وهذا بارت ثاني وتدللون حبايب
فداء:
رجعنا من الكاع وشمس مثل واحد ضاربيه براسه دايخه خطيه اكيد من الشغل وهي ما متعودة بس خليها تجرب حتى تبطل من كيفها ما تريد الدلال الغبيه هو احد لاكيها
دخلنا للبيت لكينا ام رضا عدنا شفتها واتعوذت من ابليس وكل الشياطين تتكامز كدام عيوني فتنا للبيت شافتني سلمت عليه ورديت من وره خشمي عليها
-شلونج يمه فدوى اخبارج
-الحمد لله
تخطيتها ودخلت وورايه شمس منزله لثامها ووجها يريد يطك من الحمار وهاي العجوز وكفت وتصلي عالنبي وتتغزل بحسنها
رجعت سحبت اختي واخذتها لغرفتنا مو ناقصنا هم منهم دخلنا للغرفه وشمس ذبت روحها بفراشها مثل واحد فاقد على وجهها
-ها شمسه شفتي شلون راحتج هنا شلج بالكراب واني مدللتج شمس شوفي ايديج
سحبت ايديها اشوفهن الها مجرحات من الحشيش والشغل
انت ما تكدرين تشتغلين ربيتج بدلال ومو هاي العيشه اللي اريدها الج شوفي حال خواتج وحالي شلون عايشين انت حلوة الف يتمناج اريدلج الاحسن بس قبلها تدرسين وترفعين راسنا وتاخذين شهادة واخليج تطلعين منا من هالمكان وعودك من تصيرين لا تنسيني اريد من الخير جانب يا اخيتي ادرسي تعلمي طلعينا من هالحياة الصعبه ومو بس انت كل اخواني راح اخليهم يوصلون عسى واحد منكم يردها الي
-ان شاء الله فدا اني ما راح اقصر وياج والله ولا انسى فضلج وموقفج هذا بس اني ما اريد اصير ثكل عليج
سكتنا شويه ودخلت حليمه بصوتها اللي مثل السم على مسامعي تضحك ضحكتها المسمومة
-فدا مرة عمي جايه تشوف شمس لابنها الدكتور والله وسحورتجن جابت نتيجه يا بنات خيريه
وكفت وتقربت الها اريد اذبحها
-شوفي يا حية التبن انت وابن عمج ما ناطيه مره احنا وحتى سحورتنا ما نخليها على هيج سلابات هاي لو نريد نسويها مثلكم وتسدين حلكج والسالفه ما توصل لابوي والا قسم بالله ما اتردد بذبحج لو برمشة عين دير بالج وحيج عينج يوصل الحجي لابوي وهاي العجيز اطرديها لا اطلع اخزيج واخزيها
-وشكو شعندج عالبنت خليها تتوكل لبيت رجال ليش توكفيلها لو تريديها تبور وتعنس مثلج
تعاركنا وطردتها تدفع والتفتت لكيت شمس تبجي بسكوت انداريت الها بعصبيه
-ليش تعوين رايده تعرسين
-دخيلج فدا ما اريده
-وانت وين تعرفيه وما ترديه هذا ابن عمها الطبيب اللي خيط رجلج هذاك اليوم
-اعرفه عباس
عيونها جحضت وشالتني من ياختي علكتني
-لا يكون بينكم شي ولج
ارتبكت واختي اعرفها زين اسكت خايفه ردت اموت بس لازم افهمها ما عندي شي وياه ولا اعرفه
-شمس هذوله ما نريدهم احنا لا تشوفيه طبيب تره والله الكناس بالشارع احسن منهم ما عدهم كلمة ولا يصونج مو زلم والله هذوله ما وراهم غير الاذية وكسران الخاطر
-واني ما اريده فدا عيوني الج بس لا تخلين ابوي ينطيني اله
-واني وياج اخيتي ما تنجبرين على شي ما تريديه
