Khuloos e dil

Masnooii Zindagi

Wo sarii raat roti rahi thi or char bajy k qareeb aankh lagi thi jabhi subah namaz pe jaag na ho saki. bara bajy k qareeb jub wo jaagi to dil bojhal sa tha saari raat rony ki waja se ankhon k gird halky pary thy. Namazain hamain skoon deti hain jub kabhi namaz chor do to insan ka dil bechain rehta hy. Aj friday tha. weekends main workload ziada hota tha tabhi kuch advertisement companies friday off deti hain. Aj Inaya ki chutti thi. Bahir se TV ki awaz aa rahi thi jiska matlab tha k Zohaib bhi ghar pe hy. Usy yaqeen tha k us ny Zohaib ko kal raat jo kaha sahi kaha lakin phir bhi us ka samna nai karna chahti thi is liye kamry main hi bethi rahi. ghanta bhar choty moty kaam nimtati rahi or phir jub ukta gai to socha ami ko call kar lon.

"aaj bary arsy baad maan ki yaad ai hy?" wo naraz lagti thin. 

"kya karoon ami masroofiat hoti hy. waqt hi nai milta." usny bahany tarashy.                

"masroofiat bhi to khud paali hui hain. Zohaib ko koi kami thori hy. phir bhi pta nai tumhain kya kamany ka bhoot sawar hy." Inaya ki ammi ko uska job karna bilkul nai pasand tha or iska izhar wo har waqt karti theen. hamary yahan ik barii abadi hy jo is baat pe  yaqeen rakhti hy k larkiun ko kamana sirf us waqt chahiye jub zaroorat ho.  

"charain ami ye btain Taha kaisa hy? " Hamesha ki tarah wo baat badal gai thi. 

"theek hy. bus aaj kal ECAT k liye tuitions ly raha hy. bus dua karna k uska admission ho jaye kisi achi jaga." 

"ho jaiga ga insha Allah aap fikr na karain." isny maan ko tasalli di.

 "wo bechara bhi tumhari shadi k baad se akela ho gaya hy hur waqt kehta k Inaya ab badal gai hy. baat hi nai karti." 

"Ammi btaya to aap ko bohut masroofiat hoti hy or wo khud bhi to baat nai karta." 

"Yahi to beta main kehti hon koi routine bnao . ye kya k hur waqt kaam ko sar pe sawar kya hoa hy dunya ka koi hosh hi nai hy. aesy kab tak chaly ga. abhi to bachy nai hain to ye haal hy baad main kesy manage karogi."

"uff ab ye naya shosha" Inaya ny socha. wo ab ukta gai thi . jabhi thori bohut baat kar k usny phone band kardia. wo apny ghar waloon se bohut kam baat karti thi. aesa nai hy k wo yaad nai aty thy bus wo un k sawal jawab se bachna chahti thi. hur baar un se baat kar k wo nai siry se ulajh jati thi. tasannu ameezi usy kabhi nai pasand thi or ab us ki zindagi hi jhoot ban gai thi. kam az kam Inaya ko to aesa hi lagta tha.

............************............

wo log ab walk karty karty ik dhaby pe ruky or chaye mangwai. Zohaib or Manahil ki baaten jari thin or wo khamosh bethi thi. kabhi kabhi jub baat ka rukh uski taraf murta to wo haan naa main jawab de kar jaan churati. in dinon main Zohaib or Manahil kafi frank ho gai thy.

"ary aap ko pta hy Inaya ko bhi farigh bethna bohut mushkil lagta hy." Manahil ny kaha to Zohaib ny mur kar us ki taraf dekha jo un se la taalluq ho kar badlon k par na jany kya khoj rahi thi. chaye pi kar wo uthy or agay chal diye wahan chair lift dekhty hi Manahil ny kaha 

"chalo chair lift main chalty hain maza ayega."  jub wo donon uski taraf mury to Inaya ny nafi main sur hilaya.

"nahi tumahin pta to hy mujhy height phobia hy aap donon beth jain." pta nai ye sach tha ya Inaya ka waham k usy laga uski baat sun k Manahil ki ankhain chamak gai thin.

"Manahil tum beth jao hum donon yahan sahi hain. main ticket ly kar ata hon." uska jawab suny baghir hi wo counter ki taraf chala gaya. Manahil bujh si gai. lakin line main khary huy us ki ik larki se dosti hogai jis k saath wo lift chair pe beth gai. wo aesi hi thi ziada dair kisi baat ka rog nai lagati thi. wo hamesha se agy barhny walon main thi. kaafi dair donon khamoshi se khary rahy phir Zohaib ny kaha.

"aap wasay hi baat nai karten ya mery saath special treatment hy." Inaya ny us ki taraf dekha jo sweater k asteen mor kar ghari pehen raha tha. chahry pe halki si muskurahat thi. ik side pe dimple parta tha. wo intehai khush shakal tha.

"nahin  mujhy khamosh rehna pasand hy." Inaya ny jawab dya.

"pehli larki dekhi hy jisy khamosh rehna pasand ho chalain ye bhi achi aadat hy. lakin kabhi kabhar bolna bhi zaroori hota hy." Zohaib ny samjhaty huy kaha.

"Zahir hy aap anchor hain aap ko to khamoshi bohut ajnabi mehsoos hoti hogi." wo pta nahi kuch ziada hi rude ho gai thi. Zohaib ny uski baat per be ikhtyar qahqa lagaya.

"lagta hy main ny ghalti kardi aap ko bolny ki naseehat kar k. aap to achy khasy tanz bhi maar lyti hain" achanak hi Inaya ko apni baat pe bohut sharmindagi hui. tabhi samny se Manahil ati nazar ai. or usny shukar ada kya.

............************............

"Yaar do teen dil pehly tumhara koi letter aya tha" Taha ny phone pe btaya.

"kahan se?"

"koi orient company tha naam shayad" Taha sochty huy bola. Inaya uth kar beth gai

"tum mujhy ab bta rahy ho" Inaya bohut ghussy main aa gai thi.

"kya hoa?" Taha heraan hoa.

"Pagal!! main ny wahan CV bhaiji thi. kya tha letter main?" Inaya saari frustration ab bhai pe nikal rahi thi. 

"pta nai main ny khola nai."

"ajeeb insaan ho tum jaldi kholo or btao kya hy us main?"

"pta nai kahan hy dhondna pary ga." Taha intehai bedili se bola us k boards k paper chal rahy thy or wo paper de kar thaka hoa wapis aya tha jub Inaya ko call ki btany k liye k liye k paper acha hoa hy. or ab pachta raha tha.

"to jaldi dhondo main wait kar rahi hon . mily to foran msg karna." Inaya ny hukum sadir kya. or phone band kardia. thori dair baad phone ring hoa to dekha. Taha ny letter ki picture bhaiji thi jis pe interview k liye blaya tha AAJ. usy ab yahaan ana mazeed bari ghalti laga tha. us ko Manahil ko mana kardena chahiye tha. usy apny uper ghussa aa raha tha. tabhi kaan main awaz goonji "kabhi kabhar bolna bhi zaroori hota hy."

Hey readers!!                                                                                                                                                             

mujhy is baat ka bakhoobi ahsas hy k main bohut lait upload ki hy to meri poori koshish hogi k agli episode saturday ko post kardon insha Allah.                                                                                  

enjoy reading or mujhy  btain k aap ka favorite character kon hy?

please voooooteeeeee!!!!!!!

thanks :)