في حالات كثيرة ينتابنا الغضب ...
فنغضب ونثور كالبركان ونفقد قدرة التفكير ...
ويتلاشى عقلنا خلف ضباب الغضب وتتكون في داخلنا
رغبة لتكسير الأشياء حولنا ...
فلا نرى ولا نسمع سوى صرخة الغضب في أعماقنا ...
وكثيراً ما خسرنا عند الغضب أشياء كثيرة نعتز بها ..
وتعتز بنا ثم نستيقظ على بكاء الندم في داخلنا..
أعتقد أن ما أشعر به هو حقيقة يشعر بها الكثير من حولي.. أكثر شيء أكرهه في حياتي أن أندم على تصرّف قمت به بإرادتي!! الشعور بالندم شيء دائما أتمنى الخلاص منه.. ليس لأني لا أريد أن أعيش تفاصيله فقط!! بل لأني لا أريد أن أندم على وقت ضيعته كنت أستطيع أن أنجز الكثير من الامور بحياتي..لكنني استسلمت وضعفت وبدات مشاعري تتشوش...
في اللحظة التي احسست بها بالامان فقدته بعد حين...
في اللحظة التي كان في داخلي صوت يريد ان يخرج...مات..لهذا اذا كان لديك شخص يحبك ومخلي الك مكانة بداخلة وصمت وهدمت كل اشياءة الجميلةبداخلة...بلحظة غباء منك بسبب الغضب...حاول تصلح وترجع خطوة تهدا...لان اذا خسرتة عمرك بحياتك مرح تلكة مثلة..
راح حازم ودعنا وراح شغلة وقبل لايطلع....
نرجس...تعاي رايدك...
هسة اغسل ايدي واجيك....
ها حازم ...حضرتلك جنطتك ...ملابسك وفرشة اسنانك عاشت ايدك
..
نرجس..هاج هذا...
اشرتلة براسي...هزيتة شنو...
ماعندج موبايل...
مالة داعي حازم مااحتاجة اصلا ويامن احجي..ماعندي احد... مو عندج اني...اكيد اذا احتاجيت شي رح اخابرج...
تلفون عمة موجود....
تو.تو..المفروض بهاي الحالة تكليلي شكرا...وتاخذي ..
شكرا...
يلة محتاجة شي...
لا..سلامتك...
عفية ...يلة مع السلامة..
حسيت احساس داخلي بالراحة...
احساس يخليني فرحانة وحزينة بنفس الوقت...كلمات هواي داخلي..ردت اكولها بلحظتها...بس وكف لساني وتعثر...
صح جنت احبة الرضوان وحبي الة ميتقارن...بس عمري محسيت بالامان كد ماحسيتة ويا حازم ذيج الفترة...
حسيت لاشعوريا طلعت مني ...
كولي نرجس تريدين شي..
ضحكت عرف قرا عيوني...
لا..ماكو ..ضرب ع جتفي..يلة اشوفك بخير واخابرج من اوصل براحتك...
اشرلي براسة لا...اكيد خابرني من توصل..
ضحكت طلع ...
حااازم....
هااا...
شوكت تجي...اقصد رح تجي بالعيد لو تبقة هناك...
تريدين اجي..
دنكت راسي...بكيفك...
باوعلي...اكيد لازم تجي تعايد عمتي...وبيبي...
احاول اجي..لان ورا دوام مااكدر بعد...
اول مراح واحس بشعور غريب ماحسيتة..
كل شوي اشتغل اروح عالموبايل انتظرة يدك علية...
وماكو اتصال منة ..
ادك عليه ..
لا شنو ادك عليه...هو لمن يوصل رح يخابرني...كملنا الشغل...
وسوينا الغدا وصليت الظهر..مدك الموبايل دست الدكم..عبالي مطفي لا مشتغل..
اوووف..اكيد نسى..هسة بيت عمة..وبت عمة موجودة...مرح يدك..
اووف ..يانرجس جنج متعرفين..ومغشمة روحج...
نننرجس...
هااا عمة...
تعاي تغدي يمة...
جاييية..
صبينا الغدا غصيت باللكمة اح.. اح..
خالدة...يمة سودة علية حازم جوعان...
شنو...شمدريج...
بيبي...يمة هاي احنا من نغص باللكمة نحس بالناس نحبهم جوعانين..
شمعنى حازم...يمكن فطومة بان جنت اني اوكلها ...
دك الموبايل طفرت...
بيبي..لج ليش كمتي...
خالدة..فطومة عالتلفون يوووم..
استحيت منهم...
كمت...رديت..وصوتي يلهث..
الووو ..
هلو..نرجس..شونكم....
جان صوتة جاد..
حسيت طكة باب...
شبيج جنتي تركضين...
لا جنت اتغدا...
يااا..روحي اتغدي...بعدين اخابرج..
هسة وصلت...
لا صار بال٣ساعات...
جنت انتظر احد يظل بالة علية ...
بس محد ظل بالة للاسف..كانو يكسرني ويجبرني بنفس اللحظة..
روحي اتغدي ورا متكملين دكي علية...
لا شبعت...
اعرفك تاكلين لكمتين وتكومين...
كملي غداج..بين مايخلصون غدا..متت جوع....
ليش بعدكم مااتغديتو ..
بيت عمي اذا مطخ ال٤ميتغدون..
ياعيني وانت متريك ب٦
ميت جوع هسة انت..
من هاي..اني..شنو...
مو كلنا هاي الكلمة ممنوعة...
ههههه.غير من عاشر القوم..صار منهم..صدك...انت صير منا...
اني من اول منكم...
سمعت صوت بنية...
هااا..حازم ..شو ..برة..
حارة...
هسة اجي...
ها نرجس...هاي مروة...
بت عمي....
اوكي ماشي روحح..الله وياك ...
ضجتي...
لا الدنيا حارة...لاتصير بيك ضربة شمس..
زين عرفتي الدرس وحافظتة...
اي لعد شون...مو اتعلمت ..
دخلت عمتي..تحجي...لج عيني حتة اللكمة غصت بيها المسكينة ...خ تكمل غدا....
ههههه.هاي امي...
غصيتي باللكمةنرجس..
لا..لا فد شي حامض بلعتة وخنكني...
دروحي حبيبي روحي كملي غدا بدت تطفر الروايح يمي...
اروح انام لما يجي الفرج...
مع السلامة...
ضجت من مروة..وبعدين كلت شنو ضجت ..اني شعلية...
ظلينا ايام الصبح يكعد يخابرني ...
الظهر اكعد احجي ويا تصبيرة وعمتي..تشمرحجي وضحكنا اثنينا...
وبالليل...يكلي تصبحين ع خير اقفل الموبايل وانام...
ثاني يوم مدك تلفون..واني هم مرجعت خابرتة..ظليت لليل ثاني يوم هم مدك...وظليت كاعدة للفجر..هم مدك...حسيت كلبي انقبض...
اليوم عرفات...بلكي يجي عالعيد...
شوي كاعدين نسوي غدا ..سمعت طبة باب تكسرت حتى المزهرية مدخل البيت...
عبالنا امريكان ..
دائما مداهمات...
حطيت شال ع راسي ...فات حازم...بعصبية...صاحني نرجس تعالي...
شكو يومة شبيك...
ماكو شي..
حجي بيني وبين مرتي...
فتنا للغرفة...ظل ساكت...
هاااحازم...شبيك خير..
خو ماكو شي...
تقربت الة...هاي شنو انت شارب...
معليج انتي ..
اشرب مااشرب ماتحاسبيني حاسبي روحج..
ع شنو احاسبها...ممسوية شي غلط...
وعتبة الباب ما واصلتها من طلعت لحد مرجعت...
والحجي...
ياحجي..عليه اني حجي..
شنو...بلة متحجي...
ظل رايح راجع...
كليلي..انتي ورضوان من جنتو سوا...
شبينا..
صار بينكم شي...
شي مثل شنو..
لاتغشمين روحج..تمثلين فقيرة..متعرفين شي وانتي مكطعة السمجةوذيلها...
وصوت علا...
انت شنو قصدك... حازم متحجي هي حزورة ...
نرجس...اني من البارحة مشعول اهلي اريد ابرد واسكت...
وارجع اشتعل ...
لزمني من ايدي قوي....
لج كليلي انتي كليلي...
اني زوجت وحدة مكتوب جنسيتها...ارملة قبل الدخول...
وانتي...باوعت علي...فكيت ايدي منة...
كتلة انت شنو قصدك...
ماكوووو....
طلع ورجع وجه المغرب ...يدخن ..وشارب اكثر...كملنا العشا..لان يتعشون واني ضايجة منة حيل... هم صاحني...وعمتي تكلي ميخالف اخذي ع كد عقلة ...
هو يحبج...
غسلت ايدي...
ورحت عليه...
كتلة تتعشا..
لج ياعشا يازقنبوت...
واني مشعولين اهلي...
حاززززم..احجي بدون لف ودوران ..
انتي شحاجية عن ليلة عرسنا..
ضحكت... شااحجي..
لج. الج عين ضحكين..ضربني راشدي وظل يصيح ....لج اني تكولين علية مو رجال ومو كدهة حتة ماجرح نفسة خلاني اجرحة عمود يبين رجال...
هنااا. صدك وكف عقلي...
حاااازم...والله ماحاجية والله ولاجبت سيرة ..اصلا ع ايدك.. اني بيومهة مطلعت الة الكل راح...
هدا...واخذ صفنة ..انتي حاجية منو غيرج ..قابل اني افضح روحي...
دكت الباب..عمتي...يومة..تعالو تعشو...
روحي..يوم مريد زقنبوت...روحي..
حااازم...
روووحي يوووم معليج...
اجة...رجع كعد يمي...
نرجس..اني وثقت بيج...وماخنتج..بس انتي خنتيني..
حازم ..لك شدتحجي انت...حازم لك ياخيانة .. هو اني شايفة الهوا عمود اخونك..
حاززم استهدى بالله كوم اغسل..ونحجي...
مااريد..
اتعشا..
كتلج مااريد زقنبوت...اني ارد اعتباري...
شنو وكفت...كعدي... بصوت ناصي...صار بينج وبين رضوان شي..قبل لاتزوجون...
حااازم..لاااا .بعد مااكدر اتحمل حجيك....
رح اطلع..جرني من ايدي..
وشعري...تعاي وين تريدين تنهزمين كعدي اليوم لو كاتل لو مكتول...
حااازم..كل شي من الي بالك ماكوو..
اني... انتي شنووو...
جبت القران ..والله والقران ...اني صاينتك ومحجيت بشي..وكل شي ماكو...اني...
شنو انتي ..ليش متحجين ..
شااحجي حازم...شااحجي حلفتلك بالقران.. اجذب يعني...
اي...كالو للحرامي احلف...
كال جاك الفرج...
ظليت اباوع علي..معقولة انت حازم تشكك بية..يعني اني نازلة مستوى انحطاط بعينك احلف كذب...
خل البس عباتي...وامشي وديني طبيبة نسائية واتاكد من شرفك مااطشر..
لج ياطبيبة ..الساعة١٠
معقولة كل هذا الوقت من العصر لل١٠مكدرت اثبت برائتي..
لاالحلفان...ولااخلاقي ولاصلة القرابة كلها توكع بلحظة...
باجر..روووح لعد
..لج شنو باجر تغشمين روحج باجر عيد...
انتظر واتاكد بنفسك..
لج شاانتظر ...اسبوع انتظر واني محترك ابوية وراسي رح يطك ...
نرجس..لعد شاااسويلك..بصوت عالي..
حجيت وياك مفاد ..حلفتلك بالقران والله ماكو شي وانت ممصدك..شااسويلك ..روح طبيبة وانتظر...اني هم مااقبل تنزل علية حجاية ولا على اهلي...فهمت حازم وهذا العندي...
اني مااصبر اسبوع نرجس...
يعني شنو ....مرح انتظر اسبوع ..عمود اتاكد...
خلص طلكني وارتاح...
وحسبي الله ونعم الوكيل بيك وبالي حرظك علية...
تريدين تطلكين مني نرجس.. وتكولين مو رجال وطلكتة..
لك حازم ..شبيك اني ماحجيت..والله وروح ابوية محجيت...
ظل يتقدم خطوة وارجع خطوة كعدت عالكرسي...
اجة حط ايدة عاليدات مال كرسي ..ثبتيلي ..هسة نرجس ..شنو...
مااكدر....مااكدر..حازم..كتلك..احنا اتفقنا..
ع شنو اتفقنا..ظل يلطم ع راسة..مااتفقنا ع طيحان الحظ.وظل يكسر..بالغراض..
باعي اني مراح تبرد ناري واطلع من هاي الغرفة الاثبتيلي لو اطلعج جنازة وفضيحة ...اختاري..
ظليت صافنة..يعني لازم اني انحط بخيارين ممسموحلي بثالث ظليت متبسمرة اني ازوجت عمود اخلص اهلي وميشيلون همي..
اطلع فاضحتهم واموت هيج..بلا ذنب ولا صوج...
حسيت روحي..خلص..بعد مابية..حسيت باايد حازم ع ايدي نار جمر وايدي ثلج...جرني مثل الذبيحة للمذبح..وثبت لروحة انو هو رجال...وسقط من نظري اني...
(لا تظلم الحب.. لكي لا يظلمك من تحب.. )
للقصة بقية...
لاتنسون تصوتولي للقصة وسمعوني تعليقاتكم...
