#الحب-والاعراف

نهاية صبر

البارت الاخير
ورد..كل شوي اكول هسة يحجي وماكو جان مركز بالسياقة...واني كاعدة على نار...اريد اعرف شراح يكول
لحد ماوصلنا استراحة ...
باسم..تحتاجين الحمام روحي بين ما اجيبن شي ناكله
ورد...اجيك للمطعم...التفت علي وخزرني...
باسم....تعاي هين بالسيارة...وصلني للحمامات.....ومن طلعت شفته واكف مسافة ينتظرني رجعني للسيارة...وراح جاب اكل واجى ..
من صعد...كال افتحيه ناكل هنا..دافتح بالاكل وضحكت
باسم...جاشمالج ...ضحكينة وياج
ورد...ذكرني الموقف من جبتوني واني شاردة
باسم...مانسيتي
ورد...الله عليك ...انسى الخوف لو البردلو العكال الشطب جسمي..سحب ايده من الاكل...باسم ليش بطلت
باسم...اندار وانتجة بيديه على الستيرن وظل يباوع عل كدام...تعرفين ورد اكثر منظر بحياتي اتمنى انساه شنو..
منظرج وانتي مكرفصة بالزوية..وجسمج مشطب...صار ٣ سنوات هذا الموقف ياكل ويشرب وياي...التفت عليه...ورد مرات نعشك بكل مابينا حيل للعشك.....وشكد انحنا زلم ومانهاب شي ...بس من نجي للاعراف والتقاليد مانكدر نكسرها...وخوف الي بداخلنا من ماتعشكنة البنية يخلينا نعكس عشكنا قسوة...انا حبيتج من اول يوم دخلتي علينا مثل الغزال...بس شفتج ميالة لابن عمنا وجنت صغيرة ....شفتها صعبة بحقي احبن طفلة وهي تحب غيري...وبعد كل ذاك الضيم الي شفتيه ويانا كلت خلها تروح بس  من شميت عطرج..عرفت بعد ماكدرن احب غيرج ولا اريدن مرة غيرج تصير حلالي...ورد انا كل اخبارج اعرفنها وحتى جنت مرات اجي وية قاسم واشوفنج من ترحين للمدرسة...وشكد كبرتي بعيني من عرفت من قاسم انت شلون ساعدين امج...
ورد...يحجي واني فاتحة حلكي...يحبني...شنو الفايدة باسم واحنة طرقنا ماتتلاكة ...
باسم....ليش ورد...ان جان على سويته انسيجياه ...الا اذا جان ماتحبيني ماكدر الومج ساعتها
ورد...ضحكت من كل كلبي...ماحبك...اووف باسم تمنيت ماحبك ..شفت المرمنك وتمنيت اكرهك...بس كلبي مالي سيطرة عليه
باسم ...تفاجات من حجيها وحسيت  كلبي زادت دكاته الزمت ايديها وعصرتها حيل..صدج ورد
ورد...شنو باسم...اخ ايدي انت كله عنف عندك ...خفف لزمتها وظل يفرك بيدي.
باسم...جاكوليها...
ورد...مو كتلك ماكو فايدة
باسم...ليش وردي
ورد...شلون ننجمع ماكدر اعيش هناك ...
باسم...جا ماعندي معزة عندج ماتتحملين لاجلي
ورد...مو ما اتحمل بس انت اعرف راح يبزعوني...ومااريد اعيد ماساة امي واخواتي...عاف ايدي التفت
باسم...اذا كملتي ...خلينا نرشد
بقى الطريق كله ساكت لحد ماوصلنا ...جلبت بيه امي مقبل ينزل
طبيت وانا شابعة قهر...شسوي اروح هناك ادري ماراح يعوفونه بحالنا ...ومراح اتحمل بقيت لليل الوب ...ماعرف شريد... ساعة اكول اوافق..وارجع ساعة اكول لا هم ترجع سالفت عباس ونور...اندك الباب...طلع احمد يشوف منو ...
نور...يمة ورد هذا باسم...اجى تعاي سلمي عليه
طبيت للصالة وعيوني كلها لهفة لشوفته وقلقت
ورد..هاباسم صار شي
نور...يمة شبيج ..غير تسلمين
ورد...اسفة السلام عليكم
باسم...وعليكم السلام..ماكو شي لا تخافين ..بس ماكدرت اصبر لباجر...خالة ام احمد...انا اريد رؤى حلالي .واجيت اقدم اقتراحي كدامج وكدامها...ورد ماتريد تكعد هناك وية اهلي...وانا صراحة ما اكدر اجي لبغداد...فحل وسط تجي وياي للبصرة..انا تعينت هناك بشركة ...ناخذلنا بيت ونرتب وضعنا
نور...والله يابني ماعرف شكولك...اني بعد الي شفته هناك مستحيل اقبل تروح..بس انتو خوش ولد..شفت رؤى شلون مرتاحة وية قاسم...حتى ابوها الله يرحم جان مما مقصر ...على كل حال بكيفها
ورد...باسم وكليتي...
باسم...تكمليها هناك نسوي نقل لج ...
ورد...سكتت...
باسم...جاماكلتي شنو رأيج.
ورد...باوعت له كتله بكيفك ابن عمي...شفت الفرحة مو طبيعية بعينه..بس باسم واهلك خاف مايقبلون...خزرني بعينه...
باسم.....جامو زلمة كدامج.
ورد..مو قصدي بس خاف تصير مشاكل وية عمي ابو علي
باسم.مالج شغل...يلا اسلم عليكم...بس احنة هالموضوع ناجل شوي بعد الاربعين مال حبوبتي
ثاني يوم جاب لي تلفون من الباب انطانياه مسجل رقمه عليه وظلينا متواصلين ...وكل مايسال ليش ماتكولين احبك اكوله من تصير حلالي
بعد الاربعين فاتح اهله ابوه ماعارض بس عمي ابو علي عارض وصارت مشاكل بينهم..جان رؤى تحجيلي هو مايكول شي...وبقت وضعنا هيج..وابوه هم صار ضده من عرف يريد يسكن بالبصرة ...بقينا ٦ اشهر ..اخر شي هو بايس ايد ابوه وكايله ماربدن ازعلك بس هاي حياتي وانا نطيت كلمة على كص راسي ماتراجع من طالع عمي الحكه وكايلة ماعندي اعتراض..
واجى عمي ومرته وقاسم ورؤى ولد عمي ابو حمزة خطبوني من خوالي وماكدرنه نسوي شي لان بعد ماطالعة السنة بس لبسنا الحلقات وعقدنا سيد...
ومن طلعوا بقى يمي هو...جنت لابسة فستان ازرك وبيه ورد ابيض وحجاب لان ماقبل انزعه كدام ولد عمنا ولد خالي ..بس من طلعوا كال ذبي حجابج ..اريد اشوفن الليل السودني...من ذبيته تقرب مني وظل يتلمس شعري ويشمه ..وجرني لحظنه
على جلمة احبك تكَلب الكون
اذا الزمها ايدك كَلي شيصير
تدريني بمحبتك انه عطشان
مايروي العطش صدكَني كل بير
يل بايكَ فرحتي بظلمة اليل
رغم جان شكثر عندي نواطير
العين ورمشها وجرحك الجان
يدكَ كَلبي مثل دكَ البسامير
خاب انه شتهيت اليوم ملكَاكَ
ما يحتاج اوضح ونطي تفسير
بس ريض يخايب دحجي وياك
البوسة اضن شي عندك جبير*
.اخ بوية هالوجه من يصير طماطاية من الخجل يشعل نار بكليبي الموجر..دنك علي باس راسي وخدودي وشبكني حيل كوليه ورد لا تخليني بحسرة هالجلمة منج
اكلك اني احبك استحي اشلون اني اكول
اني طبعي مو جرئ بارد وكلش خجوووووووول
خاف اكلك اني احبك وتكلي انت عجوووووووول
خاف اضمهه وتبقى حسره وحسرة كليبي تطول
وهسه بعد العشره كلهه انت تسمحلي اكول..,,.
اني احبك والله احبك ومنك اترجه القبول
وهسه بس محتاج ردك هيه مو هيج الاصول
باسم...جان رده علي احلى بوسة بحياتي...كلشي بالاحلال حلو...سافر جهز بيت وانا خلصت جهازي وطبعا الصف الثاني من الكلية وسوينا نقل لجامعة البصرة  ...سوينا زفة بسيطة بدون موسيقى لان جان ماطالعة السنة بس هو ماقبل ياجل كال تعبت من الروحة والجية ...وزفونا للفندق بوقتها باسم صلى شكر لله..
ورجعنا ثاني يوم للبصرة ... جان هذا نهاية ٢٠١١..كملت كلية وصار عندي ولد اثنين ...باسم ماتغير نفس حبه واكثر ...بس عصبي وغيور كلش حتى عباية لبسني ...ورؤى صار عده ولد وية ابنها وبنتها...بيت عمي ابو قاسم دائما نروح لهم والتقي بكل ولد عمي وبناتهم ...ومن يكون امير موجود يظل باسم يلوب ....لمى صار عدها ولد وبنية ...ورؤى تكول زوجها خوش ولد وحباب بس هي مجرعت المر هم ماقابلة على حياتها...امي داىما تجيني  احمد اخوي نقبل هندسة ومحمد بالاعدادية...الحمد لله ...ماقصر ربي بجبر خاطري...لان طول عمري اتكالي عليه وراضية  بقسمتي ...خلصت الحكاية