فداء:
مرت ايام طوال واني عند اهلي ابوي ما كان يحجي وياي وحليمه تبث بسمها بس ساكته عليها لان ما الي خلك احجي مرض وفقد وضياع كانت مشاعري كل ما اذب ملابسي اريد اسبح اشوف بطني ماكو ابقى ابجي لحد ما تفرغ عيوني هالمره ما الي قوه ولا اكدر اواجه ولا بقى بنفسي شي يستدعي اعصب لاجله
سكتت بس داخلي انكسر والي زاد عليه رضا لا برر ولا اعتذر وعرفت شكد غاليه عنده اني ومهمه سكتت واحتسبت عوضي عند ربي ما اريد اجر من بشر
بهاي الفتره اشوف اخواني الصغار صاروا يجون يمي وخصوصا محمد يكعد ويسولف حبيبي كبران وتوه اختطت شواربه وصوته صار يضحك عمره ١٢ سنه بس طول بضخامه وهوايه بي شبه مني وعصبيه شايل مثلي ضبط
رجعت للزرع والفلاحة ورجعت فدا القديمه بس بصورة ثانيه صرت امشي وره اخوي محمد وصرت احس عندي سند او بالاحرى حسيت بهالشي
تسع اشهر مرت واني ببيت اهلي لا هو رجعني ولا اني رجعت وما شايفه احد منهم صار محمد صديقي كلش وحتى لامه يسكتها اذا رادت تتجاوز حدها شفت اخويه كبر وقوه عوده ورجعت تمسكت بشخص واريد بي خير لنفسي من يكبر اريده يشيل عني هاي اني ركضت للكل وما افتهمت محد منهم وافاني حقي
شمس تجينا كل فتره وخطيه حملت بابنها الاول وهي طالبه اعداديه وكانت تتعب كلش وقربت ايام ولادتها وكالعاده اني لازم اكون وياها واجا عباس اخذني الها
عباس شكد كنت خاطئة بحكمي الاول عليه طلع عكس ما ظنيت وثبت شكد عنده حب لشمس
وصلت بغداد واني جايتها مرات كلش قليله فرحت بدخولي الها حلوة شوارعها وبيوتها اني لابسه عبايه مال راس اباوع للنسوان هم مستورات بس لبسهن حلو كلش ومرتب
وصلنا بيت حلو بمنطقه هادئه كلش ونظيفه ونزلنا وفتح الباب عباس ودخلنا يرحب بيه لبيت اختي اللي انصدمت بشكل بيتها وشكلها هي بداخله كانت لابسه دشداشه قصيره كلش وبطنها رافعتها وفاتحه شعرها بطول ثوبها يعني اني بالحمام استحي البس هيج وشمس تتمشى بي بالبيت
هجمت على عباس تبوس بي واني من فشلتي ضميت وجهي بهالعبايه
راح عباس لغرفتهم و اجتي تسلم عليه استحيت وهمست باذنها
-لج شميسه عيب هاي شلابسه انت روحي تستري
-هههه ليش اتستر من اختي لو من رجلي
-لج ميصير هيج شمس عيب حتى لو رجلج مني اتستري اني استحي امشي ولج والله عباس ماخذ رايج
-هههه فدا شكد مشتاقه الج ......دمعت عيونها
حضنتني وتبجي ببالها اني شايله عليها لساني
-فدا سامحيني
-وانت شعليج شوفي شمسه اني ما مقهورة عليه ابد لو يريدني يعرف وين اني جان اجاني وافتهم مني ما الكم دخل انتوا بس هو اختار الفراق واني مستحيل ارجع لا تضلين تبجين
-فدا شكد كلبج طيب اني السبب بفراقكم
-ابد مو انت احنا ما نتفاهم لا اني ولا هو واني ما زعلت بيوم منج
حضنتني وضلت تبجي اخذتني للغرفه اللي مخصصيها الي لان راح ابقى هوايه عدهم لحد ما تولد ووراها فترة ابقى لان ندخل فترة امتحانات والطفل محتاج يبقى عندي
