Poems: A Compilation

December 22, 2016

A/N: A spoken word. I'll soon upload the video of myself on YouTube. Kapal ng mukha ko po kasi to do it. Hahahaha.

PUNO NG ACACIA

Nagtungo ako pabalik sa ilalim ng punong acacia
Sa pag-aakalang ang bultong nasa ilalim noon ay ikaw pa
Ngunit habang papalapit ay saka ko napagtantong
Maling acacia pala ang pinupuntahan ko

Tumayo akong muli at nag-isip ng sandali
Nakiramdam at nagpatuloy sa paghahanap sa nawawalang lalaki
Napalingon sa kanan, kaliwa, likod, at harap
Ngunit kahit saan ako bumaling
Walang ikaw na nagpakita't ngumiti

Ika'y aking hinanap nang hinanap
Sa likod, kanan, kaliwa, o harap nitong acacia
Hanggang sa ako'y napagod at nagwala
Napagod sa paghintay sa pagdating ng isang taong matagal ko nang hinihintay
Napagod at nagwala nang nalamang ika'y nawawala at hindi na muling babalik pa

Pinanghawakan ko ang pangakong ibinigay mo
Na ikaw ay babalik at ako'y muling aarugain
Ika'y aalis ngunit babalik upang ako'y mahalin
Ngunit nagsisimula nang malagas ang mga dahon ng punong acacia pero ikaw
Ikaw ay wala pa rin

Tayo'y tahimik na magkayakap sa ilalim ng punong acacia
Sa ilalim ng libo-libong bitwin na patuloy na nagniningning
Nakangiti at damang dama ang nag-uumapaw na pag-ibig
Hanggang sa tumayo ako't sinabing "Ako'y magbabalik"

Ngunit sa aking paglalakad pabalik sa punong acacia
Aking napansin na ika'y nawawala na pala
Aking isip ay biglang napabalik
Sa mga panahong tayong dalawa'y tila nasa langit

Mga panahong tayo'y naghahabulan, nagtatawanan, at nagke-kwentuhan
Parang mga bata na tila walang patutunguhan
Ngunit mga hinaharap nati'y atin nang napagplanuhan
Isang napakandang memorya mula sa nakaraan
Noong tayo'y magkasama pa

Mga pangako mong aking pinanghahawakan
Ang sabi mo, "Kapag ako'y umalis, tandaan mong ako'y babalik"
"Kapag ika'y nalulungkot, tandaan mong mahal kita at ako'y babalik upang bigyan ka ng kaligayahan"
"Kapag ika'y nag-iisa, hayaan mo, at ako'y babalik upang ika'y damayan"

Ngunit bakit nang ako'y umalis at nagpaalam at nangako na babalik
Nawala ka't hindi man lang nagpaalam
Nawala ka't hinayaan akong mag-isa sa ilalim ng acacia
Nawala ka't hinayaan akong mag-isa na nanlalamig
Nawala ka't hinayaan akong nag-iisa sa dilim

Isa
Dalawa
Tatlo
At nagsimula na nga akong magbilang hanggang isang libo
Sa pag-aakalang pagkatapos kong mabilang at pagkatapos dumaan ng bagyo
Ay magpapakita ka at sasabihing, "Narito na ako, mahal ko"

Ako'y napaupo sa paanan ng punong acacia
Napalingon sa itaas at nakita ang nalalagas na mga dahon nito
Napakalayo sa malagong dahon nito magmula nang ika'y maglaho
Ngunit ano nga ba ang magagawa ko
Kung ang bawat binitiwan mong mga pangako
Ay unti-unting nawawala, naglalaho, napapako

Kaya't nakapagdesisyon na akong tumayo
Tumayo at nagsimulang hanapin ang nawawalang mahal ko
Ngunit sa paglingon ko sa kabilang acacia
Sa tabi ng punong acacia na ating minarkahan na
Ikaw
Ikaw ay nakita ko na

Nakita kita na masayang nakikipagtawanan, nakikipagkwentuhan kasama ang isang babaeng hindi ko kailanman nakilala
Nakita kita na masayang kumakanta kasama siya
Nakita kita na umiibig kasama ang iba

Ako'y napako sa kinatatayuan ko
At napa-isip, napapikit, at napangiti ng mapait
Dahil sa isang realisasyon na pumasok sa aking isip
Isang realisasyon na ni hindi man lang sumagi sa aking isip
Na sa tagal ng aking pag-iisa
Sa tagal ng aking pahihintay na ika'y bumalik
Heto ka at masayang nakikipagkwentuhan sa iba

Hindi ko alam kung ano ba ang dapat kong gawin
Kung dapat bang ako'y lumapit at tanungin ka sa kung anong nangyari
Kung dapat bang ika'y sampalin at hagilapin ang pagmamahal mo para sa 'kin
Kung dapat bang ika'y yakapin at magmakaawang ika'y bumalik na sa 'kin

Ngunit sa saktong panahon na nagtama ang tungki ng inyong mga ilong
Sa panahong sabay na nagsara ang inyong mga mata
Sa panahong nagdampi ang inyong mga labi
Ni isa sa mga ito'y wala akong nagawa
Kahit ang pagkaka-estatuwa ko'y nawala
Nagsimula na akong maglakad pabalik
Pabalik sa puno ng acacia kung saan tayo unang nagkakilala
Sa puno ng acacia kung saan ako natutong humalik
Sa puno ng acacia kung saan ka nangako na ika'y babalik

At sa paglingon ko sa inyong dalawa na nasa loob na ng sarili niyong mundo
Mga luha mula sa mga mata ko'y dirediretso nang tumulo
Kumawala upang mabawasan ang sakit sa puso ko
Kasabay ng pagbitaw ng mga salitang "Paalam, mahal ko"