#الحب-والاعراف

في احضان العائلة

طبعا من اجوي اخذوني جان عمي الجبير ابو علي يصيحوله وياه عمي الصغير ابوقاسم وياهم ولد شاب طويل معضل ماعرف ابن منو منهم...بس سمعت عمي صاحله حسن... وصلنا..واني جنت مسطورة من البجي والطريق ونزلت دايخة ...اباوع مزرعة جبيرة وخضرة واكو كم بيت بس ماكو سياج خارجي او باب خارجي..دخلني عمي لاكبر بيت ...واشوف لمة جبيرة نسوان وجهال وبنصهم مرة جبيرة بالعمر لابسة فوطة سودة جواها عصبة ....ظليت واكفة صافنة عليهم...النسوان تلكنية هلا هلا وبوسني
ابو علي...تعاي بنيتي حبي ايد حبوبتج
ماعرفت شقصد بحبوبتي ...هي صاحتني رحت عليها كام تبوس بية وتكول...اوووف يريحة وليدي ...
اني جنت مثولة بس اباوع ماحجي وماعرف شسوي كعدت بمكاني ماتحرك...
سمعت وحدة تكول لعمي...سبحان الله تشبه امها نصا مابيها شي من عباس ...الحجاية بسيطة بس طريقة القاءها جانت بيها خبث
امي جانت تكولي انتي نبهة حيل على ابوج طالعة ...جان يقرى المقابيله قراية...
بالغدة انجمعوا حتى اتعرف عليهم...البيت الجبير طلع لعمي ابو علي .عنده اربع ولد علي.حسن.حسين ..امير وماعنده بنية
عمي ابو حمزة...عنده ولد اثتين حمزة ومحمد...وبنات اثنين زينب مزوجة علي ...وخولة مزوجة حسين
عمي ابو قاسم وباسم ...قاسم مزوج اختي رؤى ...وبنات اثنين فاطمة زوجة حمزة ومها الصغيرة اكبر مني بسنتين بكد اختي لمى
زوجات عمامي اخوات بس المسيطرة اختهن الجبيرة والشور كله بيدها...
شفت الكل ماعدة  امير وباسم اثتينهم يدروسون هندسة بغير محافظة وينزلون يومين بالاسبوع..
رؤى ولمى اخواتي صار ٩ سنوات ماشايفتهم .رؤى تلكتني تبوس وتحضن بية مزوجة وعدها طفل ولمى عمرها ١٦ سنة بس مارحبت بية مثل رؤى حسيتها ماتقبلتني ...خلال الاسبوع الاول جنت مثل الخطار...اراقب الكل...لمى شفتها تشاقة هواي زيادة عن اللازوم...هي مبطلة لان كسلانة ....
اني جنت صف ثالث ..امتحنت نص السنة وعمي كال انقلج بعدين....
ام علي...كومي حبيبة ...خطية اختج شايلة البيت هي وزينب ساعديهم
ورد...ماعرف شتريدون كولولي
قسمت الشغل بينا...صار مسح البيت علي...طبعا لازم طول اليوم ابقيه نظيف لان جهال طاب طالعة وهو جبير ...وكل ماتروح للزرع وترجع تحجي على المسح بس مو كدام عمي او بيبيتي
مرة طلعوا جان عدهم شغل بالمزرعة بقيت اني وبيبتي ولمى راحت على رؤى ...اني لاحظها من يصير شغل تنهزم...كلت خلي اغسل الارضية احسن...رفعت دشداشتي وشغلت الصوندة والراديو وضفرت شعري لان طويل وبديت امسح بالماسحة واغني نسيت نفسي...وبعدين كمت شوي امسح وشوي اركص...واني ارجع لوره الطخت بشخص وراي ...اباوع شفت ولد طويل عيونه زرك تبسمرت بمكاني مادري شسوي...وهو بقة يباوعلي...شوي حسيت على نفسي ...اجيت اركض زحلكت بالمي ونجبحت هو مات ضحك علي اجى يكومني وهو يضحك ...اني ماخذت ايده كمت وحدي وركضت للغرفة...وبقيت ماطلعت وسمعت مرت عمي
ام علي...جاشنو هالمايات ..البيت مطربس بالمي...وينج ياخايبة
واكو صوت ثاني ...يمة على كيفج
ام علي....هلة بوليدي ..
وصارت هوسة سلام
بيبيتي...جايمة شمالج اليوم...شو مطلعتي من غريفتج ...ماجوعانة
ورد...لا بيبي مااشتهي
واني اكول وية نفسي شلون بية ...شلون راح اباوع بوجه...شوي دخل عمي وبراه جان الولد
ابو علي....السلام عليكم
بيبيتي...هلا يمة الله يكويك هذا ياهو الي وياك.
بيبيتي ...من البجي على ابوي  ...وبعده جدي راحت عيونها وصحتها على كدها
هذا اني حبوبة امير...دنك باس ايدها
بيبتي...هلا حبوبة ...شلونك يمة
امير...الحمد لله...وعينه علي واني داموت من المستحة
ابو علي....ورد بوية ...هذا امير ابن عمج
امير...شلونج بنت عمي
ورد...الله يسلمك
بالليل...الكل التم يمنا علمود امير واجى باسم هم عرفوني عليه  شفت لمى اختي ومها يتسابقن على ارضاء امير...طلعوا بالحديقة الولد...واحنة البنات بقينا داخل البيت نسوي عشى... ام علي مابطلت تبسمرني...اسمعهن
ام قاسم...شلونها
ام علي...فاهية توكع من الحلك جنها امها ..شغلتها سنة يلا تخلص
ام قاسم...على كيفج وياه ترى يتيمة
ام علي....جاشمسويتلها ..شفتيني شايلة العصا واحود بي
اني حيل نقهرت وحزت بنفسي حتى من صبوا عشى مااكلت ورؤى شكد رادت مني
طبعا هي تايهة عائلة جبيرة ...الولد اكلو وحد والنسوان وحد بس نسمع ضحكهم....
بالليل...كلمن راح لبيته والبيت كلهم ناموا..طلعت بالحديقة الخلفية ...ردت ابجي وافرغ نار كلبي ...بس اخاف بيبيتي تكعد...جان دموعي تصب  وبدة صوتي يطلع كمت اخلي ايدي على حلكي...حتى ماطلع صوت...سمعت واحد كال
ترى راح تختنكين....وللحكاية تكملة