بقو يمنه اهل ابويه لليل ..واجه ابويه وعمامي .. الكل التمو يمه .. احنه بيوتنه بنفس الفرع واحد قريب ع الثاني .. همه 3اعمام ... ضليت الوب ..بس اريد اتفرغ وي امي .. بس صارت سوالف... اني شفت فون امي .. ع الكاونتر ..اتلفتت شفت ماكو احد اخذته .ضميته .... وصعدت فوك الكل ملتهي .. طلعت الورقه .. وفتحت فون امي واتصلت .. دك ..الفون وكلبي يدك وياه .. جاوب الو ..اني سكتت .. الو..الوو .. جاوبته الو هلو اني ليال .. هههه هلو شبيج مستعجله.. اني خجلت ..سديته .. كلت..شكد عيب ..هسة شيكول عليه .. كلت خلي يولي اني شجاني ودكيت عليه .. حذفت رقمه ..داطلع.من الغرفه ..اتصل ..اباع ع رقم نفسه .. كلت ماجاوب .. صفنت بيها ..كلت لا خلي اجاوب ..لايدك ..على امي وتصير مصيبه .. الو ليال شبيج .. مابيه .. لعد ليش سديتي .. ها ماعرف .. شلونج .. زينه .. شخبارج ...تمام ..اني اجاوبه واكمز اول مرة احجي وي ولد ..وجنت معجبه بي كتلة ..سيف ..هذا رقم امي ..اني ماعندي فون .. اهااا شعجب ..كتلة ماعندي .. لعد شلون نتواصل .. ماعرف .. كال ليال اني كلش معجب بيج .. اي .. شنو اي ..وانتي.. ماعرف .. هههه.ماعدكم ثواب منا منا توزعو ..وتجين اشوفج .. ضحكت كتلة لا ..بعد هوايه ..يلا نسوي منا بدت علاقتي وي سيف ..وصار حب بيناتنه .. بقيت ويا وتعرفت ع اخته طالبه وياية بنفس المدرسه ..وبنفس المرحله بس كلمن شعبة ..صارت صديقتي ..وكمت اتحجج بلدراسة..وي امي . ..واروح ادرس ..يمهم .. واشوف سيف ..سيف علاقتي بي كلش. حلوة وبريئه ..هنا ..اختي نجحت ..وطبت كليه ..واني نجحت ورحت اعداديه .. بس وحدة من عماتي رادتها لابنها .. بلبداية ..رفضت هيفين ..بس كلنه نعرف القانون ..منزوج الا من الاقارب ومنه وبينه .. شكد جانو يجون خطابة ..لاختي او بنات عمي وعماتي ميقبلون ..ابد ... انخطبت اختي لابن عمتي وسوينه حفله بيناتنه .. اني وسيف اتفقنه بس اكمل السادس يخطبني .. الكل عرف بعلاقتي بي من اهله امه وخواتة وجانو كلش يحبوني ..واروح يمهم ..ادرس ..ومرات هوة يكعد يدرسنه .. بس بوجود امه ..نكعد ..نقره ..او اني واخته ..نقره بغرفتها ..وحدنه ..المهم يمهم بلبيت واشم عطرة بي .. سيف صار كل حياتي .وخلاني اتحفز ..بلنجاح سنه بسنه لان يريدني ..اوصل ...بقيت ويا .. 3سنوات ..صرت بلسادس ..ودخلت ادبي ..هوايه جنت اسمع ..ناخذج وناخذج من اهل ابويه اني جنت اتعمد من يجون يمنه ماشتغل وماتحرك لو اسوي جاي مطيب واذب بي تراب لو اغسل المواعين او الهدوم كدامهم وابقيها بوصخها ..حتى يشوفوني مو شاطرة عود ..لو اضوج امي والاسنها ..وتضل امي ..تحجي عليه .من يطلعون طيح حظي ..وتحلف تكول نادرة ونظيفه ..بس محد يصدك اني كل هذا الي بي غايه ..وصح كامن يخطبن لولدهم من الاقارب وعافوني بحالي ..يعني مابقى واحد من ولدنه مزوج .. وبقيت اني وكم بنية ..بس اصغر مني بهواية .. ضمنت ازوج سيف ..بس بقى اهلي يقنعون .. مرة من المرات ..امي لكفتني احجي وياه .. هنا عرفت فلمي وليش هيج اسوي ..لعبت بيه لعب ..واخذت الفون مني ..وضلت تهدد بيه راح تكول لابويه ..اذا ماعوفه ..بقى سيف ميعرف شنو الي صار وليش اختفيت من رجعت اداوم حجيت لاخته ..ورة يومين ام سيف اجتي ..وحاجت امي ..عليه كالت ام ازاد احنه نريد ليال لسيف ومنلكة احسن منكم .. امي تحججت بلدراسه وصغيرة .. ام سيف ما..كالت شي ..كالت بس خلي نحجزها .. امي مقبلت وكالت بعد وكت خلي تتخرج من السادس .. عرفت امي تستحي تكولها مينطون لغيرهم وخلت الدراسه حجة ..توسلت بامي وذكرتها شلون اخذت ابويه عن حب وحاربت الكل من وراه ..هنا كلب امي رف عليه ..وكالت كملي سادس واني اقنعهم ..بس منا لذاك الوكت ماريد اسمع تحاجي ..مدة وامي رجعت الفون الي..صرت حريصه اكثر ..وبقيت وي سيف وفهمته كلشي اختي اخرت زواجها بسبب الكليه ..وهوة هم جان طالب بس اتخرج .. بسنه الثالثه ..من دراسه هيفين كامو يحجون لان طولت خطوبتهم .. كالو هية بقت سنه ..وتكمل ..والعريس تخرج ..خلي نزوجهم .. حاولت امي وياهم بس تتخرج بس مقبلو حتى ابويه مقبل ..ووافق ...ع الزواج وحددو موعد الزواج .. وهيفين هم حضرت روحها ..وصار العرس ... حضرنه روحنه من بدلات ومكياج ...والكل يمنه .. جتي اختي من الصالون طالعه لعابه تخبل ..اني جنت لابسه ..فستان ..ليموني مال سهرة .. شويه وجوي الزفافه .. ابويه الي هوة عمي من ضمن الزفافه بعتبار ابن اخته وبت اخو العرسان .. مزيقه ودك وركص ....وهلاهل .. الحفله جانت قاعه .. فمن طلعنه برة .. كامو يرمون ابويه وعمي الثاني ..حركو الدنيا رمي .. لحد ما امي ركضت عليهم ..وبطلو .. صعدنه بسيارات .. وصعدت العروس والمزيقه .. نسمع صوت صراخ ..من الجيران ..الي جانو واكفين ..من جيرانه علمود العرس راحو ..يمهم .. وطلع واحد من بيتهم يهد علينه ..ويصيح .. اجه ركض،لسيارة العروس وجر العريس بلكاع ..نومه ..لحد هسة مدنفتهم ..شي .. بس عياط وصياح وناس جر بناس .. وخرو الولد .. يصيح كتلتو اختي كتلتو اختي .. مدانفتهم شي منو كتل منو ..التمت العالم ..وطلعت منهم سيارة ..بس بقو مجلبين بعمامي .والعريس .. هذول جيرانه جديد اجوي يمنه ..حتى منعرفهم مين .. صار عزة مو عرس ..ورة ساعه ..كالو ماتت..المرة .. واجتي الشرطه اخذت كل الولد اجتي الشرطه اخذت .ابويه وعمامي ..وولد عمي شكو شاب واكف اخذته ..بقينه احنه مثل حيارة ..امي تخبلت العرس صار عزة ..علينه ..اختي بلبدله ضلت ..وتبجي وعياط وصياح احنه .. والعالم الي كبالنه دك ولطم مدانفتهم شي ..جتي ام سيف وسيف ....مفرفحه ..كالت ماتت بنتهم ..واكفه ورة الباب تباع ع المزيقه .والزفه وجتها براسها طلقه موتتها بمكانه .. وكالت لاحد يطلع منكم من الباب ذول مو مثل طبعكم .. ترة تصير دمايه بيناتكم ..احنه الرعب اخذنه ...كلمن رجع لبيته وتكتر ..بقن عماتي وكلبو العرس عزة ..علينه بقينه امي ..واحنه ودزينه ع خوالي ..يمنه.. بنفس اليوم ..البيت الي جان بي عرس صار بي عزة .. وشارعنه انسد ..من السيارات ..والعالم .. اني كل دقيقه اصعد بسطح اباع ..ع ذولي ..جيرانه ياسيارة تطبك ..ينزل نسوان ..دك ولطم.وصياح من الباب ملخن ..روحهن ..قلبي نمرد عليها ..ابجي ع الي ماتت مدري ع حظ اختي مدري اهلي الي كلهم انسجنو .. وكل شويه تندك الباب واحنه ننهبط ..جوي خوالي .. واجوي ..رياجيل عماتي ..والكرابة للليل بيتنه انترس ..رياجيل .. اني عابدت السطح وكعدت .. هيفين ..ملخت روحها بجي .. امي صفرة ..مدري تلطم مدري تتوسل بلولد يشوفون حل ..واني ..مكابله السطح.. مصيبه ووكعت ع روسنه من الرمي ..ماتت بنيه ..واحنه تعزينه .. راحو الولد للمركز ....كالو ميطلعون هسة لحد ما ..يشوفون اهل المجني عليها ..وطلعو كم واحد الي اصدقاء العريس ..بس ابويه وعمامي و ولد عمي بقو بلتوقيف ..علما التحقيق يخلص اخوالي ..بقو يمنه ..خافو بعد ماعرفو جيرانه من العشيرة الفلانيه ..عرفو السالفه مراح تفض ع خير .. خابرت سيف .. من الصدمه هم ..ميعرف يحجي .. سالني ع عشيرتنه اني ..ماعرف ..بهلسوالف .. كلي ليال ماتعدي اذا مايفصلوكم .. كتلة احنه خوما قصد قتلناها .. كال دام رمي يعتبر قتل متعمد .. شنو يعني .. بابا شبيج ياخذون منكم دم لو فلوس .. سيف عفيه هبطتني مدافتهمك .. حياتي لا تخافين ماكو شي .. زين انتو ذابين جرش ..وي عشيرة ..قويه جرش ..شنو.. اهو ليال ..شيفهمج ...باعي لا طلعون ولا طبون بهل كم يوم .. ليش سيف .. ليال سمعي كلامي .. اوك ..ماطلع ..حتى خالو كال ..ترة ولد عمي راح يوكلون محامي .. متفيد اذا متحلوها وي اهلها .عشائريا . ..ترة تصير دم ..لحد هسة الي سمعته يكولون كتلو بنتنه .. شنو ..ترة رمي عشوائي وشنو دم ياخذون.. روحي ليال ترة راسي راح يطك وانتي كل شي متفتهمين .. بهلاثناء صاحوني ..اني سديته منه ونزلت ..جوة .. سويت جاي للرياجيل ...واسمع بحجيهم وراحين ع شيخنه يتفقون ويا..وشيخ خوالي .. اسمع خالي يحجي ع اهل ابويه .. يكلهم راح يكسرون ضهركم بلفصل ..كله بسببكم ..ضالين بلقوقعه.والعنصريه مالتكم لا تنطون بنات منكم وتناسبون غير عالم ولا تزوجون من العالم منو يوكف الكم ..هسة .. اني انزل وارد اصعد اول مرة بحياتي اشوف هيج حسب حجي العالم ..راحو يدفنوها .. صعدت تقريبا ب12..بليل ..داباع .. شفت 3سيارات عاليه ..طبكت ..يم بابهم .. نزلو منها معكلين .. واحد منهم ..بس ضلمه ومو واضح ..جر سلاح .. واجه ركض يم بابنه .. وطلعو ..عليه ..ولدهم ..جرو ...وضل ..يصيح ويعيط ..اني متت ..من الرعب ..اريد افتهم ..مفتهمت .شي .. بقو ..رياجيلهم ..بلباب ..لحد ساعه 2اني اراقب .. بس هذا الي هجم على بيتنه جان شيريد يسوي ماعرف .. نزلت مكلت لاهلي ..خفت .. رحت بفراشي افكر السالفه مو سهله ولا راح تفض ع خير .. ثاني يوم الصبح... كعدت ع الهوسه ..واسمعهم يحجون بعطوة مدري شنو .. مدتها 4ايام ..بس مدافتهم شي .. كمت من فراشي ..غرفتي فوك قبل لا انزل ..طلعت بسطح ..السيارات رايحه وبابهم ..مفتوحه بس ماكو احد ولا هوسه .. رحعت سديت باب السطح ..ونزلت جوة ..امي كاعدة بلكاع وطاكه بجي ..اختي ..هم ..وخالي الصغير يمهم.. ماما شكو ..متحجي بس تبجي ..يمه شصار .. انهدت بيه وحيل تضرب ع وجهها .. وتعيط ربي دخيلك حلها النه .. خالو شكو .. محد يحجي .. ورة شويه ..كالولي .. رافعين دعوة ..قتل ..ع ابوج ..بعتبار الزفه و الرمي من بيتنه .. ويعني .. امي كامت تلطم ..شنو يعني ..لو يعدمو لو ينحكم مؤبد .. وفوك هذا منطين عطوة اهل البنيه..اذا مكعدنه وياهم يكتلون منه .. يومه ..ربي دخيلك ..شنو هاي ..اكو قانون اكو محكمه .. خالي كال حجي المحامي ..يكول فضوها عشائريا ..ويبقى حق العام اني اخفف الحكم بس يتنازلون عن الدعوة .. والولد باجر يطلعون بس ابوج يبقى .. زين خالو ..شنو يكومونه .. والله يابنتي ماعرف طلباتهم دزينه عالم ..وراح ننصب جادر ونشوف .. باجر يطلعون الولد ..ونتفق .. واذا رحتو شتكيتو انتو .. ليال اسكتي ..متفهمين شي .. مر علينه اليوم برعب .. طلعو الولد ..وطلع العريس ..اختي اجتي عمتي اخذتها ..المسكينه لا تهنت بزفه وعرس ةلا شي وابويه راح بسجن .وباقي الولد طلعو .. وبقو يتحضرون ع الكعدة .. اني من يلتمون يمنه اوكف اسنط ..عليهم .. اسمع خالي يكلهم .جبت ناس اجاويد .. راح تحلها ..بس حضرو فلوس وارضو بطلباتهم .. هناك وارد اصعد فوك ..سنطه .. ولا عبالك ميت ..حتى فاتحه ماكو .. بهاي الهوسه اخابر سيف بسطح وافتهم منه .. واحجيله الي يصير .. سيف كال فاتحتهم مو هنا بلمحافظات سوهه.. وضل يسولفلي ع العشاير والفصول ..اني اول مرة اسمع واعرف ..حتى سيف حجة ع اهلي ع منخطلت وي العالم وناسب منهم ع الاقل يوكفون النه .. بقيت بين السطح وبين الجوة .. كامت اشكال عالم اطب النه .. ماعرف مين ..ويا خدري جاي ياجيبي مي ..هلكت وامي فدمرة تاذت ..والولد رايحين جاين ع ابويه .. ويدزون عالم ع اهل البنيه ..الي ماتت.. ماعرف شون مرت الاربع ايام .. الي فهمته اذا ..ما نكعد وياهم ..يجون يهدون علينة.. يعني ..سالفه كبرت ..كلش .. والكل حاير ..عمامي دكو صدر ع شيردون ننطي ونلم ونطلع ابويه صار يوم الفصل ونصبن 3جوادر سدت المنطقه حتى دوريات شرطه وكفت
