الوحدة صارت منفاي..ويامن اضحك...ويامن احجي...
كل مااكول خلص عندي سند...
فجاة يروح ويتركني بكسرتي..
حاسة روحي مختنكة مو كادرة اتنفس....
جوي عماتي ...ونسوان عمامي وبناتهم...الفاتحة بيت ابوية صارت...بجيت وونيت لحد ماانبح حسي..كمت بالاشارة احجي ويا العالم ...مابية طاقة بعد
...
خلف الله ع نسوان المنطقة قامن بالواجب وزيادة الي تطبخ والي تغسل..والي تقدم...صدك سمعتك بين الناس هي المهمة ..بيبيتي كل باب الهة موقف..وكل جاهل هي تفرحة..جانت مرة قوية وماتت وهي قوية...ملمحت وجه حازم ..جنت كل مااحس اقترب انهزمت مااريدة يشوفني..
احساس داخلي ..يكلي هربي منة مااريدة يشوفني حزينة ولامكسورة...
ولااريد يشوف الدموع بعيني..حاسة مبقة شي واولد..كلش ثقلت خلصت الفاتحة والناس قليل ميجون صحت زينب ..
فدوة جيبي مقياس الضغط وتعاي قيسيلي...
شوي وجاني حازم...خير شبيهة نرجس..
دفعتة عمتي خالدة لك اطلع عيب نسوان..هنا...
كالولي متخربطة نرجس...
هاي سوالف زينب..اكيد...شوف منو دزتة ع حازم..
وهو ولا يمة ...حجي عمتي...
امشي للبيت يلا ..فاتحة وفضت امشي ستري علينة...
يوم رح اخذ نرجس للبيت...تعذريلي من الولد وكولي لمروة خ ترجع ويا اهلهة..
مرح ترجع...
شعندي راجع خو اعوف مرتي هنا..مو ابقيهة وحدهة ...
حاضر عيني حاضر شكلنا..
رجعنا اني وحازم للبيت..كالي فوتي للغرفة ...لاتروحين غرفة بيبيتي..تظلين تقهرين بروحج..
تعاي نفوت غرفتنا ارتاحي هنا...
اي..واشبع قهر نامت مروة ع فراشي..
حازم...مروة منو ...
نرججججس...
عوفني حازم لخاطر الله...
خليني بحالي ...مشيت خطوات..لغرفة بيبيتي..ظليت ابجي عليهة ودعتني ووجها يضحك..لزمت فوطتها..وظليت اشهك وابجي....
لك ربي شسويت اني بدنياتي ...عمود اتحمل كل هذا القهر ...شسويت اني ..اغلى احبابي ماتو بين ادية...واني اغسلتلهة ولبستها الجفن..باايدي هاي..فاض الصبر ربي.واشتم بريحتها واشهك...لج يمة منو عندي غيرج اشكيلة منو بعد يوكف بظهري ويحاميلي لج بيبي وينج عني ..مااخذتيني وياج وخلصتيني من هالدنيا راسا فات حازم حضني...عوفني ...لك حازم عوفني...كلة منك....
اه ..ياوجع مايخلص ابد..ليلتهة نمت بحظن حازم...كل شوي افز ويرجع يحضني وابجي..وهو يمسح على شعري ...
كافي حبيبتي كافي ...الله يرحمهة....
مرات المصايب تنسينة كل الخطوط والحواجز..
وتخلينا نذكر لازم نقوي ..بعض..صار شهر ع وفاة بيبيتي كلة ...عبالك الصدمات من تجي تجي كلهة سوا...بيوم دك تلفون حازم عليه..واني من تعاركنا
ابد ميدك..اذا راد شي...يخابر على عمتي ..واذا راد يطمن..هم نفس الشي..يخابر عمتي..
ظل يدك كلت شيريد بهالساعة..
رديت علي ...
الو...
الووو...
شونج عيني ام الجهال...
الصوت مو صوت حازم..
منو حضرتك..
اسمعيني...ابنكم يمنا منا ل٣ايام اذا مدفعتة ٣دفاتر اقرو عليه الفاتحة وسدة...
ظليت مصدومة شسوي عفية مصايب ماتنتهي حياتي...
اكول لعمتي هي من الصبح تكلي صدري مقبوض...
عفية صدك لو جذب من كثر المصايب جلدي دبغ حتة احساس ماااعرف شااسوي...
رجعت خابرت عالرقم مغلق...
عزة صدك..ياربي..لا فدوة ربي لا..وكتها عرفت معنى الانهيار خابرت اخواني ..لازم يكونون وياي..بهاي الضرووف..ترددت اكول لعمتي...
بس لازم تعرف..
دزينا على عمام حازم ..
هم..هنا صدك حسيت بالتعب اهلي اصلا..واكعين من السطح مع هذا محمد عرض سيارتة للبيع..ومرة اخوية باعت ذهبهة واطتني يا..
عمتي هم باعت العدهة والماعدهة ..حتة غرفة الاخشاب مالتي ..بعتهة...مروة صح جانت ضايجة وتعبانة..طبعا حازم ماكو منا..ليلي نهاري جان بجي ربي بس رجعة بالسلامة وكل شي مااريد..يومين مانجمعن الفلوس...حتة كلادتي جابهة ابويةبعتهة...مع انو عمتي مقبلت ...مر اليوم ثالث ...خابرو علينة توسلت بيهم ..
اطونا يومين حد أقصى... ونزلو شوي الى دفترين صارت الفدية..
عجزت اخر شي خابرت على اية ...جان عندي حصة بورث رضوان..حسب وصيتة..اني كتلهم مااريدة بوكتها...
خابرتها وحجيتلها السالفة مقصرت ..كالتلي بلا متحجين اني رح ادزلك الفلوس وذكرنا رضوان علواه لو رادو فدية وبقو عايش ضغط الاعصاب والشد صار ٥ايام..
صار موعد تسليم الفدية..
طلبت منهم اسمع صوت حازم...سمعني كلمتين. ...نرجس سامحيني..صوتة تعبان كلش ..دموعي نزلت خفت ليكون هذا وداع ومارح اشوفة..توسلت بالرجال ..ميكتلو..يبقو عايش..بس لخاطر جهالة..عالاساس عدهم ذمة وضمير بس حجيتها عسى ولعل وظليت أسبح ..ان الله على رجعه لقادر...وراحو الولد حطو الفلوس ..راحت ..كالو الصبح يمكم..
ظلينا انتظرنا للظهر ماكو ...
زاد الخوف والقلق واني اكول لا كلبي بارد يرجع.. يرجع..
اهل مروة ثاني يوم ..كالو اكيد نكتل ..ولامونا عالفلوس دفعناها..
وصارت ست مروة تريد تلزم عدة٠..يمنا..
فاتحة بيبيتي ..حازم كالي عقد عليهة عقد سيد...بس مامدت ايدهة بشي..ولا ساعدتنا..
وكامو اهلهة يحومون عالبيت وحصة حازم...بس مو بصريح العبارة...
عمتي لامتني..كالتلي شون انتي متحملة متحجين حقهة مجانت موجودة من جابهة للبيت ديكسر عيني...مروة لبست اسود ..عود حزينة ..كتلهم ابد مااصدك اذا مااشوفة بعيني ميت مااكول مات..مرت ١٠ايام..ماكو خبر منة ..عمتي نامت بالمستشفى ..
وظليت وياها وبكلبي مليون اااه..
صدفة وشفت محمد ..لمحني...
نننننرجس...
نرججججس..
هاي انتي...
انصدمت من شفتة واني انهزمت هزوم منة..
كالي هيج ..الايام تفتر وترجع تجمعنا...
جان خلص متطوع ..ويشتغل ..مكافحة الارهاب...
حجيتلة السالفة..
انطاني رقمة..مقبلت اخذة...
كالي ..شوفي هذا رقم زوجتي...احجي وياها...واني اوصلج اخبار عندك صورة...
خفت اطي..
كالي لاتخافين محمد القديم راح والي سمعتي صفحة ونسيتهة بحياتي..
مثل ميكولون الغرقان يتوجى بكشاية جانت عندي ..صورة محتفظة بيها...
كلها يومين ...وخابرني كالي لكيتة..بمستشفى اليرموك تلكي بالعناية المشددة دزيت على امي تبقى ويا عمتي بالمستشفى..
واجة محمد ...ورحنا.. للمستشفى وشفتة ...وياريتني ماشفتة ماكو عظمة بجسمة سليمة ..
المهم بي ...نفس ..سجدت لرب العالمين ..وظليت يمة اسبوع على ماصحى..
لحظات ..وكف كلبي حتة نسيت اني حامل وهاي ايامي...وادخل بشهري..
اخيرا صحى حازم ..ونقلوه ..لغرفة عادية ...شوي شوي بدا يمشي على رجليه..
جكد جنت حريصة ماانزل دموع بس من شفتة..مااكدر لازم دموعي تنزل...
وراها بيومين حازم كالي لاتجين روحي ارتاحي بالبيت يعرف خلص ساعاتي..هاي..
يلة ..يمعود عالاقل بالمستشفى منحير بيهة ...كبل اقرب سدية وبوجهنا للطوارئ..
جانو اخواني ينكتون بس لااني كادرة اضحك من الحمل والثقل ..ولاهو كادر يضحك من الوجع ..عندة كسر بالاضلاع..مروة جانت تروح وتجي وكل ماتجي تسمني بحجيها وتروح بس معاد هامني ..
اخيرا رجع حازم...للبيت بس كلبي بعدة ملجوم منة ..فتت للغرفة..غرفتنا مابيهة اخشاب..
