#الحب-والاعراف

طفلة لم تكبر

اسمي لمى مواليد ١٩٨٨ ....متوسطة الطول وسمر وعيون زرك يعني اني ورؤى مشابهات بس رؤى ماخذة لون شعرها من امي اسود اني لا على شعر اهل ابوي بيه شكار ...يعني ماماخذة من امي اي شي ...من اخذوني عمامي من امي جان عمري ٧ سنوات طفلة ..مافهم شنو عمام احق وام تزوج ...جنت ابجي واشوف امي شابكة ورد...ردتها تجلب بية مثل مامجلبة بورد ....بعده تمرضت بقيت اسبوع اصخن اريد امي...ورؤى حارت بية...بقيت فترة طويلة اترغب الباب بلكت امي تجيني...جنت اشوف بنات عمي شلون امهاتهم يدارنهم ...واغار واخبث عليهم ...صرت وكحة وهواي اسوي مشاكل...بمرور الوقت كرهت امي لان حسبتها فضلت ورد علينا ..رؤى صارت امي ...بس هواي شلعت كلبها ...حتى بالدراسة مافلحت …ومن زوجت رؤى تأذيت رغم ماراحت بعيد عنة بس هم مو يمي ...وبداية زواجها كمت اتنحس عليها ...وهالشي خلقلها مشاكل وية قاسم ...وخوب من جابت ابنها ...حسيته ضرتي هذا...لذلك قاسم مايحبني ..يكول انت انانية ...بس تحبين نفسج...بس مو صح اخذوني من حضن امي ولكيت هالحضن برؤى...تعلقت بيها ...مو بيدي وماحب اسوي مشاكل لها...هو يريدها بس له...
من بديت افهم واوعى تعلقت بأمير ...رغم ادري محجوزة لباسم...وبمرور الوقت لكيت نفسي احبه...امير عاطفي وطيب االكلب وحنين...باسم تخوف شخصيته ...من احجي وياه احسب حساب للكلمة ...
من جابو ورد...ما اهتمت لها ذكرتني بامي سبحان الله حتى بالشكل كلها امي ..لذلك جنت اضوج منها....والنوب رؤى صفت وياه ...وراحت يمها نجمعن سوة وبقيت وحدي..جنت اشوف نظرات امير لها...وتفاجأت من راد يزوجها...شنو بيها مميز ...زادت غيرتي منها...مو اني كدامك ...ماحبيتني واني اتمنالك الرضا ترضى...تمت خطوبتنا بس ماكدرت من اشوف امير ..اموت من القهر ...وبساعة شيطان طلبت من بنية جانت صديقتي تشتريلي تلفون...واثناء عرس حضرناه...جابته وعلمتني شلون استخدمه...بديت ارسل لامير واشغاله...ادري خطا اني مخطوبة ...بس جنت مستعدة كلشي اسوي بس امير يصير لي...مها شافت الرسايل وسمعت فاطمة من كالت خلي ندك على الرقم ونشوف منو هاي...انجمعن بيت عمي ابو قاسم...لان خافن لا الولد يعرفون بيهن ....هانسيت اكول امير مرة من داستخدم التلفون شافني هو متعود يدك الباب وراسا يفتحه من يريد شي. انا نسيت اقفل الباب وشافني تلبكت وضميت شي
امير...لمى شجرالج..وشنو ضميتي
لمى...ماكو شي...محتاج شي مني...جرالمخدة وشاف الموبايل
امير..ماهكيتها منج ...شنو هذا ..روفع الموبايل...فتحه شاف الرسايل...وفتح عينه…انتي لمى ...لج ليش...
لمى...انا احبك امير
امير...لج عيب انتي خيتي ..ربيتي على ايدينا...طول عمري احسبنج اختي الي ماجابتها امي ..انت ورؤى...
لمى...جا ليش ماحسبت ورد هيج
امير...ورد ماربت بينا ...وبعدين انتي مخطوبة لابن عمنا...عيب هيج تسوين...وين عقلج ...شمالج خيتي...راح اغض النظر ..بس ماريدنج تعيدها ...باسم خوش زلمة مايستاهل هيج منج
فمن كالن ندك على التلفون خفت يلكن يمي ...خليته بهدوم ورد... ومن صار مجادل وضربنها ضجت عليها...بس ماكدر اتحجى وشكولن ...خوب من جابوها من خوالي وباسم ضربها .
حيل تأذيت عليها...بس مابيدي شي
بعد يومين من رجعتها وعرفت امير حاجي متت بدمي بس لا يتحجى علي...وارتاحيت من اجى وكال انتي خيتي ماكدر افضحج بس ماراح اسامحج على كسرة البنية ...وهذا حد وياج لان اتوقع بعد كلشي يطلع منج...عافني وطلع...كلها ادافع عنها..
وكملت من باسم كال بنت عمي كسرت بختج بس ماكدرن اكمل وياج...حسيت كل الناس هجرتني...وكله من وراها...
امي اجت تدور عليها ...وهي جبيرة واحنة جنة صغار مادورت علينا...شلون يردون ماحقدن عليها...وجمالة اسامح امي واجي اسلم عليها....راحت ورد بس وضعنا مارجع مثل قبل …امير يتجنبني ...ورؤى تبجي هواي على ورد...عمي ابو قاسم ومرته هواي ضاجوا على روحتها...حتى مها ضاجت عليها ...قاسم احسه يعرف شي نظراته لي غريبة...لحد يوم ام علي كالت لي الناس الي اجو على ورد خوش ناس وبعدهم يريدون مرة من عمج ليش ماتقبلين بيه...وافقت اريد اخلص ...بعد لمن باقية هنا
رؤى...لمى اكثروحدة اذاها بعد امنا ...ملاها كره للاخرين مو من سهولة تحب ...واذا حبت بتملك...لازم محد يشاركها ...جانت من صغيرة تتعمد الخباثة والوكاحة...اصور جانت تريد تجذب انتباه لها...طفلة لا ام ولا اب وتشفن حولها اطفال امهم وابوهم مدلليهم...اكو انسان يكدر يقاوم الظروف الي يمر بيها وتبنيه صح ويعتبر بيها ...واكو انسان يوكف بنص الطريق ويندب حظه.
لمى هيج...بقت بداخلها الطفلة الي تخلت امها عنها...حاولت اكون لها ام واخت ..بس تملكتني حتى من رجلي وابني تغار...اليوم زفتها ومقبلت لا امي ولا ورد يجون...صار ٤ اشهر من عافتنا ورد...
لمى...اجت الزفة وانا الدمعة بعيني ...صح ما ارتاحيت ولا حسبت هذا بيتي ..بس راح اعوف رؤى الي هي امي واختي...واعوف حب طفولتي ومراهقتي امير..يلا بقت على هاي...وللحكاية تكملة