نظرات محرمة (الفصل الثاني )

الجزء3

حلقة 10
بقلم لينا صبرينة
دخلهم لشمبرة تاعو وماقدرتش نحبسهم باه نهدر معاهم قبل باسكو من شفتهم حسيت روحي لازم عليا نحكي واش صاري معايا باه يحموني ويكونو سند ليا بصح هو عرف يقنعهم بلي حاب يهدر معاهم هدرة رجال وحدهم عليها تبعوه تغلقت الباب عليهم وانا تغلق عليا آمال كثيرة .بقيت على أعصابي لمدة ربع ساعة وحنا نستناو امهم بقات غير تدعي عليا بالشر ونسرين تقولها اسكتي .شفت حتا جواد وفؤاد ومنصف جاو بصح ولا واحد فيهم هدر ز نظراتهم ليا كلها تساءلات حتى حشمت من روحي حسيت روحي مدنبة في وسهم_ كيخرجو كانو وجوهم ماتبشرش بالخير ونضال وراهم .عمي ديراكت تهجم عليا وضربني على وجهي فهمت بلي نضال عملها بيا _تستاهلي نحطك فالأرض تحتي ونعفصك برجلي حتا تموتي رخسية كلبة هبطتي راسنا للأرض تبان ماعرفناش نربوك باه خرجتي خارج طريق كون جيتي بنتي راني نحرتك _علاه واش درت _واش درتي اااه .عندك وجه تعيطي نجي ندوك وتقابليني بيه وتسلمي عليا وتزيدي تسقسي واش صاري خامجة ظهرت نعمة طليقة سامي كان كلامها صحيح وحنا صدقنا بنتنا وكدبنا بنت ناس وقلنا راهي تشوه فالصمعة تاعك كيخربتي دارها بصح ظهرتي وحدة معفونة وناجسة كون يسمع باباك بيك يموت من قهرو الله لا تربحك _عمي والله مادرت حاجة راني مضلومة والله صدقني _يعني ولد لحرام لي في كرشك جبتيه ونتي ماعلابالكش وراجل ليكان يطلع لعندك ويفتح الباب ويدخل ويسكرها من وراه ماعلابلكش بيه ولغناء ورقيص وليفيطو المخلة بالحياء ماعلابلكش بيهم يارب العالي راجلك قبرو مانشفت ونتي راكي تزني مع رجالة وينهي تربيتنا وينهو دينا لهادي درجة كفرتي بربي ورجعتي ماتعرفيهش رجع عندك لحرام ساهل درتي روحك سايبة ماعندكش والديك ومواليك الله ولا تربحك وخسارة تربية وثقة باباك فيك _عمي افهمني كنت مشرب دواء تاع رقاد مانعرفش شكون كان يطلع عندي ونضال راه يزيد عليها _بهدلتنا رجع يقولي هزو بنتكم وروحي بيها ماش ناقصنا بنات لحرام تشوه سمعتنا حشمتينا وغطستي راسنا فالأرض _كيفاه قالك نروح معاكم مافهمتش _شوفي من لخر ماعندك وين تروحي معايا نفضل نموت لا نهز معايا وحدة زانية وغضبت ربي _كيفاه ماتدينيش مانيش فاهمة _نطق ليا سالم يعني تبقاي هنا ولا ترجعي لبلادك وحدك مايهمناش فيك المهم حنا ماندوش وحدة معانا كما نتي .كيفاه قدرتي تتبدلي ولا دراهم والرفاهية بدلوك ورجعوك صح هجالة .كنت بكري مكدب نعمة على كلامها وواش شافت وواش هدرت ووقفت معاك وكنت ناوي نسترك من كلام ناس بصح درك ظهرتي فتي الحدود بابا ماقدرش يشوف بنت خوه واش دارت بصح انا شفتك مع راجل يصور فيك ونتي ترقصيلو صح خرجتي ساقطة _واش من رقيص يهديك ربي _نطق نضال .ماديريش روحك بريئة وماش عارفة كلشي راه عندي مديتو لسالم شافو باه نبرأ روحي ومايقولش ضالمتك حنا ناس لينا اسم وسمعة وكون تخرج اشاعة حنا نكونو برأنا رواحنا منك ودرك مادام جاء عمك نسلمك ليه ونخرج روحي وعايلتي من هادي لحكاية ونصفي روحي قدام ربي والمرحوم خويا بلي أمانو حافظت عليها وتسترت وفالأخير خليتها لمواليك يتولاوك حنا ماعندو مادخلنا باه نحاسبوك من غير والديك وربي _(كيكان يهدر وكأنو شريف مكة ويعرف ربي ويفرق ين لحلال ولحرام واكيد تخدعو فيه )_وادا ماصدقتونيش كاين امي وخاوتي سمعو وشافو _نطقت يماه ايه كنت كينطلع ليها من الباب نسمع لغنى في دارها وماكنتش فاهمة حتا حكمها نضال فيها ليطراس تاع صباع راجل هو شك فيها وراح شاف الكاميرات وشفنا ليماينشافش _نطق نضال . ايه الكاميرا كنت حاطها بصح جامي تفقدتها باسكو مرت خويا وعيب نتجسس عليها بصح هيا استغبانتا ودخلت لدارها راجل وممكن ماش غير واحد ماندري _حرام عليكم راكم تقصفو في شرفي وعرضي والله مادرت حاجة ولغنى ليكانو يسمعوه تاع عرسي كنت دايما نتفرج فليفيديو تاعنا برك _نطق سالم .بركاي ماتكدبي وتنكري راني شفت الفيديو ونتي ترقصي وراجل يصور فيك تعيفي علابالك _ واش من فيديو  راح تهبلوني هاتو نشوف واش حابين تتهموني راح نهبل_تحبي تشوفي كلشي فلاشومبر تاعي _رحت نجي لاشمبر لقيت الميكرو مفتوح وفيه أصيل وهو طالع لداري فدروج وهو كان مايبنش روحو حتا تتغلق الباب يعني باين بلي يفتحها ويغلقها بروحو .وثلفون نضال تاتي مفتوح ولمحت صورتي .