ဒီလတွေအတွင်း စနေ တနင်္ဂနွေ ရက်တိုင်းမှာ Prison ကို ဘယ်လို အကြောင်းမျိုးပဲ ရှိရှိ မပျက်စေရပဲ ကျွန်တော် သေချာသွားဖြစ်ပါသည်။
တကယ်တမ်း ကျွန်တော့် thesis က အတော်ပင် အချက်အလက် အကြောင်းအရာ အကိုးအကားတို့ ပြည့်စုံ စုံလင် သလောက် ဖြစ်နေကာ အတော်အတန် ပုံပေါ်နေပြီပဲ ဖြစ်သည်။
အကုန်လုံးဝ ဥဿုံ မပြီးသေးသော်ငြား ကိုယ့်ဘာသာ အချောသတ်ရေးလိုက်ရုံနှင့် အဆင်ပြေနေသလောက်ပင်။ ကျွန်တော့်အားလပ်ရက်တွေ ဖြစ်သော Weekends တွေမှာ Lancasterကို အမြဲ အပင်ပန်းခံကာ သွားနေရခြင်းမှာ ကျွန်တော့်ကို အပတ်စဉ် မျှော်နေလျက်ရှိသော မျှော်နေခြင်းကို ကွယ်ဖွက်ထားလေ့ရှိသော .. ခပ်စူးစူးမျက်ဝန်းနက် တစ်စုံကြောင့် ဖြစ်ခြင်းကိုမူ ကျွန်တော် မငြင်းဆန်လို။
ကျွန်တော်နှင့်တွေ့သည့်အခါတိုင်း ပွင့်ပွင့်လင်းလင်း ရယ်ပြတတ်သော နှုတ်ခမ်းထူထူတစ်လွှာသာ ရှိမနေဘူးဆို လျှင် ထိုကဲ့သို့သော နေရာမျိုးကို ဆက်သွားမိလိမ့်မည် မထင်ပါ။
ကျွန်တော် Master ဘွဲ့မယူရခင်အထိတော့ သူ့ဆီကို တတ်နိုင်သလောက်လာမည်ဟု ဆုံးဖြတ်ထားသည်။ နိုင်ငံ ရပ်ခြားမှာ တစ်ယောက်တည်း ကျောင်းတက်ရသည်မှာ အများအမြင်မှာတော့ ကိုယ့်ဘာသာ ရပ်တည်ခွင့်ရှိတယ် ဆိုပြီး လူအထင်ကြီးချင်စရာကောင်းပေမယ့် Culture မတူသော အသိမိတ်ဆွေတွေကြား တကယ့် စိတ်ရင်းနဲ့ ပေါင်းမယ့်သူ ရဖို့ဆိုတာ မလွယ်ပါ။
အပေါ်ယံ ထ,သွား ထ,လာ အပျော်အပါးဖက်သော လည်ပတ်တဲ့နေရာတွေမှာတော့ အဆင် ပြေကောင်းပြေနိုင်ပေ မယ့် တကယ်တမ်း စိတ်တူ ကိုယ်တူ အတွေးတူ မိတ်ဆွေမျိုး မရှိတာ အရမ်း အထီးကျန်ဆန်လှသည်။
ကျွန်တော်၏ အနည်းငယ် ပျင်းရိခြောက်သွေ့ဖွယ်ကောင်းသော သမားရိုးကျ ဘဝမှာ သူနှင့်တွေ့ဆုံခွင့်ရခဲ့ခြင်းဟာ အပျင်းပြေသည်ဟု ခပ်ပေါပေါ သုံးနှုန်းခြင်းထက်စာလျှင် အလွန်စိတ်ဝင်စားဖို့ ကောင်းသည်ဟု ပြောင်းလဲ ပြောဆို ချင်ပါသည်။
သူ၏ ကွယ်ဝှက်ထားသော ဘဝကို သူ့စကားတွေထဲမှ တဆင့် ကြိတ်ခန့်မှန်း အဖြေရှာရခြင်းကို နှစ်ခြိုက်သွားမိ သော ကျွန်တော်က တစ်ခါတစ်လေ ကိုယ့်ကိုယ်ကို စုံထောက် Sherlock Homes အလားပင် မာန်သွင်းနေတတ် ပြန်သည်။
