في مساء احد الليالي الشتائية الباردة واحد مساءات كانون الثاني ولدت زهرة واي زهرة انها زهرة كانون الثاني لاننسى الحكايات الخيالية ولاننسى زهرة النرجس البري .هل يزهر النرجس وسط هذا الشتاء البارد وزخات المطر ولاننسى دعوات والد ريفي يتمنى بقرارة نفسة بنتا ولا لحظات الوجع الي عاشتهة والدة:يارب ..يارب جازي تعبي وخ تجيني بنية ..تكبر تحن علية ودموعها تكت من الوجع جانت ولادتها متعسرة والدنيا تمطر مطر قوي والدنيا تخوف برة والكراكيع يمكن لهذا عمري ماخفت من كركوعة. ابوية راح على عمتي خالدة التؤام مال ابوية وبصوت ناصي .جانت نايمة يم الحجية وبصوت ناصي ...
خالدة..خالدة ...كعدي خالدة..
خالدة:خير خوية بيك شي رح تلتحق دتوصيني ع زهرة ...
خالد : لج خالدة هاي زهرة عدهة ولادة ومااكدر اروح لااهلهة هسة ولااكدر اروح وحدي ... تعاي انتي ...
خالدة :تدلل خوية ...بس خل اكول لاامي ليظل بالهة ...
خالد: لاتكعديهة ...ترة زهرة تعبانة مو مال حجي من امي تج..ين لو اروح وحدي بهالزلك ....
الحجية:هااا ...خالد خيرك .تكعد اختك تالي الليل. شكو شصاير ...
خالد : خير حجية زهرة عدهة ولادة دا اوديها ....
الحجية : جا مرتك زغيرونة اول مرة جيب شو ماشاء الله عدهة اربعة بعين العدو و الخامس جاي بالطريق ماتعرف الطلوكة تطول عبالها اول ماتروح تزلطة للولد والمستشفى كلهة تتفرج ع مرتك مكشفة امشي وديني خل اشوفها لهالزهرة شسبتنا بالليل ..
جان ابوية بعثي بزمن صداموالكل جان يخاف بس يخطي بشارع لو محلة بس للاسف هاي الشخصية وهاي الهيبة صفر كدام بيبيتي يمكن الزلم قبل كلها هيج يحترمون امهاتهم وابهاتهم ..
وابوية ظل يصفن بوجه عمتي خالدة بلكي تحجي ويا بيبتي عمود لاتغث زهرة بس الخوف هذا جان ميزة العائلة كلا الظاهر ....مشت بااتجاة غرفة امي وابوي جان نظام بيت جدي حوش جبير وداير مدايرة غرف وجانت العالم لو تعوفهة مفتوحة لو سكفهة المهم بهالمطر طلعت بيبي من غرفتها مشت بااتجاه غرفة امي وابوية دفعت الباب وجانت امي حاطة وصلة بحلكهة عمود لحد يسمعها فشلة من عمامي نايمين .دفرت الباب بيبيتي وفاتت خير عيني يالمسعدة صغيرونة لو اول مرة جيبين متصبرين للصبح متشوفين الدنيا ظيم ومطر صبري شوي للصبح....
زهرة:لج عمة رح اموت والله ..من المغرب البارحة طك مي الراس وسالي خالدة....وج يمة رح امووت..
الحجية :موتتهم سكتي فضحتينا وشوي اتحملي ....خل يهدا المطر الشوارع كلها فايضة وطين تنكلب السيارة بيكم والله....
خالد :يمة ...من رخصتك دا اودي مرتي ..شكلها تعبانة كلش ..
الحجية:لك يويل لك هاي عيارة نسوان ...ولك شنو ماخلفنا والله كاعدين بالزرع نشتغل نزلط الجاهل منا ونكص الحبل بالمنجل شنو هي ....
زهرة:اووووف ...يممممة لحكيلي وبصوت عالي صاحت...
الحجية :وصممممة سكتي ولج فضحتينة ...
زهرة :خالد رح اموت وخطيتي وخطية جهالك بركبتك وبركبة عمتي اووووف ...اااخ
الحجية : سكتي لج طولان لسانك بت محيسن يم ابوج احجي هالحجي يلة اخذهة ان شاء الله مردت....
صعدنا بالسيارة وامي كوة تمشي وعمتي خالدة تجر بيهة والمطر فوكاهم بس صعدت السيارة وكع ثقل بين رجليهة ..
زهرة :وج خالدة احس شي بين رجلية نزل الطفل باعي...
خالدة: شو خل اشوف .. باوعت ع خالد :وهو ديسوق ..لك عزة خالد هاي رجلين الجاهل والله اذا نزل اكثر تتملخ ايدي...شون ...
زهرة :تبجي ....لك ربي فدوة العينك طلعنا سالمين فدوة العينك ويجي ابني بالسلامة ...وكفت السيارة نزل ابوية فتح ابوية باب امي ونومهة ع رجل عمتي ....
خالدة : لك خالد شدسوي شمفهمك انت بهالسوالف....
خالد:بنتي رح تجي بالسلامة ولاناقصة ايد ولارجل والمطر يزخ فوك راسة طبب الطفل وفر بطنهة لاامي وكالله تحملي شوي ونوصل صبري حبيبة .
رجع يسوق السيارة وزخت اكثر جنها ماماطرة قبل دنيا ليل ساعة ٣والشارع يخوف.... بدقايق امي ولدتني بالسيارة جانت دايما تكلي دومك مستعجلة عالدنيا ..امي طول الوقت تباوع بعين ابوية وشايفة الخوف بعينة وكل متذكر ولادتي عينهة تدمع على ابوية وعلى موقفة وياها بذيج الساعة نزلطت على كولة امي وابوية لف الحبل السري وبوجهة للمستشفى... وجان بينة وبين نفسة يارب بنية يارب بنية تجي تكسر عين الناس لان خلفتهم جانت كلها بنات الا ابوية عندة اربع ولد تجي بنية تكسر عيونهم ...طبعا ابوية اجة على خمس بنات واجتي ويا عمتي خالدة ممزوجة وهي الوحيدة تحب امي وامي تحبهة ...وشرفت اني اول حفيدة بالعائلة عمامي جان هستوهم مزوجين وعماتي كلهم هم احب اعرفكم بنفسي اسمي نرجس ابوية سماني تيمنا بااسم عمتي المرحومة غركت بالشط ابوية راد يخلصة بس الشط جان سريع وجرفهة وهو هذا الشط جكد جرف ناس اعزاز....ومن هنا وعلى هالاسم انولدت معاناتي كبنية اولا وكاامراة مستقبلا.وبيومهة ابوية صار افلاونزا وعمتي انخطبت وامي راحت بيت جدي لان جديتي مقبلت ترجع للبيت ونسوان عمامي اثنين حملو خوش فال مو...
للقصة بقية.
