#الحب-والاعراف

ذكريات

كل هاي ذكريات جنت احس عشت البارحة مو قبل تلث سنين واني هسة بطريقي لبيت عمامي ...بس هالمرة بمزاجي مو غصب عني….رؤى كالت بيبيتي مريضة وتريد تشوفج ...اني تردد قبل مااجي بس هاي ريحة ابوية ...وماأذتني ...بس شلت هم شلون اوصل بيت عمي ابو علي...قاسم اجى لبغداد ياخذني ...ومن وصلنا وداني لبيتهم من شفته ...شريط حياتي رجع كدامي...وشكد مامشتاقة اشوف باسم شكد مااريد اعيد مشاعردفنتها من يوم الي ميزت شنو نوعها...تلكتني رؤى...طبعا صار عدها بنية تخبل تشبه امي حيل ...عبوسي صار عمره ٥ سنوات تلكاني ...دخلت سلمت على ام قاسم...وكعدنا سالت على امي..قاسم كال ارتاحي ونتغدى واوديج على حبوبتي...من طلعت من الحولي لنفس الغرفة القديمة عيوني جانت تتلفت دور عليه...اكيد ماموجود ...لان حظوره يملي البيت...بدلت وتمددت على الجرباية ...نمت لان تعبانة من الطريق ومن كعدت رحت لبيت عمي ..كل خطوة لبيتهم جانت حيل ثكيلة علي...تلكتني مها وزينب وخولة وسلموا ورحبو ..بس ام علي ماطلعت ....جانت وياي رؤى وام قاسم..من طبيت على بيبيتي نقهرت لحالها...وبجيت...دنكت ابوسها
بيبيتي...هذا ياهو
ورد...اني بيبي
بيبيتي ....ورد هلا بريحة الطيبين...تعاي يابعد حبوبتج
مها...ها حبوبة شوعرفتيه من دونه
بيبيتي ...جا ماكو غيرها يكول بيبي..جاهيج ماساليني علي
ورد...حكج على راسي...بست ايدها...
سالت من وياج...كتلها ..
بيبيتي...ام قاسم طلعي من الصندقجة الصندوج...طلعته وجابته لها...هاج حبوبتي هذا لج .
فتحته لكيت ذهب اشكال بيه...لا بيبي مو من حقي هذا كله...وزعيه بينا
بيبتي...جان انتي تعلميني بنت عباس ...حبوبة هذا حقج...كلشي مراح تاخذين من عمامج ..ولدي واعرفهم ...وابيج سودة علي ماسعد بشوفتجن راح وهو بعز شبابه ..اخياتج ربن هني...وياخذن حقهن وزيادة...بس انتي حبوبة محسوبة بنت امج...ترانا كلشي اعرف..بس مابية حيل امس ...ابوج وجدج اخذو كل حيلي...سلميلي على امج وكوليلها والنعم من ماربيتي ...
طبعا ..ام قاسم حسيتها كامت اطك بس ماحجت...بيبيتي تعبت وكالت اريد انام ..بست ايديها وراسها ومن طنطلع سالت مها على عمي...كالت مانصحج  دخلين .لان حجايته وحدة واصلا ماجان قابل على جيتج لو ما الولد ولخاطر حبوبتهم ..
من رجعنا دخلت على عمي ابو قاسم...طبعا يختلف عن عمامي اثنينهم كلش كلبه طيب...ويكولون حيل جان متعلق بابوي واكثر واحد تأذى بموته...شوفته العلبة ..كلت كلشي يصير مابية حيل لمصيبة جديدة...كال عمي هي انطتها ومثل ماكالت بعد ماتحصلين شي من حقج وياهم...وباس راسي.كال والله عمي نور عرفت تربي...خلص اليوم سوالف وية رؤى ...جان السؤال على لساني ولجمه..وين باسم...بالليل ناموا..واني بقت فكري مشغول اشتاقيت لكعدة الحديقة...طلعت كعدت على المصطبة جان الدنيا صيف والمولدة تشتغل ....باوعت للسما وللكمر..شكد جنت اناجيك قبل تلث اسنين تذكرني لو لا...
من رجعت وية امي ...قررت ماترجع لسوريا وابو احمد رجلها ماقبل ير جع للعراق ..جانت الطائفية بعدها هذا الحجي ب٢٠٠٧ ...هو قرر يطلع مناك لامريكا او كندة وجان مقدم واخذ مرته الاولى ...اني وامي واخوتي احمد ومحمد بقينا بيت خالي شهر لحد مافرغ واحد من المشتملات...بعت كم قطعة من الذهب ورتبنا المشتمل واشترينا الحاجات الضرورية ...امي مقبلت ابيع بعد كالت هذا الج للمستقبل وضمت الذهب...العيشة بالبداية جانت صعبة لان بس ايجار المشتمل الثاني وماعدنا مورد...رجعت امي تخيط ...هي جانت بس النا تخيط هسة كامت تخيط للناس...٢٠٠٨ رجعت ادروس خامس ادبي وقاسم سوالي النقل من يمهم...كام يجيب رؤى كل فترة تبات كم يوم يمنا..
جان عندي واهس اشتغل اساور مال خرز وكلادات ...سويت كم وحدة لبنات ويانا بفلوس كلت اشيل مصرفي ..خطية امي ماتلحك...وعجت بالمدرسة الشغلة...اجت ابنية كالت اخوي عنده محل اشتغلي وجبات وهو يصرفهن .. جنت احصل على القطعة ٧٥٠ يعني اذا اسوي ١٠٠ قطعة ربحي ٧٥٠٠٠ بس هاي مال شهر...نعمة بوقتها زين السوك يوم الي اسلمه القطع ارجع اشتري فاكهة بطريقي واسوك..وامي تظل تحجي علي خلي الفلوس الج تنفعج...بس جانت الشغلة حيل متعبة وتاذي العين..خلصت خامس وبديت سادس ..مرة اجو بيت قاسم..وامي مقبلت يروح كالت له الطريق خطر بالليل بوقتها جان المفروض اسلم القطع ثاني يوم واني مامكملة وماريد اشتغل كدامهم...خليتهم ينامون .
.وكعدت الفجر صليت وبديت اشتغل بالمطبخ ونسيت نفسي ماشفت الا رؤى وقاسم فوك راسي...رؤى...هاي شنهي خيتي تسوين ...وليش كاعدة هالحزرة
اني لميت الاغراض بسرعة ...كتله ماكو اعمال فنية ..بس شفت نظرة قاسم....وصلته للباب واني رحت للمدرسة من رجعت لكيت امي حاجية كلشي لرؤى...بعد ايام اجى قاسم يرجع رؤى..
صاحني..طلع من جيبه فلوس...كال هاي نصيبج من الزرع
اني حيل نقهرت منه...
ورد...ابو عباس ادري عمي ماينطيني شي...وهاي منك..
ليش هيج تخجلني
قاسم...ورد مو تكولين انتي خيتي...جاشلون ماتقبلين من اخوج..
ورد...لا تخليني اخذ موقف منك ...ادري بيك متقصر بس الحمد لله مامحتاجين
عتبت على رؤى شلون تحجيله كالت هو انتبه وكال اساليها...فترة وخابر كال حضري نفسج واوراقج وارواق عمي ..استغربت ...من اجى مشى معاملة التقاعد احنة عفنها من امي ازوجت وجانت ماتسوة..بس هسة من تعدلت الرواتب اني استحق لا مامزوجة ...وهو جان عنده عرف كملها خلال شهرين ..بديت استلم راتب ...وبطلت اشتغل لان اذن عيوني ...خلصت سادس وجبت معدل ٨٥ بس قدمت على كلية تربية...ومن داومت شكد حاولوا يتقربولي ...بس واحد بس ملى عيني وماكدر اشوف غيره...وهسة فهمت مشاعري …سمعت صوته...مابطلتي هاي الطبيعة...غمضت عيني واني احسبالي اتخيل ...وللحكاية تكملة