Marami pa ring palaisipan ang gumagambala
gaya ng 'di pa pagsakop ng alien sa ating planeta,
siguro hindi pa matagpuan ang lunas sa gayuma
kaya wala pa silang balak manalasa.
Mahal na kasi ang bigas sa pinas
mga pinuno pa'y ungas,
gumagawa ng demuhong batas
na sila lang naman ang magwawakas.
Ang sahod kasi'y mababa pa
sa gumagalaw na kuto sa lupa,
wala pang gatas si kaka
kulang pa ang pang-matrikula.
'Di na rin kasi maunawaan ng panalangin
kung Diyos ba o sila ang sasambahin,
may mga pananaw hirap intindihin
mga teroristang kulang sa pakain.
Trapik pa sa Edsa 'pag umaga
wala pang kaning natira
oo kahit bahaw man lang ayos na
subalit wala nang naiwan sa pinapak ng ipis at daga.
Wala pa kasing trabaho si Tatay
tambay pa sa bahay si Nanay,
nagtapos nga subalit sumablay
nagtitiis sa paglako ng gulay.
Namintakasi na nga ako sa rebulto
ipinahid sa mukha ang punit na panyo
naniniwala sa milagro ng nuno
na baka gumaling ang paang may kalyo.
'Di na ako magising sa tilaok ng manok
bulsa ko'y pasinok-sinok,
'di pa makautang sa tindahang bulok
gaya ng sistemang hindi na madaklot.
Maagang natulog subalit puyat
umiinom ng kapeng kulang sa asukal,
'di masawatang paghihirap na umaatungal
gaya ng sikmurang nabubuhay sa punyal.
Marami pang suliranin ang hindi magapi
kung paanong mahirap kalaban ang sarili,
pabalik ang ikot ng daigdig
kung paanong 'di tapat ang pagibig.
Siguro nadismaya ang mga alien sa nalaman
bulok kasi ang pinagmamalaki nating kayamanan,
mainit pa ang ulo ng sangkatauhan
kaya bulilyaso ang pananakop sa mundong parang 'di tahanan.
BINABASA MO ANG
'Santasang Tula
PoetryAng koleksyon na ito ay para sa mga Filipinong manunulat na naghahanap ng lugar para sa kanilang mga akda. Para rin ito sa mga pinoy na patuloy na sumusuporta at tumatangkilik sa mayamang sining ng pagsulat sa Pilipinas sa pamamagitan ng pagbabasa n...
