#الحب-والاعراف

فراق وألم

كان شرط اهل امي ياخذلها بيت بغداد...وطبعا جدي ماقبل ...امي بقت سنة يم اهلها زعلانة ..ولدتني يم اهلها.وابوية مشاكل وية جدي لان يريدنا.. وبيبتي من شافت ابوية شكد تاذى ...قنعت جدي يشتريله بيت بغداد ...طبعا البيت باسم امي صار لان ماعنده ٥٧ ....وبقى ابوية يروح كل اسبوعين لبيت اهله وياخذ اخواتي دائما اني جنت صغيرة مايكدر ياخذني ....بس امي ابد ماراحت بعد لبيت جدي حتى من صارت ضربة الامريكان هم مقبلت تعوف بغداد وتروح يمهم ....وجدي بقى زعلان على ابوي ...لحد يوم...ابوي داخل عليه ومتعذر منه وبايس ايده ...ومن راجع لبغداد ...سوة حادث بالطريق ومات....جان عمري سنتين....
جدي نجلط بوقتها... واهل ابوية حملو المسؤولية لامي ....بس بقو كل شهر عمي الجبير يجيب بيبتي ويسوكلنا مسواك كامل وينطي راتب لامي ..طبعا من حصة ابوي ...بقينا ٣ سنوات على هالحال...بس خوالي قررو يزوجون امي...كال بعدها صغيرة وعدها بنات...اهل ابوي  تخبلوا...وجدي راد من عمي الجبير يزوجها علمودنا...امي مقبلت كالت اني احب عباس وماكدرت اتحملهم...وعادوني...النوب اخذ رجل اختهن...ومرت عمي تخبلت وصارت مشكلة...وكانت النتيجة ...اهل امي قرروا يزوجوها لابن خالها...مزوج ومرته ماتخلف... اهل ابوية قرروا ياخذونه منها... وامي لا كدرت على اهلها ولا على عيالها....
اني جنت عمري ٥ سنوات ماذكر بس لقطة وحدة من اجوي ياخذون اخواتي وهن يبجن وامي تبجي...واني اجلب  بامي ماقبل اروح وياهم ...ومن يطلعن اخواتي اركض اجلب بيهن...اخر شي خلوني يم امي واخذوا خواتي بعد ماشفتهن....
امي زوجت ابن خالها جان اسمه عبد الله...خلفت منه ولد اثنين ..احمد ومحمد...رجل امي جنت اصيح له عمو ...جان خوش انسان حيل راعاني ومافرق بيني وبين اخوتي… .ها نسيت اكول امي باعت البيت واخذت مشتملين واحد كعدنا بيه واحد اجرناه وبيت جدي اهل امي انباع وكل واحد اشترى بمكان ...بعد السقوط وبالتحديد ٢٠٠٤ ابو احمد جان بالمخابرات خاف من الوضعية قرر نسافر لسوريا ..اني ماعندي جواز ولازم يحضر واحد من عمامي ...كان عمري١٤ سنة....ابو احمد كال لامي لازم تتصلين بيهم...رادت منه يسويلي جواز مزور ماقبل كال كلشي يصير ...وصارت مشكلة بينهم...هي تكله ياخذوها مني ...وهو يكول ذولة عشاير ماتقارش وياهم....اخر شي قرروا يتصلون بيهم عن طريق بيت خالهم...الي جانوا جوارين بيت جدي....اجى عمي الجبير….
وتعارك وية امي كاللها تقصدي ماتركين عنوان لج ...حتى بنتج زوجناهه وردنا نتصل بيج حتى تحضرين معرفنا...وبنتنا...نريد نعرف اخبارها...وهي تكوله لو صدك حجيك جان كدرتوا توصلون ...وبعد قيل وقال عمي كال لها انطينا بنتنا ...امي تخبلت...وصارت مشكلة جبيرة...وطبعا ماكو شي اسمه محاكم..هم قانون ومحكمة...لذلك كدروا ياخذوني من امي...بيومها صار عزة عدنا اني ابجي وامي ادك وتلطم وتلوم بابو احمد...اخذوني من امي وعبالك دياخذون روحي...هي مجلبة بية بجهة وعمي بالجهة الثانية...رحت وياه ...لعالم غير عالمي...لناس يكولون اهلي واني ماعرف احد بيهم ولا شايفتهم...خلصت الطريق بجي لحد ماتعبت ونمت...كعدني عمي كال وصلنا....وللحكاية تكملة