نظرات محرمة (الفصل الثاني )

الجزء11

الحلقة 79
بقلم لينا صبرينة
دموعي تحجرو ودمي حسيتو جمد من الصدمة كنت متوقعة كيطلقني راح نفرح باسكو نتهنى منو بصح ليوم تعكست الأدوار طلقني وهو فرحان وانا حازنة على حالتي ونادمة أني تحديت أصيل وأنا ماش قدو واستهزيت بيه وفالاخير الفاس طاح على راسي وتخمامو واعر وخبيث وقاسي طلقني باه يوقعني فلحرام ويعدبني نفسيا وعدابي بدا من نهار ليوم __بقيت مدة على نفس الحالة حتا سمعت الباب تاع دار تفتح وصوتو هو يهدر ويقول ولدي لحبيب تواحش ماما .وانا في حالتي المنهارة تبسمت وخرجت عندهم لقيت صمد في يدو جريت ليه نحيتهولو ونحضن ونبوس قريب ناكلو  _ياعمري على حبيبي تواحشتك موت يالكبدة نتاعي وين كنت ياعمري نتا _بلعقل على طفل خليه يتنفس _طلعت راسي ليه .وين كان وين ديتو ومع من شبعان ولا جيعان ؟_كان مع رقية برك تهلات فيه _هبطت راسي لصمد وديتو للبيت وهو سمعتو خرج من دار .درت بيبرونة حليب باه نشربلو لقيتو شبعان وحتا مبدل لاكوش ونظيف بقيت غير معاه ونبكي حتا سمعتو دخل .حطيت صمد في بلاصتو ودوخة حسيتها بدات تدي فيا وتجييب .القصة كاملة مكملة في صفحة قصص لينا صبرينة .خرجت عندو لقيتو جايب ساشيات بزاف معمرين دخلهم للكوزينة _واش هادو ؟_القضيان ليتحتاجيه .قالها ببرود وغلق البالكون هادا حداري يتفتح . راح للبيت ونفس الشيئ غلق تاقة وزاد تاع شمبرة وحدرني اني نفتحهم وراح فتح لخزانة وجبد فاليزة وبدا يحط في قشو _واش دير ؟_رايح _فهمني كيفاه رايح _بقى غير يلم في قشو وماحبش يجاوبني ولا يكلمني ولا حتا يشوف ليا وكيكمل فتح الكوفر فرغو فالفاليزة وغلق كلشي وهبطها للأرض جبد دراهم من جيبو حسبهم ورماهم على وجهي طاحو كلهم فالأرض مفرقين وانا بقيت مستغربة _هادو دراهم ليالي ليوهمتيني بيهم _شوكاني ومشا الفاليزة وفات عليا كان راح يخرج من دار تبعتو حكمت دراعو حبس _وين رايح وعلاه دير معايا هكدا _نحالي يدي .ماتمسينيش وتستاهلي ماكتر وادا نسيتي قبيل راني طلقتك نستناك تكملي العدة تاعك ونرجعلك لدار يعني منا على 3 شهور نجيك ونعيش معاك فلحرام _أصيل الشيى ليراك ناوي ديرو حرام ويغضب ربي ومايليقش راجع قرارك _قراري مافيهش رجعة وحتا طلاقي ليك راه صحيح طلقتك بكل قواي العقلية ومتأكد من نفسي وتخمامك وافكارك الخبيثة وخيانتك وخدعك تسلكيه أضعاف نعود نخليك تغضي صباعك ندامة _أصيل واش نديرلك باه تصدقني بلي صح تقبلتك في حياتي _ديري واش ديري ماش راح نصدقك باسكو بدواء ليكنتي تشربيه وتكدبي في وجهي بصحانية وجه وتقوليلي نجيبلك ولاد ونتي من ورايا تحفريلي لتم صايي طحتي من عيني وزيد خنتيني مع الكلب تاع نضال. كيهدرت معاه وحكالي وهو يتاستي فيا يشوف ردة فعلي باه يعرف ادا راكي معايا ولا نو ماقدرتش نصدق واش هدر وبواش وعدتيه قلت ماعندكش جرأة ديريها الغاز طلعلي في راسي وجيتك طاير وزدتي أكدتيلي كلامو بالحرف لتم شعلتي النار على روحك وعلى زواجنا مالا من ليوم ماكي مرتي ماني راجلك اتهناي بهادو شهور ليتوفتيهم بلا بيا باسكو اعصاري ليجاي راح يخليك دوامة ماتعرفي شمالك من يسارك من ليوم راكي محبوسة مسجونة في هادي الدار وكل تحركاتك نشوف فيها وحتا لخزانة خليتها مفتوحة كون تغلطي وتغلقيها نجيك نربطك كيلكلب _أصيل راني قابلة بكلشي حابو برك ربي يعيشك ماتروحش وتخليني محتاجة ليك _هادو دموع وهادو الكلمات مابقاش يزيدو يفوتو عليا صيبووو فقتلك وفيقت روحي _فتح لباب زدت حكمت يدو بزوح يدين ونبكيلو (هاد المرة صح كنت نبكي من قلبي باه مايروحش ويخليني تمنيتو يبقى ومايديرش ليفيراسو ). وين رايح وتخليني هكدا راك تقتل فيا _من لخر رايح نتزوج بلمرا ليتعتبرني بكل قناعة منها انو انا راجلها وتمتعني برجولتي وتقدر تجيبلي ولاد _مادييرهاش بيا تكدب _كدبي ولا صدقي جومونفووو وتفكيري جامي توصلي ليه وتعرفي واش فيه.و كاين ألف حيط خبطي راسك فيهم باسكو ندامك بدات تاكل فيك.و ادا احتاجتي وخصتك حاجة تبعتي ميساج برك صوتك ماش حامل نزيد نسمعو .
الحلقة 80
بقلم لينا صبرينة
نحالي يديا وخرج وغلق عليا بالمفتاح طحت فالأرض ونبكي ونشهق ونعيط عليه يرجع بصح والو راح بلا رجعة وخلاني في ندامتي تبحرت من عقلي وحسيت بروحي راح ندوخ عندي كتر من 24 ساعة لا ماكلة لا شراب وحتا يدي يوجع فيا ويحرق _نضت شربت ماس ماء فيه سكر ولقيتو جاب بانان كليت حبة ورحت غسلت وجهي ويدي ليمجروح كان مسلوخ ويحرقو بلاصة متحجر فيها دم غسلتها بلعقل وعقمتها وربتها ببوندا ورحت عند صمد لقيتو رقد مسكين هزيتو وديتو لشمبرة حاوطتو بلمخاد وحيطت راسي قدامو تكسلت وبداو الويدان تاع دموع يهبطو ونتفكر في كل كلمة قالها وجعتني وحطمتني بصح حكاية زواج متيقنة مايديرهاش من غير يهدر برك .وانا مع تخمامي رقدت ماحسيتش بروحي حتا نوضني صمد يبكي نضت رضعتو حبيبي دايما عاقل من غير كيجوع ولا يخمج مايحملش روحو يبقى يبكي .كيتهدن نضت حسيت روحي راحتلي دوخة بصح فشلانة ميتة وعضامي مكسرين قابلت مراية شفت وجهي مطراسي بصباعو حتا رقبتي انا ولو بشرتي سمراء بصح أصيل صح يزير عليا ديراكت يخليلي لاطراس _رحت للكوزينة لحت عيني للطابلة لقيتو مخليلي ثلفون كيفاه حتا خلاه وماخفش مني. نن ياوجدام مادام خلاه وماخافش يعني داير حسابو ماتتسرعيش وتغلطي _شفت مع ساشيات لقيتهم قضيان حطيت كل حاجة في ببلاصتها وحتا ليكوش ولحليب جاب دوبل ولقيت معاهم بومادة عرفتها جابها ليدي زعما راه يجرح ويداوي .نحيت البوندا حطيت شوي من البومادة على الجرح وخليتها ورجعت لشمبرة شفت مع لخزانة اكيد درك راه يراقب فينا ويشوف كلشي بصح محتمة عليا نبقى هنا باه يشوفني ويحن عليا .هبطو دموعي تاع صح محتاجة ليه يرجعلي ومايرجعش يعيشني فلحرام ولا يبدل رايو ويعطيني حريتي بصح الحرية كانت بين يديا وضيعتها تفرت يلزمني درك من غير نخمم في حل ونحاول نخليه يصدقني بأي طريقة بصح ماش بإقتناع مني من غير باه مايضرنيش كتر يلزمني نتقبلو مؤقتا ممكن من بعد نلقا حل آخر ممكن نقدر نراضيه ونصالحو ويخليني نعيش حياتي هاد المرة راح نحارب كلشي على جالو باه يرجعلي ويقتنع بيا وندير طريق لمستقبلي.القصة كاملة مكملة في صفحة قصص لينا صبرينة. فات شهر وماجاء ماشفتو مالمحتو ماسمعت صوتو كل مرة نعيطلو بصح ماييردش ومرات نعيطلو ونبقى نحاول فيه ونطلب فسماح بصح ماكانش رد منو مي كينبعتلو بلي حتاجت حاجة يردلي أوك ومرات يدخل فليل يحطلي فدار واش طلبت عند الباب برك مايدخلش يخطف روحو باه مايشوفني مانشوفو صفحة قصص لينا صبرينة .حتا لوحد نهار دخل عندي فجأة تخلعت وفي نفس الوقت تأملت أنو يرجعني_راح شاف صمد هزو شوي ورجعو لبلاصتو دار ليا شاف فيا من فوق لتحت _ماكيش تاكلي ؟_ناكل علاه؟_راكي مشيانة بزاف غيرك كولي مليح راني نوصلك في كل خير لدار حابك منا تخلاص العدة تاعك تكوني ربيتي اللحمة شوي مانحبش نمس لعضم رجعي كما كنتي من قبل _منك بصح تستنى فالعدة تاعي تخلاص _علاه نتي ثاني منك بصح متأملة نرجعك طوووز عليك المهم بلا كترة هدرة روحي وجدي روحك نروحو للولاية هاديك باسكو غدوا عندك جلسة فالمحكمة _كيفاه علاه ماخبرتنيش من قبل وعلى واه وواش نقول مانيش عارفة _هوووب بعقلك كيتروحي وتفهمك المحامية هيا وجدي روحك ماتعطليناش نباتو تم وغدوا صباح تصبحي فالمحكمة _رحت وجدت روحي كما قال وهز صمد وخرجنا وحتم عليا نركب لور ماخلانيش نركب لقدام .حط نواضرو كما عادتو وديمارا وطول طريق ساكت حتا وصلنا للولاية كان وقت العصر حبس في بلاصة هبطت _هاتي صمد خليه عندي ونتي دخلي لهادا البيرو تلقاي المحامية تستنا فيك وهاكي لاكارت ناسيونال تاعك قوليلها برك اسمك راح تعرفك وخودي وقتك وراحتك باه تفهمي عليها _حكمت عليه لاكارت .ونتا علاه ماتدخلش معايا ؟! .