فدا :
كعدت المغرب على ايده تلعب بشعري وحاضني من خصري متلفلفين اني وهو بشرشف السرير نهضت بسرعه من حضنه كافي لهنا تخبلت اليوم شبيه هيج سويت بنفسي دخلت للحمام سبحت ونشفت جسمي وطلعت هو كاعد ينتظرني
-ها فدوى حبيبتي اذا تعبانه لا تنزلين نبقى هنا
-لا ما بيه شي اريد انزل هسه شمس ومروة يدورون عليه واريد احضر للعشا
وكف تقرب الي حضني قربني اله
-الناس كلها الها بيج حصه صايرين الا اني ما الي شي لا ضحكه لا بوسه لا حضن كاضين زواجنا معارك وثارات ياهو اللي يغلب وياهو اللي يكسب
-شتريد اكثر اللي تريده دا تحصله واليوم حصلته بزيادة همين
-اني ما اريد فراش وبس اريد مرتي تداريني وتحبني مثل الباقين مو كلهم تداريهم حالي حالهم لحد ما نرجع احباب مثل اول
-ما نرجع مثل اول انت تدري زين واحنا مو احباب اني ما عاد احبك
حطيت عيني بعينه اريد اتحداه مثل كل مره ما كدرت اشوف ضعفي بعيونه نزلت راسي بسرعه اريد اطلع جرني وكفني مقابيله
-لا تكولين ما تحبيني اذا ما تحبيني بارادتج تحبيني غصب عنج بعدين اللي ما تحب ما تسلم هيج ما تفقد اخر ذرة عقل براسها بلمسه من حبيبها بلسانج كلتيها وسمعتها
-والله عاد كل موقف واله كلمه واني هسه تندمت عاللي كلته لان مثل ما كلت يمكن عقلي شويه غاب عني لا اي امرأة هيج تكون اذا صارت بمثل موقفي
-غصب عنج تحبين مو بكيفج
-والله عاد هاي ما بيها جبر
عفته ونزلت بس جسمي كله يرجف تأثيره لساه ما تركني اخدر من اتذكر يومي وياه واحن ارجع اله بس كافي عاد حتى لو احبه باجر عكبه تصير ويبيعني مره ثانيه ويوكف يتفرج على جرحي ما يداويه اليه
نزلت دمعتي على خدي واني اتذكر يوم عرسه الاول مو بعيد كاعده عنه حضرت حنته دخلت بيتهم وكانت اول مره الف وجهي وكفت ويه النسوان اللي يتفرجون على زلمهن بالدبكه ويهلهلون الهم وبحديقتهم اشوفه يجوب بعرسه ما كان مقهور ولا زعلان ابوه شلون يضرب اله طلقات وهو بثوبه الابيض بيومها هو يدبج والطبل يدك براسي وهلاهل عرسه ترن باذاني اني هلهلت دموعي عليه بساعتها دنيا مغرب حنته واني احس روحي تنسلب مني
ثاني يوم بزفته هم ما تحملت رحت اشوفه بيت الشيخ مفتوح وعرس ابنهم واي وحدة تريد تفوت عادي واني افوت لابسه العبايه ومنقبه محد يعرفني
دخلت كانوا جايبين نجيمه لبيتهم لابسه الثوب الابيض ومصنعيها عروس هي تضحك فرحانه عمرها صغير كلش تطلع بنت ١٤ سنه شفتها م ما ضل بيه حيل اكثر انتهيت بالبجي وانتبهت عليه وحده من النسوان واجتي ام رضا تريد تعرفني منو وبس تقربت عرفتني بيومها جرتني جر وشمرتني من الباب الوره مال البيت وسدته قوي عبالكم مشيت لو بعدت بقيت بكعدتي وره بيتهم قرفصت وارتجيت بالحايط لحد ما صارت زفته وصعدوه لغرفته واني ويه هوستهم عقلي شويه شويه يضيع مني مو بيدي الضعف ولا بيدي اتحمل ولا بيدي امشي بقيت كاعده وانحب بضهر هالبيت
بيومها من رجعت للبيت ابوي جنزني تجنز من الضرب لان طالعه من البيت وما يدري بيه وين واشوف حليمه تشمت وتتمضحك وراه
