قلوب من ورق .. للكاتبه دعاء الشمري

الجزء الثلاثون

مرحباا ☺️❤️
.......
رحمة
شلت الفراش مال البيت وبقيت امسح جنت بدون حجاب ورافعه ثوبي لحد اركبي ومدنكه امسح ما احس الا رجلين ورايه واني مدنكه شفتهن كبل فزيت درت وجهي لكيته صفوان جاي وافاتح الباب  واكف وراي وصافن ع رجليه وجسمي
ارتبكت راسا نزلت ثوبي وركضت للغرفه وعفت السطل مال المسحً والكاع ناكعه صاح عليه هو بس ما اهتميتله
طبيت بالغرفه وسديت الباب
مرت ساعه دزلي رساله ع التلفون وكلي اسف مو قصدي شي بس انتي صرتي كدامي
اني ضجت واحس الدنيا خنكتني صحيح هو الصوج مني اعرف وقت جيته اني ليش هيج سويت
رجع دزلي رساله اني اسف
جاوبته كتله لا انت اخوي مصار شي الغلط مني بس اني نسيت موعد جيتك
........
المهم ثاني يوم طلع الصبح للشغل ومصار شي ولا حجينه
ثاني ثالث يوم كذالك
بعدين كام يجي باوقات مخربطه ويدخل فجأة
بقيت اني لابسه الحجاب من الصبح لليل مره دا اطبخ والتفتت شفته وراي وعينه ع جسمي من درت عليه ارتبك وبسرعه دار وجه
ضجت حيل واتمنيت لو اكدر اطير واروح لمكان ما بي جنس ادام لان تعبت التفكير والقلق والخوف تعبني الصراحه جان الولد كلش حباب وحته ميباوع بوجهي بس من يوم الشافني بهذاك الموقف تغيرت نضرته الي وكام يتقصد يجي فجاء يدخل
بقيت اول مره استغفرت ربي ما ردت اشك بالولد وهو ساعدني ما ردت هيج اجازي

مر شهر هيج واني ع هاي الحاله نفسيتي تعبت ساعه الساعه خايفه يتهجم عليه كمت ما اشتهي الاكل شعري كام يوكع القرايه عفته تعبت حيل
مره اجه هو عصبي ويركع بالغراض دخل بغرفته وقفل الباب حيل
اتعجبت من امره اول مره اشوفه هيج رحت للمطبخ جنت جوعانه اريد اسوي عشه
سمعته يخابر بصديقه سمعت اسمي لفت نضري الموضوع رحت وكفت وره الباب اسنط
يكل لصديقه رحت اليوم وام امير قبلت وكالت طبه مرض شسوي سوي بس ابوهه تعارك وياي وكلي اخذ رائي امير وشوفه اذا ميريده طلكه منه واخذهه انت لان ميصير عاقدين عقد سيد وعقد محكمه
اني احس رجليه ما شالني ردت اوكع من الحركه
رجع كمل كلامه ويه صديقه كله لا يمعود صغيره ما اريد اكسرهه اريد هيه برضاته والله اني نهار كله طالع من البيت لا اشتهيه واكول خاف الشيطان شاطر
.......
يبست دم ما بقه بجسمي وما اعرف شسوي رحت كوه وصلت للغرفه وقفلت الباب عليه ولك هاي الفتره كله اني حاسبتك اخويه وانت هيج نضرتك عليه
مرت ايام واني ع هاي الحاله حابسه روحي بالغرفه وحته الاكل كطعته عايشه ع المي اصلا فقدت رغبتي بالحياة مرت ايام واشهور واني ع حطتي وصفوان حجاهه بوجهي وكلي رح اطلكج من امير واني اخذج ما كدرت ارد عليه ولا احجي شي استلمت الامر الواقع بقيت كاعده بالغرفه وحابسه روحي  حته الحمام ما اروحله غير مره باليوم مرت ايام واني ما شايفه شكل صفوان ولا حاجيه وياهه كاعده ومكابله التلفون شوكت الله يرحمني ويتصلون عليه

امير
الفتره المرت عليه كلش صعبه اخوي التوام يعني نص من عندي نص من كلبي وعقلي اول فتره تعبت حيل وجسمي ما كدرت اتحرك بعدين علاجات ومقويات شويه كمت وكفت ع حيلي وراجعت صديق نفسي مرت شكم شهر لحد ما رجع صديقي القديم الي جنت نكعد نشرب اني وياهه سوه ورحتله فديوم وكتله اني ضايج وهاي حالتي وتعبت مع العلم اني جنت اتحسن بوكته وارجع دكتور نفسي
كعدت يمه وانطاني حبوب هاي الحبوب من ارجع للبيت ادخل للغرفه اقفله واشرب حبايه ما احس ع الي وياي اروح بغير عالم لحد ثاني يوم يلا اصحى كمت انسى الناس اشويه اشويه ما اذكر غير الي اشوفهم كبالي حته مصطفى وانتقامي نسيته بقت الشغله بيد الدوله  مرت 8 اشهور ع وفات المرحوم واني حته عمر كمت انساهه من ورهه هاي الحبوب دمرتني والمشكله ما اكدر اتركه
لحد يوم من الايام كعدت الصبح راسي ثكيل
ردت اسبح ماكو مي بالحمام الفوك نزلت جوه بعدني امشي ع الدرج شل رجليه اسم واحد رجع دمرني
سمعت امي وابوي يسولفون امي تكله لا تكله رحمه اهله عافوهه ومحد اله هسه لا كله هيه متريدك وطلكه ختولي ما تسوه هيج وحده باقيه ع ذمتك
ابوي يكله لا يمعود احنه ما صدكنه ينساهه وينسى مصطفى تردين اتهجمين بيتي انتي تردين تموتين الثاني خليه هيه ادبر حاله عسى ما تاكله الجلاب

رجعت لغرفتي اتعثر كل ساع واكع راسي يفتر يا ربي اني اتحلم نمت شويه وكعدت شويه مصصح اكثر اجت ع بالي رحمه  وكل لحضاتنه انعادت كدامي فارر دمي مجرد اذكر شخص منهم اذكر الي صار
متت راسي موتني هسه اشجابهه ع بالي وصدك اهلهه عافوفه لو اني اتحلم يي يابه اكيد اتحلم اصلا اني منين سمعت
رحت كمت دخلت لاحمام فتحت الدوش وجان صوت المي عالي اجه صوته باذني (امير لا تعوفني انت اخر امل الي بهاي الحياة ) رجعت سديت المي راح الصوت
فتحت المي رجعت تحاجيني وتكلي احبك انت كلشي الي بهاي الدنيا لا تعوفني
خررررررب اتخبلت وكسرت المرايه والغراض بالحمام طلعت ذييت روحي ع جربايتي وكمت اصيح بعلو صوتي الله ياخذكم منين طلعتولي صعدو امي وابوي يركضون قفلت الباب قبل ما يوصلون شربت حبايه ورجعت تمددت ع الجربايه احس روحي فصلت رحت بغير عالم

رحمه
اجه صفوان دك الباب وجابلي علاج واكل اتوسل بيه بس راد يشوفني اني ما كدرت اتحرك من مكاني مرت ساعه هيج سمعته دخل لغرفته وسد الباب كمت بيه ما بيه رحت غسلت وجهي وتوضيت واخذت الاكل والعلاج ودخلت للغرفه كعدت صليت ونمت ع المصلايه وكمت ابجي ربي فدوه اروحلك ساعدني ما اريد زواج ولا شي بس اريد مكان استقر بي والله تعبت والله تعبت.
حسيت عيوني غوشت وصارت الغراض الي يمي احسه تفتر عليه كمت بيه ما بيه سويتلي لفه واكلته كوه بلعته وشربت علاج ومقويات 
مرت ساعه واحس روحي شويه صحصت احسن لزمت التلفون واتغطيت ونمت بقيت اباوع بالتلفون بالصور صوري اني ونور وما اعرف عنهم اي خبر
احس التلفون رج بأيدي امير يتصل بك
امير يتصل بك 😳
كمت شمرت البطانيه وفركت عيوني غسلت وجهي ورجعت شفت مكالمات باوعت ع الساعه الي داك بيه ياربي دخيلك هاي هسه
رجع دك مرت الخ فتحت خط وايدي ترجف كلي
مرتي
حبيبتي
وين جنتي ليش مجاوبين
وكع التلفون من ايدي ياربي شيصير ويايه كبل سديته وكعدت اشهك وابجي ياربي هذه وين جان ليش هسه يلا اذكرني وره 8 اشهور
بقه يدز رسايل فتحي خط ولج فتحي خط عبالك توه يحجي وياي
جاوبته وكمت اغلط عليه وطبعا اول مره اجاوز ع شخص بس فقدت وما سيطرت ع اعصابي
كمت اغلط عليه وكتله انت مو رجال انت هيج انت هيج
تذكر من كتلي للموت اني وياج وين وعدك ياجبنان ليش هيج عفتني
مو كتلي انتي بس وافقي ومعليج تذكر بالحديقه مال مستشفى انت حقير انت مو رجال رحت زرت الامام وحلفتلي كتلي لا مصطفى ولا اكبر واحد رح يوكف بعيني انتي مرتي
تقبله مرتك بدون اكل وبالقطعه الفارغه خمس ايام
مرتك الكل عافهه وتبره منه
مرتك تلث مرات رادو يعتدون عليه كلي وينك انت وين غيرتك حرام عليك حوبتي اضل وراك طول عمرك تعرف شنو دمعت اليتيمه ولك فقدت صوتي فقدت عافيتي من وراك ومن وره هل الحب الاكشر
.......
بقه يشوفهن وميجاوب
رجعت دزيتله امير فدوه ساعدني والله مالي دخل اني انت حب حياتي والله اموت بدونك ارجعلي الله يوفقك
امير اريد ارتاح اني يم بيت صديقك صفوان ويباوعلي بنضره وصخه ويريد يطلكني منك وياخذني هو تعال ساعدني فدوه لعمرك والله تعبت بمعنى الكلمه
بقه ميجاوب
رجعت اغلط عليه واسب بيه وبساعه السوده العرفتني بي وهم ما جاوب لزمت التلفون وكسرته سويته طحين بالحديده مال شباك طلعت غضبي بيه
بقه صفوان يدك بالباب ويصيح فتحي شسويتي فتحي شبيج
هدئت وكعدت بالكاع احس راحت الرجفه مني
دكيتله ع الكتاب  ع كيف يعني ما بيه شي افتهم عليه وراح

..........
للحكايه بقيه ☺️