نظرات محرمة (الفصل الثاني )

الجزء14

الحلقة 93
بقلم لينا صبرينة
وجدان يدك علاه ترجف _مانعرف كيشغل خفت برك _هيا ماكانش حاجة تخوف ونتي معايا_دخلنا من باب تاع لحديد لقينا جاردينة مشينا شوي شفنا الباب تاع دار مفتوح وغاشي لداخل .زير على يدي ودخلنا وهو لاح السلام وهوما كانو مع يماه غاسطين فيها يعزيوها بصح كييسمعو صوتو دارو كامل أكيد الأغلبية ماعرفوناش حتا نطقت يماه وقالت مرحبا بوليدي أصيل الحمدلله ليوم نهار كبير يلقيلك تزغريتة طول وعرض باه يعرفو بلي ولدي رجع وأخيرا لتم شفت كامل تفاجئو ويهمسو مع بعضهم وفيساع دارو بيه .خواتاتو يسلمو عليه والدموع في عينيهم ويلومو فيه كيغاب هادو سنين عليهم ومنها يطلبو فسماح منو ويحضنو فيه واما خاوتو مبتسمين في وجهو وفرحانين كيجاهم ويماه تبكي ماقدررت نعرفها على بنتها ولا على أصيل يامن الحزن ولا بيها الفرحة بصح أكيد كلش تخلط عليها وجاها فوق بعضو .قعدنا كانو حاطين فوتايات فالهول رحبو بيا عادي وكلشي وأصيل حسيتو ماش عارف واش يدير سيغتو الكل يشوفو ليه ويحاولو يهدرو معاه ونسمع فيهم يقولو كيفاه رجع تبدل وقريب ماعرفناهش وفي فمهم غير الله يبارك وحنا هكداك يجي واحد من خاوتو باين هو لكبير من لحيتو شوي بيضاء قالو باباك حاب يشوفك واصيل حسيتو متردد بصح ناض وقف وشاف ليا مدلي يدو رحت معاه مع صمد في يدو ودخلنا منين باباه كان متكسل فسرير وباين عليه الكبر والمرض والماسك تاع الاكسجين في فمو كيشافنا نحا من فمو وتبسم معاه الله يبارك ماشاء الله عليك_ لاباس عليه _حمدلله ولدي حمدلله شفتك قبل مانموت من قالولي جيت حسيت بالراحة دخلت روحي .سكتو ثواني ونطق نتا ماتسلمش على بوك ثدم لعندي . حسيت بيه عاود ضغط على يدي كنت حاسبة راح يرفض بصح مدلي صمد وقدم ليه وسلم عليه وقالو ولدك كبر مايتسناش واحد يعلمو واش يدير يعرف صلاحو .ايه الله يبارك رجعت راجل _من بكري راجل ماش حتا ليوم وراني جيت وجبت معايا مرتي ولدي _تبارك الله مبروك عليك وراني  نشوف طفل يشبهلك برك سمر كيف يماه ربي يحفظهولكم  _الشيخ كان حاب نقرب نسلم عليه بصح أصيل ماحبش قالو راهي بالحمل ونتا مريض نخاف تتعدا وانا فهماتو غير باه يوصلو الفكرة انو راجل ويجيب دراري _ كان الجو متكهرب وبوه غير يهدر شوي ويحبس شوي يحط الماسك على وجهو وخاوتو يرطبو فالجو وأصيل يهدر من فوق خشمو وكون تشوفو هاديك القعدة وظهر المستقيم ولكتاف لعراض حاب يثبث رجولتو بأي طريقة وبلا نظرات الموجهة ليه من كل لافامي تاعو مرة على مرة يدخل واحد وكل واحد حاب يهدر معاه بصح الكل ماش عارفين كيفاه يتعاملو باسكو أصيل الإبتسامة ماكان في وجهو يهدر ويتعامل بصرامة حسيتو غريب في وسط عايلتو وفاميلتو ومبعد هزوه خاوتو رجال وخرجو لبرا وانا بقيت بين نساء وخواتاتو وولادهم يتعرفو عليا عن قرب حاولت قد مانقدر نغير لهجتي بصح كاين ليشك فيا وخبرتهم كما وصاني أصيل أنو كنت متغربة برك عليها لهجببتي مبدلة __كانو فدار غاشي يعني اجواء الجنازة مازالت سيرتو كي يماه كانت فسبيطار وانا لقيت فرصة ودخلت عندها كنا وحدنا خبرتها ادا غلطت وقالت لعاطف بلي صمد ماش ولد أصيل قاتلي لالا ماجاتش هدرا هكدا وأصيل فسبيطار همسلي في وذني ووصاني عليها _القصة كاملة في صفحة قصص لينا صبرينة _بعد مارجع دخل عند باباه كان وحدو يمكن ربع ساعة وخرج عندي بقيناهم على خير وركبنا وهو من ركب وهو نفس تاعو قاوي وينفض في روحو _أصيل خيير واش صرا ؟_طالب سماح في رايو راح نسامحو في بالو نقدر ننسى واش دارو فيا وننسى يعني طول سنين ليفاتو ماجاش عندي وطلب سماح وكيطاح فراش تاع الموت خمم في آخرتو .لوكان نعرف بلي هادي دقيقة آخر نفس ليه ماش راح نسامحو _يأصيل ربي كاين هو ليحاسب  _اكيد قبيل كيخرجت مع خاوتي الكل طلبو سماح ورجعو ييتأتأو في هدرتهم و مبهدلين من رواحهم ويمدولي فالأعذار من لكبير لصغير .خوهم هادي سنيين ماحوسو ماجو طلو عليه وهوما يعرفو بلي مظلوم وهكدا ماقالوش نشوفو خونا نحاولو نردوه لينا واالو ماتعبو رواحهم ماخمو فيا حتا جيتهم بصح ماعليش خلي نكون انا هو درك سيرة الحديث عندهم وكلامي ليهم اكيد راح يحسسهم بااندامة ليتخليهم مايسامحوش رواحهم اما هاداك الله لا ينحي عليه ونتي كاش ماسمعتي كاش ماقالولك.
الحلقة 94
بقلم لينا صبرينة    Lina sabrina
والو كان كلشي مريقل وزدت وصيت يماك قاتلي راني ماغلطتش مع عاطف  _حمدلله _فاتو يومين كنت نعيط ليماه نسقسي عليها ومنها خبرتني كيفاه حالتهم فدار من شافو أصيل تفاجأو بزاف كانو حاطين فيه نظرة الصغر بصح كيشافوه حشمو من رواحهم _هاديك ليلة فليل تقرب مني وكيعادتو كان همجي معايا وكيكمل مورراها بنس ساحة حسيت بحاجة ساحت مني وسطر متقطع _أصيل نحي يديك عليا _أركحي هكدا نحب نرقد وانا محضنك ومزير عليك _حاسة بحاجة ساحت مني لتحت وكاين سطر .ديراكت تخطف وانا رحت لدوش لقيتو دم خرجت عندو خبرتو تخلع زرب لبس ولبسلي وهز صمد وخرجنا داني لاكلينيك ليولدت فيها بعد شافتني طبيبة قاتلي مجروحة برك وهدرتلي تفاصيل تحشم وسقساتني ادا يوميا يدير معايا علاقة خبرتها ايه وساعات حتا فنهار يعني تحتمت شرحتلها .ولات دخلتو وفهمتو بلي ادا تبقى هكدا الحمل تاعي ماش راح يكمل يلزم ادا درت معاها علاقة تكون بكل هدوء وماتكترتش وزادت من عندها خوفتو وكترت بزايد وهو حسيتو يسمعلها قلب ورب __كيرجعنا لدار رضع صمد هو ورقدو ورجع عندي يتلمس فيا ويبوس .ماكنتش داري بلي كينكتر ولا نزيد الفيتاس تاعي البيبي يتأثر خلاص من ليوم غير لحنانة ياحبي نعود نتحكم في روحي راني سوفريت باه سمعت خبر حملك وفرحتيني ماش مستعد نزيد نخسروه على جال شهوات انا المهم تكوني قدامي ونشبع عينيا فيك هادا يكفيني _وزعما تقدر _جربيني وشوفي كيفاه حبي ليك ماش غير شهوة حبي ليك هو صافي وخارج من القلب.فالبداية صح حبيت مفاتنك هوما لولين بصح نظراتي المحرمة عليك تحولت حب صادق نابض من القلب ولعقل وعشرتنا الجاية كفيلة أنو تبرهنلك كل كلامي _مالا علاه كيتطلب حقك فالاول تكون حنين ومبعد تتحول تفترسني وتكون همجي _حط راسو صدري .نتفكر صغيري ياوجدان هاداك التخمام ليعالق في أي تصرف سلبي منك يخلي ردة فعلي معاكسة وننسى روحي وحبي ليك ونحب نثبث لنفسي وليك اني نقدر نتحكم في كلشي بصح مانيش نصارح فيك باه تشفقي عليا غير باه نكون صريح ومن كلامي تغيري من روحك انا معاملتي وتصرفاتي لزمك تتقبليهم بالدرجة برك ماتغلطيش وتفاعلك معايا بحنية وصدق راح يخليني راكح بصح كينلقاك كيف الحجرة نحب نستعمل القوة انا يكفيني برك انو تتقبليني في حياتنا اليومية والباقي وعد مني نعطيك كل الاهتمام والامان والحب والثقة والحنانة  .القصةكاملة في صفحة قصص لينا صبرينة ._فاتت سمانة وهو قد كلامو حنين معايا ومايخلينيش نتحرك بزاف وكل ساعة يعيط يسقسي عليا حتا لوحد نهار وهو يخدم عيطلي قالي لبسي راني جاي نروحو لدارنا أمي طالبتني ماهيش بخير _لبست ستنيت حتا جاء وخرجت عندو رحنا كيدخلنا لدار لقينا لولاد مجمعين فالهول وعاطف يخررج فيهم بعيد من الشمبرة باينة حاجة صرات _عاطف وينها أمي واش صرالها _ادخل للبيت هادي _دخل وانا قدمت ليهم لقيت خواتو وخاوتو الكل لداخل ويماه على الكرسي قاعدة تبكي وحاكمة في يد الشيخ .كما يبالي راهو يودع ويجبد في آخر أنفاسو وفهمت بلي أصيل كدبو عليه غير باه يجيبوه .شاف ليه وقالو أصيل انا ليغلطت فيك والدليل انك عسكري وهيبتك ووقفتك هادي كافية انو نعرف ويعرفو بلي نتا راجل وسيدهم ولدي راه مابقاليش سامحني (كان يهدر بصح بكلمات متقطعة )الكل هجمو على أصيل باه يسامحو وهو نشوف فيه يفور كان حاب يخرج وفي ثانية  كيكترو عليه الظغط نطق أصيل .الضرر ليسببتهولي انا ليعايش فيه درك وماحد مايقدر يعيش شعوري ولا يحط روحو في بلاصتي .بسباب معاملتك ليا فالصغر خليتني درك نضر الناس وماعندي مانزيد نقولك كتر بصح ربي يسامحك .قالها وخرج قعد فالهول وانا تبعتو حطيت يدي على ركبتو مامبا خمس دقايق وسمعتهم قالو الله أكبر والله يرحمو .شاف ليا عزيتو _ماكنتش متصور يجي يوم ونحضر موت بابا .حط نواضرو وخرج وقامت الجنازة بحضورو وحضور كامل لافامي ومن كانت جنازة اختو رجعو زوج جنازات بيناتهم غير يامات ومنهم تكتبت من عند ربي يتلاقاو بأصيل مرة أخرى ومنها يصفو رواحهم من لافامي ومن الجيران ومن لصحاب أما أصيل فكان صارم وقلبو حجرة مانضنش راح ينسى ويرجع طبيعي .
الحلقة 95
بقلم لينا صبرينة            Lina sabrina
فات الجنازة عادي ويماه كانت حالتها حالة مسكينة دفنت بنتها وزادت راجلها ربي يصبرها قاتلي ولو كان راجل قاسي بصح العشرة ماتهونش وبنتها لحد الآن مازالت ماش متقبلة موتها وزيد حالتها الصحية ماش مليحة ورجلها مجروح من لبلاصة ماتحركش وبتنا هادوك 3 ايام لتم عندهم في شمبرة برك راح شرالنا قش وجابلنا لبسنا بيا بيه بصمد وماحبش يطلب منهم والخدمة دار سبة بالمرض عليها ماراحش ماحبش يقول باباه مات باه مايلفتش الأنظار من لعدو تاع نضال كان فايق .هو حالتو عادية مانقدرش نقول متأثر بزاف ومانقدرش نقول ماش متأثر أكيد كاين شعور لا ارادي داخلو يخليه يتأثر وكان كل مرة يحكيلي حاجة على صغرو كييفاه فوتها في هادي دار مرات يعبس وجهو مرات يضحك واهتمامو كلو غير فينا وفي يماه اما خاوتو وخواتاتو يقعد معاهم ويهدر بصح معاملتو باردة وجسدت شخصيتو_بعد مارجعنا لدار كانو أيام روتينية عادي هو معاملتو معايا قد معاملتي الصادقة برك مرات نتوسوس منو كيكون يهدر فثلون مرات نسمعو ومرات مانسمعش واش يهدر في وحد ليلة رجع من الخدمة جابلي معاه بيسي فرحت بيه وزيد معاه فلاش ديسك على الأقل نعود نخدم بيه ولافوطو تجيني كبيرة وكينهدر بلاكام يبانو شغل معايا وانا لاتيا بيه تفكرت ماحطيتلوش لعشا .نضت رحت للكوزينة لقيتو فالبالكون يهدر قال يعني نقدرو نثبتو كيتحضر وادا ماجاتش ترجع عليهم _كان يهدر بأريحية وشافني بلي دخلت بصح عادي بقيت غير نتسمع فهمتو مع المحامية فالأخير رجع يتبسم ويهدر بشوي ماسمعتوش كيدخل سقسيتو واش كاين _راهي ماجدة المحامية قاتلي منا على يومين تجيب صمد باه نعاودو يديرولو تحليل الدم DNA مع بهيجة وهاد المرة ادا ماجاتش راح تربحيها بكل سهولة باسكو راهي تتهرب للمرة الثانية وادا حضرت راح يكون كلشي تحت نظر الوكيل ليتبعتو المحكمة يعني ماتخافيش من رشوة او تلاعب كلشي قانوني ولتم ثاني راح تثبتي بلي دم صمد مع بهيجة فيها نسبة كبيرة متوافقة يعني على كل الحالتين رابحتيهم _ايه حمدلله ليخاف ربي نجى اما هوما ربي وكيلهم _ان شاءالله هيا جعت من ريحة واش طيبتي _كفتة سخفت عليها _ممم بصحتنا  _قعدنا ناكلو وصمد تاني نعشي فيه فالخضرة كيشبع ناض خرج صمد قدام البالكون باسكو الصيف كاين غير لهواء سخون كيحكمنا بلاصتنا سقسيتو _نتا علاه هادي المحامية جامي عيطتلي وتعيط غير ليك _لاه غيرتي _جابوني برك ياك عندها ثلقوني _انا نفهم فالقانون نتي كون تهدرلك وتعمق كتر ماش راح تفهميها عليها كلشي تخبرني بيه ليا وزعما انا نوصلهالك  _ماقنعتنيش تبان طايحة فيك _هههههه ضحك حتا شبع .هوووب ياحبي واش من طيحة لمرا راهي كبيرة على الاقل خيريلي وحدة صغيرة ماش مترهلة _علاه تعايب فيها هكدا يعني لمرا كيتكبر ترجع شارفة وفيها كل العيوب على كل حال ماش هادا موضوعنا انا شغتها مرة عيطتلك مع لفجر ونتا نكرت علاه خبيت _اول حاجة مانزيديش تتلاحي لثلفوني أول وآخر تخدير ليك وثانيا باه ماتتوسوسيش برك ماصارحتكش وماكانش نهارها وثالثا لحد اليوم مافهمتش علاه عيطتلي هاداك الوقت _يعني حاط اللوم كلو عليها _ايه انا ماعندي حتا دخل هيا انا خاطيني وزيد ماش عارفة بلي متزوح _ممم مالا انا تاني مانلومهاش نلومك نتا كاش ماتبسمتلها وهيا فهمتها عشقة _هههه ارواحي عندي ترقدي وبركاي من تفاهات هادو ريحي روحك برك وردي بالك على ولادي واكيد انا قبلهم __وصل نهار التحليل ورحنا وكان كلشي كيف العادة نروح لهاديك الدار الحاجة تتهلى فيا ومن تم المحامية جات هزتني لاكلينيك لقينا الوكيل وزوج معاه ستنينا ستنينا بصح بلا فايدة ماجاتش هنا المحامية زادت طمنتني وحتا باركتلي بلي صايي ربحت قضية إثباث النسب .تحتمت بقينا يومين لتم حتا نهار الجلسة بحضور صمد ليطلبوه باه يشوفوه انو عايش وكنت رابحتهم وهوما المحامي تاعهم بقا غير يجبد في قضية الزنى وشهود ليشهدو ضدي انو طفل ماش ولد سامي وماعندوش حق يورث فالمرحوم .لتم القاضي أجل القضية بعد سمانة حتا يزيدو هوما يحققو كتر فالموضوع بصح ماش حاجة تخوف لأنو كلشي يثبث صلاحية كلامي .
الحلقة96
بقلم لينا صبرينة           Lina sabrinaa
كييخرجتنا جات ليا بهيجة تعرشلي والدخان خارج من وذنيها بقيت نضحك عليها بإستهزاء وماخليت ماهدرت عليها ونعاير فيها ونضال غير يسكت فيها ماتحشمش نورمالمو كيشافت حفيدها قلبها يحن بصح هيا طماعة حاجة ماتسكتها ولا تحبسها كيرجعنا لدار وحكيت مع أصيل عليها قالي ممكن كلشي من نضال هو ليتحكم فيها ممكن قلبها يحكي حاجة سيرتو كيشافت صمد وعقلها نضال يتحكم فيه _بصح شياطن كامل حاشا البعض _شاف ليا وضحك وسكت حنا هكداك والمحامية عيطت بلاكام _ اهييه متطورين وتهدرو بلاكام ثاني _والله هيا ماش انا راكي تشوفي بعينك راني مظلوم _نتا ياولوكان ظالم تقول مظلوم وباه نصدقك دير لينقولك عليه راهي كوبات عاودلها نشوف واش حابة تقولك وكيتكمل قولها عرسي قريب وراكي معروضة نشوف ردة فعلها _نتي واعرة نتي المهم ابقاي بعيدة باه ماتبانيش وردي بالك تغلطي وتسمع النفس تاعك _عاودلها هزت وهيا هازة شعرها على جنب تميل في راسها ومتبسمة وسقسات على حوالو وبقات تشرحلو وتفهم فيه واش راح يديرو حسيتو هو ملامحو تبدلو شغل حاجة قلقتو من واش كانت تهدر ومركز معاها وهيا تتلاعب في حراكتها حسيتهم اغراء ماهيش طبيعية .كيكملت بقات تسقسي فيه وتدخص في كلامها وليت قرصتو من رجلو باه يفهم روحو .مشا معاها فالهدرة ومبعد خبرها بعرسو شفتها ديراكت رجعت تتعقن في كلامها وقاتلو ماكنتش عارفك خاطب .المخلوقة لقيتها عدلت قعدتها ورجعت تهدر بالرسمي وكلمة خويا في فمها عكس قبل وكوبات_شغت بلي كيقلتها قريب تتزوح كيفاه تبدلت .لقيتو ماهوش معايا شغل غايب في تفكريو كيقسيتو قالي يلزمني نلقا دار ونرحلك من هنا  _علاه _صمد ولدتيه في هادي الولاية وراح يجو يسقسو ويحققو يعني كلشي قانوني بصح هادو المعلومات يفيدو نضال كييوصلوه يزيد يشك بلي متزوجك _وخلي يشك على روحو ماكانش دليل _قادر هاداك يدير عسة نورمال في هادي الدار باسكو كاين شياتين يقدر يجي يسقسي وصاحبي هاداك يعرف داري يقدر يهدرو ويخربها عليا  _وكيفاه درك _يلزم نرحلو وهادي الدار تبقى هكدا .راني قادر نخليك هنا عادي واحد ماشافك بصح ترجعي محبوسة من دار ماتخرجيش عليها يلزم نشوف دار خلاف _القصة كاملة في صفحة قصص لينا صبرينة .لغدوا مع الظهر عيطلي قالي درك يجوك رقية ومعاها وحدة يهزو قشنا و يعاونوك فيه نتي عسيهم برك ماديري والو ماكالاه تعبي روحك .كيجاو دخلو وبداو بقش صمد ساع الاول وراحو للشمبرة كنت ديجا هزيت حوايجي الخصوصية عيب يشوفوهم المهم عاونوني اصلا وصاني نهزو غير حوايجنا واش نلبسو برك باسكو دار لجديدة مفروشة من كلشي .كيكملو كلشي كنت ديجا درتلهم بسبوسة يتقهواو بيها .عجبتهم ورقية بقات وهاديك ليمعاها راحت _وجدان ختي سامحيني _علاه نسامحك خير .تبسمت ونضت هزيت لفناجن لافابو لقيتها نطقت_هاداك نهار ليجيتك وجبتلك معايا دواء ياك رجعت للدار بصح ديراكت لقيت أصيل ورايا هز هاداك صحن وكسرو وقالي درك تخبريني واش قاتلك وجدان لبارح وانا خفت وخبرتو _وسعت عينييا ودورت ليها .هادا نتي ليزدتي أكدتيلو وانا نقول هادا راجل داهية يعرف كلشي _سامحيني والله خفتو _(تفكرت الكاميرات بدلتلها الهدرة)صايي درك تفرت كانت غلطة مني وفاتت ودرك راني بالحمل منو وراح نجييبلو طفل وراني فرحانة بيه وغلطتي جامي نعاودها _يعني رجعتي تحبيه _وعلاه أصيل مايتحبش صح يكون حنين معايا وواقف نعايا ومساندني هاديك الدنيا ومافيها _ربي يدوم عشرتكم _دورت نغسل لفناجن ونعصر في روحي من داخل .هاديك ليلة ماجاش خدم حتا لغدوا جاء مع لعشية لقاني واجدة لابسة ركبت ورحنا لدار لجديدة حبس قادام بلوك وبجنبو ليبلوك بزاف كل وحدة لاصقة في ختها وتحتهم حوانت وتولهت بلي شارع عام فيه الحركة ولحوانت بزااف ومتنوعين _ هبطنا دخلنا لدار حسيتها مشروحة فيها ضوء تاع ربي وتدخلها الشمس وزيد مفرشة ونضيفة وريحة صانيبو تعيط باينة نضفوها ليوم كانت فيها دوش مقابل الباب وكوزينة بتاقة كبيرة وبجنبو كاين صالون وبالكون تاعو مغطي وشمبرة وبيت مغلوقة _علاه مغلوقة??! .
الحلقة 97
بقلم لينا صبرينة
قدم فتحها جايا فيه خردوات وحيوطها مقشرين _خسارة كون جات معدولة كون استغليناها _عادي حبي الويكاند نتهلى فيها ونرجعهالك بيت نضيفة برك من زربة قلتلهم خلوها .درك خلينا منها حطي صمد فالكرسي تاعو وارواحي نوريك حاجة.حطييت صمد ومشيت معاه .شفتي هادي  الباب ليدخلتي منها هادي هيا الباب تاعك تدخلي وتخرجي منها عادي اما انا نعود ندخلك من الباب لي فلبالكون تاع صالون _رحت معاه وراهالي جاي بالكون مغطي فيه تاقة برك وفيه باب على جنب كيتفتحو نلقاو دروج مغطيين يهبطو لقاراج فيه باب كيدخلتو لقيتو دايرينو استوديو وتقدر تخرج منو لواجهة خلاف _انا نرجع ندخل من ونخرج من واحد ماشافني ولا واحد ماراح يشك فيا  بلي دار ليلفوق هيا نفستها تهبط لتحت باسكو هنا الاغلبية دايرينهم ليجاردة بصح هادا سيد استغلها في استوديو_تنهدت وقعدت على كرسي لتم .أصيل لوقتاه تبقى هكدا خايف من خيالك _مااانيش خايف وردي بالك تزيدي تعاوديها ليفي راسي واحد ماراح يفهمو قتلك اصبري معايا حتا نهار يفرج ربي ولا ديجا كرهتي _بعقلك علاه تعيط هكدا _قلقتيني انا راني مريسكي بعمري على جالك ونتي مستهزأة بيا اطلعي لدار واستنايني حتا نجي _طلعت وغلقت الباب هاديك وماكنتش عارفة بلي هادي الباب ليجايبتلي لبلا والمشاكل .رحت شفت شمبرة شابة حيوطها بويض وسرير الكادر تاعو ذهبي وكبير وفيه ضواو فالحاشية يشعلو ولقدام تاع سرير فيه مقعد فتحتو لقيتو فارغ مليح نحط فيه صوالح ونقدر نقعد فيه وقدامو مايدة تاع زجاج فالذهبي بعد _القصة كاملة تلقاوها في صفحة قصص لينا صبرينة. موراها بساعة جاب قشنا كلو وسرير صمد والماشينة تاع لخياطة وكلشي وجدتهولي جابو وعاوني رجعنا شوي قش لبلاصتو والباقي قتلو بعقلو وفالاخير تعشينا وصليت وطحنا رقدنا سيرتو هو رقد قبلي من التعب وانا عجبتني اني نرقد ليوم آلغز بلا مايحشر روحو فيا __لغدوا بقيت نرجع فالقش في بلاصتو وجاني تخمام زعمة حتا هادي الدار فيها كاميرات دايرهم .اواه مانضنش وينو الوقت ليحط فيه وزيد رجع يوثق فيا مانضنش يزيد يعسني .القصة كاملة تلقاوها في صفحة قصص لينا صبرينة _فاتو ليام ووصل وقت الجلسة بصح للأسف واحد ماحضر فيهم وهنا سقطت القضية وأثبتث انو صمد ولد سامي برك قضية الزنى ليرجعت المحكمة تشارع فيا عليها والشهود ليضدي ليزادو فالهدرة والمحامي تاعهم قال بلي حتا الجيران وشافوها .وهاد شيى جاء ضدي والمحكمة طلبت حتا طبيبة ليكانت تجيني لدار بصح اكيد درك نضال يشريها ويبدلها هدرتلها مانيش متأملة منها _أجلو الجلسة حتا المرة كيجو شهود ولحد الآن مازالتي القضية تاع كيطيحتها ماوصلناش لتفاصيلها كيرجعت لدار هو ماجاش حتا لغدوا من داك وحنا نتعشاو سقسيتو _أصيل قادرين يجبدو اسمك واش ديير _ماتخافيش عادي يعرفوني كنت صاحب سامي نقول جيت عاونتك برك ماعندهم حتا دليل ضدي ماتحيريش __لغدوا لميت شوي قش ورحنا لداهم يماه بعد محاولات باه أصيل قبل نروحو عندهم نعيدو لتم اليعد لكبير .الحق من رحنا فرحو بينا وعطاولنا قيمة ومكبرين ببينا وخواتاتو شفتهم بعيني كيفاه حابين يتقربو لأصيل وينحو الحاجز ليدايرو وصمد استقبلوه بالاحضان كل مرة عند وحدة هازاتو سيرتو بناتهم والعيد فات ولا اروع من حاجة وهو ماحبش ييزيد يبقى كتر من ليلة بقيت نحاول فيه باه نزيدو نقعدو باسكو عجبني الجو العائلي ليفقدتو هادي مدة بسيف قبل زيدنا بيتنا لغدوا مع صباح دخللت عند خالتي للشمبرة عاونتها درتلها بومادة لرجلها ونحكو دخلو عاطف وخوه بقاو يسقسو عليها واحد خرج وعاطف بقى كانو هو ويماه يحكو على الصدقة ليمن يمدوها .جيت خارجة تولهت بلي ماعندهاش الماء باه تكمل تشرب الماء قلتلها درك نجيبلك .خرجت لحقني عاطف .مرت خويا بزاف عليك تهبطي وتطلعي درك انا نجيبلها ريحي روحك _تبسمت يعطييك الصحة ربي يخليك .حنا هكداك وأصيل كان فدروج طالع وعاطف راح عندو وهززو من كتفو بيدو وهبط وهو طلع عندي _واش كنتي ديري ووين كتتي _مع يماك درتلها بومادة وكنت راح نجيبلها الماء ولا عاطف راح _ممم اوك _انا نغسل يديا ونجي .
الحلقة98
بقلم لينا صبرينة 
هزز براسو ودخل عندها وانا رحت لدوش غسلت كيرجعت لقيت خوه لكبير داخل بساشي في يدو وانا دخلت وراه من غير شافني اصيل وراه حسيتو ماعحبوش الحال بصح ماهدرش وزاد جاء عاطف وانا نظرات إصيل فهمتها وليت خرجت رحت لشمبرة شوي ولحقني دخل وغلق الباب بالقوة شاف معايا وراح تكسل على سرير ويديه ورا راسو وبقى يتخنزر _وشبيك تشوف هكدا _تبسم .عجبوك _ااه واش تقصد _قلت ممكت عجبتك سمورية تاعهم ولا ريحتهم باسكو سمعت قلتي ربي يخليك وشفتك ونتي ماشية وراه _بركانا من هادا توسويس ياك كللشي قدامك _اهاااه  ديريه مورايا خير .بصح صارحيني تعحبك سمورية خير من لبيوضة تاعي هوما بالاك تحسيهم صح رجال ومشعرين بزااف ماش كما أنا وبالاك تواحشتي سامي وخاوتي كيتشوفيهم تتفكريه وتشلي عينيك بيهم _(كان يهدر بكل استفزاز )..غمزلي .هاه جاوبي علاه ساكتة _انا عندي أصيل وراه معمرلي عيني بما فيه الكفاية مانيش راح نرجع للماضي وعينيا ماش راح يشوحو لحد بخلافك نروح نشوف صمد ومجي _خرجت من عندو وخليتو يضحك وانا من داخل راني نغلي كيفاه جاء لعندي بكل برود وبقى يهدر هكدا وبهادي الطريقة الاستفزازية بصح أحسن حل درتو اني لحتلو زوج كلمات وتجاهلتو عارفة كون زدت فالهدرة راح يتلاح عليا وينسى روحو__فليل هزينا رواحنا ورجعنا لدار رقدت صمد ورحت دوشت وحكمت بلاصتي كيف العادة قربني ليه وبقى غير يتغزل عرفت نيتو وكيعصرني ببين يديه نفهم بلي جاتو حالتو .......كيكمل حسيتو فوررصاني شوي باضغط عليا كيشغل راه ينتقم ويعاقب فيا من واش صرا صباح بهادي طريقة وزيد بالسكوت تاعو باسكو من صرات هاديك لحكاية وهو يهدر معايا غير ليمحتم برك كيقربت ليه تغزل بيا وأصيل صح يتجاهلني ويسكت يقلت ني باسكو نظراتو برك ترجع تهدر وحدها وتخوف _فاتو سمانتين وهو جابد روحو عليا غير فليل يعصرني بين يديه بصح مايحبش يحكي معايا ولا يناقشني ورجع يطول فالخدمة بزاف ومرات يبات بسيف رجعت علاقتنا عادي ورجع لطبيعتو معايا يهدر ويضحك ويخرجنا نحوسو وزاد داني لطبيبة نسويفي قاتلي كلشي مليح وهو يسقسي ويعاود باه يطمن. وفالويكاند على صباح ناض هز هادوك الصوالح لي فلبيت هبطهم كلهم لتحت حطهم فرغ البيت ونيطواياها وانا عاونتو شوي _حبي نحي من يدك جيبي كرسي وقاببليني برك ماديري والو _نورمال أصيل اصلا انا وحمي مايضرنيش شغل مانيش بالحمل كيف هادا الحمل كيف لول _ايه راني نشوف فيك انا كيشارشيت لقيت بلي ليتوحمو يتقياو ويتشهاو بصح نتي والو _حمدلله هكدا خير _جاب دهان وخلطو ورولي ليا ورولي ليه انا غير نخلط بصح هو يعرف متعدد الخدمات بقا يعلم فيا ويطليلي في وجهي ماخلا فيا والو وغير ننطق اسمو يقولي ماتنطقهيش ماش وقتو لا نرجعك كامل مطلية بصبيغة. دار الكوش لول صباح وعاود الكوش ثاني لعيشة بلون رمادي جات لبيت تهبل بهادي لاكولار وزيد تبرق باسكو صبيغة زيتية كيكمل هبط كلشي لتحت  وغدوا من داك كيرجع فرشها معايا نقصت من صالون كان شارجي بالكانابيات ولفوتاي كبير وزدت حطيت فالبيت ماشينة تاع لخياطة وقدامها طابلة وليفرحني بعد يوميين جابلي مانكة نعود نخدم بيها يعني راه موفرلي كلشي نحتاجو وعاجبني برك الخدمة ماحبش نخدم برا _القصة كاملة في صفحة قصص لينا صبرينة .في ليلة دخل ديراكت لشمبرة غلق على روحو وطول ونسمع فيه غير يهدر .طبطبت عليه فتحلي سقسيتو واش كاين قالي في راسي معمر حاب نركز مشغول .كيلحت عيني لقيتو كان قاعد على المقعد تاع سرير وطابلة فيها البيسي تاعو ورجال يبان كان يهدر معاهم بلاكام _برااا واش راكي تشوفي _خلعني خرجت وغلق الباب ستنيت حتا كمل وحطيتلو لعشا تعشى بساكت وناض تكيف ورجع ليا يحضن بعدتو عليا _واش هادا تصرف وجدان ؟؟ _نتا ماشفتش تصرف تاعك تاع قبيل كلما تنفحلك تحاوزني وتعيط في وجهي شغل انا غريبة على الدار حتا تغلق فالباب باه مانسمعك مانشوفك واش دير.
الحلقة 99
بقلم لينا صبرينة
كنت نهدر مع صحابي برك وحبيت ناخد راحتي عارف كون نفتح الباب صمد ينحيلي التركيز بعياطو _طفل قد الكمشة ماتحملش صوتو _وجداان ماتخلطيش صمد ولدي وعزيز عليا قتلك برك باه نبقى مركز شوفي ليا انا مانحبش نشرح بزاف ولا نبرر_ايه نتا راجل ونتا لي من حقك دير كلشي بدون قيود وماتحبش ليحاسبك _ ياك فتحتلك وشفتي بلي رجال ليكنت نهدر معاهم ماتكبريهاش وزيد شرحتلك باسكو شفتك غاضك الحال برك راني قتلك انا كيندير حاجة غالطة نجي نقولهالك فالوجه _ماتزيدش تعاملني بهادي الطريقة نحس روحي حاقرني ووحيدة _ياسيدي خلاص ارواحي لحضني ودرك نسيك في حليب يماك ....__فاتو ليام وفاتو شهور وأصيل مرة يقلق مرة راكح مرة مغشش مرة فرحان كل مرة كيفاه بصح سعادتو بولدو ليراه يكبر في كرشي فرحة كبيرة وانا كنت عايشة معاه عادي حياة هادية بصدق وبنية قلب ماكانش خبث ماكانش كذب ماكنش مخططات والو نمشي قدقد كما مسيرها ربي سبحانو ولتيت روحي بالتصميم ولخياطة نتقنن وبالنسبة للشرع كل مرة يأجلو وآخر مرة شهدت معايا طببيبة نفسانية وكانت بصفي ماكنتش متوقعة تشهد بلي صح كنت نشرب فدواء مي حمدلله مرا تخاف ربي بصح الجيران طبعا شهدو ضدي وكاين ليزاد من عندو اني كنت ندخل راجل لداري فليل وانا فالعدة وكانو يسمعو غناء في داري وكنت دايرة دعارة واتهامات بشعة ربي وكيلهم مايخافوش ربي حتا اتهموني اني استغليت سامي ومرضو غير باه نديلو الورث بقاو كل مرة يجبدو اتهامات ودلائل مزيفة بالهدرة ضدي وهادا الشيئ عقد كلشي وعارفين راح نربحهم عاجلا أم آجلا بصح غير يزيدو فاالمدة ويطولو فيها باه نكره ونستسلم عارفة نيتهم حابين نحطلهم كلشي بإسمهم باه يسحبو كل الشكاوي والاتهامات بصح ماعليش باقية وواجدة نكمل للآخر ولو هاد شروعات ماش راح يخلاصو منا على سنين .آخر جلسة كنت فيها كان عندي حمل قريب ندخل لسابع وكرشي ماش خارجة بزااف وكنت نلبس غير لعريض ولون لكحل ووحتا صدري نلبس دوبل بونج باه تكبر وتخبيلي كرشي .كنت قاعدة فالكولوار تاع المحكمة وبهيجة كانت بعيدة عليا شوي ونسرين غير دور بهاداك طالو ولابسة ليكات بيضاء مع سروال حمر والغوج في فمها وتتعوق قدامي كيكانت متزوحة بأصيل كانت لباس تاعها محترم ودرك رجعت مطلوقة راحلها الشبح وتشوف ليا شغل حسيتها تتمكر فيا ولا مانعرف واش .قدمت ليا وقعدت. سمعت بيك أصيل راه يعاون فيك _واش حشرك نتي _شوفي ماتستنايش منو يبطل خدمتو ويتزوجك ولا تحاوبي تقربيه منك هو مايحبش لوسخ ليكما نتي _بسماح خليتو لوحد المذلولة تهين في كرامتها على جال راجل _ادا كنت لأصيل عادي متقبلتها وزيد أصيل حافظاتو خدمتو يفنى عليها ماش راح يلعب بروحو على جالك بصح انا يجي يوم وتلقاي يدي رجعت على يدو واسمي مربوط بإسمو _ايه بصحتك وانا واش راحلي فيكم _ليام لجاية ونشوفو كيفاه نخليه يزيد يفرط فيك ويخليك ضايعة وحدك تحاربي فينا باي بيبي _ياخي حالة كيغاه راهي دير تبهدل تعيف بهادو التصرفات وتبهدل .قدمت ليا المحامية _وشبيها المجرابة هادي واش كانت تقولك _راكي قلتيها مجرابة وتافهة تموت على الذل _ضحكت وشوي وعيطولها راحت ونضال استغل الفرصة و جاء قعد قدامي جيت نوض ماخلانيش حكمني بالقوة _علاه راكي ماش حابة تسمعي الهدرة تشفاي نهار قتلك قابل نبرئك قدام فاميلتك ووعدتيني بزواج وخديتي نيميرو تاعي علاه لتم خدعتيني _واش من خدعة بالعكس ماقدرش نصدق كلامك _وصدقتي كلام أصيل ووثثقتي فيه يااك ؟ _أصيل من غيير دار معايا خير لي نتا نورمالمو توقف معايا بصح نتا خرجتها ضدي _لقيت نسرين جات قعدت بحدايا ورجل على رجل وتخلط في تلفونها .نوضي من قدامي _شنفت عليا وعطاتني بظهرها وجدان دوري ليا وسمعيني انا من غير كيمازدتيش بنتي ولا عيطتيلي حقدت عليك بصح مازلت عند كلامي حاب نوقف معاك وحاب نخلي امي تتنازل على شكاوي بصح نتي ترجعي لدار قبل ومن وراها يصرا كلشي كما تحبيه _والله حسباتلك مسيبة روحي ليك ونصدقك روح اجياح على وحدة خلاف ماش عليا _وجداان راكي تندمي _ماعندو مادخلك فيا وادا صح نيتك صافية كون ماستنيتش حتا نعيطلك كون رحت دييراكت لبلادي وبرأتني كونك فحل وراجل وروح ديرها علاه تستنا فالمقابل مني برهنلي نيتك بأفعالك ليتكون لصالحي ماش ضدي .
الحلقة 100
بقلم لينا صبرينة         Lina sabrina
سكت وناض وقف مقابلني مربع ييديه ويتخنزر .شفت مع نسرين مازالت عاطيتني بظهرها وليت هزيت صاكي ونضت قعدت بعيد حتا رجعت المحامية ستينا شوي ودخلنا انا تقريبا ماهدرتش بصح المحامية خدمت خدمتها وكيلعادة يأجلو على أمور تافهة __كيرجعنا لدار راح قعد فالكوزينة على الكرسي و يحكي مع المحامية فثلفون ومركز حتا كمل وكوبا لقيتو ديراكت خبط الكرسي ليقدامو برجلو وخبط طابلة بيدو كيسقسيتو واش ليبيه قالي مظغوط تعبت راح نرقد وهاتي ساع ثلفونك .مديتهولو وراح لشمبرة عارفة باه يزيد يفيريفي لانو ثقتو فيا مازالت محدودة ولو مفتحلي كلشي ومخلي كلشي قدامي بصح كاين امور مازال يعسني فيهم هادا ادا ماكانش كاميرات فدار هادي _لغدوا ناض مليح يحكي وزاهي وداني شفت جنس البيبي لقيناه طفل مات فرحة وخرجنا حوسنا وبقينا طول نهار ندورو هو فرحان وانا ابتسامتي كانت مصطنعة ومانكدبش عليكم صح كنت ماشية مع أصيل بالنية وعادي مي تمنيت هادا الحمل مايكملش لانو راح يعدبني من كلام ونظرات الناس ويحطو عليه نظرة أنو وليد حرام ومجهول الأب بصح قدر الله ماشاء فعل كاتبة ليه يجي لهادي الدنيا ولا اعتراض على حكم الله _طاح ليل وحنا برا بصح غير داخل طونوبيل  بقينا ندورو باسكو شتاء والبرد .رجع مرة على مرة يخرجنا ينحيلنا ضيقة الخاطر تاع دار سيرتو كيعاد صمد يمشي خطوات __كيدخلت لشهري ثامن هاديك ليلة أصيل خدام مايجيش وانا ساهرة نرسم صونا ثلفون لقيتو نيميرو جديد فالأول ماحبيتش نهز وكيعاودو بزاف هزيت وماحبيتش نهدر سمعت صوت مرا باه هدرت .شكون نتي _لهادي  درجة ماتعرفيش صوت سلفتك لقديمة _ديراكت عرفتها نسرين ؟_ايه شاطرة _منين جبتي نيميرو تاعي _ماش مهم . ليهم انو عيطتلك برك باه نأكدلك كلامي دوماج ماعنديش فيسبوك تاعك صينو كون صورتلك اللقطات الحميمية _واش  تخلطي نتي ؟_ درك نخلي ثلقون فوق لاقوافاز وماش راح نكوبي وسمعي بوذنك حبيبتي بصح باه تفهمي نصيحة مني ليك تسكتي _نضت من بلاصتي واش تقصدي ماتهبلينيش _مازادتش هدرت وبقيت نسمع غير حس مافهمتوش ومبعد سمعت صوت راجل وهيا قاتلو بصحتك تدويشة حبيبي كيقرب الصوت ليا عرفتو أصيل .فشلت ديراكت قعدت وبقيت نسمع وهو يتغزل بيها متأكدة هو صوتو كان يقولها في كلام محتشم وآخر حاجة قالهالها روحي لدوش لبسي واش جببتلك وأرواحي لعندي ليلة ليلتنا .من تم سمعت حس وباب كيتغلقت ومبعد هدرت معايا هيا _سمعتي نورمالمو وتأكدي بلي أصيل حبيبي ليوم راه معايا ونتي ادا متأملة باه يكون ليك كاش نهار فأحلمي _كوبات عليا وانا ديراكت عيطت لأصيل وأعصابي تالفة لقيتو هز عليا فيساع _أصيل وينك _راني خدام وماش قاعد ادا ماكانش حاجة ايرجو ومبعد ونهدرو _ماكان حتا حس معاك كيف موالف علاه _وحدان كوبي عليا مانيش قاعدلك _ صح كوبا عليا عيطتلو مغلوق هكدا يا أصيل راك تتلاعب بيا وتخون وينهو هادا حبك ليتضل تهدر عليه ظهرت كداب زدت عيطت لنسرين مغلوق _ليلة هاديك ماقدرتش نرقدها وانا مع تخمام قلقانة وعلى أعصابي راح نجهل من تخمام والتساؤلات .القصة كامل فيي صفحة قصص لينا صبرينة _على صباح لقيتو دخل في يدو البيسي لقا حالتي حالة من وجهي نبان آنورمال بصح دمعة ماطيحتها بصح شرارة الغش في عينيا خارجة_واش كاين ؟_وين كنت؟ _شحال من مرة نعاودهالك بلي كنت فالخدمة وشبيكي ليوم ؟ _راح لشمبرة لحقتو .راك تكدب عليا عيني عينك أصيل كنت بايت مع نسرين ودرك جاي عندي بصحانية وجه شغل ماداير والو ومن فوقها تكدب _دور ليا وكل علامات الاستغراب في وجهو _واش تهدري نتي _نعرف كلشييي اصيل ماتنكرش _شكون ليقالك وكييفاه تعرفي _شفت ونتا تتغزل بيها وتقولها رووحي البسي واش جبتلك انا كنت نسمع في كلش من ثلفونها ضهرت واحد كلب صح وحيواان خاين _وجداااان راكي بروح في كرشك سكري فمك من لخماج _كنت تقول عليا خاينة وظهرت نتا الخاين الأكبر رحت زنيت وشبعت شهواتك وجاي ليا بكل وقاحة بصح انا الغالطة ليوثقت فيك وصدقت حبك ليماكانش منو على الأساس درتني لعبة في حياتك برك وكلشي فيك خرطي مسواك رجع في نظري منحط .
الحلقة 101
بقلم لينا صبرينة             Lina sabrina
قدم ليا حكمني من رقبتي بيدو وحشرني فالحيط _اسكتي بركاي ماتهدري برك وادا تحوسي على الصح درك نصارحك ايه ليلة لبارح كنت مع نسرين في نفس الدار وفي نفس لفراش وحتا كما درت معاك درت معاها يعني نتي ضحية الاولى وهيا الضحية الثانية وادا ماكيش فاهمة وماكيش مستعوبة ساهلة درك فيساع تفهمي _طلقني طحت فالأرض وليت نسعل قريب جيفني بيدو .هزني من الأرض وقعدني على المقعد وقابل ليا البيسي فتحو قدامي وبقا يدخل فالملفات تاعو ومبعد حبس_ هادا الفيديو اتفرجيه كيتفهميه أرواحي ساع واجهيني _هز روحو وخرج من شمبرة ويدي بقات ترجف زعما واش راح نشوف في هادا الفيديو بقيت مترردة لمدة دقيقتين هكداك ودرت كوراج وفتحتو قلبي هرب من بلاصتو تصدمت تفاجأت ودمي رجع يغلي ويفور ماش غيرة وإنما حسيتها غدرة وخيانة وتلاعب بيا ولخماج ليقدام عينيا ماقدرتش نزيد نتفرجو كتر وخرجت عندو لقيتو فالبالكون قاعد حاط رجل على رجل ويتكيف _عجبناك ؟؟!_ قالها وهو يضحك ومستهزأ بيا وفرحان بعملتو . نتا واش من صنف من البشر نحطك ؟؟_قولياي ساع كملتي الفيديو تفرجتيه كامل _حاشاك ادا انا نقدر نتفرج خماج كما هاداك .كيفاه راك حامل روحك ونتا عاصي ربي _ ردي بالك توصفي شيى لسمعتيه وشفتيه خيانة باسكو نورمالمو خبرتك هاداك نهار ادا تشفاي قتلك رايح نتزوج يعني علمتك من قبل بصح نتي مادرتيهاش صح بلي نقدر نديرها وليوم مادام ست الحسن قدرت توصل ليك انا ثاني زدت كملتها وسهلتها المهم صارحتك من قبل وماش من حقك تحاسبيني ولا واش قلتي في كلامي نستنى في ردة فعلك باه نعرف كيفاه نزيد نجاوبك _بصح كيرجعت ماجبدتش حكاية زواح وصح كنت نسمعت تهدر مي مادرتيكش تزوجت _هههه هادي هيا نتي دايما تستهزاي بيا حتا تغريها بعمرك بصح زدتي أكدتيلي من دخلة تاعي ليوم ومن تصرقاتك وكلامك انو مازلتي بعيييدة باه ديري فيا الثقة وحتا حبي ليك ماكيش دايرتلو قيمة _حابني نقيمو بالشيى ليشفتو وسمعتو واش من حب ليتهدر عليه ليحب مايخليش لمرا ليساكنة قلبو ويروح يحضن غيرها ويخدعها _طلعلي حواحبو وناض رما القارو فالأرض وعفصو برجلو وقرب ليا حكمني من يدي وداني للشمبرة قعدني _كملي الفيديو _في عقلك نتفرج في خماجكم بعدني _ايه تتفرجي ويديك فوق راسك باه تفهمي بلي انا يسموني أصيل وكل وحدة فيكم خليتلها ليلة ماتنسوهاش عمركم كلو _حكملي شعري بالقوة وفتح البيسي وشعل الفيديو وخلاني نتفرجو بسيف وليشفتو زاد صدمني وتفكير أصيل كان يخوف ولعب بالنار غير باه يطفيها بصح الصبر ليه حد وتصرفاتو ليها ردة فعل جنونية مني وقلبت منها الادوار وحطيت انا يدي على النار بدون خوف .