----
رضا :
كاعدين وبدا غانم يحجي بالخطبه كنت مدنك والعب بسبحتي وافكر شوكت الله يفرجها عليه واني هم اجي اطلب منهم غايتي بس سبقني هالغانم
غانم:اليوم احنا اجيناك يا ابو محمد وطمعانين بكرمك وحق القربى والعشرة القديمة وانت تعرفنا زين وتعرف كل شي ببيوتنا احنا اهل وام محمد اختي واني اليوم اجيت طمعان بكرمك ما تردني لان انا خال الولد وجاي اطلب المحروسات بناتك الله يسترهن لاخواني ابو مروة ودكتور عباس وهاي الناس كلها جبناها ومشيناهم عليكم ما تردونا
اني من خذلتي شلت راسي وعيوني صارت بكصتي هذا شيكول اهزله راسي بلا وهو مستمر اعض شفتي ماكو هو يباوع الي ويغمز ويضحك ويرجع يكمل واللي فاجأني اكثر لما ابوهن كال كلامه
ابو محمد:جيتكم على راسي وهاي كدام الشيوخ بناتي تحت امركم كبعوا واخذوا احنا وين نشوف احسن من الشيخ ابو مروة يشرفنا بنسب على راسي انتوا وجيتكم واعتبروا طلبكم تم
غانم:كفو منك ابو محمد خلص نقرا الفاتحه
قرينا الفاتحة واني مو مصدك اللي صار زين شلون وشراح نسوي وفدا حتى وجهي ما تريد تشوفه يلا هي بعد صارت ونشوف التالي
طلعنا وصعدنا بسيارتي اني وغانم وانهديت بي
-بالله يا ابو فاضل هاي سوايه سويتها
-شسويت
-مو راضيه هي شلون غصب الله يهديك
-ومن شوكت الهن رأي بالزواج يمنا...باوع الي بطرف عينه يستفزني ... نطيناهم حليمه بنت ١٤ وزفيتها بيدي وهي تبجي ما جانت قانعة بي وزفيتها لبيته خليه يرد النا هو هم
-غانم لا تخبلني
-ابو مروة ما اعرفك وانت قلبك رهيف ههههه اجبرها يا خوي اجبرها ما بيها شي تره مرات الحزم مريود وانت اشو صاير رهيف من يمها
-انت ما تعرف اللي صار
-اعرفه من اول للتالي وما ينراد هالكثر معقدها ابوها نطاها وهي مجبرة تنفذ بعد والباقي يمك خو ما يوميه ندك بابهم كلت فد مره نخصمها ههههه الله عليك ما فرحان
-هههه والله يا غانم ما ادري اكذب على نفسي طاير من فرحتي بس.....
-لا بس ولا غيرها عيش يا خوي والله انت معقدها عمي النسوان اشكال والوان مثل الفواكه وانت كل يوم لازم تجرب صنف هههه....يمعود لا تضل مجفي هالوجه ولاطم عليها لا تخلي بنفسك
-اي مو صرت غانم ههههه
-شكو بيها اصلا احلى من اثنين يتعاركن عليك ماكو تعيش ملك صدكني بس كون تعرف تمشي امورك وياهن وتاخذهن بهداي وتلعبها صح
-هههه غانم بعدني بالاولى تعزمني عالثانيه هو اني محصل هو وين اكو زلم مثلك استاذنا انت عمي محد يلحكك هههه
رجعت لبيتنا وتباركلي عباس كدام امي واخواتي وكلهم جفلوا من سمعوا الخبر ومحد فرح الي رغم اخوي راح ياخذ اختها وهنه طايرات بيها مشيت وتركتهم ليش بس سعادتي ما احصلها ليش راحتي بعيدة ليش الضحكه ما ترهم الي ادري بنفسي شيخ وادري لازم اكون جاف بكل شي بس هم احتاج جانب بحياتي ارتاح اله يكون بي ضحكتي وفرحتي لو كل الناس لازم ترتاح براسي واني احصل بس التعب امي اقرب الناس الي من سمعت حتى ملامحها تبدلت جنت اظنها تفرح الي لان تشوفني متلوع متعذب ما الي لا مره ولا ولد الشايل اسمي ...قهرتني بردها البارد وكفايتها بالكلام بعبارة بيها الخير وكأن الموضوع ما بي خير دوم
