( قارئة الفنجان بقلمي/ احكي ياشهرزاد(منى لطفي

قارئة الفنجان الحلقة 4 بقلمي/ منى لطفي

قارئة الفنجان

الفصل (4)

بقلمي/احكي ياشهرزاد(منى لطفي)

كانت منهمكة على حاسوبها الشخصي تنهي العالق من أعمالها حينما سمعت صوتا حانيا يقول بالقرب منها:

- ايه يا نادو يا حبيبتي، خضتيني عليكي؟.. بقالي مدة بخبط على الباب وما ردتيش!!!..

رفعت رأسها من أمام شاشة الحاسوب وابتسمت وهي تخلع نظارتها الطبية وتضعها جانبا فوق سطح طاولة حاسوبها، قبل أن تجيب والدتها وهي تفرك بيديها الصغيرتين عينيها:

- معلهش يا ست الكل، كنت مركزة أوي في الشغل اللي بعمله فما سمعتش..

كريمة بحنان أمومي فياض وهي تميل على ابنتها تداعب خصلاتها السوداء الناعمة المنفلتة من عقدة شعرها المحكمة:

- يا بنتي بالراحة على نفسك شوية، مش كدا، المهم... ياللا عشان نتعشى، وفيه مفاجأة ليكي على العشا...

قطبت ندى واستفهمت بابتسامتها الرقيقة:

- مفاجأة؟!!!.. مفاجأة إيه يا ماما.. خير إن شاء الله؟!!!..

كريمة بحماس جعل بؤبؤيها يلمعان بشدة:

- فاكرة طنط دولت؟..

تعبير تائه احتل وجه ندى لتردف والدتها بحماس أكبر:

- طنط دولت مامت رشا ولؤي، جيراننا اللي كانوا ساكنين في الفيللا اللي قودامنا قبل ما يهاجروا مع أونكل فاضل لأمريكا!!!.

ندى بعد أن بدأت تتذكر هذه الأسماء وأصحابها:

- آه.. آه.. افتكرت، بس دول مهاجرين من زمان يا ماما تقريبا أنا كنت في أولى ثانوي وقتها؟!!

كريمة مؤكدة على كلام ابنتها:

- أيوة يا حبيبتي، رشا قدّك ولؤي كان في ثانوية عامة وسافروا بعد نتيجته على طول، هو هناك درس إدارة أعمال والحمد لله ربنا وفقهم بعد ما والده كان شغله هنا مش ماشي كويس، اتفق مع أخواته يسافر هناك ويفتحوا فرع لشركته هناك وهو اللي مسكه، ودلوقتي لؤي ابنه اللي ماسك فرع الشركة بعد ما عمك فاضل تعب وعمل عملية قلب مفتوح والدكاترة أمروا بالراحة التامة ليه..

ندى بغير فهم وابتسامة متسائلة:

- إيه دا يا كرملة.. إنت عملتي عليهم تحريات ولا إيه؟.. وبعدين مالي أنا ومال اللي بتقوليه دا؟..

كريمة بلهفة غريبة عليها:

- مالك إزاي بس؟.. انتي ناسية انك كنتي انتي ورشا أصحاب الروح بالروح؟.. دا أنا ما صدقتش نفسي لما شوفت دولت بالصدفة في النادي انهرده الضهر، كانت وحشاني أوي..