#الحب-والاعراف

عودة الحنان

ورد...صحيت من النوم واحس جسمي مكسر ...شوي وذكرت الصار التفت شفت معلكيلي مغذي  وشفت رؤى نايمة على الجرباية الثانية ...ردت اكوم لزمتني دوخة رجعت لمكاني جانت جربايتي بصف الشباك الي على الحديقة الخلفية ... بعدت شوي البردة حتى شوف الوكت...جانت الفجر بد يشع ...بقيت صافنة وادعي الله يفرجها علي ..شفت باسم جاي يتمشى  والجكارة ببده...اول مرة اشوفه يدخن ...بس جنت حيل حاقدة عليه ...وكارهته بلحظتها...كعد على المصطبة ...شمكعده من الصبح ..رجعت البردة لمكانها...الصبح كعدت رؤى
رؤى...صباح الخير ...حمد لله على سلامتج خيتي
ورد...الله يسلمج....هسة ليش تبجين..صار شكد نايمة
رؤى...يومين ...وجنتي مصخنة نار ...وعلي اكثر من مرة ضربج ابر
ورد...انشلت يمكن ...لان بردت من جابوني...شصار...حجت رؤى كلشي..
رؤى...قاسم زعلان علينا لان ماكلنا هو وصلج
ورد...ميخالف حبي رضي اليوم صعديله مابية شي اني
بقيت يومين ماطلع من الغرفة بس عل كد الحمام واحاول من مايكون احد موجود...عمي ابو قاسم هو ومرته جوي باسوني ...
صح نظلمت بس دخلتهم تكفي.....خفت الدوخة عندي وجه راح الورم منه ...بس بقت طكعات الي بجسمي...قاسم دخل علي وعتب لان ماحجيت ...بس كال ماكدر ازعل عليج لان اخذتي كفاية ..وضحكني بوقتها...رؤى حجت كالت امير كاتل مها لان مفتشة تلفونه وكايل لها شلون ترحين تفتنين ..يعني ماكدر أمن بيتي...وجاية زعلانة وقاسم مرجعها كايل لها عنده حق وانتي سبب المشكلة الجبيرة لان عقلج صغير...رؤى داتحجي وطبت لمى
رؤى...هلا بخيتي هسة اذكرتي ...ماجيتي على خيتج شفتيها ماتت احتيت...
ورد...شفت لمى تباوع لي نظرات غريبة...اني جنت اضن هي برة مشكلة التلفون...بس ابعد هاي الفكرة من بالي
لمى...اخيتي...الي هجمت البيت علينا من جت لسة
رؤى...لمى تحجي عدل
لمى ....كله منها ...امي اختارتها من دونه تبقى بحظنها..
ومن كبرت اجت جاهز ماشافت الضيم الي شفناه..ومن جت لسة شغلت الكل واولهم امير...وهسة باسم بسببها طلكني
رؤى..صخام ...شوكت
لمى..اسالي حماج ورجلج
رؤى...ورد شعليها...
لمى...من ورة سالفتها طبعا
ورد....من ورة سالفتي متاكدة ...لو غير شي
لمى...شتقصدين
ورد...لمى من خلة التلفون بملابسي...شفتها صفرت
لمى...جا انا شدراني
رؤى...ورد ...لمى خيتنا ماتسويها
ورد...رؤى خيتج انتي...الاخت الي تورط اختها ماريدها .الي تشوف اختها تنضرب وتنهان وتسكت...ماريدها...
رؤى..صدج لمى الحجي ..انتي سويتي هيج
لمى...اي صدك...كل الحب لها...امي...وامير...وحتى انتي اخذتج مني...رجلج عمره ما كعد وياي..وياها سوالف وضحك ويوصل للمدرسة ..حتى باسم من وراه سوالفها عافني
رؤى...صخام لمى ..ليش خيتي ليش ..احنة ماعدنا احد بدل مانكون سوة تسوين هيج لخيتج..
لمى...مو خيتي مو خيتي
طلعت وظلت رؤى تبجي..شلون عرفتي هية
ورد...اعرف تحب امير جنت اشوف شلون تباوع عليه...ومحد يكدر يفوت للغرف بس اني وانتي ومها..ومها مالها مصلحة
رؤى...يجوز تريد تبعدج عن امير.
ورد..مها تعرفني ماحب امير...وتدري مستحيل ازوج هنا
...بس باسم ليش طلكها معقولة عرف بيها
رؤى..ما عرفن بس لو داري جان ماطلك بس جان ذبحها..
ورد...رؤى لا تحجين لاحد ..تبقى اختنا...
سمعنا هوسة وصوت عالي...طلعت رؤى تشوف شكو..رجعت لج لحكي امي اجت
ورد ...كمت بسرعة من مكاني بس كمشتني الدوخة ...رجعت كعدت ...رؤى سنديني اريد اشوفها
اخذتني رؤى بعد ماخلت شال على راسي ...وصلت للحولي...شفت امي وية ام قاسم تسولف...والصوت العالي جاي من يم الزلم...يمة
نور...التفت شفت ورد متجيها وكوة تمشي...يمة بنيتي..تلكيتها بحضني...
ورد...ليش يمة عفتيني...شوفي حالي...يمة ضعت بعدج ...هيج هنت عليج ...اشهك بالبجي واحجي...اوووف ياريحة امي
نور...سودة علي يمة ...لو ادري ميتة ولا اشوفج بهالحال...يمة وين اخواتج..
ورد...رفعت راسي رؤى واكفة بعيد...امي من شافتها عرفتها
نور...يمة رؤى تعاي خلي احضنج وشمج
ورد...رؤى كلبها طيب راسا شبكت امي وتبجي وتعتب عليها..بس ميفيد العتب...امي ظلت تسال على لمى ...دزت رؤى عليها مقبلت تجي...
دخلت امي لعمامي .عانبتهم على وضعي
نور...ابو علي...هية هاي الامانة ...هاي ريحة اخوك هيج تسوي بيها
ابو علي...بنتج تصرفت غلط...وتعرفينة عشاير هنا والناس ماترحم
نور...بنتي راح اخذها...واذا خايف علمود الكاع ...هسة تكتب تنازل عن نصيبها
صار صوت عالي وبعدين خف ...طلع قاسم وصاحني...
ابو علي...امج تريد تاخذج...تريدين ترحين وياها ...بعد مانعرفنج ولا عندج شي عدنا...تردين تبقين نخليج بعيونه
ورد...هاي بعيونكم وهيج صار بية...شلون لو خارجها ...احجي وية نفسي...لااروح وياها وماريد شي...عمي كام ونفض عباته
ابو علي...جا لا تحسبين بعد عندج اهل ...وطلع من المضيف
نور...يلا ماما جهزي نفسج...
بس عمي ابو قاسم وقاسم ماقبلوا جلبوا بيهم على الغدة ...جان جاي خالي ابو امجد وياه ابنه رعد...اني طلعت من المضيف للغرفة ..بديت الم الملابس الي اجيت بيها بس...اندكت الباب...وشفت ...اللحكاية تكملة