#الحب-والاعراف

هروب

نهاية الاسبوع اجى عمي ابو علي صاحني وكال باجر راح يجون خطابة والاسبوع الجاي المهر وبعدها باسبوع الزفة...طبعا يحجي واني صافنة عليه
ورد...عمي شلون هيج تسوي بيه
ابو علي ....انتي سويتي وماسمعلج صوت وعافني وطلع
ظليت حايرة شسوي ...يارب محد لي غيرك ...ورؤى تبجي وماتعرف شلون تساعدني ..كتله احجي وية قاسم
رؤى...جاخية هو ياهو الي يكدر يحاجي عمي بس باسم...
ورد...اني احجي وية قاسم وينه
رؤى...بالغرفة...
رحنا لغرفتها ولكيت قاسم مهموم
قاسم....خيتي عذريني ...ماكدرت اساندج
ورد...لا ابو عباس تكدر
قاسم...جا شلون وبعيني
ورد...اخذني لخوالي
قاسم...لا ورد ماهكيتها منج ...تشردين
ورد.رحت دنكت على ايده اريد ابوسها اول مرة انزل نفسي هيج بس روحي تفرفح...خيي الله يخليك ...شبعت ضيم وماحجيت ...اعتبرني غريية ودخلت عليك ...فدوة اروحلك ...مالي غيرك ...بداعت عباس عليك
قاسم...ورد خلي نتفاهم وياهم..
ورد...كعدت بالكاع وابجي واللطم...اني عشت سنتين واعرف مايتفاهمون وانت عايش عمرك كله وتدري هالشي ...شنو ذنبي لان ماعندي لا اخ ولا اب هيح طلطشون ببة ...حرام عليكم ...خافوا الله...رؤى شبكتني وتبجي
رؤى...قاسم عمري ماخالفت شورك ..ولخاطري لو جنت صدج تحبني خلص اخيتي مالها ذنب
كعد قاسم على الجرباية وحط ايده على راسه ...باجر راح اطلع من الصبح عدي روحة لبغداد شغل كم يوم ومنها اروح لكربلا والنجف حضري نفسج بسكوت نطلع
فعلا بعد صلاة الفجر جاب السيارة للباب واخذت شغلات قليلة وعمي ومرته بعدهم نايمين ...رؤى رادت تفضحنا من البجي الا رجلها حجي عليها ...
كتلني الخوف طول مانمشي بالمنطقة خاف واحد يشوفني...
بعدين نمت من التعب...كعدني قاسم.
كومي خوية خلي ناكل لكمة ...
ورد...ماريد ابو عباس مااشتهي
قاسم...لا خوية مابية حيل يهبط ضغطج بالطريق
ورد...ابو عباس زين بالهوسة كلها ليش ماسالوا امير عن موضوع للرسالة
قاسم...امير مايعرفن شي طلع لبغداد وخالتي شجعته يسافر لتركيا وية اصدقاءه..
ورد...اوووف الشيطان يتعلم منها وجمال مامخلصة دراسة وبيها كل البلة...احجي وية نفسي
وصلني قاسم لبيت خوالي ...ومقبل يروح لحد مايطمئن استلموني
طلع خالي الجبيريصيحوله ابو امجد
ابو امجد...منو
ورد...اني خالو ورد
ابو امجد....ياهلا خالو ...فتح الباب واني ذبيت نفسي بخظنه...شبيج خالو ..هاي شنو متغيرة ...
قاسم....السلام عليكم
ابو امجد...وعليك السلام
ورد....خالو ..ابو عباس ابن عمي وزوج رؤى
ابو امجد...اهلا وليدي تفضل
قاسم...لا والله حجي اريد اروح ارتاح...جلب بيه خالي ماقبل
ابو امجد...فوتي خالو احجيلي شبيج...كعدت مرت خالي والولد ...خالي عنده امجد عمره ٣٠ سنة مزوج وطالع وحده وابع بنات مزوجات وبعد سعد ورعد هم مزوجين وكاعدين وياه
حجيت لخالي كلشي واني ابجي...خالو اريد اروح لامي
ابو امجد...خالو شلون اطلعين اذا ماعندج جواز جان خلصنا من هاي المشكلة من البداية....
ورد...اريد اخابرها...
رعد...شنو بكيفهم ماعدها اهل هيج يسوون
ابو امجد...بابا المشكلة هم اهلها اكثر منه ...تعاي خالو نخابر امج واحجي وياها...دك التلفون وسلم عليها خالي وبعد شلونج وشلونك كال اكو مفاجاة لج انطاني الموبايل ...
ورد...الووو ماما شلونج
نور...منو ورد يايمة شلونج حبيبتي ...شخبارج ليش يمة كطعتي بيه
ورد...اني يومة لو  انتي كطعتي ...خليتيني للزمن يلطش بيه...يمة جنت عايشة بظلج اميرة...لو تدرين سوة الوكت بية...يمة تهت بعدج ...ونذليت وما شفت غير الضيم والقهر...احجي هي تبجي واني ابجي
نور...يايمة سودة علي...والله نار بكلبي عليج ...شبيدي بعيدة ويوميا اسال خالج بلكت سمع عنج خبر...اكول انطيها رقمي خلي بس اسمع صوتها..يمة سدي هسة اني اخابري واحجيلي
خابرت وحجيت لها كلشي
نور...باجر راح اجيج لو تنكلب الدنيا ماترجعين وياهم ...ارجعج وياي هنا ..
وبقيت بس احس مامرتاحة ولا عندي رقم اخابر رؤى ماخذت رقم قاسم...بليلتها نومي متقطع ...كل ما انام احلم جاين ياخذوني وامي تجر من جهة وهمة من جهة نفس موقف الطفولة بس اني جبيرة هنا
بعد يومين امي خابرت كالت اليوم نوصل.... قريب الظهر سمعنا دك الجرس...جان بس اني وخالي ومرته ...الولد بالدوام ونسوانهم هم والجهال بالمدرسة ...وبيومها جانت باردة حيل وتمطر ...طلع خالي يفتح الباب ...تأخر ..سمعنا الصوت علا ...اني هبطت راسا وحسيت الموضوع يمي ...باوعت من شباك المطبخ....عزة هذا  باسم....وللحكاية تكملة