نظرات محرمة (الفصل الثاني )

الجزء19

الحلقة 127
بقلم لينا صبرينة
الحمدل والشكر لله وصلت لبلادي على خير .هزيت طاكسي وديراكت لدارنا ماعنديش وجهة ثانية خلافهم ولو عارفة راح نلقى صعوبات وراح تكون مواجهة قاسية بصح محتمة عليا _كيدخلت للولاية تاعي زاد خوفي وقلت لمول طاكسي يبدل لوجهة فضلت نروح عند خالتي أخت يما تحكم معايا لولاد مانقدرش وحدي لزوج صغار وزيد ماش عارفة كيفاه نلقى الحلة عندهم _كيوصلت هبطت هيا ساكنة فالباطيمات فالطاج الأول برك _ كيفتحت الباب وشافتني مقابلتها تفاجأت وفي نفس الوقت سوطات حضنتني فرحت بيا بطريقة ماتتصوروهاش هزت عليا براء وصمد طلعهولي واحد من جيرانها دخلتو ودخلت الباقاج وقعدنا وكانت عينها في براء منين جاء؟ فهمت منها انو ماسمعتش بزواجي الثاني وانا فهمتها وحكيتلها كلشي بالتفصيل الممل حسيت انو يلزم عليا وحدة توقف معايا وتساندني وتوريلي طريقي منين نبداه وكما توقعت لقيت فيها الخير وقبلت تكون في صفي _جيت نهبط معايا الباقاج قاتلي ماتشقيش تديه معاك ماش راح يستقبلوك _ماتدري ممكن كيشوفوني يحنو عليا _سمعي لكلامي ديجا قلبهم معمر عليك يزيدو يشوفو طفل راح تزيد تكبر لحكاية ياربي ماتروحي ليوم تكشفي المستور ومع الوقت ممكن يتصافاو لقلوب يلزمك تصبري _ماعليش راني صبرت وراح نزيد نصبر _ رحنا غير وصلت لبابهم وزاد فيا الإرتباك والتوتر .طبطبنا شوي ولقيت فاروق هو ليفتح الباب كيشافني عقد حواجبو .وجدااان !!_خويا ربي يعيشك خليني ندخل ماتحرمنيش _استغفر الله .ادخلي وبلعقل على باباك _تبسمت وهززت براسي ودخلت جريا لجيهة دارنا فتحت الباب وتقابلني ديراكت يما كانت خارجة من الكوزينة كيشافتني رجعت تعيط بصوت وتبكي وقدمت ليا بهاديك الفرحة والشوق نسات بلي متغشة مني وقلبها معمر ومن غير شافتني حضنتني بكل قوتها وحنيتها وتحمد في ربي .خرجو خواتاتي تاني فرحو بيا وحضنوني كيشفتهم قدام عينيا تولهت الله يبارك كبرو رجعو نساء وحنا هكداك مع هاديك المشاعر ليمخلطة بين العتاب والحنين روحي كانت ترجف من داخل .بديت نسمع في أصوات ورايا تاع عايلة عمي كل واحد واش يهدر كيدورت ليهم بنات عمي تسالمو عليا بصح مرتو ماقربتش وحتا قاتلي واش جابك لهنا _ماجاوبتهاش ورحت عند جدة سلمت على راسها وعزيتها .لقيتها باردة معايا وماهمهاش أني رجعت تبدلت عليا 180 درجة تشوف فيا بطرف عين  _نضت نحوس على بابا قالولي لداخل _دخلت عندو لقيتو قاعد فالكرسي المتحرك وعاطيني بظهرو .قدمت خطواتي بشوي وقلبي على شعرة ويحبس .القصة كاملة في صفحة قصص لينا صبرينة .قابلتو وماحبش حتا يطلع راسو ليا وليت هبطت لعندو على ركايبي باه تقابلت معاه وماقدرتش نتجرا ونقرب نسلم عليه عارفة يصدني .عينيه كانو حومر وملامحو فيها نوع من الشوق والحقد _بابا راني رجعت راهي رجعت بنتك يابابا تواحشتك _علاه جيتي ؟_يلزم نجي نتوما والديا واهلي وكلشي في حياتي _نورمالمو خبروك بلي تبريت منك ورجعو عندي غير زوج بنات برك _ماتقولش هكدا يابابا ماتقدرش تتبرأ من بنتك بهادي سهولة كلشي وصلك كذب في كذب مور مامات سامي حقروني وعفصوني استغلو ضعفي .في هاديك دار شوهو الصمعة تاعي غير باه نتوما تسمحو فيا ويعرفو يتحكمو فيا كلاهم الطمع تاع المرحوم وحبو يستولو على كلش خلاه سيرتو نضال كان يعرف بلي راني بالحمل نهار توفى فيه سامي كيداني لسبيطار وهكدا غمها مع روحو وانا مافقتش لروحي ونفسيتي كانت مدمرة كنت كما خسرت راجلي كنت حازنة وهو استغل كلشي وزاد شوهلي سمعتي هاداك شيطان مايقدرو حتا واحد عيشنيي جحيم (حكييتلو كلشي وحتا هوما دخلو وسمعو واش حكيت )وحكاية راجل ليكان يجي عندك لدار فليل ويفتح الباب ؟_هاديك المحكمة شارعتني عليها وخرجت منها براءة ماش عارفة شكون ماشفتو ماعرفتو _(حاولت قد مانقدر نخبي ومانهدرش الصح على أصيل قادرة غلطة مني هنا في وسط هادو ليسعو هو تكلفو الغلطة غالية لتم )_حنا هكداك ومرت عمي نطقت .نقولو صدقناك مالا علاه ماجيتيش وبقيتي لتم طول هادي سنين _قتلك حرقولي كواغطي باه نرجع _ممم مسكينة قولي كنتي تلعبي بحبالك وعجبتك الحرية وعجبك لحرام حتا زدتي جبتي طفل خلاف _كييقالت هكدا بابا ديراكت تبدلو ملامح وجهو _واش من طفل ثاني ياك عندها غير واحد ؟_ايه لول من وجهو باين ولد سامي عندها الحق بصح الثاني ليفي يد خالتها منين جاء ؟_وجدان هادا طفل تاع من _هبطت راسي .ولدي بابا ولدي بصح جبتو فلحلال مادرتش حاجة حرام _يعني تزوجتي مرة خلاف ؟_ايه تزوجت ومن وراها جبتو _وينو مالا راجلك هادا ؟_ماجاش معايا _علاه وشكون هو _بابا مانقدرش نقولك شكون ولا حتا اسمو بصح صدقني طفل عندو باباه وجبتو فلحلال _حنا هكداك وعمي دخل شبع فيا معاير ورخس وكان راح يتهجم عليا لمزية فاروق ماخلاهش وبابا ماسكتش حاب يعرف شكون بابات براء وعلاه راني خايفة نهدر _باسكو متزوجة غير بالفاتحة مادرناش عقد قانوني زواجنا كان فالسر واحد مايعلم بيه .
الحلقة 128
بقلم لينا صبرينة
اااه وعلاااه قبلتي تتزوجي بالفاتحة ولا يكون متزوج غيرك؟ _لالا من غير انا برك _مالا انطقييي علاه ماش عاقد عليك ومخبي زواجو بيك استناي وطفل مستعرف بيه _ايه اكيد مستعرف بولدو _كاتبو بإسمو ؟_ هنا سكت وهززت براسي لالا .والكل تفاجأو وماعجبهمش الحال وبابا بدا يعاير فيا انو ماش هكدا رباني وعمي كتر فيها بزاف ورجع يقدف في شرفي انو مامتزوجة لا والو وطفل جاء من لحرام وغير نكدب باه نستر عمايلي .عمي  مازال حاط عليا نفس النظرة كيجاء لتونس وشاف هادوك الامور المشبوهة وكلام نضال ماقدرش يتخطاهم وأثر بزيادة على بابا _فالأخير انفجرت في وجوهم وقلتلهم بابا عندو حق يعاير ويسبني ويعاتبني ويضربي و بخلافو ماكانش ليحاسبني _حتا لقيتو نطق .وجدان خرجي من دار راكي زدتي جبتينا عار أكبر من لي قبلو روحي وماتزيديش تجي هنا من قبل كنت متبري منك بصح ليوم نقول بنتي ماتت ودفنتها مع راجلها الاول روحي من قدامي _بابا ماتقولش هكدا و صدقني ياك انا بنتك وتعرفني مانديرش حاجة تهبطلك راسك وتغضب ربي و طول عمري صونت شرفي وشرفك _قتلك براااا اخرجيي _بقا غير يقولي اخرجي وعمي كتر منو فالاخير قدم لياا فاروق هو خرجني لبرا _روحي وجدان الحالة هنا كبيرة ومتكهربة نتي غلطتي وتحملي مسؤوليتك درك لحكاية فاتت وانا ماعنديش حق نحاسبك برك نقولك خليها ليام وماتزيديش تجي حتا يتهدنو _بصح يافاروق هكدا راكم ضالميني والله مادرت حاجة تاع عار _صايي افهمي وروحي حتا يتهدنو تهدري واش  تهدري ماش راح يصدقوك ماش ساهل واش شافوه واش سمعوه وزيد ليوم جاية بطفل مجهول الأب راكي كترتي .هيا روحي _جابتلي ختي براء هزيتو وودعتها وصمد كان مع خالتي كيخرجنا لقينا الجيران كاين ليسمع لعياط وراه يطل من البالكوات ويهدرو عرفوني بلي رجعت وكاين حتا ليسمعتها قالت منين ليها الطفل الثاني وكاين ليهدر عليا بالخايب سمعت وتحملت ورجعنا لدار خالتي نبكي ومقهورة من الحالة ليفاتت عليا ليوم كنت عارفة راح يكون يوم صعيب وليام الجايين أصعب_فليل خلاص دوشت وصليت وخالتي فرشت لولاد معايا هيا دارها صغيرة من غير زوج شنابر وكوزينة قيس عبد واحد يدخلها بكري كانو ساكنين فيها غير هيا ويما ووالديهم ماتو بكري وخلاوهم يتامى _هزيت الفاليزات فتحتهم حطيت القش فلخزانة دارتلي ليسباس ليا مهاها وكيفتحت الفاليزة تانية استغربت كيلقيت كابة صغيرة فيها انا نشفى على روحي ماحطيتهاش .فتحتها تفاجأت واش لقيت كلشي متعلق بسامي ليجبتو هاداك الوقت من داري وحرقهم أصيل لقيتهم هنا وكاين معاهم فلاش ديسك بقيت نشوف معاهم مصدومة ودمعة حاصلة فالشفر .لقيت ورقة معاهم هيا لولة _ماش على جالك على جال صمد ماعطانيش قلبي نحرقلو واش بقالو من باباه _هنا رجعت نبكي بصوت حتا جات خالتي تخلعت وتحاول تفهم واش كاين .حكيتلها ولات تهدن فيا _جامي توقعت انو تكون خدعة منو وماحرقهمش يعني كان حاب يعدبني نفسيا برك وحرق حوايج خلاف بصح ليفوطو نو .هزيت لفلاش حطيتو فالبيسي تاعي لقيت كلشي موجود ليفيديو تاع عرسنا وتحواسنا والذكريات كامل تاع سامي .حتا ليدوسي تاع خدمة تاعو ومع الخليج كلش موجود _رقدت هاديك ليلة مع دموعي مانشفوش وأصلا وقتاه نشفت دمعتي كان كلشي فالقلب وماش كلش يتحكى _لغدوا بعد حنا قاعدين مع بعض ونحكو قلتلها نكري دار مؤقتا حتا نلقى وحدة نشريها _هبلتي تعييشي وحدك باه ناس يزيدو يهدرو عليك _نبعد من كليا مايهدرو مايندبو _شوفي ناس يلحقولك يلحقولك ويهدرو ويوصلوها غير لباباك وعمك وزيد راكي بطفل بلا هوية أب يبقاو يشوفو ليك بناقص غيرك ريحي معايا حتا تفرج عليك _بصح ماعنديش حل لوقتاه نبقى نستنى خلاص طفل تبالي راح يبقى بدون نسب أصيل مستحييل يسمح في خدمتو ويخمم يحطو على اسمو_اصبري عليه شهور ويدبر راسو يدير حل بصح يلزم تحطيلو النقاط على الحروف طفل ماجبتيهش وحدك يتحمل مسؤوليتو .القصة كاملة في صفحة قصص لينا صبرينة .وحنا هكداك صونا ثلفون تاعها قاتلي راهي ختك هزت عليها ومدتهولي لقيتها وسام _وجدان راجلك راه عيطلي وقالي قولها تفتح الويفي تاع ثلفونها _علاه ؟واش يحوس ؟_وانا وين نعلم هيا راح نكوبي _اصبري واش حوالهم تم كيفاه الاخبار _من لخر نقولك بابا راهو زعفان منك فوق الحد ويما غير تبكي عليك ماعرفناها زعفانة ولا متواحشتك وعمي راهو غير يهدد قال كون ترجع تجي نحشيلها رجليها المهم الكل راهم ضدك وبلا حكايات الجيران ليزادو خرجوهم _اوك فهمت _كوبات ورحت جبدت ثلفون تاعي من ساك شعلتو وباطاجاتلي خالتي كونكسيو نسيت ماشريتش لابوس _شوي ولقيت واحد يعيطلي ماسنجر .شفت معاه ماعرفتوش ماهزيتش بعتلي ميساج قال فيه انا أصيل هزي .
الحلقة 129
بقلم لينا صبرينة
اااو من وقتاه هادا عندو الفيس ماش موالف يستعملو يكرهو يستعمل تطبيقات خلاف (وكنت متأكدة انو الكابوس تاعو راح يبقى يرافقني حتا لبلادي يعني اتصالو مافاجأنيش )_كيعاود هزيت عليه بقا غير يشوف معايا وساكت وباين متكسل فشومبرة تاع الدار لقديمة عرفتها من الضوء الموف _واش حوالك _حمدلله ونتا _خليتي فراغ كبير في حياتي مايعمرو حتا واحد كيندخل لدار ونلقاك ماش فيها يضياق صدري ونفشل مورالي يرجع طايح ويتكركر نبقى غير نسخايل فيك معايا بأي طريقة كانت بصح كينرجع لواقعي نضحك على روحي .مليحة درك كيرحتي وهملتيني وخليتيني وراك مليحة انو غدرتي بيا وعفصتي على مشاعري ليك على الاقل كنت متمني نشوف وفاءك ليا ولو بلقليل ولو بالصبر ولإبتسامة منك _انا وفائي مديتهولك كيصبرت عليك وتحملتك نتا وتقلاباتك وقسوتك ماعندي مانزيد كتر _وماشفتيش هاداك الاهتمام والاحتواء والحنانة والحب شفتي غير الجانب السلبي _باسكو سلبياتك كتر من إيجابياتك _تنهد.المهم حكاتلي ختك واش صرا وماحبيتش تهدري عليا شكون انا وهادا يثبث خوفك عليا بصح حتا حاجة ماراح تغفرلك على غلطتك الأخيرة _ماش سكت علاجالك كنت قادرة نحكي لبابا كلش عليك بصح مالقيتش فرصة ننفرد معاه باسكو ادا عمي ولا مرتو سمعو اكيد لخبر راح ينتشر ويزيد يضرني كتر ماراني مضرورة _مممم .بقا يشوف ليا ويمتعن في نظراتو _راح نرقد كوبي _هاتيلي نشوف لولاد _هاكي خالتي ثلفون مديلو يشوف لولاد انا نروح نصلي على روحي _لغدوا نفس شيئ عاود عيط وقتلو يدير حل لبراء ويتحمل المسؤولية _كون بقيتي معايا راني تحملتها بصح رحتي اتحملي وحدك وماكلاه تزيدي تجبدي الموضوع _كيقال هكدا سكرت عليه ثلفون وخليتو أكيد رجع يغلي ويسب بالمقلوب وحالتو باينة عليها الخدلان والحزن وزدت كملت عليه  .لغدوا خرجت رحت لابونك استفسرت منهم واش يلزم ندير باه نجبد دراهم باسكو يلزم عليا باه نجبد منهم باه نعيش دراهم ليمدهملي أصيل يكفو ياربي سمانة ادا طولو _بعد مافاتو ليام جبدت دراهم شريت ثلقون ولابيس فتحت فيس جديد وكلش جديد وهاداك ثلفون تاني ركبتو بيس رجع دايما يعيط أصيل ليه بصح مخليتو مع خالتي هيا تهز عليه وتوريلو لولاد انا ماحبيتش نزيد نقابلو وخالتي قاتلو بلي وجدان قاتلك ادا حابني نزيد نهدر معاه اتحمل مسؤولية براء وهو مازال في نفس الهدرة ويقول تعوم بحرها راحت الله يسهل عليها (كل مرة حقدي ليه يزيد ) اول حاجة درتها حوست على الفيسبوك تاع رقية حتا لقيتو بعتلها عرفتني عيطتلها منو باسكو الثلفون لقديم أصيل نحا كل النوامر ليفيه خلا غير تاع دارنا العفريت .هدرت معاها قلتلها تمدلي نيميرو تاع خالها معمر .مدتهولي عيطتلو هدرت معاه وطلبت سماح منهم وطلبت منو يصون الامانة ليعندو وليهيا لفلاش ديسك حتا نهار نروح ونهزو باسكو نهار ليخرجت من عندو خليت كلشي ورايا فدار عندو .هو لتم حكالي بلي هاديك ليلة بعد أصيل عيطلو وتقابلو وقالو بلي راح نخليها تروح يعني طمنو وقالي بلي شفتك تكملي اوراقك لتم تأكدت بلي صح سرحلك طريقك عليها ماشكيتش بيه هاداك الشيى ليوقفني _تمنالي ودعالي بااخير وكوبا ___فاتو ليام وبقيت مرة على مرة نروح لدارنا بصح نلقى غير الصد والرد يرفضوني نهائيا بابا يسمعني نتقهر بلبكى عليه بصح والو قلبو حجرة عليا وعمي كل مرة يحاول يتهجم عليا بالضرب حتا هو كارهني وكل هاد الشيئ الجيران زادو حطو عليا نظرة ماش مليحة وحسيت اهلي زادو شهرو بيا كتر هكدا .حتا رجعت خالتي تمنعني باه نروح قاتلي الفضايح راهي غير تزيد هني روحك شوي وخلي لحالة تبرد ماش تزدمي برك _رجعت يما وخواتاتي يجوني عند خالتي نحي وحشي منهم والحمدلله يما كيشافني قدامها حنت عليا وسامحتني وانا متمنية بابا هو ثاني يزيد يرضى عليا ويصدقني والباقي مايهمنيش فيهم __بعدها خممت مانبقاش هكدا بلا خدمة يلزم نعمر وقتي ونخدم ونسترزق مانبقاش قاعدة ولو عندي رزق خير ربي بصح يلزم نخليهم لأمور كبار ماش نضيعهم فالماكلة واللبسة والاحتياجات اليومية_قررت نروح للخليج منين كنت بكري ساكنة مع سامي ونسترجع كلشي خليناه تم ومنهم ديبلوم تاعي وامور بزاف تخصنا انا والمرحوم _فاتو شهرين ريقلت حوالي وطلعت للخليج خليت لولاد مع خالتي وأصيل ماخبرتو لا والو. استقبلوني وتفهمو الوضعية ليكنت فيها ورجعت كلشي نملكو في هاديك الدار وتلاقيت مع وحدة كنت نخدم معاها فلاثولي بعد ماحكيتلها واش صرا معايا قاتلي كون تحبي تفتحي مشروعك راني هنا نعاونك .القصة كاملة في صفحة قصص لينا صبرينة.رجعت لدزاير وبشوي فتحت آثولي تاع خياطة صغيرة درتلها فيترينا واسم يجدب الناس ومع ديبلوم تاعي فيه خبرة وزيد قريت فالخارج يعني تساعدني بزاف باه يقصدوني وزدت درت اشهار للاثولي كانت عندي بداية موفقة وناجحة كنت نصمم ونخيط بديت مع طفلة ومبعد زوج ومبعد رجعو ربعة وستة وكبر مشروعي ونجحت فيه وزدت وسعت لاثولي رجعت كبيرة سيرتو كيرجعت نصدر للخليج ونخدم مع هاديك المرا عاونتي بزاااف والحمدلله انا تاني كانت عندي خبرة واحترافية وموهبة وحلم الصغر ماراحش باطل وحتا حلم سامي ليكبرو داخلي تحقق وأخيرا (كلما ندكرو ولا ندكر اسمو يغرغرو عينيا بدموع ونتأثر ).
الحلقة 130
بقلم لينا صبرينة
عندي 7 شهور كاملين فالجزائر ومشروعي ناجح ونسترزق منو كنت نخدم نخلي لولاد فلاكراش باسكو خالتي دخلتها تخدم معايا خير ماتبقى تخدم عند الناس .نروحو صباح ونرجعو لعشية جامي قعدت حتا ليل دايما نخلي رجال هوما يقعدو فليل .فاروق ولو معاتبني بصح عاوني ولقالي ناس يعرفهم تاع ثقة بصح هو جابد روحو عليا بعتهم وخلاص وآخر مرة رحت لدار عندهم لقيت سالم قريب ماكليتو بسنيا صرات حرب بيناتنا هو يرخس فيا وانا تقول حطولي الحار في لساني شعلت فيه ماخليت حتا هدرة ماقلتهالوش باسكو هو ليشهر بيا قدام بابا وقدام فاميلتي والجيران والحومة وخلى صورتي موسخة .لتم بابا خرج عندي حاوزني وقالي بركاي ماتزيدي تجيبي فالعار كتر كما من قبل كنتي عايشة مع راجلك فالسر ارجعي وكملي حياتك انا بنتي ماتت وقريت عليها الفاتحة _هاداك نهار شحال بكيت وشحال غاضتني روحي حتا رجعو عينيا حومر ومنفخين ووجهي تحرق من كترة دموع وأصيل نسمع فيه مع لولاد يهدر .ماكانش ليلة ماعيطش فيها بلاكام يبقى يهدر ولو مايفهموش فيه وهو مايفهمش في صمد واش يهدر بصح متفاعل معاهم ويضحك شغل فاهم ومرات شفتو من بعيد بلا مانقرب جابد ألعابهم ويلعب معاهم وهوما فرحانين وكما شفت زادو تعلقو بيه ولو بعيد عليهم وانا مازدتش خليتو يشوف خيالي ولو دايما يطلب يشوفني وخالتي تجاوبو بلي رافضة ومازلت عن رأيي.القصة كاملة في صقحة قصص لينا صبرينة. الوحيدة ليكنت نهدر معاها هيا يماه مرة على مرة نسقسو على بعضنا بصح جامي عاتبتني وتقول برك ربي يحنن لقلوب .أصيل سمع بلي رحت للخليج وفتحت آثولي هنا وهاداك نهار عندو ماسبني وتحلف ونسمع فيه يكسر فقد أعصابو .مسكين كان حاسب نرجع لبلادي بصح نبقى فدار ونعيش من المصروف ليبعتلي .وهو الحاجة ليخلاتو يتحلف فيا كيسافرت وحدي .بصح انا متهمنيش فيه ولا حتى خايفة منو انا لي في راسي نديرو ونكمل نعيش حياتي ماش على جالو وعلى جال قيودو نوقف حياتي عندي طموح وراح ننجح فيه بلا بيه  __وحد نهار وانا فلاثولي نخدم عيطتلي ختي وئام هزيت عليها_وجدان ارواحي لدار بابا طالبك تجي _وقفت .خير واش كاين كاش مابيه راني نسمع في صوات الهرج قدامك _أرواحي تفهمي _ديراكت خبرت خالتي وهزيت صاكي ورحت عندهم لقيت الباب مفتوح دخلت قابلوني قاعدين لبنات مع مرت عمي _خير واش كاين _ادخلي للصالون تاعنا _ ماجات في بالي حتا فكرة ودخلت وتفاجأت كيشفت أصيل بلحمو وشحمو قاعد قدام بابا ومعاه يماه وخوه لكبير تصمرت في بلاصتي عينيا رجعو يرمشو ماش مستوعة انو راه قدامي وقاعد في دارنا .حتا قدمت ليا يما .بنتي رحبي بعجوزتك وشبيكي واقفة هكدا _لقيتها هييا جات عندي منين واقفة بعد سلمت عليها  وبابا نطق قالي راجلك جاء وحكالنا كلش _هو بقا يشوف ليا ومبتسم كان لابس لقري ولبيض وصباعو يمشي فيهم في لحيتو فهمتها كانت حركة الجسد الباطنية باه يخفي شعورو في هاديك اللحظة كيشافني _قربت لبابا سلمت على راسو ولحت سلام عليهم _وجدان راجلك جاء باه يرجعك و..._ماخليتوش يكمل الهدرة .مانرجعش من سابع المستحيل نرجع لحياتو ولدارو _شفتو هبط راسو وتنهيدة تاعو وصلت لوذني _وجدان هزيه وريحي هدري معاه بعيد واتفاهمو بينك بينو ومبعد نهدرو _بابا افهم ماكاين حتا هدرة ليعندي قلتهالو من قبل مانبقاش نعاودهالو _اسمعي لكلامي ودييري واش قتلك _شفت معاه وليت نزلت صاك ومشيت وهو تبعني لقيناهم كلهم يقرعجو ويشوفو لينا .خرجتو لجنينة ودورت ليه ربعت يديا _علاه جيت واش محتاج واصلا كييفاه قدرت تجي وخوك مادامو جاء يعني يعرف كلشي بصح كيفاه حتا حكيتلهم _بشوي عليا درك نجاوبك على كلش بصح ماش حق عليك ماتستقبليش راجلك بالأحضان طول هاد لغياب _جاء يقرب بعدني راني في دار اهلي بركا من تمهبيل تاعك ماش وحدنا _واش ندير كنت من داخل طول هادي الشهور انسان مكسور و مهزوم ومتواحش نشوفك ياولوكان نلمح خيالك بصح ليوم كيشفتك وحشي كلو زاد بقيت غير متحكم في روحي بالسيف كون صبت حكمتك وعصرتك بين يديا وشبعت أنفاسي بيك _هات المفيد واش عندك علاه جيت _اولا عندي حساب طويل وعريض معاك درتي أمور بلا علمي وزعما تفهمي وتفرقي بين لحلال ولحرام بصح ماعليش ماش وقتهم وثانيا جيت نرجعك بيك بولادي ليا _سمعت جوابي قبيل. زيد واش عندك _تروحو معايا لتونس ونعقد عليك _ههههه هاديك بكري كنت صابرة وساكتة على لكدوبات تاعك بصح درك صايي ماتقدرش ترجعني بأوهامك ليا _هاد المرة متأكد وسيريو راح نعقد عليك وبلا ماتبدلي الجنسية تاعك _والله علاه تبدل القانون وانا لا خبر _حط يديه في جيوبو . ماتبدلش بصح انا ليتبدلت وحبست الخدمة _كيقال هكدا بقيت باهتة فيه .اااه حبست نن مانصدقش ماتقدرش تديرها وتسمح فيها _على جالك نتي وولادي سمحت فيها وجيتك والدليل خويا ليجبتو معايا يعني حكيتلو كلش وعارف عاداتكم عليها جبتو هو ويما.
الحلقة 131
بقلم لينا صبرينة
منك بصح راني ماش مستوعبة كلامك_استوعبي وأصلا كيفاه صدقتي اني نقدر نتخلى عليك ونخليك ترجعي لبلادك انا كون ماشفتش لبعيد وماخططتش جامي نخليك تبعدي عليا ثانية بصح صبرت كما صبرتي نتي من قبل وريقلت أموري وجيتك _والله كلامك ماحبش يدخل لراسي صدقني توسوست ممكن ملعوب منك_وجداان راح تعبيني قتلك حبست علاه نكدب في حاجة كما هادي حبست وخرجت بوالو وكأني ماخدمتش نهار وزيد عندي مدة شهور من حبست نتي كون صبرتي شوي معايا لتم كون كلش تريقل وخبرتك بصح نتي تسرعتي فالوقت ليكنت انا نحارب في نفسي على جالك نتي غدرتيني _ماتوقعتش ديرها بهادي السهولة _شكون قالك ساهلة راني سوفريت باه قدرت نقنع روحي ونضحي على جالكم _سبحان الله مغير الأحوال _حتا عندي كتر من عام من فتحت مشروع لروحي بدراهمي بصح كان ماش مكتوب بإسمي كان كلشي سري واسمي ماخليتهمش يجبدوه حتا خرجت من الجيش باه رجعت المشروع بإسمي _والله ثاني كنت تخدم من تحت لتحت _ايه باسكو كنت شاك بلي راح يجي يوم ومانلقى غير حل ونخرج من الجيش واكيد باه مانبقاش بطال من بعد درت احتياطاتي ودرك كيخرجت لقيت منين نسترزق _الله يبارك راسك دايما يخمم لبعيد جامي تتلعبلك _المفيد هيا ترجعو معايا _نتا همك الوحيد نرجع معاك .مالا خليني نقولك انا باه نعقد معاك انساها ولو ضحيت وسمحت في خدمتك على جالنا بصح مستحيل نرجع نعيش معاك ولا نقبل نربط إسمي بإسمك الحاجة الوحيدة ليديرها هيا ولدك تعترف بيه قانونيا هادا ماكان اما انا تنساني _وجدااان ماتعبينيش هادا ماش لعب لولاد _وانا مانيش نلعب يكفي اللعب ليلعباه انا ونتا درك وقت الصح تنسب ولدك ليك ويرجع بهوية كيف الناس وانا نكمل حياتي كما حابتها بصح مستحيل نربطها بيك _بصح من قبل كنتي تقولي باه نعقد عليك علاه درك بدلتي رايك _ساهلة بكري كنت معاك مربوطة في دارك وفي بلادك فالغربة ماعنديش غيرك أما درك راني في بلادي وسط فاميلتي وحبابي كاين فرق كبير وأصلا بديت حياة جديدة هنا وعاجبتني روحي وقول على روحك نكارة عشرة يكفي واش شفتو وعشتو معاك ماش راح نزيد نرجع للبداية بعد ماتسرحت منها _دخلت وخليتو في وسط غشو لكبير .القصة كاملة في صفحة قصص لينا صبرينة.رحت عند بابا وهو لحقني .بابا انا باه نعقد معاه مستحيل انا هادا الانسان صح لجأت ليه وعشت معاه وتزوجتو لأنو ماكانش عندي حل خلاف بصح كان معيشني جحيم مانقدرش نرجعلو _عمي اهدر مع بنتك انا على جالها هيا ولولاد تخليت وسمحت على كلشي وعرضت روحي لأمور بزاف صعاب غير على جال مصلحتهم ودرك راهي رافضة وحتا ولدنا باه نكتبو بإسمو ونثبث بلي هو ولدي يلزها تطلع لتونس كاين اجراءات كبيرة بصح كون نعقدو ونثبتو زواجنا فيساع يسهال الأمر مي بلا عقد يبقى كلش معقد وتصعاب لحكاية والمدة تطول  _(شفت معاه بكل غل عرفتو حاب يزيد يعقد ويخبل الأمور كثر ويخلي بابا يظغط عليا )_نتي علاه رافضة هكدا راجل جاء وحكالنا واش دار ورجع يصحح اخطائو ويسترك علاه رافضة _نزلو دموعي .بابا أصيل كنت عايشة معاه في ضغط كبير ماتقدرش تتصورو طول هادي المدة ليعشتها معاه ماحسيتش براحة _اسكتي وسمعيني من لخر أصيل جاء برجلو باه يعاود يسترك ويريقل أمورك نتي وولدك ادا حابتني نرضى عليك ونسامحك وننسى ونصدقك بلي حابة تعيشي في حياة حلايلية أعقدي معاه هكدا انا نطمن عليك وفموم الناس تتسكر وزواجك فلحلال قدامنا يبرءك من كلشي فات من قبل خير ماتبقاي هكدا وناس تهدر عليك وعلينا ادا ماكيش عارفة نتي خليتي الناس يقولو على هادي الدار ناسها تاع فضايح وتاع العار مالا ادا حابة تتهناي ونتهناو روحي كملي زواجك وعقدي وحنا نقولو بنتنا متزوجة ومستورة وميسورة مع راجلها ماتخليلهمش فرصة يحكو عليك وعلينا بالعاطل _بابا علاه تخمم فالناس وفي نظرة المجتمع خمم في مشاعر بنتك وراحتها انا أصيل مانقدرش نرجع نعيش معاه راه قتلني وانا حية _علاه كان يضربك ؟ يحاوز فيك ويبيتك برا ؟مجوعك وهاملكم ؟حابسك ورابطك _شفت معاه وهززت براسي لالا بصح عدبني نفسيا مرضت بسبابو كاين امور مانقدرش نحكيهم _شوفي نتي راكي ديري فسبايب ادا على المشاكل تاع بين كل زوح متزوجين عادي تحلوهم بشوي ماكانش دار مافيهاش المشاكل ودرك لقيتي لحلال جاء عند رجليك ورافضتو مالا اخرجي من الدار ونهار تحطي عقلك في راسك وتقبلي تتزوجي كيف ناس وتتستري مع راجل وفي دارو شرعا وقانونا لتم نعتبر وجدان حية ونرجع بنتي لحضني اما تبقاي هكدا كما الهجالات مانقبلكش نهائيا _ياباباااا تعيش ماتهدرش ماتدمرنيش هكدا قدامهم نتا القوة نتاعي بيك. بنتك يستغلوها وياكلوها .
الحلقة 132
بقلم لينا صبرينة
ماحبش يزيد يهدر معايا ويماه تقنع فيا بيها بخوه .حتا عمي جاء وشافهم وفهم لحكاية زاد كمل واش خلى بابا .كيلقيت الحال هكدا هزيت صاكي وخرجت من الدار ودموعي تنزل شفقة على نفسي .القصة كاملة موجودة غي صفحة قصص لينا صبرينة.كنت ماشيا مابعدتش بزاف لقيتو لحقني_وجدان أصبري نهدر معاك _مسحت دموعي ودورت ليه .خير واش تحتاج  _راكي سمعتي واش قلت وواش زاد هدر باباك ماتكبريهاش ونفدي كلامي بالحرف وهكدا تسترجعي رضاهم _ههههه مسحت دموعي .علابالك نتا مسكين صح حسباتلك كيجيت لعندهم راح تظغط عليا بيهم مالا نقولك انا ماتهمني نتا ولا يهموني هوما من ليوم نعيش لنفسي برك وتبرأو مني كامل على رواحكم ماش تعيشو وترضيو رواحكم على حسابي انا ثاني عندي نغسي راح تحاسبني وراحتي لقيتها بعيدة عليكم كلكم_وجدااان راحتك هادي بعد عام عامين ماكيش رراح تبقاي مستراحة معاها وتلقاي الفرق براء راح يكبر بدون هوية أب _مادامك حبست الخدمة محتمة عليك تكتبو بإسمك _ههههه نتي مريضة تبانيلي ولا مازلتي ماتعرفينيش انا كون ماتقبليش تعقدي معايا ماش راح نعترف ببراء من للخر راني قلتهالك انا نحتاجك نتي أولا ومبعد ولدي _نشكي بيك والله نرخسك ونرخس جميع كيفك _عادي أشكي على روحك قتلك ماش خايف من الحبس وعاى جالك مستعد ندخل ليه بصح نعاود نخرج ونرجع ليك يعني تبقاي في نغس النقطة تدوري معايا مي حطيها في بالك بلي ماتلقايها معايا مليحة ولا من جيهة باباك وفاميلتك يبقاو غاضبين عليك والضحية الوحيدة ليتبقى تبكي وتتحسر هيا نتي فهمتي ولا نزيد نفهمك _مازلت في طبايعك ماتتبدلش مستفز وتستعمل اسلوب الاستهزاء _ واحد مايقدر يغيرني يكفي الشهور ليدمرتيني فيهم بغيابك ودرك مادابيك تقبلي نروحو نثبثو زواجنا قانونيا _تعرف حاجة نتا ماعندكش كرامة وينهي هادي الرجولة والهيبة والغرور والشهامة تاعك وين عفصتها وجاي تبع فيا باه نقبل نعقد معاك دير ليتقدر عليه وليتحبو وادا ماش راضي تعترف بولدك خليه ليا وحدي انا نكون ليه الأم والأب في نفس الوقت ومانخليهش يحس بغيابك ومانخليش ناس تهدر عليه بالباطل وبلاش اعترافك ليه مانحتاجكش قيلني وخليني نعيش مع ولادي وحدي ريحلي راسي منك وريح حياتي من المشاكل والدمار راني كرهت وتعبت منكم _مشيت وخليتو ورايا ودموعي هبطو يعبرو على شعوري المهان وبعد هاداك ليوم قررت واخترت المرسى بتجربة حظ مني وكنت على يقين اني نستاهل نعيش حياة فيها ضحكة وهدوء وإحتراما لنفسب ولأنوثتي ووجودي ولضميري بصفة خاصة بعيدا على القيود الظالمة المتشابكة .