اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
الدنيا فجر والجو حلو الحمد لله بعده موسم الحر ما اجانا والمطر توه تركنا..... دا افكر شلون انظم يومي وشنو المطلوب لازم اول شي احلب الهوايش ووراها افك عليهن حواليهن(العجول الصغيرة) حتى يرضعون شويه واخذهن للكاع وراها لازم احش الهن مال يومين لان شمستي عدها امتحان واروح اوصلها لباب مدرستها اروح فدوة لطولها بدت امتحاناتها للثالث متوسط واخاف ابوي يبطلها مثلنا
طلعت للحوش وشمس تركض وراي مفرعه بشعرها الذهب الطويل خفت لا ابوي يشوفها ويكصبها رجعت الها ركض فداء:شمس لج رجعي دخلي لا يفوت ابوي ويشوفج هيج والله حتى شعرج يظكه صفر امشي
شمس :فدوى حبيبتي الله عليج الله يخليج خليني اروح وياج اليوم للكاع اريد اتمشى الله يخليج فداء طكت روحي من القرايه وكعدة البيت من عطلت لليوم وانت ما تقبلين اطلع وياكم
فداء:لج روحي عاب حلكج والله لمصلحتج يخبله اني كاعد اشيل عنج الشغل حتى تقرين تراجعين للامتحان شتصخمين بعد رايحه هناك لو عاجبج يكتلج الحر والكراب
شمس:عيني فداء الله يخليج بروح امنا احلفج طاكه روحي من البيت
صفنت بوجهها شكد ملهوفة لطلعة الزرع والخضرة ما تدري لو مثلي هي كانت تتمنى لو تكدر بيوم تكعد بالبيت وتنسد بابها ويجيها كل شي ليمها بقلبي ادعيلها كون ما تعيش مثلنا ولا تشوف الشغل والكراب اللي اني كربته بعمرها بعدها صغيرة وحلوة حيل مدللتنا او بالاحرى مدللتي اني حبيبتي واخيتي وبنيتي عادتها ...ولان بالعرب ماكو بنيه تدلل ولا بنيه ايديها ناعمات الشغل ياكلنا واحنا شابات ضحكت بوجهها ما اكدر اكسر بخاطرها
فداء:روحي حبيبتي البسي حجاب وتلثمي وعبايه واخذج وياي بس مو مثل كل مره تكضيها تكمز وتخزيني تطلعين حسي
شمس:لا وداعة ابويه الحجي ما اسوي وكاحه ..اندارت غاد واسمعها ترطن ...عساس هو حسج نغم فيروزي لو ما صوتج جنه تركتر عاطل
ركضت وراها وهي انهزمت تضحك
فداء:بس الله اللي يستر منج لج مو اكول الج لا تحلفين بابونا جذب
شمس:هههه وليش هيج ببالج لا يلا ما احلف بعد بي لا جذب ولا صدك هههه
فاتت للبيت بدلت وطلعت واني كاعده انتظرها شلت المنجل وفتحت الباب للهوايش وطلعنا مره اضحك عليها شلون فرحانه مره انقهر على حالنا مره تسبقني مره تتعطل وكوه اجرها تلتهي باللعب دهر لما نوصل
