بعد كل هاي الحيرة الي اني بيهة گمت اروح للشط واسولف وية المي وتصير عندي مشاعر غريبة ..مرة بعد مرة احس اني دا اعرف اشياء قبل لاتصير بمدة وچنت اچذب نفسي ومرة ورة مرة صرت اختبر نفسي على هذا الاحساس....الى يوم 1..5..2003 طلعلي شي من المي الفجر چنت رايحة اجيب مي من الشط الة وجه مالسمچةوعندة گذلة طويلة تغطي عيونة مثل شعر الحصان والة ايدية طويلة واصابع طويلة وكتوفة اعراض وخشمة ممسوح بس مزروف زرف واحد.... جان گاعد على الجرف يم الگصب ويلعب بلمي ويدحگ علية واني اتبسمرت بمكاني حسيت دا يحچي وياي ودا افهم شيريد وهوة هادء وبس يدحگ علية بعيون تلمع مثل اعيون البزون واسعات وكبار.......المهم سويت نفسي دا اخذ مي غرفت مي شلت السطل باوعت لگيتة ماكو. .....ظليت واگفة امكاني ادور عليه بس ملگيتة ولاسمعت صوت مي ولا خرخشة گصب اختفة ما اعرف وين ............ جنت مخبلة لو وحدة غيري جان موصلت الشط بعد بس هاي السولة الي بية ماابطلهة جنت فضولية وفضولي حيل اذاني بس شسوي ابو طبع ميجوز من طبعة البعض ممكن ميصدك ويكول خيال بس الي صار حقيقة ......
رجعت للبيت ...وافكر احچي لو لا فقررت احتفظ بهذا السر لنفسي......
وصرت كل يوم من الصبح انزل للشط بلكي اشوفة بس ملگيتة ....صار عندي احساس بان هذا المخلوق يحبني ودا يساعدني. ...... فاكثر من مرة اتحققلي هذا الشي....... مرة چنت اسبح بلشط فچيتتت من مكان عالي للمي ودخلت مسافة كلش عميقة بلشط وقوة المي دا تدفعني بعيد عن الجرف .. حاولت اوگف الغوص ليجوة مگدرت..... بقيت ارفس برجلية واحرك ادية على امل اطلع للهوا بس تعبت ومطلعت وتقريبا استسلمت فتشاهدت بنفسي وسلمت امري لله ....وفجأة احس صدري وگلبي راح ينفجر ........وبلحظة صار المي من جواي قوة قوية مثل كاني واگفة بمصعد واندفعت ليفوگ وطلعت على الجرف .....شهگت الهوة بصعوبة وارتاحيت وضنيت هذا تيار مال مي بسبب السورة ....السورة هذي دوامة ماء تكون بلاماكن العميقة واحنة عدنة وحده جوانة تهيج لمن يزيد الشط بس. .......
المهم تفاجأت ان الشط هادء وماكو سورة ولا اي هوة عالي حتى يخلي المي يگلب بهاي الطريقة .....وهذا الشي معرفتة لحد هذا اليوم .......
رجعت للبيت ودخلت من شباك غرفتنة من ورة البيت ودخلت بكل هدوء وبدلت ملابسي حتى محد يعرف بية ....لان السبح ممنوع بلشط من بعد مغرگت عمتي بيه .........
ومرة اخذت الهوايش حتى يشربون مي من الشط وچنت واگفة قريب من الشط فتناطحن الهوايش و وگعت اني والهايشة بلشط ومحد يمنة بس الله وگعت اني والهايشة فوگاية وجانت كلش ظخمة واسمهة بطوشة من گد ما سمينة المهم صرت انزل وانزل بلمي بسبب الضربة على راسي دخت وما احس الة انسحبت من ايدي وطلعت ليبرة ..تفاجات انو حبل الهايشة مربوط بايدي والهايشة من طلعت سحبتني ......وهذا هم شي حيرني الى الان............
المهم حياتي بلبيت صارت معقدة لان الصدمات متتالية وهواية بديت فترت مراهقة كلش بوكت مو خوش والكل بعيد عني حتى امي ما اعرف شي عنهة ولا هية مهتمة ابنت صارت شابة بسرعة فجنت محتاجة نصائح ومحد موجود الي صح ابوية قريب مني لكن ك ابنية ابدا مايصلح اتشارك وياه اسراري ................
بعد الاحتلال ......
الايام صارت كل ساعة بيهة حدث شكل ..........
بعد سقوط بغداد بيوم جتي الطيارات الاباتشي اتمشط البساتين وترمي بكثافة على البساتين......وطبعا كلش ناصية. وكتة الشخص كلش قريب .....
بهذا اليوم قربت الاباتشي كلش على بيتنة. وگفت فوگ سطح البيت وصارت ترمي على بستانة وچانو اهلي كلهم بلبستان ..فأني كلش خفت على اهلي وطلعت للسطح وصرت الوح للطيارة والي بيهة بيدي وأشر حتى يفهمون جان اكو اربع جنود گاعدين بلباب ومنزلين رجليهم فنزعو النظارات وصارو يضحكون وطبعا وگفو الرمي ويأشرون بديهم اشارت السلام وبوسات بلهوة.........
نرجس: شتريدون منة... اهلي ناس مسالمين لاتاذوهم وكل هذا سويتة بدون وعي ردت اساعد اهلي بعدين صفنت على وجوهم وخدرت... ونسيت حتى اهلي.... شنو ذولة وشلون الله خالقهم... ودخت ومبطلت نظر عليهم حتى بعدت الطيارة وراحت ترمي ابغير مكان...... بهاي اللحظة حسيت على نفسي هاي شنو الي صار بية وليش هيچ حسيت .......
رجعت نزلت وگلبي يدگ يدگ واحس روحي تريد اطيرررر وياهم ....خيال المراهق خصب ممكن تتخيل التفكير وين يودي كمت احلم اني مخطوفة لو معتقلة وكل الجنود يريدون يغتصبوني يطلع واحد منهم وميخليهم لان اعجب بية وحابني وتقوى علاقتنا وبعدين يعلن اسلامة عمود يزوجني ويظل يحبني وتتغير حياتي واصير مواطنة امريكية هاي احلام المراهقة اكيد ..والفراغ ....تخليج تسرحين بغير عالم بس تهربين من الواقع الي عايشتة تعبت والله تعبت من خيالي وتفكيري حلمي صغير بس اريد ادرس وصير عندي شهادة ومكانة وطبعا اني جنت اتعلم انكليزي وهسة صار عندي حافز أكبر لان تفكيري رح يتحقق رجعو اهلي الحمد لله سلامات وكلش مرعوبين بس الله نجاهم بأعجوبة......
طبعا اني مستعدلت بقيت مثولة بلي صار.
خالد" اصعد لك بنتك ماتت اكيد شسوت هالمخبلة رجال متوكف كدام الامريكان تجي هي الا ماتت البنية مابيهة مجال لزمني ابوية من جتفي وهزني نرجس.نرجس بيج شي كولي مضروبة لج مخبلة سوين هيج لج ردي علية.....
نرجس:يابة متوديني للامريكان جكد حلوين بووووية مو بشر عمالقةاريد اصدك هم ياكلون ويشربون مثلنا.....حقيقييين ......
جان استلم كفخة رجعتني لوعيي لج مخبلة والله هسة صدكت بيبيتك من تكول عليج مو صاحية لابسج جني متخافين خرب لشتك على هالسواية....
نرجس :لمن حسيت ع روحي شخربطت سويت روحي تخربطت من الفشلة عزة العزاني شسويت ....وشالني ابوية وهبط علية فد هبطة....
مضت ايام قليلة وجنت اتعلم الكلام بلغة الانگليزية واتخيل نفسي دا احچي وية الأمريكان ...... وچنت كلش منبهرة بيهم وبزيهم وبكلامهم ..الى درجة اني سويت تقرير مفصل عن ملابسهم وتصرفاتهم......
بهذي الفترة چانو ولد خوالي يجون يمنة ويبقون فترة بعدين يروحون لاهلهم..........
واني كل شاغل بالي فارس احلامي الامريكي بس مجنت اعرف ابن خالي عندة مشاعر اتجاهي الى ان اجة وصارحني بالختلة....
نرجس .نرجسة ..
نرجس :يمة هبطتني مين طلعت انت وشون عرفت اني هنا...
فياض :ليش سر ...انتي تجين هنا تشوفين احد تواعدين احد كولي لاادفنك هنا.....
نرجس :هوووب ..هوب .هوب ...وخر ايدك انتو منو شنو منو سمحلك تدخل وتحاسبني واني ماعندي شي يافهيم اجي هنا اريح راسي من دوختكم واكعد اقرا شوي ...بلة نكة...
فياض:نرجسسس..
نرجس:هم ..نعم ..شتريد..فياض ترة وكفتك هنا عيب ومصدكت ابوية الله هدا علة خوالي وتصالحو ...لاتخربها ياابن الناس وامش منا لو امشي اني....
فياض :نرجس ...اني احبج ورح اخطبك من عمي خالد شتكوللين..
نرجس:خهههه.
فياض:ليش ضحكين شكلت يضحك...
نرجس :لاابد ..اني ويني وين الزواج كلة عمري ١٤ سنة وماافكر بالزواج وابوية هماتين مرح يقبل...
فياض : بعني اذا قبل عمي تقبلين تزوجيني...
نرجس :اعتبر اخذت مني موافقة اذا ابوية وافق طبعا....
فياض:اذا ماوافق يعني انتي....
نرجس:ابوية اكثر واحد يعرف مصلحتي واني اثق بقراراتة ...
فياض :اذا مقبل اروح ازوج اي وحدة ترة....
نرجس :عمي روح الله يوفقك خليني اقرا هي مال زواج بهالزلك مني منك اطفر سوريا وارتاح....
فياض :رح احجي ويا ابوية يحجي ويا عمي احسن.....
للقصة بقية
