#الحب-والاعراف

ذكرى حب

لميت ملابسي بجنطة واني الحسرة بكلبي واعاتب امي...يمة ليش عفتيني ...شوف شلون تبهذلت بعدج...لمن خليتيني ...اتنقل من بيت لبيت...اوووف يوم لو اعرف انتي وين اني اجيتج 
بيبيتي...حبوبة هالراشدة
ورد...بيبي راح اروح لرؤى وابات يمها
بيبيتي...جاوانا حبوبة منو يوانسيني باهليل ....
اجيت يمها وبست راسها...هاي من ريحة ابوي صح مالحكت اوعى عليه...بس يبقى له بخيالي صورة راسمتها...بيبي يومين وارجعلج..
من طلعت شايلة الجنطة شفت امير ينزل على الدرج وعلي واكف باب المطبخ ....
امير...وين رايحة ورد
ورد...يم رؤى
امير...ليش مليتي منا
دنكت راسي لان القهر كاتلني والدمعة بطرف عيني...هو تقرب مني
امير...ورد شمالج...شو احسنج مالج كيف....دحجي علي ...شمالج
ورد...ماكو شي امير...عفية من تطلع النتائج بلغني
امير...مو تامرين..
علي ...ادحج على خوي شلون يباوع لورد وعيونه مليانة عشك وطلعت للزرع ورثت جكارة واباوع على الخضار على مد النظر واجر حسرات بكلبي واكول اوووف يأخوي بس لا طحت طيحتي ...مجتوب علينا نحب من دون البنات..بنات اجثر وحدة تكرها امي...شكولك يااخوي بطل من عشكها ماتصير لك لو تشوف نجوم الظهر...
اسمي علي ...اكبر واحد باحفاد العائلة مواليد ١٩٧٨ خريج معهد طبي ..اداوم الصبح بمستوصف يمنا مزوج بنت عمي زينب وعندي منها ولد وبنية ...اني طويل و رشيق بس اميل للضعف اسمر وعيوني من دون اخوتي سود على جدي ..عدنا عادة الولد من يصير ب٢٠ يزوج والبنية بعد ١٥ اغلب بنات مايكملنا مو جهل لا بس لان احنة قرى والمدارس لحد المتوسطة قريبة بس الاعداديات بعيدات ونخاف على بناتنا...طبعا كلهن وصلن للثالث متوسط وبطلنا...بس قبل عام فتحوا اعدادية ومها بنت عمي وصلت خامس
من جابو بنات عمي عباس جنت انقهر عليهن لان اشوفن لمى تبجي على امها ورؤى رغم صغر سنها تحاول تكوم ام لمى وداريها ..جان عمري بوقتها ١٧ سنة...وجنت احاول اداريهن ومن ازل للولاية اجيب لهن وياي اشكال لان اني ماعندي اخت ....خلصت معهد وكالت امي ازوجك كتلها بعد وكت لحد ماصار عمري ٢٢ ورؤى عمرها ١٤ بديت انتبه لها واشوفها شكد رزنة وعبالك اكبر من عمرها  ...وبديت اراقبها وعشكتها حيل كلت اصبر سنتين من يصير عمره ١٦ احاجيهم عليها...اهلي عدهم تقليد من الصغر يحجزون فلان لفلانة...وجان محجوزة لي زينب بنت عمي ابو حمزة.. بعد سنة ظلت امي تلح ازوج وحاجت ايبوي ...واني حجيت وية رؤى كلت اذا قبلت اكول لهم بعد سنة...بس هي خافت من امي ...حجيت وية امي كلبت الدنيا كالت ابقيك بدون زواج ولا اخذ من بنات نور...وبقينا مشاكل وابوي ظل يلح على الزواج...وامي ماقصرت كام تأذي البنية ..حاولت وية رؤى تنطيني حجاية ...كالت روح ازوج بن عمي انت حسبت اخوي ...وزوجت بس يوم عرسي من شفت رؤى شلون طالعة ...كرهت اهلي وتقاليده الي مابيها معنى ...وجتى تخلص امي منها زوجتها لابن عمي قاسم....اوووف ذبيت الجكارة ورثت غيرها من ذكرت يوم زفتها رحت بنفسي جبتها من الصالون بالولاية والطريق كله كلبي يرف مثل الطير المذبوح...صح هسة اباع لها نظرة اخوية لان صارت مرت ابن عمي وخوي بس من اذكر روحي تفرفح ...
وخوي نفس الحال... ان جان رؤى ربت يم امي وماقبلت بيها...جاراح تقبل بالي ربت يم امها وتشبها حيل...يارب...هونها على خوي ولاينشلع فواده ...وللحكاية تكملة