Yapos-yapos ang katahimikan
Malungkot na gabing giniginaw
Dilim ay nalatag na higaan
Ningas ng pag-asang lumalabnaw.
Haya't nariyan ang mga tala
Buong giliw na kumukutitap
Pakatitigan nga nang mabuti
Aral nito'y sa isip itatak.
Pagmasdan rin ang rilag ng buwan
Subuking tuntunin ang hiwaga
Hanggang sa ngayo'y nagagadahan
Kabila ng pangit na itsura.
At maglalayag sa alangaang
Papasyalan ang mga hangganan,
Baybayin ang hatid nitong lawak
At padausdos sa alapaap.
Itatayo ko ang kaharian
Sa pinakamakinang na bitwin
Doon ilalagak ang pangarap
Sa isang maliwanag na silid.
Mga buhangi'y pagdudugtungin
Ididibuhong mukha sa langit
Magbubuklod na tulay yari na
Nang sa ganun ay makasama ka.
Kinabukasan na'y lumalapit
Paunti-unti nang humahakbang
Mangyayari pa lang 'di malirip
Saan nga bang aking pupuntahan?
Nakaraa'y matagal nang tapos
Kasalukuyan ang mahalaga
Pagsumikapan bago maubos
Ang oras ng bukas na hinabla.
Anu-ano nang aking gagawin?
Nang malampasan ang bagay na 'to
Kung ang tao'y wala ng damdamin
Saan nga bang lahat patutungo?
BINABASA MO ANG
'Santasang Tula
PoetryAng koleksyon na ito ay para sa mga Filipinong manunulat na naghahanap ng lugar para sa kanilang mga akda. Para rin ito sa mga pinoy na patuloy na sumusuporta at tumatangkilik sa mayamang sining ng pagsulat sa Pilipinas sa pamamagitan ng pagbabasa n...
