#الحب-والاعراف

دموع لا تنتهي

اني احس روحي لايبة ماعرف شبية ...بعدني مافهم مشاعري...لبست فستان مكسم على الجسم وماروني طوخ مضرب برصاصي طويل لحد الحجل ...وسالت رؤى كالت عادي ماكو احد انزعي الحجاب مايفوتون الولد من يعقدون يدخل باسم وامير وعمامي بس ...بس سمعت اسم باسم دك كلبي حيل....من يوم الموقف ماشاوفنة لحد البارحة بالليل اجى وسلم واني جاوبت وما باوعت له...شعري بقيته مفتوح ولفيت اطرافه...

رؤى راحت وية لمى ومها للصالون ...ومن اجوي اشتغلت الهلاهل والجكليت والهوسات كعدن العرايس ومن دخلت اوزع شربت ام علي حسيتها تريد اطك لان هواي سالوا منو هاي البنية

كالو السيد اجى يعقد لبسوهن جادر ...خلوه على روسهن جادر ابيض...وكفو اول شي مها برة الباب ...وردد السيد خمس مرات على عدد اهل الكساء ومن كالت نعم اشتغلت الهلاهل والجيلات برة...

اجى دور لمى... من سمعت باسم كال نعم اختنكت وطلعت اركض للحديقة الخلفية اريد اشم هوى ...سمعت الهلاهل والجيلات ..ودموعي صبن ....خلال هاي السنتين بجيت اكثر من ماجيت خلال ١٤ سنة من عمري ...رؤى صاحت علي...مسحت ادموعي ورحت عدلت مكياجي...كالو راح يدخلون الولد...وبدو يهوسون لهم ...رؤى اشرت لي البس حجابي ماهتميت لها ...ماعرف سبب تصرفي...

ودخلو امير كعد يم مها وباسم يم لمى...تباعين الوجه الوحيد الفرحان بيهم ويضحك مها بس...لبسوا الذهب اني واكفة بطرف الغرفة والنسوان ملتمات حولهم ماشوف شي منهم ...لحد ماكالو جيبو الشربت والكيك...بديت اوزع وصلت لهم ...باوعت امير رفع عينه ودنك...وباسم خزرني بعينه ...عرفت ماقبل على لبسي وشعري...

طلعوا من يمهن وبدوا البنات يركصن وبرة الجوبي يدك

...اني جنت بغير عالم بس اتحرك اليا...

خلصت الحفلة وظلينا نظف ...اني مامتعودة على هيج تعب والنوي ماكلت من الصبح شوي ودخت .وردت اوكع لما رؤى لزمتني..اخذتني للغرفة وصاحو علي قاس ضغطي ...طلع هابط كال وكلوها شي حلو ...وكلتني جبر رؤى وانطاني حباية نمت...

كعدت حسيت نفسي نمت هواي باوعت لفراش مها نايمة ...شفت الساعة ب٣ بالليل واني نايمة وشعري مفتوح ومشابك ....كمت على كيفي...اخذت ملابس وفتحت الباب ورحت للحمام غسلت وطلعت لافة شعري تفاجات بقاسم كبالي

ورد...اوي فززتني ابو عباس

قاسم...شمالج ورد ...بعدج مالج كيف...

ورد...لا ابو عباس بس نمت بدون غسل واحس نفسي وسخة تعرف شغل وهوسة...

قاسم...هاي هينة خيتي ...المهم مابيج شي...اني سمعت صوت ونزلت اتاكد...يلا يابعد اخوج روحي ارتاحي

ورد...تصبح على خير...

قاسم خوش ولد حيل ومداري رؤى وهي هم صابرة وياه وماتشتكي رغم كلشي

ردت اروح للغرفة ذكرت مها نايمة كلت اطلع امشط شعري بالحديقة ..فتحت سركي الباب عاى كيف ...وطلعت كعدت على مصطبة مخليها ...وبديت امشط ...بدت صور الخطوبة تجي ابالي ...وصورة باسم ماتروح نزلت ايدي من شعري وباوعت للسما والكمر جان كامل...نزلن دموعي....شكد دمعتي صايرة سهلة

...بديت احجي وية الكمر....اوف يمة وينج هسة ...مفتقدتني لو لا ...خاف نسيتيني...محتاجة لج ...تعاي شوفيني ...حسيت اكو حركة ...خفت...وللحكاية تكملة....