نظرات محرمة (الفصل الثاني )

الجزء20

الحلقة 133
بقلم لينا صبرينة
رجعت للخدمة ولتيت بيها باه نشغل روحي على واش صرا .كانت عندي طاقة رهيبة ندخم ونزيد من طايرة ونحتم في روحي باه نركز غير مع الخدمة .كيوصلت لعشية خرجنا هزينا لولاد ورحنا لدار دوشت وصليت ورحت نطيب فلعشاء لينا ولولاد _حكمي بلاصتك ريحي سوي وشبيكي من رجعتي من عندهم ونتي كيف دودة تغلي راهم حكاولي كلشي صرا _ماتفكرينيش فيهم من ليوم ماعنديش عايلة حقروني ويخمو فالناس كتر مايخمو في بنتهم .طحت فاالأرض نبكي ونندب .علاه هادا الظلم ياخالتي علاه مازالو يحقرو ويكسرو فيا بصح خلاص قررت انا تاني نتبرأ منهم _نوضتني قعدتني فالكرسي .العني شيطان واش هادي الهدرة درك يامات وترجع المياه لمجاريها وراجلك تحلت مشكلتو درك يكتب طفل بإسمو _شفت معاها وحكيتلها حتا هيا بقات بلا راس_وجدان مالا اقبلي اعقدي معاه ومبعد طلقيه ساهلة _ايييه وين تخمي هاداك اصيل مايعرف لا لحلال لا لحرام وهو اصلا كل الإحتمالات ليتخوفو ويشك فيها يديرلها حساب قبل اكيد كون نعقد معاه يدير كاش عفسة وبيها يربطني المهم ماش مدايرة فيه ثقة أبدا وزيد ماش حاملة نزيد نعيش معاه نهار _حنا هكداك طبطبو فلباب راحت تشوف .شوي ورجعتلي .وجدان أصيل ليجاء _قتلك ماش راح نتفك منو .مسحت دموعي وخرجت عندو _حاب تشوف لولاد تفضل ادخل راهم فالبيت هادي _نشوفهم ونهدر معاك _تدخل ولا نغلق الباب _دخل وراح ليهم طليت عليهم كان هازهم لزوج وهوما عرفوه يضحكو معاه وصمد يقول لأصيل بابا ويبوس فيه .خليتهم ورجعت للكوزينة _علاه جيتي روحي لمعاه انا نكمل_خليه كيشبع يروح _نتي مديتولو لادراس تاع دار_سور وحدة من خواتاتي بلعطهم بالهدرة ومدولو .القصة كاملة في صفحة قصص لينا صبرينة.شوي ولقيتو يعيط ويعاود عليا وليت رحت عندو _هزي لولاد عند خالتك وارواحي قابليني _خليتهم كما راهم يلعبو قدامو وقعدت مقابلو _راني قعدت واش تحتاج _نتي رجعتي ماتخافيش من كلامي _وي على الأكيد مانخافش وزيد عمري ماخافت منك كنت برك نجاملك ونصايرك _ناض قفل الباب وقدم المايدة تاع الحطب ليا وقعد فوقها وقابلني وجه بوجه _مادام رجعتي ماتخافيش كملي أتحدايني وجاوبيني شكون قالك تروحي للخليج وحدك ؟_ قررت لروحي ورحت مانستنا حد ((كنت نهدر معاه وخشمي فالسماء وبكل برود) _وراجلك حرام عليك اصلا تخرجي من دار بلا علمو _خرجت من بلادك ونتا علابالك وبيدك سرحتلي طريق وأكثر من هكداك ماعندكش حق فيا كبيرة وواعية ونعرف نفرق بين صحيح ولغالط _واش درتي كيرحتي وين بتي وشكون قابلتي ومع من هدرتي وشكون عاونك _عاوني ربي سبحانو وشكون هدرت وقابلت أكيد ناس ليفادوني _وكيرجعتي وفتحتي لاثولي وزيد حاطة رجال يقعدو فيها حتا لنص ليل منين تعرفيهم ومنين جبتيهم _فاروق ولد عمي عاوني _واش يحوس عندك هادا ثاني _انسان يشوف ليا بنظرة ناقصة ومشوهة بصح لقيت فيه الخير خير من شي ناس يتظاهرو بالحب وأفعالهم العكس _يعني مصرة تستفزيني بكلامك _ماش محتم عليك تسأل ولا تسمع جوابي من لخر ماعندو مادخلك في حياتي_شكون ليعندو دخل مالا ؟اسمعي لايكون كنتي تخططي لهاد الشيى من بعيد وكنتي ناوية تلقاي أب لولدي وتنفكي مني وتتزوجي _نعرف لحلال من لحرام حمدلله_سور كنتي ناوية ديريها ياك عليها كيشفتيني جييت تصدمتي وبقيتي رافضة وتهدري كيف الوحش وداخلة بعضك بالاك عينك زاغت لكاش واحد عجبك ونويتي على كاش حاجة _وقفت من قدامو .يهديك ربي روح اخرج من دار بديت تخرط _وقف .ماش كما تحبي ماش رايح قبل مانكمل كلامي انا راكي تعرفيني عقلي مهرود ومريض بيك وكون نحكم عليك حاجة خاطية ماتلومي غير روحك ماش جيتي لبلادك وحابة تتقواي عليا تحبلك باه تقديرلي وكون بالي نعفصك راني نقفل لباب بالمفتاح ونغلق معاه فمك ونعمل عملتي ونخليك بصح يلزم تفهمي انا انسان يحب ويمشي بقلبو ماش بشهواتو وكيحبست الخدمة وجيت من غير باه نعاونك مع فاميلتك صح ماقدرتش ندخل رزحي بزاف في هادوك الشبهات بصح الحل راه بين يديك تقتنعي بيا بكل احترام اللهم بارك تبقاي رافضة راكي علابالك واش يصرا انا لي عليا انو ضحيت بأهم حاجة في حياتي وهيا الخدمة من بعدها مانزيد ندير حتى تضحية الإ وادا كنتي معايا .كان مادابيا ترجعي معايا ونعقدو ونكتب براء بإسمي ونكونو عايلة مع بعض متحررة ومحترمة وبداية جيدة بصح نتي تبالي تخمامك في أمور خلاف أهم من عايلتك ومن ولدك ورجعتي أنانية ومتعجرفة لأبعد حد درك نخليك مع تفكيرك وتخمامك وانا مرة على مرة نجي نشوفكم حتا يفرج ربي وباه يكون في علمك راه لبروجي تاعي موسع فيه من زمان ودرت شراكة هنا في دزاير اكيد مانقدرش نحطو بإسمي على حساب القانون بصح الانسان ليكاتب عليه انسان موثوق وهادي الخطوة كنت مخطللها عندي بزاف كون ترجعي داكرتك للور تتفكري المهم حبيت نقولك ونوصلك الفكرة انو عيني راح تبقى تراقب فيك في كل خطوة ماتستهزيش بيا في بلادك .
الحلقة 134
بقلم لينا صبرينة
من هاداك نهار وهو رجع يخرجلي قدامي بزاف حتا وصل للخدمة تاعي ويشارشيلي على المشاكل ويجي لدار يشوف لولادو يحاول يتقرب مني ويقنعني ماخليتوش الفرصة ونتجاهل فيه وكأنو غير موجود وببرودة أعصاب .حتا يماه وكانت داخلة فالموضوع وحاولت شحال من مرة تقنعني فثلفون بصح احتراما ليها ووقفتها معايا من قبل ماحبيتش نتجاهلها وحاولت نقنعها بأمور يخلوها تحط روحها في بلاصتي _فاتو شهرين وليام غير تجري وهو طالع هابط من لتونس لدزاير ماش مريح روحو ولا مريحني وبالنسبة لدارنا من هاداك نهار ليجاء فيه أصيل انا لغدوا من داك رحت عندهم وبالتحديد عند بابا وفرغت قلبي المجروح (نتا يابابا وعمي خليتوني لهادوك لوحوش خوك قبل مايخرج من دار ترجيتو ركعت باه يجيبني معاه بصح هو رماني وخلاني ليهم يهنشو فيا كيف الحيوان بنتك حقروها وضلموها وضربوها وبيتوها برا فشتاء مرضت وتغاشيت ونضت على رجلي وحدي نكمل نصارع فيهم. أصيل صح لقيتو هو السند الوحيد عليها تزوجتو بصح مرضني في عقلي .هادا كلو بسابكم وبالتحديد خوك كان على الأقل يدير حساب ليك ولشرفك هو أمن واش شاف ياو كلش مفبرك وغلطوكم وزيد ماكفاش ولدو شهر بيا قدامك وقدام قااع الناس الله لا تربحو. نبدا نلومكم نتوما ماش فناس نتوما كنتو أولى الناس ليهدمتوني وطيحتوني اما هوما يبقاو برانية ولقاو لعبة لعبو بيها كيف ماحبو .ونزيدك يابابا أصيل ماش حاب يكتب ولدو بإسمو حتا نعقد عليه يعني كان غير يتلاعب بيك هاداك ماشفت منو الخير ماتشوف نتا فيه ودرك ماعندكم حتا حق باه تمشولي حياتي مادام مازلتو حابين تتصرفو في حياتي فأما مجبورة نشوف الوجهة ليتساعدني وتريحني الشيى ليفات عليا تعبني وطيحلي صحتي وكرامتي تكركرت بما فيه الكفاية ودرك نستاهل نعيش لنفسي ونرسم ضحكتي ونتا يابابا ادا عندي معزة عندك فخليني تحت جناحك محمية ) مور مافرغت قلبي بهادا لكلام فكان وجوابو هو الرفض رجع رفضني وانا خرجت بلا مانزيد نشوف ورايا خلاص درت ليعليا مانبقاش حابسة في نفس النقطة .ومن هاداك نهار حرم على يما كون تزيد تهدر معايا وحتا خواتاتي ومنع خالتي تزيد تدخل عندهم درك عندي شهرين ماعندي حتا خبر عليهم قاطعونا نهائيا وحتا انا مازدتش رحت ولا سقسيت ولا حاولت معاهم شغل كنت عاميني الخدلان وخيبة الأمل فيهم والقهر وعزة نفسي كانت تغلب العاطفة. ونكدب عليكم نقولكم ماهمنيش هادوك الوالدين وصعييبة باه تبردي عليهم وبالأخص الضمير .ضمييري يحاسب فيا كل لياة كينحط راسي على لمخدة نخمم فيهم وفي أفكار تخوف وتعيي القلب والعقل والضمير كاين إحتمالات ومخاوف متقلقة منهم والوسواس كبر وهو أنو كاش نهار يجيني خبر موت واحد منهم واش نديير ساعتها كيفاه تكون حالتي. القصة كاملو غي صفحة قصص لينا صبرينة .حتا لوحد نهار وانا نخدم جات وحدة تخدم عندي قاتلي كاين راجل يحوس عليك برا _خرجت تصدمت كيلقيتو نضال _واش جيت دير هنا واش جابك وكيفاه عرفت وين نخدم ؟_بعقلك لاباس عليك _نضال مانيش في وقت لاباس قولي واش محتاج مني ولا خليني نروح _باينة مادام قطعت كل هادي المسافة وجيت وحوست عليك ولقيتك واضح انو عندي هدرة _قول واش عندك _كما قتلك من قبل نادم وطالب منك سماح على كلشي ونتمى ماتحرميناش على ولد سامي _ادا على هادي تعبت روحك وجيت مالا خليني نقولك ولد سامي يبقى ولدو هو وحدو لا نتا لا خاوتك لا يماك عندكم حق فيه وممنوع تشوفوه _ماتقسحيش قلبك راه يبقى ريحة المرحوم _الريحة هاديك كنت راح تقتلها بدم بارد واش تبدل درك _قتلك ندمت ومستعرف بلي غالط _ندامة ماتكفيش وروح من قدامي ماتزيدش تجيني _جيت ندخل حبسني _مازلتي متزوجة أصيل _ايه علاه تحوس _مالا طفل لي ليولدتيه وإسمو براء الدين يكون ولدو؟_نضال من لخر اخطيني وماتخلينيش نزيد نشوفك قدامي _خليتو دخلت مافهمتش نيتو وعلاه جاء لعندي ويحكي بهاديك اللباقة _فاتو ليام على نفس الريم مانيش مرتاحة من رجع أصيل خلطلي عقلي وزيد ماش طالقني دايما يعترض في طريقي وفي أموري ويعطيني الحدود والفواصل ليمتخطاهمش وحتا مرات يديلي لولاد لدارو غير باه تحتم عليا نروح عندو هو كاري دار وعايش وحدو بصح انا نبقى معاهم شوي ونحتم عليه يرجعنا وهو مايحبش يزيد فااهدرة يقبل يرجعنا بصح حالتو باين عليه الحزن والقهر وكسرة الخاطر نظرتو ليا تحكي الف شعور وأي وحدة في ببلاصتي راح يغيضها اما انا كنت لا أبالي سيرتو كيبعتلي ليميساج فيعم شعر والقصايد ليعبرو على الاكتآب ليراه فيه بصح مانردلوش ونتجاهلو الله غالب انا تاني تقهرت وقاسيت ودرك وقتو يتقهر .
الحلقة 135
بقلم لينا صبرينة
في وحد ليلة كانت الوحدة تاع الصباح كلنا راقدين حتا فطنا بصوت فالباب تاع راجل يعيط بإسمي ويخبط فالباب تخلعنا بينا بلولاد وماعرفناش نتصرفو حنا نساء وحدنا .طلينا عليه ماعرفتو هيا ماعرفتو أنا ويبان من هدرتو شوي سكران وهو غير يخبط ويعيط بإسمي ويهدر عليا في كلام كبير بالسبان ماخلا حتا كلمة ماعيطليش بيها .تلمو عليه رجال الجيران بعدوه من الباب لتم وين قدرنا نخرجو لعندهم .وهاداك راجل من شافني تهجم عليا حط يدو على رقبتي بصح فيساع بعدوه وكاين ليعيط لابوليس وواحد لراجل قالي ادا تعرفيه جاوبتو لا جامي شفتو _تدكبي تعرفيني كنتي مصاحبة فيا وكل ليلة تجيني وتطلبي مني دراهم والمرة لخرا خليتيني على لحديدة وبطلتي تجيني وكيحوست عليك قالولي عندها زوج ولاد واحد من راجل تونسي وواحد جابتو فلحرام _اسكت واش تقول مانعرفكش مامبا علاه راك تقدف فيا هكدا عيب عليك _العيب راه فيك يالي ماتحشميش مسخ### وملعونة كون جيتي شريفة مايتبراو منك والديك _بقا غير يهدر عليا بالعاطل حتا وشفت في وجوه هادوك رجال علامات الإشمئزاز من وجوهم ليا وواحد منهم سقساني قالي صح نتي بزوج ولاد وينهم باباهم وشكون هاداك راجل لي مرة على مرة يجي يدخل لدار ويوطول عندكم _عمي هادي حياتي وواحد ماعندو حق يتدخل فيا ولا يحوس يفهم بصح ولادي عندهم باباهم وجبتهم فلحلال وعايشة بقدري حمدلله نخاف ربي قبل مانخاف من العبد _كون ماجاش هادا سكران والله مانبقاو دقيقة هنا معاك الله يلعنك بيك بهادي ليخلاتك تعيشي عندها _كييقال هكدا وافقوه كامل الراي دخلنا حتا جاو لابوليس طبطبو باه فتحنا وطلبو مني باه غدوا صباح نروح لعندهم راجل تهمني بالسرقة _ليلة فاتت عليا وانا عيني ماغمضتش وانا نخمم منين خرجلي هادا المصيبة وشكيت كاش واحد بعتو سبيسبال باه يكمل يوسخلي صورتي وسمعتي .لصباح رحت للكوميسارية ومعايا خالتي سقساوني وانا جاوبت بلي مانعرفوش اطلاقا اول مرة نشوفو وبالعكس انا ليشكيت بيه _كيرجعت من كوميسارية لقيت أصيل نزل من طونوبيل وشافني كنت عند الباب جاء عندي ويزارب_وقتاه جيت وشكون خبرك بلي راني هنا_كما صرات بعد خبرني واحد موصيه عليكم ومرتي لعزيزة ماكلفتش روحها تعيط لراجلها تخبرو وزيد جات وحدها وثلفونك طافي لوقتاه تبقاي متجاهلة فيا اااه لوقتاه باقية مخليني كيف القنطرة تمشي عليا ومادريليش حساب صبري راه نفد منك _أصيل مانعاودوش ااهدرة ربي يعيشك وخلينا نروحو _اوك واش قالولك وواش صرا _حكيتلو وهو بقى يغلي مع روحو ولينا ركبنا معاه وصلنا للخدمة وهو يرحي في هاداك دخان وماحبش يفتحلنا الكارو كيهبطنا راح طاير وخالتي تشوكات فيه _ياخااه قريب قتلنا بالدخان _هادا أقل شيئ يديرو باه يعاقبني _كيستحملتيه طول هادي السنين نستعرف بيك والله اصبري شوي نستشنقو لهواء نضيف راه قريب خنقنا .القصة كاملة في صفحة قصص لينا صبرينة. لعشية كيرجعنا لدار لقينا لاوبال مرميا قدام الباب تاع دار دخلنا وهيا خرجت هزتها وفاتو يامات كابوس في هاداك البلوك رجعو يسبونا ومايحترموناش وضاق علينا خاطرنا وزيد كملت بيهم وصلوها لحكاية منين نخدم هدرة بهدرة ومن واحد لواحد تزيد تغمق وتتفر غير فيا وانا نحارب فيهم بالتجاهل بصح لوقتاه خممنا نبدلو كلشي ونبعدو على هادي الولاية بصح خفت يتكرر نغس الشيئ ربي وكيلو الإنسان هادا ليحرش هادك راجل فيا شاكة 80 فلمية في سالم باسكو بقى متحلف فيا_حتا جاء نهار وين رجع فيه نضال لعندي مع يماه بهيجة جاوني للخدمة وطلبو يشوفو صمد وانا أكيد رفضت وماسمحتلهمش وبعد ساعتين عيطولي من لاكراش قالو كاينة مرا قالت بلي هيا جداة صمد وحابة تشوفو _آطونسيو تسمحولها وراني جاية _رحت جريا عندهم ماش بعيدة منين نخدم لقيتو هو داخل طونوبيل وهيا برا .رحت ليها سمعتها وسخ وذنيها وهيا حاستها مستحملة برك في كلامي وساكتة وتشوف لنضال فطونوبيل .دخلت عندهم لاكراش قللتهم ممنوع واحد يدي لولااد ولا حتا يشوفهم من غيري انا ولا خالتي برك ماكانش خلافنا .هوما قالولي ايه بصح شفت نظرات ناقصة يخزروها فيا غاضتني روحي اني شيعت لهادي الدرجة وكل مرة نوكل عليهم ربي _خرجت لقيت بهيجة ماكانش بصح نضال واقف عند قدام طونوبيل كيشافني جاء عندي .ماعليش نهدر معاك شوي.
الحلقة 136
بقلم لينا صبرينة
اهدر وماكالاه مرة خلاف تجو عند صمد هاد المرة غميتها وسكت المرة الجاية نقلب عليكم الدنيا كما من قبل ماعترفتوش بيه حتا هو ماعندو مايدير بيكم وغير يكبر نحكيلو كلش واش صرا معايا عندكم_ ايه فهمنا وبالأخص انا متفهمك ومساعفك وعندك كل الحق في واش قلتيه .بصح ليوم جاي نعطيلك اقتراح ونتي خمي ورديلي بالخبر _واش هو الإقتراح_نفس العرض الأول _مافهمتش قصدك؟_يعني نفس الهدرة نتزوجك ونسترك وأكيد قبل كلشي نبرئك ونرجعلك كرامتك بالمقابل تتزوجي بيا _ههههه تبالي نسيت بلي راني متزوجة ؟_أصيل خليه عليا حركة مني يطلقك وتتهناي منو وحكاية ولدك ساهلة ساعتها ترفعي عليه قضية وتتحتم عليه يكتبو بإسمو ووعد مني ولدك هو ولدي ونتكفل بيه انا ومايخصو حتا حاجة _نتا جايح في عقلك أصيل مستحيل يطلقني ومستحيل يخلي ولدو يعيش مع راجل خلاف _يعني حابة تبقاي خايفة منو طول عمرك وتبقاي معلقة معاه افهمي وديري فيا ثقة أصيل خليه عليا نقدر نخرجو من حياتك كيف شعرة من لعجين _ثواني بقيت نخمم في كلامو وليت استوعبت .خليلي وقت ونرد عليك _جبد ثلفونو مانعرف واش دار .لقيت ثلفون تاعي يصوني هزيتو لقيتو نيميرو وكوبا .راه تاعي هادا نيميرو نستعملو كينجي هنا ودرك نبعتلك ميساج فيه نيميرو تاع تونس _منين ليك نيميرو تاعي _نعرف كلشي عليك ماش صعيبة المهم خمي في كلامي ورديلي بالخبر وهاد ليومين راني هنا ادا تحبي وتقبلي وتوعديني ماتتراجعيش في هادي دقيقة نروح معاك عند باباك ونحكيلو كلش _لالا ماش درك خليلي وقت نخمم ونخبرك _اوك بصح ماديريش كما المرة ليفاتت _هززت براسي ورحت ونخمم اكيد ماش راح نقبل بيه ولا حتا نصدق لكدوبات تاعو موحال نرجع نوثق فيه باين عليه حاب يوقعني فالشبكة ويدير رايو بصح يلزمني نخمم انا نوقعو فالشبكة وراح يكون انتقام ليا _بعد تفكير طويل قررت وهزيت ثلفون عيطت لنضال هز عليا خبرني بلي رتح لبلادو _واجد تسمع قراري وشروطي _ايه ايه بيانسور قولي _قابلة بيك وقابلة نتزوجو بعد ماتفكني من أصيل بصح عندي شروط _يلي هوما ؟_انا نبقى عايشة في بلادي وثاني شيئ نديرو مفاهمة وتوقع عليها يعني كلشي قانوني يكون فيها انو ماتشاركني بحتا دورو ولا حتا رزق هكدا باه نمضن ماش راح ياكلك الطمع وثالثا ولادي يكونو من أول اهتماماتك _قابل بكلشي وياك قتلك من قبل انا ماش دراهمك ورزقك لي بيا انا بيا نتي نتي صح حبيتك بصح كنت نتكابر مع روحي وحقدي من المرحوم خرجتو فيك وعارف غلطت وسامحيني وحتا كاينة حاجة نتي ماشرطتيهاش بصح انا راح نفهم ونتفهمك بعد ماتطلقي ونتزوجو ماش راح نقرب ليك الا ونتي راضية عليا انا كينتزوجك راح نعيشيك مرتاحة بدون إجبار ولا قلق _بدلتو الهدرة. المهم وقتاه تروح تخبر بابا وعمي كلشي _غير غدوا نجي على صباح نكون عندهم تحبي نجي نديك ونروحو عندهم _لالا روح وحدك _وجدان واش يضمنلي ماش راح تغدري بيا _ادا حاب تثبثلي نيتك وبلي صح تبدلت روح وبرأني من الشبهات ليلصقتهم فيا _مايكون غير خاطرك بصح كينجي و قبل مانروح راح نعيطلك باه نتأكد منك ادا تراجعتي راح نرجع لبلادي وادا بقيتي عند كلمتك راني نروح عند والديك تفاهمنا _كوبيت وخالتي مقابلتني تسمع وحاطة يد على خدها وفاتحة فمها _نتي حابة تزيدي تنوضي حرب كون يسمع أصيل اصلا شكون قالك راح يطلقك نتي بفمك قلتي صعيب يطلقني _شكون قالك راح نطلق ونتزوج برك راح ننتققم من نضال نخليه يخبر كلشي لبابا وبعدها نجبد بيه الزربية و نخبر أصيل هو يتكفل بيه وخلي يتقاتلو على رواحهم وممكن منها أصيل يرجع يطلقني ماتدري لوقتاه نبقى انا ضحية خليني نحس بطعم الانتقام والإنتصار مرة وحدة في حياتي _يامحاينك حتا نتي تخمامك رجع خبيث ونرجسي رجعتي تحبي روحك _هادي نفسي ليعفصت عليها من قبل راح تحاسبني بصح درك صايي نرجعلها كرامتها ومانحتاج حتا واحد _بصح راكي تلعبي بزوج رجال ونتي ماش قدهم راه مازال وقت خمي وانسحبي ماتعقديهاش كتر_لاااا ماش نتراجع وخلي تخلا ماش خاسرة حتا حتا حاجة _ربي يستر مالا .القصة كاملة في صفحة قصص لينا صبرينة .لغدوا على صباح بكري نضنا بالخلعة الباب يطبطب بالقاوي حتا خفنا تتعاود كما هاداك نهار .راحت خالتي للباب قالت شكون لقيناه أصيل زربت فتحتلو ودخل ديراكت لعندي حكمني من يدي ودخلني لشمبرة وغلق الباب وجبد ثلفون سمعنيي تسجيل فيه صوتي كيكنت نهدر مع نضال ونقولو قابلة رجع نفس سيناريو تكرر معايا .
الحلقة 137
بقلم لينا صبرينة
بلعت ريقي بصح حكمت في روحي _علاه راكي ديري هكدا وصلت بيك الوقاحة ترجعي تخوني فيا مع هادا الكلب واش ناوية ديري اااه وين حابة توصلي بهادو لعمايل سودا _باسكو كرهت وتغميت حابة نعيش كيف الناس راه الحل لينلقاه قدامي نستنجد بيه ماش ساهلة عليا يوميا نخرج نلقا من صغير لكبير يهدر على شرفي ويهدر عليا بالعاطل هاداك الشعور انا نعيشو ألف مرة فالساعة ومستحملة ودرك اي طريقة نلقاها قدامي نحط رجلي فيها ومايهمنيش العواقب _بلعييي ماتغطيش على الغلطة تاعك اصلا الحل تاعك راه عندي كون سمعتي كلامي مايوصلو بهاجموك هكدا كون نتي راكي معززة مكرمة في تونس وهنا في بلادك بصح نتي حابة تشنشيف وحدك وبعيدة عليا بصح فهميني علاااه قلتي لنضال قابلة فهمنيني فيها يارب علاااه واش نيتك راكي مرت راجل ادا ماكيش عارفة مرتي انا _عارفة وانا راني في عقلي وكلشي سمعتو صح انا قبلت بيه ومانيش نادمة _اسكتيييي راح تجهليني بهادي الجرأة تاعك يعني نتي متعمدة تكسريني وتدبحي في رقبتي متعمدة تديري فاالأخطاء لينعتبرهم انا خيانة وغدرة راكي دايرة حسابك لألف حاجة وعن قصد تهجمي عليا بيهم باه تكرهيني فيك ونطلقك ونتي تتفكي مني_ايييه هاديك هيا مادام فاهم الاعيبي الوسخة طلقني مايشرفكش وحدة كيغي _يعني الهدف تاعك تكسري الإحترام والقدر ليبقى بيناتها _هههه واش من قدر واحترام تهدر عليه نهار ليدخلت عندي للدار وانا فالعدة لتم القدر بيني وبينك طاااح والإحترام تلاشى عماياك السودا ليخلاو قلبي يهزو عليك غير الكره والحقد وكيتزوجتني وعاشرتني وجبت منك طفل كلشي كان مكروه وماش حاباتو_ويعني ماكيش حابة تمدي فرصة لينا وفرصة ليك بباه ترجعلك كرامتك وقدرك _نتا مانستنا مانتمنى من عندك والو لا حلال لا كرامة لا احترام وحتا تضحياتك رميتهم مع وساختك ونهار تبعد مني هاداك نهار نعرس ونقول محلى فراقك _طلعلي حواجبو وبقا يشوف ليا مستغرب وخيبة الأمل كانت واضحة في وجهو .مالا خلاص لهنا وخلاص باوجدان انا عندي كرامة وعندي كبريائي ليميل ومايطيحش ونغسي عزيزة و على جالك كنت نقول ماعليش نتحمل ونحاول حتا يفرج ربي بصح لهنا وخلاااص هادي العملة تاعك تكلفك غالية .شوفي اول حاجة براء راح نكتبو بإسمي مسألة إجرارات ووقت برك بصح انا ماش راح تزيدي تشوفيني بزاف في حياتك وكل مرة راح نجي لعندك باسكو ماش راح نطلقك راح نخليك حياتك طول ونتي معلقة بيا الوقت ليصحلي نجي ندي حقي منك ونروح ماش راح نمدلك حريتك اطلاقا و نهار تحبي نكون ليك زوج بكل قناعة منك فماش مشكل راح نعقد عليك قانونيا و نشهر بيك انك مرتي ونديرلك عرس كيف غيرك بصح باه نخليك تعيشي حياتك طول وعرض مع غيري هادي تنسايها كليا .انا حاربت وعرضت روحي لعقوبات كبيرة على جالك وحبست الخدمة ومستعد نعقد عليك وخلي يصرا ليصرا بصح نتي تلعبي في ألاعيبك من وراء ظهري بكل خبث .ودرك عيشي كيف ماحابة تعيشي حياتك مي تروحي ويين تروحي راني وراك خيالي وكابوسي راح يمشي معاك حتا في منامك مادام حابة هكدا فساهل الحال ماش راح نزيد نظغط عليك ولا كل مرة نجي نحاسبك نتي ديري ليعجبك وانا ندير ليهوالي راسي وكل خطوة تخطيها خبارها يجوني على السريع. بصح نأكدلك تبقاي معلقة بيا وكل مرة نجي نعاشرك ونمتع عينيا بيك ونتي برجليك تجيني وماكالاه نزيد نغمق فالوصف باسكو لساني خامج المهم الصفة تاعك هاداك الوقت باينة كيفاه تعود معايا وفي نفس الوقت تبقاي تحاربي فالناس وفي والديك جامي ماراح ترتاحي مني ولا من ضميرك وادا نضاال حسباتلو كيبعتلي تسجيل يعني راح نزعف ونقلب الدنيا فلا هو ولا نتيي تعرفو تخمامي نتي غالطة ونتي الانانية ونتي الخبيثة ابقاي على هادا المنوال وراح تربحي حياة ليتعجبك وحطي في بالك بلي كينرجع لتونس راح نبني حياة جديدة لنفسي كأي راجل مانبقاش نمشي على خيالك ونستنى فيك وفي نفس الوقت راح تبقاي مرتي ليكل مرة نتواحشها نجيها لبلادها وهيا تجيني لداري تعطيني حقي وتلبي طلباتي وهاديك لحياة نبداها ليوم معاك _نحا لافاست وبدا يقرب مني حشر روحو فيا وبدا يطلعلي فالبيستي زربت بعدت عليه_ماتعبينيش هادا حقي شرعي وعادي نديه في أي وقت يصحلي اصلا حارم روحي شهور ماكانش واحد قدي يحب مرتو ويعشقها ومريض بيها ومايقربلهاش هاد شهور كامل وحارم روحي غير على جالك باه مانضركش ولا تصرا غلطة بصح درك خلي الغلطة تصرا ياك فلحلال وادا هزيتي الحمل تتحملي المسؤولية ودرك راح ندي حقي ونتي ماتفاعليش على روحك المهم انا نتمتع .
الحلقة 138
بقلم لينا صبرينة
لالا ماش وقتك بعدنيي راني مريضة _تكدبي راكي تكدبي غير باه مانقربش ليك _قسما بالله غير مريضة صدقني وادا حاب تتأكد كمل واش بديت _لقيتو رخف روحو عليا وحبس بعد _مالا ياوجدان حطي في بالاك راني رايح وراح نطول مانجيش باسكو راح نبني حياة جديدة ليا ماش رراح نبقى نستناك من حقي نكون اسرة _واش تقصد بالأسرة هادي _ماعندو مادخلك المهم كينجي راح نطلبك تجي عندي وياوييلك كون ماتجيش راكي تعرفيني مهبول قادر ندير أي حاجة وصمعة تاعك تزيد تتشوه كتر ماراهي مشوهة ناس ماتستعرفش بلي انا راجلك بالفاتحة برك .المهم راني رايح ومخلي كلش ورايا ونبعد عليك وعلى ولادي وليام رايحا تفوت وتمشي وممكن تنعكس الادوار انا نعيش حياتي طول عرض مانبخل روحي بحاجة و هاني وراضي وبضمير مرتاح ونتي تكوني عكسي كليا متأكد وادا جاء نهار وسقسيتي روحك علاه رجعتي في هاديك الحالة اكيد راح نجيك انا في بالك وتتفكري كلامك ليا باسكو كانت عندك فرصة باه تغيري كلشي لصالحك ونتي رفضتيي باه ترضي غرورك وتقنعي نفسك انو نتي رجعتي قوية وماكانش ليزيد يكسرك بصح الغدرات تاعك فيا جامي ننساهم باسكو نيتي كانت صافية معاك ونتي كنتي خبيثة وأنانية ونشوفوك منا على شهور كيفاه ترجع حالتك _خرج وهو بزاااف متغشش كلشي فيه كان يخوف حتا فشلو رجليا وكلامو بقى يتعاود ويدور في راسي عييت نخرجو _وجدان بنتي راجل راه هبل وجهو كانت تخرج منو الشر يخوف علاه ماتستعقليش وتعقدي معاه وتشوفي الحالة جربي حظك _افهمي خالتي ماكانش حظ معاه كاين غير التسلط ومرضو يخرجو فيا _بصح بلزملك حل خير ماتبقاي هكدا شوفي حالتنا كيفاه رجعت _شغت معاها وهززت براسي .ميساجك وصل وانا من ليوم نحوس على دار نسكن فيها وادا تحبي تجي مرحبا اكيد مانخليكش في هادا المستنقع _ماش كما فهمني وجدان بصح غاضتني منك يعني رجعت وين ساكنة مستنقع كمليها برك ماش راح نلومك _ابييه كملت عليا حتا نتي تزعفي ؟؟ كان قصدي انا خمجتو كنتي عايشة بإحترامك وقدرك انا فسدت كلشي _هادوك يهدرو يهدرو ويجي نهار ويسكتو عليا بصح نتي يبقاو يتهجمو عليك وزيد سمعتو واش قال ماش راح يطلقك ومنين يجي يطلب بحقو تروحي ليه _اوووف ماتفكرينيش راسي راح يطرطق .القصة كاملة في صفحة قصص لينا صبرينة .هاديك لعشية زاد جاء بصح ماهدرش معايا شاف لولاد وخرج وجات ليا خالتي مدتلي دراهم خلاهم هو .زربت حكمتهم عليها حطيت عليا الخمار تاع صلاة وخرجت عندو لقيتو راح يركب لطونوبيل _أصيل .كيسمعني دور .هاك دراهمك مانيش محتاجة _هادو لولادي ماش ليك _وانا قتلك مانحتاجش وزبد حبس ماتبعت ليما فدراهم هاديك بكري اما درك خلاص انا موجودة _مادخلكش وزيد ماكالاه تعيطيلي فثلفون كما بكري كما لليوم كاش حاجة خالتك تهدر معايا صوتك مانسمعوش _شغل انا ميتة باه نسمع صوتك ولا نجري نهدر معاك افهم انا كارهاتك وجامي لا نتمنى نهدر معاك ولا حتا نسمع نفس تاعك _ياااو انا ليرجعت نكرهك وعفتك وعفت شخصيتك هادي وغرورك انا ليرجعت وجودك قدامي مانحملوش دقيقة كنت من قبل غير نقرب ليك جسمي كلو يرجف ويشعل ويحن ليك ونحاول نراضيك ونساعفك بصح درك ماش متمني حتا نقربلك وكرهي راح يطول وندامتك هيا الأخيرة _علاه راك تهدر هكدا لهادي درجة مستحقرني وانا ماضريتكش _باسكو الخيانة والغدرات والانكسارات والخدلان وخيبة الأمل لي ورا بعضهم خلاوني نبرد عليك ونخمم حتا انا في صلاحي بعيد عليك ودرك أتبردي بحياتك وحدك في وسط الشبهات _ركب وراح طاير ومبعد تولهت لرجال قاعدين بعيد شوي يشوفو ليا وصواتهم وصلت لعندي وهوما يدعو عليا بالشر .زربت دخلت للدار خبرتني خالتي بلي اصيل قالها غدوا صباح يروح عليها جاء شاف لولاد _طول هاداك نهار وانا نخمم في كل منحنى في حياتي فات عليا وفليل استنجدت بربي سبحانو كتت مريضة مانقدرش نصلي بصح استخرت ربي طول هاديك ليلة غير حل في راسي ويلزم عليا نكون قدو _صباح نضت لبست وخرجت ماقدرتش نروح للخدمة رحت لوحد لجنينة قعدت فالكرسي ونخمم ونخمم شاب راسي من تخمام للبارح لليوم حتا ليل ومارقدتوش .وانا هكداك صونا ثلفون لقيتو نضال شفت شفت وماعليا غير كوبيت عليه و حطيتو فلاليست بلوكي ورحت عند أصيل _ كيوصلت للباب تاع دارو على اساس نجرب حضي اما هو سماها نقطة نهايتنا بكل نرجسية .