلة مرة مقلق مرة نورمال مرات حتا يستعمل معايا العنف ويقولي استحملي الشيى ليفهمتو انو بيه حاجة ومخبيها وانا ثاني غير حاملة بصح لداخل إعصار راني نبني فيه مانقدرش نزيد نحمل عقليتو وتصرفاتو كتر من هكدا التقلبات تاعو تعبوني _في ليلة دخل شعرو طايح على حبهتو ومطلي بالرمل تاع لبحر حتا قشو مبلول فيه الماء _واش هادي الحالة _مادخلكش ماتسقيش كلو بسبابك نتي عييت وانا نساعف ونستنا فيك مرضت في عقلي عييت نستحمل واش راني نحس من داخل _واش صرا _ماعندو ماصرا من غير كنت فالبحر نعوم في هادا الجو كنت حاب نفيق لروحي ولحياتي كيفاه ماشية بصح لقيت روحي انا الضحية ماش نتي انا حبيتك برك هادي هيا الغلطة تاعي معاك _بعدني من طريقو ودخل دوش كيخرج لقاني مع لولاد صمد نعشي فيه وبراء كما رضعتو وخلصت .حكم هاداك صحن خبطو فالحيط ونزل صمد للأرض وحكم يدي خرجني وغلق عليهم الباب و كركرني للشمبرة .واش  دير وشبيك هكدا _طبعني لسرير وكان معايا وحش وبقا يكرر في كلمة نحبك نحبك .عدبني كان انسان غير طبيعي حتا شكيتو كاش ماشارب ماهوش أصيل ليمتعودة عليه زاد فيها بزاف وماعرفتش واش وصلو حتا يدير معايا هكدا مالقيتلو حتا مبرر. حتا لولاد يبكو ماخلانيش نروح ليهم كينحاولو يقولي تبقاي معايا وهوما كيتعبو من لبكى يرقدو وحدهم بقيت صابرة على هبالو وقلبي محروق عليهم بسيف رقد ورخف يديه عليا .القصة كاملة في صفحة قصص اينا صبرينة .رحت شفت لولاد مساكن لقيت براء لمزية كان في بلاصتو راقد وصمد راقد فالارض على كرشو ومطلي بهاديك لابوري باين لعب بالماكلة تاعو  لمزية صحن ماهوش تاع زجاج هزيتو مسحتلو برك وبدلتلو وعاودت رقدتو وماقدرتش نزيد نرجع عند هاداك حتا أذن الفجر وأنا مازلت فاطنة صليت ودخلت لشمبرة لقيتو راقد على كرشو جيت خارجة حس بيا .وجداان .
الحلقة 121
بقلم اينا صبرينة
عاودت رجعت .أنعم _مانيش مليح نشوف فيك قدامي تدوري وراني بردان غطيني _قربت مسيتو لقيتو بالحمى _أصيل راك مريض لبحر ليعومت فيه في هاداك البرد مرضك _حبيت ننسى _واش تنسى ؟؟_لهموم ليحاكمهم قلبي _علاه حاس بيك نادم وضميرك يأنب فيك _شاف ليا ورجع غمض عينيه .تعبت خليني نرقد _رحت جبتلو دواء باه يشربو ماحبش حتا ينوضلي _قعدت بجنبو وبقيت غير نتفرج فيه وهو راقد كيرجع وجهو يسيل بالعرق نحيت عليه لغطا وفطن بيا _أصيل نوض يلزم تشرب دواء ماتبقاش هكدا بالحمى تضرك .أصيييل جاوبني راك معايا فاطن تشووف فيا ؟؟_هزز براسو بصح ماهدرش وباين عليه التعب ومرضة كبيرة _نضت من قدامو ورحت للكوزينة قاتلني تخمام ادا نديرها ولا نو راهي فرصتك ياوجدان كملي وسلكي طريقك .تجرأت وخديت قراري ورحت جبدتلو حبة تاع دواء تاع الحمى وتاع لاقريب ودواء ثالث جاء وقتو تاع رقاد شفت لادات تاعو لقيتو مازال صالح _هزيتهم في ثلاثة ورحت عندو بسيف قعدتو وانا نحاول وخليتو يشربهم في ثلاثة كيكمل رجع راسو لمخدة وشاف ليا وانا قاعدة بجنبو  _خايفة عليا لهادي الدرجة باه شربتيلي ثلاثة _ايه يلزم عليك تبرى وترجع توقف على رجليك مايخرجش عليك المرض وزيد نحبك دايما واقف بصحتك قدامي _مالا مادام شربت درك شوي ونريح ونوض لعند حبيبتي ليخايفة على صحتي . وجدان الحاجة الوحيدة لييلزم عليك ديري الثقة فيها هو حبي الصادق ليك أتأكدي بلي نعشق فيك ونتي نحبك دايما تكوني صادقة في مشاعرك ماتزيديش تخبيهم عليا محتاجهم في حياتي فهمتي ياحبي _(كيقال هكدا هبطت دمعة من عيني لأني حسيت روحي رجعت عيشتو أوهام. لثانية شفقت عليه وعلى حالو) _علاه تبكي ماتخافيش راني راجل ماش الحمى ليتطيحني راكي موالفة بيا _تبسم وهززت براسي وسكت وهو سكت وغمض عينيه رقد __فاتت نص ساعة حطيت يدي عليه نوض فيه والو لا حركة ولا حتا همسة يعني خلاص دواء خدم خدمتو .وشفت مع الحمى مازالت شوي بصح درك راهي بشوي تهبطلو  _نضت ديراكت رحت للبيسي تاعو هزيتو ورحت للكوزينة حطيتو على طابلة وققعدت فتحتلو الكود فرحت كيلقيت الكود ماش مبدل (اكيد تحوسو تعرفو كيفاه عندي الكود ادا تشفاو على نهار ورالي الفيديو تاع نسرين هو من غشو مني فتحو قدامي وانا ديراكت ماركيتو في عقلي هو في هاديك دقيفة غاب عقلو بصح انا كنت متفطنة وهو لبيسي جامي خلاه فدار يخرج يديه يدخل يدخلو معاه ) فتحتو بديت ندخل ليدوسي لقيت ليفيديو تاع نسرين وليفوطو وحتا لقيت تاعي ماقدرتش نشوف فيهم ماش حابة نزيد نتفكر باسكو فوطوات صورهم وانا فالعدة وهو كان مصور معايا .نضت جبت لفلاش ديسك تاعي وهزيت كلشي منو وخطيتهم فيه وزدت هزيت شوي من ليفيديو تاع الكاميرا للدار لقديمة ليكنا فيها كانو مسجلين سيرتو كيكنت معاه وواضح علينا بلي متزوجيين هادوك تاني هزيتهم فلفلاش ولقيت تصاور انا وهو كيكنا نحوسو هزيتهم ولقيت دوسي عرفتو تاع خدمة وحسابات ماحبيتش نفهم مايهمش ودرك هادو ليعندي يكفو نحيت لفلاش ورجعت البيسي لبلاصتو وفتحت الكوفر جبدت كواغط تاعي وتاع لاولاد وشوي دراهم وهزيت حجاب والصاك وماحبيش نشوف معاه وهو راقد باه مانتراجعش .القصة كاملة في صفحة قصص لينا صبرينة .لبست شفت مع ساعة راهي 7 تاع صباح .كملت لبست لولاد بزربة وهزيتلهم شوي قش وخايفة في اي لحظة يفيق بيا بصح يلزمني نكمل فالكوراج خلاص درك مابقات عيشة معاه _كيكملت كلشي ماحملتش ورحت طليت عليه لقيتو كما خليتو راقد .رجعت البيت كتبت في ورقة (أصيل راني رحت ماكالاه تحوس عليا مادام خرجت من دار موحال نزيد نرجع ولا حتى تقدر ترجعني) حطيتها قدامو وخرجت وخليت كلشي ورايا كانت صعيبة عليا الخرجة بصح كان لازم عليا ندير هادي الخطوة لكبيرة لأنو حياتي معاه رجعت مستحيلة ومابقيتش عندي قدرة لا نفسيا ولا جسديا باه نستحمل قيودو الوحشية وتقلباتو الغامضة .حكمت طاكسي والوجهة عند رقية ماعندي غيرها كيوصلت عيطتلها قلتلها تلبس وتهبط تروح معايا .كيهبطت تفاجأت _واش كاين وهاتي عليك صمد بزاف عليك _رقية محتاجتك ختي اديني عند خالك باه يعاوني _كاش ماصرا بينك وبينو _صايي مابقيتش حاملة العيشة معاه تعيشي ماتسقسيش بزاف _ايه هيا اصلا خفت في بلاصتك باينة هربتي _رحنا في طاكسي وحنا فطريق نحيت لابيس كسرتها رميتها وكملنا طريقنا.
الحلقة 122
بقلم لينا صبرينة
كي وصلنا لعندهم طبطبت فتحت الباب مرا كبيرة شوي فلعمر تكون مرت خالها_تسالمنا ودخلتنا وعرفتها عليا وحكاتلها ظروفي وظهرت كانت عارفة كلشي رقية حكاتلهم .واستقبلتني وقاتلي ابقاي هنا يجي معمر وهو يعاونك _من وراها بساعة جاء كان راجل كبير بعد ولحيتو بيضاء قعدت وحكيتلو بلي يلزمني نرجع لبلادي وعندي زوج ولاد واحد بوراقيه عادي والثاني بلا هوية أب _ساهلة بنتي مادام متزوجة عرفي برك يعني راجلك مايقدرش يمنعك ماعندو حتى حق .وبراء نتي يماه ومقيد بإسمك ونتي هيا المتكلفة بيه الوحيدة نكملو وراقيه و نوجدولهم ليباسبور تاعهم ونشوفو تاعك وربي يسهلك وهادا راجلك مادامو عسكري راح يخاف حتا يقرب عندي بصح حاجة محيرتني نتي قلتي كانت عندك قضية زنى كيفاه ماتبثوش عليك التهمة باسكو جبتي طفل خارج إطار الزواج _ماعلاباليش حتا الجلسة الاخيرة فاتت خفيفة غير المحامية هدرت _مالا المحامية تكون خدمت خدمتها قبل الجسلة _بصح هيا ماعلابالهاش بلي كنت بالحمل _تكون علابالها بنتي كون جاء العكس كون راكي مازلتي تشارعي _(زعما يكون أصيل حكالها وماحبوش يهدرولي لزوج .ايه ماش من الموحال المهم تفكيت )_نطقت رقية .اسمعي وجدان وكيتروحي زعما أصيل مايرجعش يهددك _يهدد على روحو انا تاني نهددو بلي كان متزوج بالسر حاكمة عليه أدلة راهم فلفلاش ديسك هزيتهم _مافهمتش بصح المهم ان شاءاالله ماتندميش _(بقيت عندهم ماعندي وين نروح حتا نسوي وضعيتي ونريقل ليباسبور .طول نهار وتفكيري عند أصيل كيفاه راهو وإذا رتاح من المرض وواش دار كيعرف بلي هربت وين راه يحوس عليا ماحبش يخرج من بالي بصح هو ليوصلني ندير هكدا ماخلالي حتا حل عندي شحال وانا صابرة ومستحملة غير باه نقريه لامان فيا ومايبقاش موسوس كنت عايشة معاه بساكتة بصح كنت نستنى فالنهار لينحكم عليه دليل مايخلينيش نرجع بيه أدراجي ونهرب ونهار حكمت الخيط زربتني الزيادة وليوم وأخيرا جاتني الفرصة و تجرأت وتحررت مابقالي غير نرجع لبلادي ونتهنى ولو راح نلقى صعوبات مع أهلي بصح خير من الغربة وصح نروح أكيد نخمم في حلول سيرتو براء يبقى مجهول الأب وراح يشوفو ليا بنظرة ناقصة )_شوي وعيطت رقية بثلفون مرت خالها قاتلي بلي راح لعندها وسقساها وهيا قالت ماجات ماشفتها بصح ماصدقهاش وهددها وسمع بيها الجيران .هادا هو اصيل يعرف غير يستعمل العنف والتهديد _فاتت 3 أيام وانا بعيدة عليه ويوميا يروح عند رقية قريب يكسر عليها الدار لمزية الجيران حبسوه عند حدو بصح قاتلي حالتو ومواصفاتو تخوف وماتشكرش .نضت صباح خرجت مع عمي معمر وخليت لولاد مع مرتو ليعاملتني كيف بنتها وكتر بيها براجلها  .القصة كاملة في صفحة قصص لينا صبرينة .رحنا بدينا فالأوراق وكان كلشي بزربة من غير يلزم حضوري فالأول والباقي هو يكملو .كيكملت هو خليتو معاهم يكمل وانا رجعت لطونوبيل ركبت و ستنيتو لمزية هاداك نهار شتاء قاوية مانبانش من الكارو تاع طونوبيل وليت موسوسة كل راجل نشوفو نقول راه أصيل ركبلي الرعب  .ستنيت حتا كمل ورجع قالي بربي ماش مطولين ويتريقل كلشي برك أصبري ومنا لهاداك نهار راكي عندنا قاعدة  _كيرجعنا لدار لقيت مرتو تبكي كيشافتنا ناضت تجري عندي وترجف _راجلك راه جاء ودا معاه لولاد ماقدرت ندير معاه والو _كيقالت هكدا لعبت بيا الدنيا لمزية عمي معمر حكمني وقعدني فالكرسي _يامرا كيفاه داهم وعلاه ماعيطتيليش علاه ماعيطتيش لابوليس ولا للجيران _ماعلاباليش اصلا كدب ولعبها بيا باه فتحتلو الباب ديراكت دخل وقالي بلي راجل وجدان وراح هز لولاد وراح بلا مايزيد يهدر وانا زربت عيطتلك بصح ماتهزش فثلفون وماعرفتش واش نتصرف وحدي خفت نغلط وتكبر كتر  _صح ثلفون تاعي كيدخلت للادارة خليتو سيلونس ونسيتو هاكي شربي شوي ماء وأتهدني _وقفت وليت ندور كيف لمهبولة يا عمي وين يكون داهم راني راح نجهل وزيد كيفاه عرفني وين راني قاعدة! سور رقية قاتلو هادي المرة تانية ليتغدرني .هزيت ثلفون تاع عمتي وعيطتلها هزت عليا وبهدلتها بصح فاجأتني كيقاتلي والله ليوم بدات ماجاش وماشفتو ولا خبرتو _نزلت ثلفون من يدي وقعدت .ياربي واااش ندير هادي ماحسبتلهاش حساب بلي يقدر يلقاني .حتا من رقية كنت منبهة عليها ماتجيش خلاص هنا باه مايتبعهاش.
الحلقة 123
بقلم لينا صبرينة
__بعد مابكيت وندبت وخممت درك رراني فطريق رايحة لدار نواجهو بالشيى ليعندي وماش راح نخاف إطلاقا سيرتو عمي معمر معايا .وصلت لدار فتحت الباب ودخلت بصح ماكاين حتا واحد والدار خرابة ماكانش حاجة بقات في بلاصتها سيرتو شمبرة ولفراش باين مشلح بالموس وقشي تاني مقطع ومرمي فالأرض _خرجت عند عمي كان يستنى فيا عند الباب خبرتو ورحنا شريت لابوس جديدة وعيطتلو ماطولش وهز عليا _ماتكوبيش أصيل وسمع كلامي _بكل وقاحة راكي تعيطيلي واش من جرأة عندك واش محتاجة مازال من عندي بعد الشيى ليدرتيه فيا _نحتاج ولادي لي نتا ماعندك حتا حق فيهم _هههه وينك نجيبهملك _راني فلبلاصة لفلانية  _ابقاي كما راكي درك نجي _كوبا وانا قلبي رجف من الخوف وقنعت عمي يروح ويستنا مني حتا نعيطلو عارفة كون يشوفو معايا يجهل _بدا يطيح ليل والبرد وهو ماجاش بقيت قاعدة على وحد الحافة تاع طروطوار نستنى .ااقصة كاملة في صفحة قصص لينا صبرينة.المغرب يأذن وهو قارا قدامي وماحبش يهبط ولا حتا يشوف ليا وليت رحت ركبت لقيتو يتخنزر فيا وعينيه معبيين غش وحقد _ديمارا ديراكت .وينهم لولاد ومع من ؟_حابة تروحي لبلادك مالا ؟_مانيش نهدر على بلادي نهدر على ولادي _رانا رايحين وتشوفيهم وتتهناي _أسمع باه نقولك ماكالاه ترجعني لدار راني ماش راجعة نهز ولادي ونروح وكون تحاول تهددني راني ...._ششش كون نزيد نسمع صوتك طونوبيل نقلبها وهكدا تكون لينا الموت وحدة مالا غيرك بلعي _سكت بصح بقيت متوترة وخايفة سيرتو كيشفت طريق مبدلة ماش هيا تاع ديار لزوج تاعو _وين مديني عندك نص ساعة ونتا تدور بيا راني كرهههت من ألاعيبك قتلك أديني عند ولادي نتا ماتفهمش _لهادي درجة رجعت وجودي معاك خانقك وتحسبيلو بالثانية بصح من وقتاه ؟_من بكري نتا ليكنت ماتفهمش وعقلك غاطس في أوهامك  _لقيتو قارا وهبط جاء لجيهتي فتحلي لباب وهبطني كانت بلاصة شوي عامرة بالناس وطونوبيلات طريق عام _ياك نهار حكمت يدك وديتك معايا كنتي بوالو لا ورقة لا دار لا راجل لا ولاد مالا تفضلي حريتك وكما لقيتك كما نخليك ظهرتي نكارة خير صح  _ماتقدرش ديرها باسكو ساعتها نشكي بيك وعندي أدلة منهم يخرجوك من الجيش وزيد تتحبس يعني تخسر الخدمة _عقد حواجبو .ماسمعتش وااش ولا نن سمعت كيشغل راكي تهددي فيا ولا غالط _ايه تهديد مباشر كلشي كان فالبيسي تاعك هزيتو راه عندي وباه تصدق كلامي خليني نقولك الكود تاع البيسي هو ######## _بقا يسمع ووجهو فيه كل علامات الإستغراب والشوك تصدم .كما سمعت وكما هوما هددتهم نهددك نتا كون تدير حاجة تضرني نضرك وكون ترجع تحبسني كاين ليشكي بيك _نتي وجدان لينعرفها ؟! مرتي ! ليحبيتها ودرت فيها ثقة ! ليفتحتلها قلبي وداري وحياتي !ليحكيتلها مشاعري وأحاسيسي وأسراري ! أم ولادي ؟موحااال ظهرت كنت صح عايش في كدبة عالمية ماش كبيرة برك  _ضحك معايا ضحكة تاع صدمة ويهزز في راسو وراح ركب جيت نفتح لباب لقيتو مغلوق خبطت الكارو لقيتو ديمارا وخلاني وراه نعيط ونمشي حتا ماحسيتش بروحي كيدخلت في نص طريق قريب مارحت فيها .
الحلقة 124
بقلم لينا صبرينة
وليت رجعت لطروطوار جبدت ثلفون نعيط نعيط والو ماهزش وليت غير نمشي ونمشي مانيش حابة نروح نشكي بيه والله غير تهديد برك مانيش قليلة أصل لهادي درجة قلبي ماهوش حجرة باه ننكر انو هو أب ولدي ونضرو كتر ماراهو مضرور .ماعرفتش روحي واش ندير ادا شكيت بيه يدخل للحبس وضميري راح يأنبني بصح نرجع ولادي ونرجع لبلادي وكون مانشكيش بيه نبقى محرومة منهم والصبر ماعنديش .ثلقون صونا لقيتو عمي معمر قبل مايروح هز نيميرو تاعي حاول يستفسر واش صرا وقالي ادا تحبي نشكي بيه _لالا ماتشكيش درك أصبر درك نحكم طاكسي ونروح لدار وادا مالقيت مني حتى إتصال هاد اليومين حاول تلقاه وهدر معاه ومن وراها ادا خشن راسو أشكي بيه ماكانش حل خلاف _بنتي تحبي نجيك ونوقف معاك _لالا خلي وحدي خير _كوبا وأنا نمشي في هاداك البرد وماش عارفة ساسي من راسي حتا من طاكسيات انقطعو حتا لقيت واحد حكمني من دراعي تخلعت ودورت لقيتو هو _روحي تركبي نديك عندهم _فرحت وماصدقت أنو رجع رحت ركبت وهو ركب وديمارا كيحبس قدام دار زدت شعلت فيه _تتمسخر بيا ماراهمش هنا راني جيت لعشية _نرجعك منين كنتي ؟_وليت هبطت رحت نجري للدار فتحتها كيشفتهم رتاحت وفرحت  لزوج كانو فالسرير تاعهم بصح فرحتي ديراكت عبستها باسكو أصيل درك راح يعدبني حية وانا ماعندي طاقة .بستهم ونحيت الخمار والصباط ورحت للاستوديو ليلتحت هزيت القرعة تاع ليصونص ليبقات من نهار صبغنا البيت طلعتها نجري باسكو سمعتو يفتح فالباب فت للكوزينة جبدت بريكة ورحت للشمبرة في نص هاديك الفوضى وفرغت هاديك القرعة كامل وهو لحق بيا وقف قدام لاقوافاز وانا كنت مقابلاتو ومورايا ريدو تاع تاقة _وااش دييري نتي هادي ريحة ليصونص!! _ماتقربش ليا بعدني ولا والله نشعلها _ماتغلطيش هكدا راح تهلكينا كامل حتا ولادك وشمبرة راهي مقلبة بالقش النار تلهب وتوصلهم _ايه خلي خلي نموتو كامل واش ندير بهادي لحياة تعدبت فيها برك من نهار جيت لهادي لبلاد وانا نتعدب المرحوم صح كان مريض وتعدبت معاه بصح عداب حلو فيه نقاوة وحنانة ومن راح لحياة مافيها طعم حلو كلشي مر _علاه ليعشتيه معايا مر صح كنت قاسي معاك بصح حبيتك وكتر منو واش خصك معايا ياك نقولك كيتكوني مسالمة نكون معاك مليح _بصح المسالمة تاعك هادي نتا مرتاح فيها بصح انا مخنوووقة كنت غير نصاير فيك ونمشي معاك كيف ماتحب وانا من داخل مدبوحة _يعني جامي لاحسيتي معايا ولو شوي براحة _لالا كنت غير نكدب عليك وعلى روحي يلزم تفهم ياأصيل بلي جامي ماراح نحبك _ماااقوتلكش حبيني قتلك أتقبليني لاااه ماتفهمييش _وانا لا حبيتك لا تقبلك كنت غير نوهم فيك برك كل ليلة نسلملك روحي نعاف نفسي ونعافك كل ليلة كرهي ليك يزيد كل ليلة نشوف لعينيك باه نقدر نتفاعل معاك وتحس بلي راني صادقة معاك .كل يوم عايشة كابوس لداخل صح كنت متهلية فيك بصح غير باه نعيش نحس روحي أنثى وعندي أسباب باه نعيش مرات تكون راقد يجوني أفكار شيطانية بصح نلعن شيطان ونصبر صح كاين يامات حلوين معاك وفرحت فيهم من قلبي بصح هاداك شيئ مايدلش أني حبيتك وتقبلتك بالعكس نكرهك ونكرهك وعلى قد مادير معايا أمور ملاح راح نكرهك  _علاه علااه ياوجدان هادا الحقد كلو ياريت حبستيهم ولا نطقتيهم ودرك نقرب ليك وادا تحبي تشعلي شعلي اصلا قلبي حرقتيه _قرب خطواتو ليا وقعد فالأرض بسكات وانا ماتجرأتش نشعل لبريكي .لقيتو حكم يدي .اقعدي جنبي وسمعيني واش في قلبك بالاك انا تاني نكرهك ونحقد عليك ونتحرر من هلوستي بيك _قعدت كان كتفي جنب كتفو وبديت نفرغ في قلبي وكل مرة كنت نقارنو بسامي وهو وجهو حمر ويضغط على قبضة يديه ويسمع بساكت كيكملت انا رجع هو يحكي وقال كلشي يحسو في قلبو ويحسو كيكون معايا فالأخير ضرني بكلامو الأخير خلاني نشهق بلبكى .
الحلقة 125
بقلم لينا صبرينة
ماضنيتكش تنكري العشرة وتسمحي فيا بهادي الطريقة نهار ليكنت فيه فراش ومريض غدرتيني ورحتي كيفطنت وبقيت نعيط عليك وماجاوبتيش نضت رحت للبيت لقيت لولاد ماكانش ولخلاخل تاعك مرميين فالأرض راسي كان قد البيدون اصلا عييت نفطن كيرجعت لشمبرة باه نعيطلك شفت الورقة قريتها .شفتي هاديك القسوة والعصبية والتكبر والغرور والرجولة تاعي في هاديك ثانية راحت وتعفصت على جالك ماش كيهربتي غاضتني الغدرة كيفاه جاتني في وقت انا كنت ضعيف ومرمي فراش ومحتاج ليك تعسيني وتشفيني بوجودك برك مقابلتني نتي طرتي بيك بولادي بلا ماتشفقي على ليوراك وخيرتي الفرصة ليساعدتك باه تجبدي أمور تهدديني بيهم ومن وراها شفتي مصلحتك ورحتي .كنتي قادرة تبقاي معايا وتقنعيني بطريقتك كنتي قادرة تزيدي تصبري معايا وساعتها نلقاو حل لمصلحتك ومصلحتي بصح دوماج فالنهاية خرجتيهالي غدااارة بلا قلب _نتا رجعت قلبي حجرة ومانشفقش عليك الوحيد ليشفقت عليه هو سامي وهو الوحيد ليكان يخمم في مصلحتي كان يقولي روحي وماتشوفيش وراك .هو صح خمم فيا من قلبو وخمم على راحتي وسعادتي بصح نتا العكس تحب روحك انسان نرجسي بإمتياز _ ناض وقف طلعت راسي ليه .نوضي ماراح نضربك ماراح نمسك راح نخليك لضميرك يحاسبك كيف ما أنا يحاسبني يوميا وكل ساعة وكل ثانية _خرج من الدار وخلاني في هاديك الحالة من تعبي رحت عشيت صمد بزربة ورضعت براء ورقدت في وسط هاديك الفوضى _لغدوا ماجاش وفاتو 3ايام وماكانش حسو البيبان مغلوقين عليا وثلفون داه معاه خممت قلت ممكن عمي معمر شكى بيه هو قادر باسكو راجل تاع قانون بصح كون شكاو راهو جاء عندي مافهمتش وبقيت هكداك كتر من سمانة على أعصابي مرات يجوني أفكار ننتحر ونتهى وبعدها نستغفر يلزم نقوي إيماني ونزيد نصبر ونشوف واش راح يدير وعلاه ماجاني حد وهو ماجاش _في عشية لقيتو هو بشحمو ولحمو دخل لعندي شاف معايا وراح عند لولاد بقى كتر من ربع ساعة وهو يتفرج فيهم وتايه ويضحك في ضحكة غريبة حسيتها براءة ولا راني نوهم في روحي _جيت خارجة من قدامو حكم يدي وناض وقف .هيا نروحو تكملي كواغطك نتي ولولاد وتروحو لبلادك _تكدب ؟_من حقك تكدبيني بصح فهمت أنو الحب ماش بسيف وحتا الإقناع مايجيش بالإجبار المهم لبسي نستنا فيك برا_ خرج وانا بقيت مستغربة متفاجأة زعما صح راح يكمل يخليني نروح ؟_فرحت فرحت فوق الحد .لبسنا ورحنا ودرت الاجراءات وغدوا من داك زدنا كملنا بصح يجي يدينا ويرجعنا ومايدخلش لدار ومايهدرش معايا نهار جابلي ليتيكي تاع طيارة وقالي منا على يومين من خرج بعد بديت نوجد في قشي ليمحتم برك ليام لولين ويكون ماش مقطع وقش لولاد فالفاليزات وحوايج يخصوني وقبل ليلة مانروح جاء لدار كانت 1 تاع ليل كنت فالبيت مع لولاد درت روحي راقدة قرب مني باسني وبقى مدة وهو غاطس وجهو فيا ويهدر في كلام خلاو قلبي يتعاطف كان يهدر شغل واحد صغير .نحبك والله حبيتك برك واش ذنبي اني حببيتك ومرضت بيك والفتك كل يوم وكل ليلة في حضني واش يصبرني عليك وعلى غيابك نتي وولادي والله تمنيت نربي معاك ولادنا ونكملو عشرتنا بصح انا الغالط من الأول ويلزم كما نتي صبرتي على أضراري انا تاني نصبر ونتحمل عواقب أفعالي
الحلقة 126
بقلم لينا صبرينة
بسيف لابعد مني مانعرف علاه شكيت بلي قال هكدا باسكو يعرف بلي فاطنة وراح نسمعو ممكن باه نتعاطف معاه ونشفق عليه من غير تخمين والله أعلم بقا مقابلني كيف بكري قاعد و يتفرج فيا حتا انا تعبت مابقيتش عساسة ورقدت _صباح لقيتو ماكانش شفت مع تيكي تاع لقيت الطييارة صباح تقلع مابقالهاش كيفاه نروح وحدي _رحت لبست ولبست لولاد كيكنت نلبس فالخمار لقيتو دخل تبسم معايا وراح عند لولاد يلعب ويقولهم حبابي واجدين يطيرو فالطييارة وانا ليمن تخلوني _زربت غلقت الباب باه مانسمعش واش بهدر راهو راح يخرجلي قلبي صح غاضني _القصة كاملة في صفحة قصص لينا صبرينة .كملت كلش وخرجت عندو .راني واجدة _قدم ليا حضني وعصرني بين يديه يبوس ويهمس .ليلة لبارح ماقربتش ليك غير على مصلحتك باه ماتهزيش الحمل وتحصلي وحدك بصح دايما حطيها في بالك بلي حبي ليك فاق كل الحدود _ديراكت جبد روحو وهز الفاليزات خرجهم ورجع لولاد .تنهدت ومشيت موراهم ماش مستعوعبة بلي صايي رايحة من _خرجت وهو سكر لباب وركبنا فطونوبيل _أصيل عمي معمر يلزم نخبرو بلي رايحا راه عاوني هو ومرتو على الأقل نتشكرو _ماش درك اصلا راه علابالو كلش هاكي ثلفون ودراهم راه فيه نيميرو تاع يماك وخواتاتك كيتوصلي لتم اشري لابوس وعيطيلهم أكيد ماش راح يستقبلوك يلزمك قبل تمهديهم _حكمت عليه وسكت وديمارا وهو طول طريق يدور يشوف ليا وانا ماقدرتش نقابلو بعينيا .طولنا فطريق باه وصلنا للمطار كل مانزيد نقرب كلما قلبي يزيد يتشرح وحاسة بحاجة غريبة _هبطنا ودخلنا وكمل الاجراءات وكان الوقت ضيق كانت معايا زوج يخدمو لتم عاونوني فلولاد هزوهم وبعد ماكمل كلشي وصل وقت الوداع كيتقابلو عينيا في عينيه ماحملتش روحي وهبطت دمعة _اششس مسحيها ماتبكيش قدامي هكدا عارفها عليا نتي ليحبيتي وانا سرحتلك طريقك المهم روحي واتهلاي في روحك وفلولاد وماتقطعيش اتصالاتك معايا _أصيل كمل خيرك وطلقني انطقها _غلطت مرة وماش راح نعاودها هيا روحي ازربي راكي روطار _أصييل ربي يعيشك _هزز براسو مستحيل تبقاي مرتي ولو بعيدة روحي ربي يسهلك روحي وماترجعيش تشوفي وراك وراكي مسامحة من عندي _تبسمت وهو حكم يدي باسها وقرب عند لولاد باسهم وتبسم معانا هيا وجدان طريق سلامة روحي وماتدوريش ليا _تهلا في روحك بزااف بسلامة _رحت مشيت شوي ودورت ليه لقيتو مازال يتفرج فينا دارلي بيدو باي رجعتهالو وكملت طريقي ودرت شهيق زفير وأخيرا الكابوس كمل وحان الوقت للرجوع بعد صراعات والصراع الأكبر مازال باه يخلص وكان تحدي يستنى فيا في بلادي ويلزم عليا نرجع كرامتي مع إنسان واحد .