قلوب من ورق .. للكاتبه دعاء الشمري

الجزء الاول

هُنالك أنا، وهُنالك أنت، وهُنالك دائمًا مستحيل ما يولد مع كل حبّ.

الكاتبة دعاء الشمري

ساعة 4:15 العصر الغرفه شبهه ضلمه الجو بارد صوت المطر يدك بمسامعي ...
وضعي كاعده ع الكاع البارده او بالاحرى الغرفه بارده خرسة ما اكدر احجي فاقده النطق تعبانه تعيسه مكسوره حزينه

رحمه !!

رحمه!!!

رحمه !!!!

هه ... وين الرحمه بالموضوع 💔😞

رحمه هذه اسمي هه !! بس بحياتي ما شفت الرحمه ولا احد رحمني ... عمري 22 سنة مواصفاتي بيضه طولي وسط جسمي زين متناسق لا سمينه ولا ضعيفه عيوني كبار لون رصاصي معاني عاديه حلكي صغير خشمي صغير

رح ابدي وياكم قصتي
امي اسمهه سرور طالبه جامعه من اهل بغداد تعرفت على ابويه بالجماعه ابويه كردي بس عايش بغداد اهله متوفين وعايش ويه خاله وزوجته واطفاله
تعرف على امي وحبهه والجامعه كله ضلت تسولف بقت حبهم اهلي امي ناس عدهم فلوس متاكلهه نيارن جهنم امي عدهه ست اخوان وبس هيه عدهم بنيه
ابويه جان عايش ويه خاله ويداوم الصبح ويرجع العصر يشتغل بفرن مال صمون يعني رجال فقير ع كد حاله ويتيم وحته خاله هم فقير يادوب مدبر عيشته وهم اتفق ويه ابويه بس يزوج يأجر مشتمل صغير ويكعد
اشتغل ابويه وجمع مهر امي فلس فلس
واجه فرحه وكله رح اتقدملج
اتقدم ابويه بس اهلهه رفضو لان ماعنده فلوس وفقير ولان هو من طائفهً وهيه من طائفه
بس ابويه ما ايس وبقه يتقدمله ويرفضون لحد اخر شي اخوهه شك ان هو يحبه وميكدر يتخلى عنه دز عليه ناس وكسرو تكسر امي سمعت بالخبر وكامت تبجي وتلطم صار الليل اخذت ذهبهه وفلوسه وراحت الابويه
ابويه اخذهه وسافرو الخانقين اهناك عقدوً وازوجو واجرو بيت صغير بمنطقه ريفيه وتقريبا مكطوعه حته ما عليه سيارات
كامت امي تشتغل بالبيت تسوي اللبان واجبنان وكيمر وابويه فتح بقاليه صغيره

اما خوالي ستتهم بقو يدورن ع امي وابويه وحته نشرو صورهم واكالو ننطيي مكافئه للي يجيجهم النه ميتين عدلين وخالي يوصي اصدقاء وين مشوفهم كتلوهمً اثنيهنم

مرت الايام وامي حبلت بيه وجابتني
ويا محلى طيبيتهم ونضافت كلبهم وحبهم الصادق
سماني ابويه رحمه على كد طيبت كلبه من وعيت ع الدنيا وابويه هذه الرجال البسيط  ومسالم ودائما يضحك وامي المره الي تتعب وتشتغل وشايله  ريحه الجنة نضيفه صادقه ومخلصه ويه ابويه نكعد بليل ع ضوه الفانوص ونتقاسم الخبزه سوه ما فد يوم شفتهم اتعاركو لو صارت مشكله بيناتهم
كبرت وصررت صف رابع ابتدائي طبعا مدارس القريه كلش بسيطه وحته المعلمين مو هلكد تعليهم بس اني ابويه جان يدرسني طبعا ابويه تخرج وامي كذالك بس همه اختارو هاي الحياة البسيطه البعيده عن الكل
جنت اشوفهم احلى اثنين بحياتي ...احبهم حب ما اعرف اشلون واصفه بحيث من انام اكعد واني فرحانه لان رح اشوف امي وابويه كدامي
وراحت ايام واجت ايام ونجحت وصرت صف خامس وابويه وامي سوتلي حفله بسيطه كيك وحلويات ورحنه للبستان اهناك واجوي كل الجوارين والاطفال الي بعمري وفرحانه واكلنه واتونسنه وكل لحضه وكل ثانيه وكل دقيقه ما ناسيته من ذيج الايام
ويا محلى ذيج ايامنه الماترد......
كبرت وكمت اساعد امي بالشغل بس هيه جانت ماتقبل
جنه انحضر العشه اني وياهم وكاعدين بره دنيا صيف وهوى الشمال حلو كعدنه وابويه اجة من الشغل وصلى وكعدنه نتعشى خلصنه عشه وامي جابت الجاي وكعدو يسولفون
امي كالت الابويه تريد تروح لبغداد اتزور الامام الكاضم
اني من سمعت اسم بغداد طرت من الفرحه ورحت كعدت يمهم واسنط على حجيهم بس ابويه ما وافق وامي كامت تبجي اجه باسهه من راسهه وكله يا حبيتي والله اني اخاف عليكم والا اني شعندي قابل من باجر اخذج
كالتله ميخالف منو الي رح يعرفنه صار عشر سنوات
كاله هاي هيه ما يصير خاطرج الا طيب باجربليل نطلع حضري روحج
صار الصبح واني تحضرنه اكل وحضرتنه ملابس سبحتني وسوتلي ضفاير اثنين طبعا شعري يوصل لركبتي ضبت شعري حيل شنطت عيوني حيل هههههه صار المغرب اجه بابا صلى واتعشينه وطلنه وصينه الجيران على بيتنه اني جان عندي دجاجات صغار خليتهن بكارتونه وحطيتلهن مي واخذتهن وياي وامي وابويه يضحكون عليه  صعدنه بالبيكم مال ابويه وطلعنه بليل وصلنه الضهر ساعه ب 12 ابويه اجرلنه فندق عادي بمنطقه الكاضميه ابويه وامي صلو وبعدين ابويه راح جاب غده وتغدينه وارتاحينه العصر بدلنه ورحنه انزور الامام الكاضم عله السلام واني فرحانه والدنيا ما واسعتني شعور غريب اول مره اطلع من منطقتنه لمنطقه ثانيه
دخل ابويه يزور من يم الرياجيل
واني وامي دخلنه مو يم النسوان امي وكعدت بالباب وكامت تبجي تبجي حيل بصوت عالي وناسون الي يطلعن يجن يبوسنه ويكلله الله ينطيج مرادج اني من شفت امي تبجي من يمي خفت وكمت ابجي وياهه بعدين هيه انتبهت عليه وكالت سكتي حبيبتي سوده عليه مسحت دموعي ودخلنه انزور واول مره ازور واول مره اشتم هيج ريحه طيبه
كتله ماما هذه الكاضم بيته شكد حلو
كالت لا ولج لا تكولين هيج كولي الامام الكاضم تعاي كعدي اهنا وطلبي مراد
كتله شنو يعني مراد
كالت يعني امنيه ههههه اتمني شي
كتله ها اوك
وامنيات الطفوله جانت
غمضت عيوني ودعيت رب العالمين يكبرني بسرعه واول مره اتمنى شي بحياتي والاسف امنيتي جانت غلط ..
زرنه وفرحنه وامي عيونه تلفت هيج وهيج وابويه جان خايف علينه لان يدري بخوان امي ناس شراينين وما تخاف الله وهو رجال فقير لا ولد ولا سند
اشترالي شعر بنات وحلاوى دهينه وبسرعه رجعنه للفندق
بقينه تلث ايام بالفندق ويوميه انروح انزور

نايمه بليل فزيت ع صوت امي وابويه طبعا اول مره صوتهم يعلى
فدوه لعينك ابو رحمه خليني اروح اشوف امي وابويه حته لو من بعيد 😔

سرور صدوك دتحجين اذا متخافين ع روحج خاف ع هاي الطفله شنو ذنبهه 😟

بس فدوه لعينك يا ابو رحمه هسه السالفه صارهه عشر سنوات واكيد رح ايسامحوني

لا سرور مستحيل افرط بيكم انتي وبنتي وبعدين انتي اخوانج سته وكلهم عدهم فلوس واسلاح و و و .. وانتي شتدرين بيه حته ماعندي اخو يهد وراي هو بس خالي وما ادري وين صفه هسه  وحته القانون هسه يشترو بالفلوس بعدين والله ما خايف ع روحي  اني خايف عليكم انتي وهذي الطفله شنو ذنبهه دستهدي بالرحمان وسكتي

لا فدوه لعينك الله يوفقك حته لو من بعيد بس اشوف امي وابويه واسئل عليهم واعرف اخبارهم

اووووووف ياسرور وتالي شون

فدوه ابو رحمه الله يوفقك

ماشي باجر العصر انروح نسئل الجوارين وبس تعرفين اخبارهم وبعدين نرجع لبيتنه لخانقين حته ما اشوفينهم

يي ماشي حبيبي الله يخليلي ياك بجاهه هذه الامام ويحفضك النه

صار ثاني يوم ولبسنه ورحنه رحنه لمنطقه تبعد عن الامام بنص ساعه بس ما اعرف اسمهه لان ما اعرف عن مناطق بغداد
دخلنه وسئلنه يابه بيت ابو فلان شخبارهم ابنهم فلان وفلان
سئلنه مره عجوز

كالت المره غير وره ما انهزمت بنتهم المعزايه الرجال الجبير انشل والمره بيه هسه مرض خبيث وهاي اخر ايامه والولد كلهم ازوجو وكلمن بيت وبس ابنهم الجبير بعده يمهم

بعدهي المره ما مكمله حجيه وامي اغمى عليه شالهه ابوي ودخله بيت المره العجوز واني ابجي ولازمه عبايته
جابتنه المره مي وغسلت وجهه وابوي يمه كعد يشرب جكاير

واني خايفه وارجف كاعده يمهم .....

وللحكايه بقيه
بقلم الكاتبه دعاء الشمري

اول بارت انطوني رائيكم !!!