اعتذر عن التأخير حبايب النت انقطع اليوم😘😘
--------
رضا :
قضيت ليلتي الاولى محروم من حبيبتي وحضنها رغم نايمين بنفس المكان والظاهر حياتي وياها راح اقضيها اعد ليالي حرمان يلا المهم هي يمي حتى لو ما تريدني راضي بكل شي
ما مصدك قبل دقايق كانت بحضني وشميتها واخذتها الي زوجة وصار بيناتنا فعل المتزوجين اووف شكد سنين انتظرت هاليوم بس مثل كابوس كانت بين ايديه والي وبعيده بكل شي احساسها متحجر ما احبك تدك براسي اي حقها شتحب من واحد ما كدر يوكف بوجه اهله ويكول احبها واخذها غصب عن الكل اني خذلتها واخلي الايام تعكس الكلمة وتصير بغير وجه
نامت عالارض وحضني اللي متانيها سنين ضل بارد ما بي هي
بالموت يلا اجاني النوم ما كدرت انام اريد اروح اتوسلها ابوسها بس ما اكدر عزة نفسي وكبريائها يمنعون بقيت بمكاني وهي بمكانها المهم متزوجين وبنفس المكان هاي كافيه الي
فتحت عيني توها طالعه الشمس واني متعود اكعد من وكت نهضت اريد اباوع لفدا ما مصدك هي بايته عندي الليله مثل احلامي الدائمة بيها
باوعت الفراش شايلته ومرتبته وهي ماكو ونزلت اركض معقوله كل هذا حلم سمعت صوتها بالمطبخ دخلت لكيتها تسولف ويه مروه بنتي ومسويتلها ريوك شافتني دارت وجهها وسكتت لابسه اسود مثل لبسها الدائم عروس بصباحيتها بالاسود طالعه مبين كلش فرحانه صبحت عليها ما ردت عليه مستمرة تشتغل دخلت امي للمطبخ وشافتها وشهكت
ام رضا:ياا هاي شنو فدا ليش تشتغلين يمه ما يصير انت عروس
التفتت فدا الها
فدا:صباح الخير عمه تعالي تريكي دا اسوي ريوك لما يجون اهلي جايبين صبحيتنا صاير الظهر كلت نتريك وخطيه مروه كعدت جوعانه محد منطيها عشا بالليل ملتهين بالعرس
اندارت تكمل شغلها وابد ما عبرتنا بكلمه ولا اشتركت بحديث بقت مستمرة ومتجاهلتنا
شويه وامي سألتني بهمس على ليلتنا ابتسمت وهزيت راسي وامي هلهلت والتفتت الي
-مبارك عليك يمه كون تترسون هالبيت جهال
دنكت اضحك وفدا بنفس السكون
حضرت النا السفرة وكعدنا نتريك اني وهي وامي وبنتي الحمد لله ربي بلكت تلين ويايه
شويه وخلصنا وهي صعدت واني صعدت وراها اريدها ما شبعت اصلا ما شفت شي منها ولما
دخلت كانت دا تمشط شعرها اللي اموت على كل خصله منه تقربت اريد المسه ابتعدت وكامت لمته بقراصه وشالته عالي ولبست حجابها
-هاي ليش لبستي الحجاب شنو راح تنزلين
ما جاوبتني وكعدت تعدل بالغرفة عصبت من اسلوبها
-فدا احجي وياج جاوبي وكافي هالاسلوب عيب تتجاهليني من احجي وياج شني زغير الكدامج لو راح تقللين احترام لان شفتي مجال
- ها شيخ كنت تحجي ويايه
تباوع بنظرة كلها تشفي استغفرت ربي وطلعت من يمها قبل لا اسوي مصيبه
نزلت بالبيت ساعتين وبعد ما صعدت يمها امي كاعده يمي وبنتي مروة ماكو
-يمه مروة وين
-كالت تصعد لفدا وصعدت وانت ما تصعد ليش هنا
-لا خليني ما عاجبني اصعد
-يا شجالك اليوم الله يرحم جنت اتوسل تكعديمنا وانت كله كاضيها بغرفتك دامك موجود بالبيت
-يمه عوفي هالحجي ادري شعندج اسكتي لخاطر الله وفدا محد اله شغل بيها عسى ما تطركم بحجار خلوها شتسوي اني راضي
-يمه تستفلت عليك هيج شنهي خلوها
-اني قابل ولا تخافين ما تستفلت ادري بفدا شنهي وادريها تحشم وعقلها جبير بس لا احد يندك بيها
