ولاني امراة الجزء 25 سوزان المندلاوي عافني وراح ..يمه شكد مشتاقه لاهلي بس احس روحي راحت ويا ..ضليت اباع عليه لحدمافترت سيارته ..وراحت الجهال طلعو عليه ..بوستهم .. طبيت شفت بيبي يمنه ام امي .. سلمت عليها ..وبوستها .. وضلت تسال بيه شونهم وياج ..خالج خوش جر الهم اذن ..اني اكولها الحمدلله ..اني مرتاحه وزينين ويايه بيبي بس ادعولي ..الله يوفقني وياهم .. ضليت الوب ع امي .. ياربي شكد مشتاقه الها. امي جانت ..بلحمام ..تسبح .. الجهال خبلوها بلحمام ماما ليال جتي .. وانتظرتها تطلع فتريت البيت كلة بلهفه .. عبالك اول مرة اطبله ..طلعت امي رحت بوستها وحضنتها .. كالت ولج هاي شصايرة ..تخبلين ..وتفرني ولج سمنانه فدوة شون متغيرة .. كالت مرتاحه .. كتلها ماما احبه ..ومرتاحه ويا بس لوما خباله وعصبيته .. وكل شويه ابوسها ..واشمها ..اوف ياربي الجنه بيها والله.. لليل جتي اختي يمنه ..طابه بشهرها وروحها طالعه .. خطيه كوة تمشي ..وتعبانه حتى مكدرت تبات يمنه ..كلها مورمه ..ضليت اضحك عليها خشم ويمشي كد مامنفوخه .. كالت ..مارتاح ..واخاف صير ولادة ..المستشفى قريبه عليه بقت لليل وراحت .. بقينه بلبيت اني وامي وبيبي والجهال ..امي تعبانه علمود سالفه ابويه ..بس من شافتني ارتاحت وبقينه نسوالف ..وهناك وكلبي يوحعني ع فهد ..اشتاق اله وهيج اتخايله يمي ..لو اتخيل ضحكته ورصعاته ..وارجع وي امي كالت امي من ذاك اليوم ..ابوج دز رساله الج وامانه ع حطتها محد فتحها ..اني كالت هيج ..كلبي كمز .. جابتها الي .. رحت كعدت ع القنفه .. وفتحتها ..واقرة بابا ليال .. اعرف صرتي الثمن لاغلاطنه اني وعمج .. بس انتي كد المسؤليه واعرف راح ترفعين راسي يابنتي اني صح عمج مو ابوج بس انتو واختج اعز من روحي ..وعد بس اطلع اجي اخذج واخلصج من عذابج لو اعرف ابيع اهدومي اطلعج ..اني رب العالمين امتحني بسجن وانتي امتحنج بيهم اريد منج الصبر بابا .. واني زين ..وعينج ع امج واخوانج ..اخواني ..مانهم شي زين ..لو جانو خوش عمام ماينطوج فصل بابا .. ادعي الله يعجل بطلعتي من السجن حتى اخلصج من عذابج ...سلامي .. اني سديتها ودمعي ..يجري ..ماعرف شكول ..شحجي امي اخذت مني الورقه وقرتها وهم ضلت تبجي .. كتلها ماما اني احب فهد ماكدر بدونه ولا اعوفه بيوم .. مرتاحه ويا كلش .. كالت الله يسعدج ماما ادعي الله يرجع ابوج النه .. بيومها ...كلام ابويه اذاني كلش ..كلت قبل لا اروح اكتب اله رساله اكوله اني مرتاحه ...قبل لا انام .خابرني فهد .. ضايج .. شبيك فهد .. مخنوك .. ليش قلبي .. اتصدكين ..البيت كلة مابي طعم .مابي روح .صاعد نازل ..عبالك مضيع شي يعني ..شنو .. يعني من امداج ..داكلج ..مخنوك انتي ماكو .. اووي..اووي .. قلبي .. كال لا تسوين هيج اوي ماوي ولج وين اولي بهليل .. ضحكت ..كتله حبي اني هم ضايجه بدونك .. والله لو ضايجه بدوني ماتعوفيني ..اجيج باجر .. لا فهود توني جيت ..كم يوم حبي.. ولج طاك كلبي عليج ..ليال ..احبج ..بروح ابوي احبج ..ماعرف شجرالي وياج مثل الضايع صاعد نازل ..يوميه مسودنتي بسوالفج ..ياتنكين ياتدلعين ..عليه وانه بلحالتين جدي مشتعل بيج .. واني هم اموت عليك والله .. لا ماتحبيني ..اذا تحبين ماتعوفيني .. ههههه ولك شون ابطل ماروح لاهلي .. لا حبيبي روحي بس ماكدر انام .. وسالفه الكاع صاطرة راسي.. ياكاع .. الحجي يريد يشتري كاع من عمام رشا وشويه بيها دوخه .. اهو هم جبت طاري رشا .. تروحلج فدوة .. يمه .. اي يمه تروحلج ..فدوة ..هي وعشيرتها وعمامه .. يمه يمه قلبي ميتحمل ..حبي باجر اطلع .. خير ان شاء الله .. لسوك اشتري غراض .. اي .. اروح يعني .. روحي بس امانه ..اتحشمي ..لبسي عباه .. فهد البس جبه .. لا عباه .. لخاطري .. انعل ابو خاطرج عباه ..اغار عليج .. حبيبي والله ماعرف امشي بيها لخاطري .. ضل يحجي عليه تاليه قنع ..وضليت اسولف ويا ..لحد ماغفه ....واني سديته .. وضليت ادعي ربي يدمه فوك راسي ..وميحرمني منه لوما رشا اني اسعد انسانه .. ثاني يوم ..اجه خالي يمنه ..وضلينه سوالف .. وحجيت اله شون مدلليني ومرتاحه وياهم .. بيومها مكدرت اطلع لسوك ..خطار يمنه ثالث يوم طلعت ..اني وامي والجهال ولبست عبايه اسلاميه .. فريت السوك كوله ..مخليت شي بنفسي واخذت سوار ذهب من فلوس الحجي .. وحرت شاخذ الهم هدايه .. سهام شاخذ لروحي اخذلها ..سيتات نوم وشموع .. الباقيات دشاديش .. وحمويني ضياء وقاسم سبح كلمن باسمه زين لكيت جاهزة .... بقى الحجي ..وفهد .. فهد عجبتني جداحه ..وحفرت اسمي عليها ..ليال .. والحجي ..هم يدخن ..جبتله وحدة ..بس استحيت احفر اسم سهام عليها .. خابرتها سالتها ..كالت لا خيه واكفه كتبي ابو عامر احسن .. ورادت مني لخوانها سبح .. كملت مسواكي وغراضي ..رحت للصالون رتبت روحي ..وردت اسوي خصل حمرا ماروني .. دك فهد ..اني يم الصالون كال .. الو هلو حبي .. هلا ليالي..انه يمكم .. وين يمنه ..هيج نص ساعه واوصل لبيتكم انتي وين اني بصالون .. شسوين . .مفاجئه .. وليش ماكلتي .. كتلك والله .. يصير خير انه انتظرج عجلي .. اني هم من الي يصير خير ..خبصتها .لام الصالون .اعرفه مخبل ..كملت شعري ..السوك مسافه قريبه علينه بس اني اخذت تكسي حتى لا يعصب ... وصلت شفتة واكف يم سيارته وواكف واحد يمه ماعرفه يسولف ويا اني ولا شايفته قبل ..منو هذا سالت امي معرفته .. نزلت السلام عليكم ..وطبيت للبيت .. ورة شويه ..فهد طب للكراج .. سلم ع امي .. وطلعتله ..بس ضايج مداعرف شبي .. كال يلا ..ليال حضري روحج .. امي كالتله ليش مستعجل باتو اليوم .. مقبل ..كال جيت ع ربعي هنا ..وجيتكم .. جان كلش ضايج ..حتى وصيت امي لا تلح عليه اعرفه من عيونه معصب .اوف ياربي خيرة شبي .. لميت غراضي وهدومي ..وخليت بايد امي فلوس وودعتها وطلعت .. صعدت ويا .. شونك حبيبي ..مشتاقه الك .. هلا .. شبيك فهد .. مابية شي .. الطريق كلة ساكت ويدخن ..ويسوق سريع ضليت الوب معقولة من ورة لبسي ..لو الصالون شبي ياربي ضليت ادعي الله ماكو شي واقرة ايات ..مابيه حيل رجف بعد .. كلت بس لا الحجي جبرة يزوج ..رشا ..اوف شسوي ..بس اريد اوصل ..حتى اعرف منه شبي ..وبقى ميحجي شي بس اعصاب ....ويدخن.. وصلنه ..ذب السيارة بلكراج .. وطب شمر السويج وصعد .. اني طبيت سلمت عليهم واحد واحد .. وبوستهم ..رحت ع سهام ..سالتها شبي ..فهد .. كالت مابي ..كال اروح اجيبها ماتحمل .ضجت وحدي ..بدونها ..كتلها سهامه ..الطريق كلة اعصاب .. كالت شمسوي يمعزايه .. كتلها والله مسويت شي .. كالت دصعدي شوفي شبي .. اني طلعت ..غراضها وصعدت .. طبيت ..كاعد بهدومه .. ع الجربايه ..ويحرك برجله وايدة متوتر .. جيت ذبيت غراضي ..ونزعت العبايه ..جنت لابسه ..تراك نيلي ..ووردي ..جديد .. وطلعت الجداحه ..خليتها ع جهه..حتى انطيها اله .. وفتحت شعري ..اباع عليه ولا رفع راسه عليه ويهز برجله ربي دخيلك شبي ..بس حتى وهوة عصبي شكله يخبل .. خليت عطر ..ورتبت روحي .. ورحت ..يمه كعدت بحضنه ..وخليت ايدي ورة ركبته شبيك ..حبيبي ..بعد ماعوفك ابد بسته من خدة ..وضليت ابوس بي واشم بركبته صد مشتاقه اله كتله ولك اموت اموت اموت عليك ... فهود شبيك والله كتلك ع الصالون ..ولك مشتاقه الك ميته عليك ..حبيبي .. رفع راسه عليه .. ضل يباع بعيوني .. حسيت حجي هوايه بيها .. شفايفه كامت ترجف ... كلي ليال .. كتله عيونها .. سيف منو .. اني نصدمت .. كتله شنو .. كال سيف منو ...ليال بقت عيوني بعيونه ....واحس الدنيا كلها اضلمت بوجهي وانعكد لساني ..بس عيني بعينه ... وللحكايه بقيه .. شهرزاد
