عباس:
اسبوع كامل وابو مروة ببغداد اريد احجي وياه اريده يرجع يخطب الي اللي رايدها ولما رجع رفض رفض قاطع وما قبل يروح يمشي عليهم امي كانت وياه وساندته وما كالوا السبب شنو ولا ليش هالكره ربطوا ايديه ورجليه وكالوا ما تاخذها بس قلبي ضل حر وما يكدرون يربطوه وهو كل يوم رايح يمها
كل يوم اروح للكاع ما اشوفها واموت من قهري وضوجتي اريدها بعد ما بيه اصبر وعدنا المره بس رجلها يشوفها وين ما ادير وجهي ملثمات صرت اتمنى لو المحها عرفت بيها تمتحن من شفت اختها توصلها للمدرسه حتى شيل تشيلها من يعصاها المشي حبيت حرصها عليها واهتمامها اي هاي حبيبتي وكل واحد يحبها احبه راقبتها تمتحن بمدرسة قريبه من المستوصف وكت جيتهن ووكت طلعتهن اتحجج بالتدخين واني ما ادخن واوكف بالباب ادخن لحد ما تجي
عكب اسبوع مرار كنت طالع من المركز الصحي وفات قلبي من جدامي يمشي كانت تعرج ومشيتها ببطئ ووحدها يا ربي فرجك شكد حلو
ما شفت نفسي غير واصل يمها يمكن تخبلت لو يشوفني احد طلقة براسي وبراسها
شمس:
كنت طالعه من امتحاني الاخير فدا تأخرت عليه كل يوم هي تجيني وتطلعني للبيت لان رجلي ما اكدر امشي عليها بس ماا اعرف ليش اخر يوم تأخرت طلت اتمشى وهي اكيد تتلكاني بالطريق واني فايته من يم المستوصف اسمع اسمي بصوت ناصي مال زلمه راد دمي ينشف صخام بعينج شمس منو اللي يعرفج وماشي وراج اني ملثمه ولابسه العبايه ومنزلتها منو اللي عرفني غلست واريد اسرع مشيتي حسيت بي صار ويايه يمشي لان اصلا اني بطيئة بالمشي
-شمس اوكفي
انداريت بخوف وشهكه ولكيته نفسه الدكتور اللي شافني قبل اسبوعين اريد انهزم اتبخر وين اروح ورجلي زايدها تمشيني مترتين وتتعب
دنكت عيني بالكاع ورجعت امشي بس احس نبضي صار سريع وصوت قلبي يمكن ينسمع من بعيد والله لو يشوفني ابويه بعد احلم اوصل المدرسة وهذا مستمر يمشي وياي
-شمس مو احجي وياج اوكفي
كرر كلامه بتشديد واني عيوني جرت دموع خايفه لا شنو الخوف احساس حلو يم اللي احسه
-عوفني لا تلحكني ما تستحي انت ما عندك عرض وتخاف عليه والله ان اهلي شافوك ما يصير خير
-عندي والله وغالي عليه وانت ضمنه تره بس اريد احجي وياج سالفه وامشي
-ما عدنا سالفه وروح منا عيب من الناس
مشيت بسرعه ابتعد عنه وهو رجع وشويه وطبكت سيارته يمي عزه بعينج وطين براسج يا شمس هذا شبي شنو هالفعايل مخبل اكيد نزل واجاني
-امشي اوصلج لبيتكم اليوم فدا ماكو
-عوفني الله ماخذ رايك انت شني موكفني بالشارع الناس تباوع علينا الله ياخذك
بين ما اتعارك وياه لمحت فدا وطرت يمها وبدال ما ترزله ترزلت اني وراحت اله مدري شكالت اله واجتني
فدا:يلا امشي فضحتينا كلت الج الوجه فتنه وانت كاعده كباله مطلعه الوجه وهاي النتيجه
-والله فدا هو لحكني اني شعليه ابجي واتوسل بيها تصدكني وهي عصبية نار صارت
