مساء العنبر ...
ولاني امراة
ج 2
كلها مسلحين عبالك منطقتنا دوله النا بس...
عدد السيارات ..
والمسلحين يرعب الرووح ..
وكلها متحزمه بسلاح ..
صغار وكبار ..
امشي وعيوني ..شاخصة ..
ادور ..بالكي اشوف فهد ..
صعدونا مثل القطيع ..
واحد يتبع الثاني ..
مشفت فهد ابد من سمعت الطلق وكعدته من النوم..
صعدنا
مشت السيارة واني ساكتة محجيت شي ابد جهال سهام ويايه ويمي بحضني نايمين بس هي ماكو كمت ادور بعيوني كل النسوان موجودة بس سهام لا
شوية وشينا وصلنا لمزرعه
وطب بينا ع الترابي
دقايق وصلنا
نزل بدينا ننزل هم رياجيل مسلحة
سالت فاطمة شكووو
جانت عيونها كلها دموع ..
كالت نبقى هنا وبليل يودونا لغير مكان
ليش
امشي لليله
مشيت وراها وذيال العبايه وشبل بايدي وجنطه بايد
كل شويه انجبح واكوم
اعدل روحي واتلفت محد حاير بيه
طبينا لبيت كلش جبير بكد بيتنا
اول ماحطت رجلي
عاطت وحدة
يبووو
وضلت اتهوس وذبو النسوان كل شي من ايدهم وصارو كبالها
يلطم حيييييييل اني بقيت بس صافنه اول مرة بحياتي اشوف هيج شي مشايفه ولا راح اشوف يعمري
شلون الشدة سوووها ويعيطون ووحدة بالنص
شبل ع عياطهم كام يبجي
كدرت اطلع من يمهم واتلفت واباوع كوة ..
وكفت بالممر واسكت بي وكفت وحدة بصفي بوستني
وكامت تبحي كالت اني بنت عم ابو عامر شايفتج بعرسج
متذكريني ابتسمت الها خزرتني
كتلها اي اذكرج
كالت
جا ليش ماجوليين وياهم تلمطين
كتلها شبل يبجي
عاطت بوجهي يبوووووو مشبع من عمه يبووووووو وطبت
جانت عبارة عن اوبرا عراقيه وي كلامهم ودكه رجلهم مثل الفلكلور اول مرة اشوفه
فترة وكعدو
وردو طبو نسوان وكامو نفس اللطم
تعبت حيل وشبل كل شويه يصرخ
رحت ووكفت يم فاطمه
كتلها شبل خبلني اريد انومه
صاحت
منيرة
جتي نفس البنيه
اخذتني وطببتني جوة
كالت هذا الحمام
وهذيج الغرفه
يلا دنصب غدة جني النسوان
نومي وتعالي
البيت رغم متروس بس احس فارغ وكئيب ومامريح ابد
طبيت كل شي غريب علية المكان الفراش البيت غرفه فرش
كعدت بالكاع وكعدت ابجي ع حظي كل شي
مدري حظ هالطفل ..
كل شي تغير
اشياء جانت فارزة بحياتي
شي يفصل عن شي
احس طاقتي بدت تخلص وتروح مني
احس كل شي بيه بدة يجمد
وين اني
والى متى هذا الضياع الي
داعيشة
بهذا البيت الي اذكرة كعدنا بي يومين وبثالث
من وجه الصبح .
طلعنا .شبل بهالفترة كلش تناحس عليه
وميرد احد بس يريدني
وفهد بعيد عني شكد ردت اوصل اله مكدرت
حتى لو مكالمه مرهمت
عفنا كل شي وطلعنا ع كد هدومنا وبس
هالمرة طلعتنا طوولت وعبرنا بيها غير طريق
عرفت احنا اتوجهنا لمنطقة بالبصرة اسمها الكرنه ..
الطريق كلش اذاني ..
وتعبنا اكثر اكثر من مرة شبل يتقيئ عليه
ويبجي الطفل بدة يتعب من الفرة الاماكن
اول مادخلنا البصرة
اذكر جنت فاتحه الشباك
ضربني هوى رطب ..
وبي حرارة قويه هذا الحجي جنه بشهر الخامس
ممتعلمه ع هيج جو
سديت الجامه
وكعدت
وبقيت اتامل شوارعها
هوايه سامعه عن البصرة بس اول مرة اشوفها
جميييله بشكل
واهلها حلووين
ضليت احفظ اسامي المحلات
افران الزهراء
صيدليه الامل
وغيرها وغيرها من الشوراع
عفيه عمر فريتني فرة معدله
من بطن بغداد الى الجنوب ..
وكفت السيارة
بمزرعه ..
بس فصاله يختلف هوايه عن الي شايفته
اول ماندخل بيها
بيها عدة غرف او بيوت صغيرة
شلون المجمع
بس صغار ..
وهذا مضيف ..ومفتوح
ضل يفر بينا ووكفنا كدام بنايه
الكل بدة ينزل
جان شبل بصفي نايم
ذابته ع الكشن
شلته لزمت ظهرة صاير مي وعركان
شلت جنطتي ومشيت ونزلت
اول مانزلت رجلي
وصرت برة
كفختي هوى دبك ..
بي خنكه ..
ردت اسحب نفس صعب عليه
بقيت واكفه بمكاني
اسمع احد ورايه يكول امشي
فزيت من الصفنه مالتي
واخذت ربع نفس يخنك الصدر
وشفت اهلنا ديطبون بالبيت طبيت بسرعه
وياهم
هي خطوتين بس هيج رطوبه مشايفه ولا اشوف بعمري
اول ماخطينا عتبه الباب
بدة العياط والتولول
والصياح ..ونفس الموال احس راسي صدع من عياطهم
نفس،البس اسود ولافين عبايه بخصرهم .
ماعرف يركصون يلطمون ..
الجو هذا كئبني زايد
