من يوم صار عمري ١١واني حبيت اكتب كل شي يصير بحياتي حبيت اذا كبرت اذكر كلماتي حتة لوجانت سخيفة ردات فعلي خيباتي جكد جنت متفاءلة بس جوا هذا التفاعل انسانة مليئة بالطاقة السلبية والي عايشتة بيتنا يحتاج مني اكون صبورة وقوية مااحب احد يشوفني مكسورة حتة ورا مكعدت من المدرسةظل عندي امل ارجع للمدرسة وصير عندي شهادة واعلم الجهال واشوف ابتساماتهم مع اني كنت طفلة ...احلام ورا احلام واني كاعدة مااكوم لحد مايجي حامد يصيح عليه نرجسة تعاي ياريت ترجع ايامي وياريت يجيني حامد يصيحني نرجسة ...نرجوسة تعالي بسرعة لحد يشوفك ...
اهم الاحداث الي صارت ورا السقوط وهاي المرحلة حسيت احساس جديد احساس اني مسوولة عن عائلة لا فعلا ابوية تقريبا سلمني كل شي وامي شالت ايدهة صارت هي تستشيرنيي شنسوي طبعا بذيچ الفترة ببداية الحرب الناس خافت من القصف واغلب العوائل طلعو بالاحرى خافو على بناتهم من الامريكان لذلك اغلبهم طلعو لشهربان....الة احنة وبيت عم ابوية وبيت خالتة.....يمكن محد يتخيل منطقة بيهة اكثر من ثلاثة الاف شخص بيومين يبقى بس 132 شخص الي همة اهلي وعم وخالت ابوية وعيالهم.... .المهم اجة خالي....... وتوسل بابوية حتى يطلع من المنطقة ويروح لشهربان وياهم......
خالد؛مااطلع منا شنو خايف شنو مهزوم تالي عمري لاجئ عد العالم
اعيش واموت بيتي عمري مشفت ابوية حزين ومجروح عمري مشفتة مكسور هيج بس وجهة مبتسم ابوية حبيبي فارس احلامي جان مو بس يخاف على اهلة چان حيل مقهور ع العراق وهو شايفة مدمر والحواسم تنبش بممتلكات وطنها حتة براميل اللقاحات داروها بالكاع واخذوهم مااعرف شنو جنسهم من بشر اكو واحد يسرق بيتة بس الوطن انباع نباع بيد اولادة يمكن شعوري ولة احساس ابوية بالحزن يحسة البعض نفاق ..مبالغة.. بس هواي ناس بجت عالبلد وهواي رح يبجون ... احساس الوجع الي شفتة بوجه ابويةاذكر مشفتة من موتت اخوية احمد بس اني جان بالي..... خيالي طبعا
اي ...صح جنت بصراحة مقهورة عابوية بس بس لان بطلت من المدرسة اجباري وردت اكمل وسمعت حجي من اخوتي. وولد عمي الامريكان بس يدخلون بغداد رح يبنون عمارات وشركات وينطون حرية للبنات النسوان يصيرون حالهم من حالنا والي يتعرضلهم ينحبس بداخلي فرحت هواي وجتي بالي افكار سلبية هواي كلت بعد محد يكدر يوكف بطريقي.....
اي خلي يدخلون الامريكان وارجع دراستي واخذ حريتي مشاعري وكتها مشاعر بنية مراهقة تحلم تكمل دراستها وبس جكد صغير الحلم بس بعينهم شكبراتة .......
المهم رجعت امي تتوسل بابوية حتى نطلع لشهربان بس ابوية گال...كل عقلچ الامريكان يضربون المنطقة لو يدخلون اهنا لاتخافين ..ذولة الي طلعو راح يتبهذلون هسة اتشوفين خلينة گاعدين ابيتنة لمن الله يفرجهة.......
امي ظلت ايام طويلة ماتنام وتقرة قرأن وتفتر علينة واحد واحد وتغطينة وتبجي من شدة القصف الي يهز الگاع الى ان جية يوم 3..4..2003 ودخلو الامريكان للمنطقة وچانو يرمون اي شي يتحرك....بدون وعي قتلوا جكد ناس بلطريق الي يريد يجيب لكمة جهالة الي يتوسل امة مريضة يريد ينقلها مستشفى تالي يكتلو ويكتلون الحجية ويا والطريق يخوف مثل افلام الحربية الامريكية طول الطريق اظلم ومتشتم بس ريحة الجثث والجلاب الي انسعرت من اكلهة للاوادم ... وحرگو الدبابات مالت الجيش وكتلو ولد الخايبات من الجنود الي قررو يواجهون وما ينهزمون ....چنت اصعد على الشجرة مالتي واشوف الدبابات العراقية محترگة والنار تلهب منهة والدخان يتصاعد من كل مكان.... ودبابات الامريكان بكل مكان ارتال ارتال..
جان المنظر كلش يخوف وكل شوي اتلفت اباوع منا...هسة يشوفوني منا...ومااحس الة ايد جرتني وايد ثانية غطت حلكي ذكرت حجي بيبيتي لمن كالتلي الامريكان اذا شوف وحدة حلوة يخطفوها وبوكتهم طيار بريطاني خطف وحدة فلاحة لان انعجب بجمالها وجانت بيبياتنة كلهن حاطات صورتهة بالبوفية وبالي امريكي انعجب بية هااا وبعد يخطفني بالطيارة مالتة الله جكد حلو هذا الفلم الرومانسي الي كطعة صوت ابوية اللطيف بس وصلنا البيت والرمي فوكانة لج انت شنو مخبلة قردة معلكة بالشجرة استحي على طولج صرتي مرة واني دمي مثل الثلج فطيرة بنص هاي الهوسة...لا يابة قطعت سلسلة افكاري وخربت الفلم عايشتة واستلم بيبيتي الي رجعت يمنا اووووف مو كتلة لاابوج واخوانج والله لاتكسر وجهكم هالنرجسة واني افشل واسكت....جنت اغتنم الفرصة وانهزم من البيت حتى اشوف الي دا يصير برة....
المهم بذاك اليوم التمينة كلنة بداخل غرفة وننتضر شراح يصير.....فجأة اندگ الباب بقوه گال ابوية بصوت عالي ...يس...يس..چان يضنهم الامريكان....بس طلع عمي جاينة من جوة القصف والرمي حبي على ركباتة
عم نرجس عبدالجبار: خالد لازم نطلع بالعجل منا اكو طريق بري جانبي نمشي بيه بسياراتنة ... اسمع كلامي رح يبيدونة احنا وجهالنة ولاتركب راسك ...
خالد: شيلو اي شي خفيف وزنه وكلمن تشيل ذهباتهة منعرف شرح يصير بينا وللسيارة بسرعة...... نرجس :چان عدنة سيارتين وحدة ابوية يسوقهة وحدة اخوية يسوقهة المهم اني ركضت وچنت حاسبة احساب هذا اليوم وچنت امحظرة جنطه بيهة الذهب مالتي ومذراتي وملابس اتكفي وبنفس الوكت جنت لامة جنطة لااخوتي الصغار وامي چانت مرتبكة شنو اشيل شنو اعوف گلتلهة....
نرجس:يمة.. اخذي اغلى شي عندچ بلكنتور واني راح اخذ اكل ويانة.
ام نرجس: يمة حاسبة حسابك....اخذتي شي الكم....
نرجس: كلشي مظبطتة لا تخافين ام نرجس :ابتسمت لي .. الله يرضى عليج يمة ميلام ابوج من يكول حزام ظهري .. جنت امجمعة خبز لمدة ثلاث ايام اخبز وطبخت ثلاث انواع من المرگ وجمتة بلمجمدة ...
نرجس:من صار القصف انقطعت الكهرباء ....بس چان عدنة كمية گاز كلش هواية وعدنة مكينة كراب چبيرة ابوية حورهة وسواهة مولد چبير فجنة انتابع اخبار العراق على قناه اسمهة العالم ايران بس يحچون عربي .....المهم جمعت الاكل مع كل شي ممكن نحتاجة للحياه حتى دبات كبار مال مي .... المهم طلعنة بطريق بري كلة طسات وضيق واكو سيارات انگلبت بيهم....صرنة نمشي بلسيارة من ال10الصبح لحد9بليل وگفنة بمكان منگطع مابيه امريكان وچان اكو غرفتين طين مسگفات بسعف النخل نزلنة دخلنة بيهن من التعب والخوف مفكرنة بحيياية ولا عگارب ...وچان اكو ويانة بيت خالت ابوية عددهم ٣٠نفر واحنة وبيت عم ابوية كلنا نجمعنا بغرفتين ناس فوك ناس دخلو الزلم بغرفة والنسوان والجهال بغرفة ..طولهة ا4...4مترالمهم نمنة ناس فوگ ناس واني كلمعتاد لازمة دفتري واكتب مذكرات واسجل تواريخ........
المهم ..گعدنة الصبح ساعة ب11 وبدون منحس على نفسنة فتحنة الباب ولگينة ناس واگفين گدام الغرف وجايبين وياهم صفطة خبز وجدر حليب فاير وجدرية بيض مسلوگ ودبات مي بيهة ثلج ........
گالو الحمد لله على السلامة .......
هذا بيتكم واحنة اهلكم ...المهم ..كملنة بذيچ الغرف 4ايام ورجعنة لبيتنة وشفنة الي مينشاف جيش كامل مدمر على طول الطريق والچلاب ياكلن بلجثث وجوه مشوهة واجسام متناثرة حتى فوگ النخل ............
واكو شهداء مستشهدين وكأنهم نايمين ولا دودة صاعدة عليهم......
ابوية وعمامي الثنين واخوتي بس گامو يدفنون بيهم اما باقي الناس من گرايبنة ختلو ببيوتهم ...وعمي جمع كل الاوراق الثبوتية للشهداء وظمهة لحد ما انفتحت الطرق وگام يكتب لافتات ويعلگ بالعلاوي والگراجات وعالشارع اسماء الشهداء حتى اهلهم يتعرفون عليهم..ويجون عليهم ...ومن احد المواقف الي اثرت بية وبالحوالينة ...شهيد كاتب رسالة لاهلة وحبيبتة وچان يودعهم....
بسم الله الرحمن الرحيم
السلام عليكم اما بعد...
امي الغالية..اخواني اخوية حبيبي لا مو اخوية ابوية انت اوصيكم وصية ..ولاتردوني ماظني مطول الحرب جنهة سيارة ماشية بسرعتها وماتشوف كدامهة والبارحة ادفنت اعز صحباني استشهدو وجنا نحجي حجي بليل وهذا يذكر امة وهذا يذكر ابو بس ماتو وموصلولهم اني عفتلكم ذكرى بخط ايدي مااريد تبجون امشو بفخر ابنكم مات وهو يدافع عن وطنة. الكاع غالية واذا ماادافع عنها شون اجيب جهال للذلة للمهانة ....اني امانة الله انطاني واخذني ...يوووم ...يالطيبة يالحنينة الغالية كملتي ثوبك الاحمر امانة عليج يمة نزعي الاسود ولبسي بروح ابوية وكولي هذا عرس ابني وباايدك زفيني يوووم اني اذا متت رح اموت رافع راسي وامانة امانة عليكم نهلة يمة تعرفين جكد احبهة وجكد تنتني امانة يوووم لاتنسوهة اسالو عليها
اهلي احبابي ديرو بالكم عليهة حتى لو ازوجت غيري لاتگطعون وياها💔🖤
هاي المشاعر جانت من رائد شاب بالجيش العراقي وهو فعلا حقيقة واقعية ابدا مو روايةخيالية ...اثرت بينة كلنة .....
طبعا فضولي هذا رح يموتني من قريت الرسالة ودموعي ظلت تكت والمفجع بالموضوع انو اهلة قرو اسمة وجو يسالون علينة لحد ما اجوي علينة يضحكون.... ويگولون وين الخطار مالكم خلي يجي العراق وصار مو مالنة... بعد ليش ملتزم ...تعال احمد وينك ...هذا چان اخوه الجبير يحچي بكل فرح.......
وفجأة انصدم بان اخوه شهيد ..خطية اغمى عليه بس سمع الخبر ورة ماصحة بچة وبچانة وياه ويگول ...لك يخيي المن اشتريت الغرفة ..لك يخيي نهلة خطبناهة الك ..ولك يخيي امي خيطت دشداشتة الحمرة حتى تلبسهة بعرسك ..ولك يوليدي شگول لمي وشااكول لنهلة يعيني لو سالوني عليك.........
هذا الي صار انطبع بذاكرتي لليوم وگام الرجال وطلع اخوه من الگبر ولفة ابنايلون وحطة ابحظنة ‘وراح ومقبل يحطة ابتابوت يگول احمد يخاف من المكان الضيگ خلي ابحظني احسن..........
اااااه............
هذا الي صار عزز مشاعر الاخوة بين عمامي وابوية وتندمو على اهواية اشياء مرت بحياتهم وهمة متخاصمين........
للقصة بقية متعة القراءة ولاتنسو صوتون للقصة اذا اعجبتكم وتعليقاتكم عالقصة.
