اسطورة حب

بداية الاسطوره‍

ابتدأت اسطورتنا بشلة البنات وبذكر البنات فكان اجتماعهم في بيت شوق
شوق:بنات عندي لكم فكره خطيره
البنات:وش هي؟؟
شوق:ايش رأيكم نروح ندرس برا دام احنا خلصنا ثانوي وبندخل جامعه والسفره بتكون على حسابي
ميعاد بدفاشه:اييه ونااسه خلونا نروح نغير جو
شوق:لمار ووجد ايش رأيكم؟
وجد:انا ابوي اتوقع ماراح يوافق لانه لحالي وكذا
ميعاد :ماعليك ماعليك احنا بندبرها لك بس انتي قولي له اول شي
شوق:وانتي يا لمار
لمار بهدوء:انا ما اقدر اخلي امي واختي لحالهم
ميعاد بهدوء:لا تخافين عليهم راح يكونون بخير
شوق:يلا لمو تكفين خلينا نروح
لمار:طيب بشوف ماما وارد لكم
وبكذا قفلوا على موضوع السفر وبدأو يتكلمون بمواضيع مختلفه
لين ما اتأخر الوقت ورجعت كل وحده لبيتها

عند وجد (وجد وحيدة ابوها ويتيمة امها ما لها غير ابوها في الحياه)
وجد بهدوء:بابا ممكن اجلس معك شوي
الاب:اكيد قولي وش عندك
وجد بهدوء وتوتر:بابا انا ابي ادرس برا
الاب:وش تقولين انتي
وجد بترجي:بابا تكفى كل صديقاتي بيدرسون برا الا انا بابا لا تخاف انا كبيره واقدر اعتمد على نفسي وبعدين شوق صديقتي هي اللي بتتكلف بكل شي المطلوب بس موافقتك
الاب بهدوء:طيب موافق بس انتبهي لنفسك وخليك عاقله
وجد بفرح وهي تبوس يده:تسلم يا احلى اب في العالم
وراحت تركض لغرفتها تكلم البنات

عند بيت لمار (لمار يتيمة الاب عكس وجد امها واختها لميس هم حياتها كلها )
لمار وهي تبوس راس امها:شخبارك يمه
الام:بخير دامك انتي واختك بخير يابنتي
لما بهدوء:ماما ابي استشيرك بشي
الام:قولي يابنتي
لمار:ماما صديقاتي كلهم بيدرسون برا الجامعه ويبوني اروح معهم بس انا ما ابي اخليكم
الام:والله وكبرتي يابنتي ،حبيبتي هذا مستقبلك لازم تبنينه بنفسك ولاتعلقي مستقبلك بنا انا واختك نقدر ندبر نفسنا اهم شي انتي ياحبيبتي ، روحي وما عليك مننا احنا بنكون بخير
لمار وهي تبوس يد امها:تسلمي لي يمه الله يخليك لي ولا يحرمني منك
الام:ولا يحرمني منكم يابنتي

عند ميعاد(ميعاد امها وابوها مو مهتمين بها ابدا يعني وجودها مثل عدمه عندهم محد مهتم بها غير اخوها الكبير)
ميعاد وهي تدخل غرفة امها وابوها وتقول ببرود:تراني بسافر مع صديقاتي ندرس برا وماراح ارجع الا لما اخلص وحبيت اعطيكم خبر
الاب : وهو يناظر باللاب توب:طيب طيب بس اطلعي الحين لاني مشغول
الام بدون اهتمام:سوي اللي تبينه
طلعت من عندهم والعبرة خانقتها وقابلت بوجهها اخوها
ميعاد بإبتسامة مصطنعه:هلا هلا شخبارك يا اخوي
سليم:يا هلا بالزين كله بخير دامك بخير، وش كنتي تسوين عند امي وابوي
ميعاد بحزن:اختك مسافره تدرس برا وما اهتموا فيني وقالوا سوي اللي تبينه
سليم بحزن على اخته:خلص لا تزعلين نفسك ويلا امشي عازمك على العشا برا (بإبتسامه عريضه)
ميعاد بفرح:دقيقه واجهز وراحت تلبس عشان تطلع مع اخوها

نبذه عن سليم(اخو ميعاد الكبير عمره 20 ثاني جامعه حنون وطيب ويحب اخته وما يهمه كلام احد ولو عصب مايعرف ابوه من امه )

عند شوق(شوق وحيدة امها وابوها ودايما مدلعينها وما يرفضون لها اي طلب)
شوق:مامي بابي انا بسافر مع صديقاتي نبي ندرس برا
الاب:وين يا بنتي؟
شوق: امم لسه ما حددنا بس اهم شي تكونون موافقين
الام والاب:اكيد كم شوق عندنا احنا
شوق وهي تبوس راسهم:الله يخليكم لي
وراحت تتصل بالبنات واتفقوا انهم يسافرون بريطانيا

وانتهى البارت الاول اتمنى يعجبكم