#الحب-والاعراف

عشك مؤلم

اسمي رؤى مواليد ١٩٨٦ طولي وسط ومربوبة عيوني زرك على بابا وماخذة سماره هم بس شعري على امي  اسود مزيج غريب من الصفات...القصة الي داتحجيها ورد كلنا عشناها بس اني عشت بداية اكثر منها لان كان عمري ٩ سنوات من اخذوني من امي...وعمري ماانسى شلون جنت ابجي على امي وورد مجلبة بية ...بس للاسف امي بعد ابد ماسالت علينا اني ولمى ...وأضطريت بسن صغيرة ادير بالي على لمى واشيل همنا .. لان اصبحنا ايتام من الاب والام...ماحجيلكم مرة عمي سوت بينا ...جانت حيل حاقدة على امي ...لان ابد ماسمعت حجيها والنوب عمي راد يزوجها ومد ايده عليها وزعلت اشهر يم اهلها ...وهو ماصالحها تالي اهلها جاوبها له..بس بوقتها جانت بيبيتي بحيلها مو مثل هسة وجانت تتصدالها ....من وصلت ثالث متوسط بطلتني وخلتني اطلع وياهم للزرع...ومن بديت اشب ويبرز جسمي ...لاحظت ابن عمي علي عينه علي وين ماروح ....طبعا مو نظرات وسخة لا نظرات حب وعناية...بس ادري مستحيل امه تقبل بيه ...لذلك شلته من بالي...ماحاولت اركز وياه...المكان الي يتواجد بيه اعوفه واطلع ...هو كام يلاحظ هالشي..لحد يوم قرروا يخطبوله زينب ...شافني مريت وكفني
علي...رؤى اوكفي اريد اسولف وياج
رؤى...خيرك خوية
علي...لا تكولين خوية
رؤى ...جاشكولك
علي...رؤى لا تسودنيني...تعرفين زين اني احبج واريدح حلالي
رؤى...علي...انت راح تخطب بنت عمنا ...ماله داعي هاالحجي..
علي...بعدني ماخطبت...انتي بس كولي تريديني...وشوفي
رؤى ....لا خوية...ماكسر ركبت بنية...وبعدين تعرف امك ماتودني...
علي...انت مالج شغل ...انا اصرف وياه
رؤى..عذرني خوية....مشيت وعفته بس حسيت عيونه صارن شرار...ظل يحاول وياي...ماكول ماجنت ارغبله بس ماعيد تجربة اهلي ...
خطب وصارت زفته ...شلون طلع بيومها ..ظل كلبي يدك وية طبل الجوبي...واحجي وية نفسي...لو اهلي موجودين هم جان صار هيج وياي ...زفوه للغرفة وعيني عليه...
بالليل ماكدرت انام طلعت بالحديقة اتنفس هوى...حسيت اكو حركة...ختلت برة الحايط ..
علي...اطلعي لاتختلين
رؤى...شعرفك اني هنا
علي...ماعرف بس شميت عطرج...وكلبي دك...معناه ولفي قريب مني..
رؤى...علي ماكو داعي للحجي...ردت امشي
علي...تمنيتج انتي العروسة ..وبحضاني اضمج...وليلي كله اكضيه تسامر وياج...ارويج الي بكلبي وشسوى العشك بية...
اختنك ماكدر يكمل...وحسيت بالقهر عليه...عفت ودخلت ..
امه جانت حاسة بيه...وقررت تخلص مني وتزوجني واكيد لازم ماروح غريب...وخطبوني لابن عمي قاسم...
قاسم ....اني هم لي دور بهاي القصة ...مواليد ١٩٨٠ خريج تربية ومتعين...احنة كلنا طوال القامة بس انا شوي مربوع ...اني وباسم دون العائلة عيونه رصاصي...من كالت امي راح نخطبلك رؤى الفرحة ماوسعتني...لان احبها من بدت تكبر وانا عيني عليها...رزنة حيل واكبر من عمرها..وحلوة .عدنا البنية من توصل ال١٦ تصير مناسبة للزواج....
صح مابينت لها حبي...بس جنت ادري خالتي ام علي ماتاخذها
فاني انسب واحد لها...
رؤى ..خطبنا والصدك ماقصروا بس قاسم كال خلال شهر زواجنا وفعلا التهيت بالتجهيز...ويوم الزفة ...اجاني علي للصالون اخذني ...صح مايباوع مثل قبل لان صرت مرت ابن عمه بس من تجي عيني بعينه اشوف الحزن والالام ...بيومها باوع لي بالمراية وشفت عينه دمعت.
اني تمنيت امي تحضر زفتي رغم كل شي احتاجها بهيج يوم...وقاسم من كتله ماقصر ..اخذ عنوانهم من عمي وراح يدور
عليهم لكاهم شايلين...متت قهر...زفوني للغرفة...وهلاهل وجيلات
شوي...زفو العريس...ودخل للغرافة..اني كمت ارجف من الخوف...
قاسم...شماله الكمر خايف
رؤى ...لا ماخايفة
قاسم...رؤاوي ماريد يوم تخافين مني...انتي الهوى الي اتنفسه...وروحي..صار سنتين احلم بهاليوم
رؤى ...تفاجات ورفعت عيني له...لان ابد مامنتبه يباوعلي
قاسم..ايي رؤى احبج ...وردج حلالي والحمد له صرتي لي
رؤى ...بجيت من كال هيج.
قاسم...ليش هالدموع
رؤى...جنت مقهورة ماشفت امي...وخايفة لاتكون ماخذني ترضية خاطر لعمي
قاسم...ادري قصرت وياج بموضوع امج ...بس تعبت وماحصلت عنوانهم ...هسة انا صرت امج وابوج واخوج ورجلج..

رؤى الحمد لله ...الله عوضني بقاسم وهسة عندي عبوسي سميته على اسم ابوي 
وحياتي مستقرة..صح تعبت بدايتها...وهسة هم اكو تعب لان مرت عمي ام علي ماتعوفنا بحالنا تدخل بكلشي...وعمتي ام قاسم فقيرة بس تسمع لاختها...بس ماكو حياة تخلى من المشاكل...
هسة شايلة هم لمى ورد...وللحكاية تكملة