#الحب-والاعراف

فرحة وعرس

باوعت يمنى يسرى كلت اني مو مخبلة طالعة بهالليل وحدي ...مو حقه باسم من يحجي علي ...ضحكت..ودخلت جوة...ردت انام وظليت فكرة تجيبني وفكرة توديني لحد ماغفيت بعد ماصليت الفجر
باسم...بعد موقفي وية ورد رجعت للبصرة وبديت كلش قليل انزل ومن انزل.... وياها على كد السلام وتتجنب تطلع من اكون موجود بس مرات اشوفها من بعيد لان بيت واحد...
خابرني ابوي كال نريد نتمم خطوبتكم ...وافقت ماريد اكون سبب مشكلة جديدة ...وعلى شنو المشكلة وهي تحب امير ودائما ضحك وسوالف وياه...
صار يوم الخطوبة...الناس فرحانة وهلاهل واني احس نفسي من الداخل مو عبالك خطوبتي لا فاصل عن الواقع ....ولبسنا الذهب واشوف الغزال دخل ...وكلبي شغل سرعته...بوية شطالعة ...الجسم مفصل والشعر ليل ونازل على الجتف ...طلعت روحي ردت اكوم اسحلها لان توقعت باقي الولد هم شافوها...صحت رؤى وكتلها لبسوا حجاباتكم...كالت ماطالعين برة اشرت براسي على ورد ...كالت جانت جوة هسة اجت مادخلت من دخلوكم الولد...بس مارتاحيت ..اشوف النسوان شلون يباوعن لها....
بالليل ظليت افكر ....وماجاني نوم حسيت حركة ...طلعت شفت باب مفتوح وسمعت صوت ناصي ميزته راسا...رحت من شباك الهول اباوع  ...شفت الغزال كاعد بضي الكمر يمشط شعره...وتحجي وية السما ...سمعتها نقهرت عليها...صدك ضاعت بنصنا ...طاح حظك امير لو اني حارب الكل واخذها ...شمالي اني...لالا اصلا اضوج منها كوية وماتسمع الحجاية…وترادد وماتعرف عوايدنا...بس تبقى حلوة ورقيقة  كبرياء عدها مال عمي عباس كله...وفرس جامحة وتريد خيال كدها...استغفر الله ...هاي اخت لمى واليوم صارت خطيبتي مايجوز افكر هيج لازم اشيلها من بالي....
ورد صبحنا على صوت ام قاسم ...طلعت للمطبخ...شفت رؤى
ورد...صباح الخيرحبي
رؤى....صباح الخيرات بعد اختج
ورد...شكو شو صوت عمتي عالي
رؤى...خطية باسم يريد يرجع وتريد منه يبقى بعد ماتلحك تشوفه
ورد...هو اول البارحة اجى شعجب اليوم يريد يروح
رؤى...ماعرفن هذا الولد شجراله...اشوفن اموره كله تخربطت...وجمالة ماكو احد يكدر يحاجيه يريد كله على هواه
ورد...اني هم اشوف حجايته ماشية على الكل ...والكل تاخذ برايه
رؤى....جا غير هو شخصيته هيج ويكولون تشبه شخصية جدي
...مشت الايام بين الشغل بالبيت الي مايخلص النوب شلت شغل مها لان ملتهية زفتها بعد شهر...طبعا ام علي استعجلت خاف امير يحن ويرجع يبدل رايه... ام قاسم كام تكول ياريت عندي ولد ثالث جان جمعتجن ثلاثجن يمي....باسم اجل العرس مال للصيف القادم كال اخلص عقد وية الشركة حتى ارجع هنا...واصلا قليل يجي...لمى بعدها بعيدة عني وتتجنبني هواي...ومرات اشوف نظراته غريبة...من تنمج وية رؤى مادخل لان ادري ماتحب تحجي كدامي..رغم اتمنى تكون علاقتي بيها مثل علاقتي برؤى ..احنة اخوات والزمن لعب بينا...بس علاقة باسم بلمى هم باردة ...ماعرف همة هنا هيج طبعهم...مادري
اجى يوم الحنة ...صارت النسوان يم العروسة والزلم يم العريس...طبعا الطبخ شلنا ايدنا منه ...لا عدهم النسوان الكبار يعني مو العجايز لا الوسط والزلم هم يطبخون جداري كبار...صراحة ماشايفة هيج ...كل جدر شكبره ...والطليان الي نذبحت ...بس هم تعبنا لان  الامور الصغيرة علينا ......بس الحلو الكل تقدم المساعدة ...ها نسيت بيوم الحنة مها كالت انتي سويلي مكياجي وتسريحتي ...ماكو داعي اروح للصالون لان بعيد ...من سمعت ام علي تخبلت ..يمكن خافت لا اخربها...بس هي كالت معليج شمدريها انتي سويتي...وفعلا سويت لها تسريحة بسبطة ومكياج هي سمرة بس مو طوخ ..وعيون زرك وطلعت تجنن...لبسناها البدلة ...ودخلناها تكعد ...وبدت الحفلة لحد ماكالوا حنوها حتى نصب عشى ...طبعا كلهم يريدون يشوفون الجوبي...من حنوها بدن يهوسن حجاية افهماه وعشرة لا ...بس جنت فرحانة لمها...تستاهل كلبها طيب....
الكل جان باالحفلة ...ورحت للمطبخ اجيب كلاص مي وحدة طلبت من الحجيات وية دخلتي دخل باسم من الباب الثاني ...اني جنت اركص وطالعت اضحك..
ورد..شلونك باسم....رفع عينه على وظل صافن
باسم...هلا ورد ...لبسي حجابج لاحد يفوت...وعافني وطلع...شكد مكروه لازم يغثني عبالك طالعة برة
باسم ...رحت اخذ جداحة من المطبخ ودخلت ورد...الخدود صايرات طماطاية وهي بيضة والضحكة تلاعب الهوى ...صفنت عليها...شو مامبين عليها ضايجة على امير...نبهتها على حجابها وطلعت...
بعد العشى اشتغل الجوبي...بس ماكدرنا نشوفه مايخلونة نطلع واجة باسم نبه رؤى محد من البنات تطلع خارج البيت...بس النسوان الكبار راحن لبيت ابو علي ...واحنة ظلينا نلوب بعدين  بلشنا مواعين وتنظيف...لحد ماهلكنا...وللحكاية تكملة