شو هي الحياة ؟؟
ينظر أغلبنا ..
هي شي منيح .. بس هدول عبارة عن 2%
بس الـ 98% الي ضايلين ، بالنسبة الهم شي مجبرين عليه
شي زي خطأ ، ما إلنا دخل فيه
بس لازم نتعاقب عليه
كل واحد فينا بيفكر لحالو
انا شو عملت بحياتي
ضاع عمري ..
و حاسس بالعجز والخوف
والرهبة واليأس
لهون وبس
يمكن انت قوي وقدها
وقادر تحقق الي بدك ياه
بس خلص ..
ماعاد الك نفس تجامل حدآ
حتى نفسك
والحلم اللي قعدت وقت طويل تبني فيه ،،
كل فترة بتهدم منو جزء
قاعد تخربو
بتحس حالك ما بتستاهلو
كبير عليك
وكل ما تهدمو بيصغر
لحتى ما يختفي كلو
ويصير خيال
عادي ..
احنا هيك كلنا ، بنبلش بنفس القوة
بنفس الأمل
بنفس اللهفة
بنفس الإحساس
مو قصدي بكلماتي الفشل بالحب
لا بالمرة ..
الحب بدو سنين لنحكي عنو
ويا ريت نخلص ..
انا قصدي دمارنا بالحياة
وفشلنا فيها
وليش احنا كلنا بدون ما يكون حد ناقص منا
لما نكون محتاجين حد ..
بنلاقي حالنا لحالنا ..
غريب كثير !!
كلشي بيتحرك بالعكس
ولا اشي بصير زي ما بدنا
ومرة بعد مرة
موقف بعد موقف
بتصير تصغر صداقاتك ومعارفك
بتبعد عن الحياة بالنوم
لحتى ترتاح وتريح راسك
مع انو حتى راسك
بطل يوجعك
لانه تعودت على الخسارة والفشل
حتى اهلك ...
ما بيحكوا معك الا عشان يطلبوا اشي
يمكن لا ،،
بس انت هاد احساسك
او انت هيك بدك تحس ..
وهسا في كثير اشياء كنت تحكي انك مستحيل تعملها ،
وعملتها ..
البرود الي انت فيه بعد ما كنت دايماً محروق
اللامبالاة بعد ما كنت أنت المهتم
النوم الكثير بعد ما كنت تكره الليل الطويل
انت ما كنت هيك ..
بس انت هسا مبسوط
يمكن قدام الناس مبسوط
ومن جوا ..
انت نفسك ترجع زي ما كنت
نفسك تحس انك انسان
نفسك تحس بشعور حلو
نفسك تعيش ..
سؤال :
لسا عندك أمل وتفاؤل بعد اللي قرأتو ..؟!
الاكتئاب والفشل الي قرأتو خلاك مبسوط ؟
يمكن لأ
اكيد لأ
بس أنا متأكدة اني كتبت الواقع
بدون خوف أو تردد
بدون ما ازيد اشي أو انقص
سامحووني .. هاد الواقع
هاد الي بصير مع الكل
معي ومعك ومعها ومعه
معنا كلنا ..
حياة مؤلمة وظالمة وفاشلة ..
وبدك او ما بدك
انت مضطر تعيشها ❤
•°•°•
